JESAYA 18
18
Karunga nga futisa Sudani
1Kesinya kwina lyonomukuro daSudani kwa kara sirongo asi zuvhika nomuhagaro domavava. 2Vakarelipo woyirongo kuna kuwogera moNili momawato aga va rugana gonombu. Tengureni kweni, one nontumi dokugenderera! Twareni mbudi kosirongo seni esi da gaununa nomukuro, komuhoko gweni ogu gwa pama gononkondo, kovantu veni wovare woyipapa yoyiwa, ava wa tjira uzuni mudima.
3Namuvenye ava mwa kara pevhu, purakeneni! Tareni kosidiviso serembe eli nava zerura kondungu zondundu! Purakeneni mbendogona nsene tava zi siki! 4Hompa kwa tantera nge asi: “Ame kuna hara ni mwene pore zange ni tare pevhu meguru lyange, moomu ali kara po eundu moupyu womasiku posiruwo sokuteza‐teza, ngwendi moomu ali hwike ezuva moupyu womutenya. 5Ago mandjembere nokuganyanga si, nombya nadinye dina kukumuka, ano mandjembere gana pi, nonkore yipo ngadi hanagura Vasudani noureru, moomu azi tete mbere nomutayi kosindjembere. 6Yimpu yovakwayita vawo ngava yi zumbira yidira noyikasama. Pokurombo yidira yiyo ngayi paruka, ano pokufu yikasama.”
7Siruwo tasi wiza apa nga tambura Hompa Munankondo nadinye nonzambo kosirongo esi da gaununa nomukuro, muhoko gwa pama gononkondo, vantu ava wovare woyipapa yoyiwa, ava wa tjira uzuni mudima. Awo ngava wiza kondundu zaSiyoni oku ava tongamenene Hompa Munankondo nadinye.
Currently Selected:
JESAYA 18: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
