Vagaratiya 3

Veta ndi epuro

1Nane vakwetu one Vagarata kougova! Ogu ga mu suragura yilye, vantu one va fanekera Jesus Kristusa va pamparere kosilivindakano komeho zeni? 2Tani mu pura ko eyi asi: nani one Mpepo one kwa zi gwanena mokusikisa mo eyi za tanta Veta, ndi mokuzuvha nomokupura Mbudi zoNgwa? 3Ugova weni musinke owo? Vantu mwa tamekera ukaro woupe moMpepo, kuna hara nye kukauhulisira mwaamweni ndi? 4One kwa hepa momudona, nani nye mawoko‐woko? Nsene asi sili yomawoko‐woko ya kere! 5Apa a mu pe Karunga Mpepo zendi, a rugane yitetu mokatji keni, kuyiruganena mokonda zokusikisa mo one eyi za tanta Veta ndi, ndi mokonda zokuzuvha oku tomu pura Mbudi zaKristusa?

6Moomu ga tanta matjangwa asi, “Abirahamu kwa pulire Karunga, makura epuro lyendi tava li mu varwire uhungami.” Napaapa si yimo. 7Apa yipo nomu yi divira asi, ava va kara nepuro, yiwo ruvharo rwene‐rwene rwaAbirahamu. 8Matjangwa ga yi yowora eyi asi, Karunga nga hungamekesa vapagani kepuro, age yiyo ga udisira nare Abirahamu Mbudi zoNgwa asi, “Moge yimo nga tungikira Karunga vantu navenye.” 9Abirahamu kwa mu tungikilire morwepuro; nava va pura navenye, nawo yimo ngava va tungika ngorooro.

10Ava va korera kweyi yokusikisa mo Veta, kwa va fingilira. Yeeyi matjangwa kwa tanta asi, “Ogu a dili kusikisa mo nkenye aka va tjanga moBuke zoVeta, kwa mu fingilira.” 11Eyi ya zera asi, kutupu ogu ga hungama kwaKarunga morwaVeta, yeeyi matjangwa kutanta asi, “Muntu ogu ali hungameke epuro kosipara saKarunga, yige a kara nomwenyo.” 12Nye Veta kapi za tara mepuro. Matjangwa kutanta asi, “Muntu ogu a sikisa mo nkenye aka za tanta Veta, yiyo ngayi mu pesa mwenyo.”

13Kristusa ga tu zowora mo mefingiliro eli azi reta Veta, pokutuzira mo mefingiliro mwene. Yeeyi kwa tjanga asi, “Nkenye ogu ava zenzereke kositji, kwa mu fingilira.” 14Kristusa kwa yi ruganena eyi, asi etungiko eli ga tumbwidira Karunga Abirahamu, ngava li gwane hena vapagani morwaJesus Kristusa, ano nose makura ngatu gwanene mo mepuro Mpepo ezi ga tu tumbwidira Karunga.

Veta netumbwidiro

15Vakwetu, tani ruganesa apa sihonena seyi mwa diva: nsene va lizuvha vantu vavali, nye tava paka po egwanekero, nagumwe si hena gokuzungurura egwanekero olyo, ndi asi a gwederere ko hena yapeke. 16Abirahamu Karunga kwa mu tumbwidilire asi, ‘Kohonde zoge.’ Kapi ga mu tantere asi, ‘Konohonde doge,’ ngwendi gogu asi vanzi ana tamba, nye gumwe tupu ga tembe pokutanta asi, ‘Kohonde zoge,’ kuninka asi, Kristusa. 17Eyi na gazara yeyi asi, Karunga kwa tulire po egwanekero, ta tanta asi, kapi nga li zungurura. Ano Veta ezi za ya wiza moruhura, konyima zonomvhura mafere gane nonomvhura nomurongo ntatu, nokuvhura si zi zungurure egwanekero, ndi zi dimise matumbwidiro gaKarunga. 18Ano nsene asi upingwa ou a gava Karunga moVeta au tundu, nani komatumbwidiro kapi hena wa hama ko. Nye Karunga kwa u pererere Abirahamu, morwa ga u mu tumbwidilire.

19Veta nani yinke eyi va zi gavererere? Kwa zi gwedererere ko, zi horore maunzoni, dogoro noku za wiza honde zaAbirahamu ezi ga tente Karunga. Veta vaengeli va zi hegumwisire, zi gendere mogu gopokatji, Mosesa. 20Nye gopokatji nokumuhepa si, ntene asi gumwe tupu po; ano Karunga gumwe tupu.

Sitambo soVeta

21Azo Veta kwa lilimba nye nomatumbwidiro gaKarunga ndi? Hawe, nampili kuna zi manga! Ngano asi Veta kwa zi gaverere asi yizo zokupa vantu mwenyo, ngano vantu Veta yizo azi va hungameke. 22Nye matjangwa kwa tanta asi, uzuni naunye kwa kara mepangero lyononzo. Ano ava vana kupura, kugwana uhwi ou ga tumbwidira Karunga mokupura Jesus Kristusa.

23Nye apa sa dilire kusika mo siruwo sepuro, Veta tanko yizo za tu peke modorongo, dogoro noku va li horwere epuro eli. 24Veta yizo za kere mupisuli gwetu dogoro noku ga wizire Kristusa, a ya tu hungamekese kepuro. 25Ano nye apa sa sika mo siruwo sepuro, kapi hena tuna hepa mupisuli.

26One namuvenye mu vana vaKarunga mokupura Jesus Kristusa. 27Namuvenye one ava va kuhwira mwaKristusa, Kristusa nye mwa dwara. 28Patupu malitondororo hena asi ogu Mujuda, ogu Mugereka, ndi asi ogu mupika, ogu ga manguruka, ndi asi ogu mugara ogu mukadi. Yeeyi one namuvenye kwa kara gumwe tupu mwaJesus Kristusa. 29Nsene asi kwaKristusa mwa hama, nyone nye honde zaAbirahamu, novapingi mokuliza nomatumbwidiro gaKarunga.

Currently Selected:

Vagaratiya 3: KWN

Highlight

Copy