JESAYA 40
40
Nonkango dehuguvaro
1“Hengagwida vantu vange,”
yimo ana kutanta Karunga.
“Va hengagwida!
2Korangeda Vajerusarema.
Va tantera asi nare
va gusa kuhepa, makura nye.
Nonzo dawo vana di va
dongwenene po nye.
Na va pangura yimo pa mokuzura
morwanonzo dawo nadinye.”
3Ezwi kuna kuzigira asi:
“Wapekereni Hompa nzira mowiza!
Hetakanesereni Karunga gwetu
nzira momburundu!
4Nkenye edamenena va li fofere;
ano nkenye ndundu
nokandundu va yi nunupike.
Mapompwa ga hetakane,
mavega gomamanya ga yerakane.
5Uyerere waHompa ngava u horora,
ano yinamwenyo nayinye
kumwe ngayi u mona,
yeeyi kana kaHompa
yiko kana yi tanta.”
6Ezwi tali tanta asi: “Zigira mbudi!”
Ame tani pura asi:
“Mbudi musinke nani zigira?”
Zigira asi vantu navenye
kwa fana wayi;
kukaramwenyo kwawo
kapi kwa pitakana
kombya zomosanzara.
7Wayi kukukuta, mbya kurembuka,
nsene a tuma Hompa
mpepo zi yi pepere.
Vantu kapi va kora kupitakana wayi.
8Wayi kukukuta,
mbya kurembuka,
nye nonkango daKarunga gwetu
ngadi kara dogoro narunye.
9Jerusarema, ronda kondundu
zonde, o zuvhise mbudi zongwa!
Zigira unene, Siyoni,
zuvhisa mbudi zongwa!
Uyunga wa ha tjira.
Tantera yitata yaJuda asi
Karunga gwawo ta wiza!
10 Hompa Mupangeli ta wiza
a ya pangere nononkondo,
age nga pitura vantu
ava ga yoworora.
11Siunda sendi nga si lisa ngwendi musita.
Nga pongaika nonzwigona
mokuwoko kwendi
a di simbire ponturo zendi,
nodidi ta di sindangeda nombili.
Karunga gwaIsraeli ga hana kuheteka
12Pweli ogu gokuvhura kuheteka
efuta nokuwoko
ndi o heteke eguru
nomawoko goge ndi?
Pweli ogu gokuvhura kutura
uzuni monkinda
ndi o heteke nondundu kosiviha ndi?
13Kuvhura nye o tantere Hompa
eyi na rugana ndi?
Yilye gokuvhura kumuronga
ndi a mu pukurure?
14Yilye ogu a pura ko Hompa
mokuninkira asi a dive ndi a
kwate egano ndi asi a lirongere ko
omu ayi gendi yininke?
15KwaHompa nomuhoko
age nayimwe si,
kapi da pitakana eta lyomema;
yirudi yokoure kwa pepuka
ngwendi mbundu.
16Yikorama nayinye yomowiza
waLibanoni nokugwana si
mokuzambera kwaKarunga gwetu,
ano yitji yamo hena yisesu
unene mokuhwameka mundiro.
17Nomuhoko age kwendi nayimwe si.
18Karunga makura o mu heteke
nye nalye?
Nyovelye nye gokuvhura
kusingonona omu ga fana?
19Age kapi ga fana karunga
goyimpepa ogu va honga vantu,
ano vahambuli woyivera
yiyo va mu vambaika ngorodo
va mu ture metako lyosisiliveli.
20Mugara ogu ya limba kugwana
sisiliveli ndi ngorodo ta horowora
yitji eyi ayi dili kutukwa.
Ta papara nkurungu a honge
efano eli ngali dira kugwa.
21Kapi nye wa yi diva ndi?
Kapi nye va yi ku tantera
nakwanare ndi?
Kapi nye wa zuvha omu wa
tameka uzuni ndi?
22Age gogu ga hingira posipundi
sendi souhompa
keguru lyevhu nekesinya kwina
lyeguru yige ga yi sita;
vantu vepevhu kuvatara
ngwendi yimbumburugona.
Age kwa zanzumuna eguru
ngwendi ekehe,
ngwendi tenta zokukara vantu.
23Age kuganda vapangeli
wononkondo, ta va nunupike
va kare nayimwe si.
24Awo kwa fana yimenogona
eyi kava tapekere ntaantani
yipo dina kukwata nondandani.
Ano Hompa nsene a tuma mpepo,
tayi kukuta yi reruke ngwendi rungu.
25Nalye nye no vhura kumuheteka
Karunga gokupongoka?
Pweli nye gumwe ogu
ga mu fana ndi?
26Ko tara si keguru!
Yilye ga sita dina
nombungururu ono kumona?
Gumwe ogu a di pitisire
ngwendi gogu a pitisire
mbunga zovakwayita,
age ga diva asi dingapi da kara
age kuditumbura nadinye
komadina gado!
Nonkondo dendi nonene unene,
patupu eyi ya lisempuka po!
27Israeli, papi nye apa no sivanena asi
Hompa kapi ga diva udigu woge
ndi asi a dire kukupakera mbili
nsene asi to hepere mwangoso‐ngoso?
28Kapi nye wa yi diva?
Ndi kapi wa yi zuvha?
Hompa, Karunga gwanarunye;
yige ga sita uzuni mudima.
Age kapi a kurupa ndi a roroke.
Nagumwe si a kwata egano
yigazo yendi.
29Age kunkondopeka
varupirankondo ava va roroka.
30Nampili vadinkantu kupira nonkondo;
vadinkantu kupunduka tava gu.
31Nye ava ava huguvara
ekwafo lyaHompa
ngava gwana nonkondo donompe.
Awo ngava tukisa mavava
ngwendi makuvi;
ngava duka nye nokuroroka si;
ngava genda nye nokutwama si.
Currently Selected:
JESAYA 40: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
