JESAYA 16
16
Mowaba tayi mu yipire
1Vantu womoMowaba kwa tumine nzwigona kogu nga pangere mositata saJerusarema ngouhwi, u tunde mositata saSera momburundu. 2Awo kwa ndindilire konontere domukuro gwaArunoni nokugendagura, va za va tengura va hana sitambo songandi ngwendi yidira eyi vana kutukisa poyikorogo yayo.
3Awo kwa tanterere vantu womoJuda asi: “Tu tantereni omu natu rugana. Tu gameneni, ngwendi sitji sina kugava mundwire posiruwo soupyu sokositenguko. Tu sigeni tu pwizumuke momundwire gweni. Ose vanayirongo, tu horekeni oku nava dira kutugwana vantu. 4Tu sigeni tu tunge mosirongo seni. Tu popereni kwava vana hara kutuharaganesa po.”
(Ehepeko nehanauko ngayi haga po, nava vana kuhanagura sirongo nawo ngava haga po. 5Gumwe ponontekuru daNdafita nga kara Hompa, age nga pangera mbunga noulimburukwi neharo. Age nga genderera kurugana youhunga, ta tara asi uhungami tava u rugana.)
6Vantu womoJuda tava tanta asi: “Twa zuvha omu ava linenepeke Vamowaba. Twa diva asi awo kwa litumba nokulinenepeka, nye malinenepeko gawo gomawoko‐woko.”
7Vamowaba ngava lira morwa maudigu aga ngaga va gwana. Navenye ngava lira morwanondya donongwa edi ngava li mositata saKire‐Heresi. Awo ngali va zumbana ehuguvaro. 8Nofarama dopopepi naHesiboni noyikunino yoyindjembere yaSibuma yina hanauka po — yikunino yoyindjembere yovhinyu ezi ngazi korwesa vapangeli wonomuhoko. Posiruwo simwe vhinyu kwa lihanene dogoro kositata saJasera, korwaUpumezuva dogoro komburundu, koUtokero dogoro mesinya mwina lyEfuta lyoKufa. 9Ntaantani ame tani lilire vhinyu zaSibuma moomu na lililire Jasera. Mahodi gange taga gu morwaHesiboni naEliyare, morwa mutupu muzangu gokuhafesa vantu. 10Nagumwe si ogu ana kuhafa hena momapya gomawa. Kutupu ogu ana kulilikida ndi a dimbe moyikunino yoyindjembere. Nagumwe si gokukama mandjembere ga kare vhinyu; nkugo zoruhafo zina mwena nye. 11Ame kuna kukema momudona morwaMowaba, kuna kara neguwo morwaKire‐Heresi. 12Vamowaba kuna kulirorora vene mokuza konondundu dawo dokuzambera nokonontembeli dawo va ka kanderere, nye nayimwe si ngayi va kwafa.
13Mbudi zaHompa ezi ga gava nare zokuhamena Mowaba zezi. 14Ano ntaantani Hompa ta tanta asi: “Monomvhura ntatu ugawo wounzi waMowaba ngau dongonoka. Vantu vendi wovanzi, wovasesu tupu ngava hupa po, nye awo ngava pira nonkondo.”
Currently Selected:
JESAYA 16: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
