JESAYA 39
39
Nontumi dokoBabironiya
(2 Vahompa 20:12-19)
1Posiruwo tupu sooso yipo ga ninkire hompa gwaBabironiya Merodoka‐Baradana zaBaradana, a tume mbilivhe nouhwi kwahompa Hisikiya, yeeyi kwa zuvhire asi gwina kwa verere yiyo ga veruka. 2Hisikiya kwa haferere nontumi, makura ta ka va likida nzugo zendi zougawo; sisiliveli nongorodo noyidumba nomagadi gondiro nonzugo zendi nazinye zoyirwiso neyi nayinye eyi ya kere momazimo gonzugo zendi zougawo. Nayimwe si eyi ya hupire ko membo lyendi ndi mosirongo sendi, eyi ga dilire kuvalikida. 3Muporofete Jesaya makura ta zi kwahompa Hisikiya, ta mu pura asi: “Owo vagara yinke vana ya tanta, navene kupi vana tundu?”
Hisikiya ta limburura asi: “Kuna tundu kosirongo saure koBabironiya.”
4Muporofete Jesaya ta pura hena asi: “Yinke eyi vana mono mo mombara zoge?”
Gwina ta limburura asi: “Awo kuna mono nayinye eyi ya kara mombara zange neyi ya kara momazimo gononzugo dange dougawo. Nasimwe si esi na dilire kuvalikida.”
5Jesaya makura ta tantere hompa asi: “Hompa Munankondo nadinye kuna kuuyunga asi, 6ruveze ngaru sika mo asi nayinye eyi ya kara mombara zoge neyi va pongaika onyokokuru dogoro naina, ngava yi twara koBabironiya. Nakamwe si ngaka hupa mo. 7Ano povana wovagara wokureta nyaamoge, ngava gusa po vamwe, ngava ka kare varombe mombara zahompa gwaBabironiya.”
8Hompa Hisikiya ta yi kwata egano eyi asi posiruwo sendi ngapa kara mpora negameno, makura ta limburura asi: “Mbudi ezi ono tantere nge zakwaHompa, ngwa.”
Currently Selected:
JESAYA 39: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
