JESAYA 17

Karunga nga futisa Siliya naIsraeli

1 Hompa ta tanta asi: “Damasikusi kapi ngasi kara hena sitata; ngasi kara tupu nondambo domakuma aga ga teka po. 2Yitata yaSiliya ngayi kara mapuku dogoro narunye. Ngayi kara mauliro gononzwi nonongombe, nye nagumwe si ogu nga di tjida mo. 3Israeli kapi nga kara nepopero, ano Damasikusi nga zumbanesa emanguruko lyendi. Vasiliya ava ngava hupa po ngava zumbanesa efumano lyawo ngwendi Vaisraeli. Ame Hompa munankondo nadinye nyame na yi tanta.”

4 Hompa ta tanta asi: “Ezuva ngali wiza apa ngau haga po unene waIsraeli, ano emona lyendi ngali lisitunuka ruhepo. 5Israeli ngali kara epya eli va teza, nga kara mawoko‐woko ngwendi epya momuramba gwaRefayimu nsene vana li pupura nuunu. 6Vantu wovasesu tupu ngava hupa po, ano Israeli nga fana sitji souzwe esi sa pwa kunyanga nonzwe di hupe ko mbali ndi ntatu tupu kondaga‐ndaga ndi dingapi tupu konomutayi depevhu. Ame, Hompa Karunga gwaIsraeli, nyame na yi tanta.”

7Ezuva olyo apa ngali sika mo, vantu ngava tengwira kekwafo lyoMuungi gwawo, Karunga gokupongoka gwaIsraeli. 8Kapi hena ngava tara moyizambero eyi va rugana vene, ndi asi va huguvare moyirugana yomawoko gavene — mafano gakarunga gomukadi Asera noyizambero yokuswakererera yedumba lyewa.

9Ezuva olyo apa ngali sika mo, yitata eyi ya pama ngava yi zumba tayi kara mapuku, ngwendi yitata eyi va zumbire Vahevhi noVaamoli apa va dukire Vaisraeli.

10Israeli, ove kwa divara Karunga ogu ga ku yoworora yiyo ga ku popera ngemanya lyononkondo. Makura yiyo wa tapeka yikunino yokupongoka asi o tongamene karunga peke. 11Nye nampili yi kure tayi temuna nombya ngurangura zoozo ono kuyitapeka, kapi ngayi paka muzangu. Udigu welike ngau kara po nokukora kwa hana kupwa.

Nomuhoko dononkore tava di fundu

12Nomuhoko dononkondo kuna piyagana, ezwi lyado ngwendi endundumo lyefuta, ngwendi sindundumo somankumpi gomanene. 13Nomuhoko ngadi genderera kuza komeho ngwendi mankumpi gana kuyerauka, nye Karunga ta va tugumukire tava tengura simboda, va duke va ze moomu azi tuka mbundu konondundu, ngwendi wayi ana kurerura kakunguru. 14Ngurova awo kureta yihuna, nye ngurangura awo tava pili po. Oso yiso sigwana sankenye ogu a hakana sirongo setu.

Currently Selected:

JESAYA 17: KWN

Highlight

Compare

Copy