Vagaratiya 2

Paurusa novapositoli vakwawo

1Pwa pita nomvhura murongo nane, makura tatu tengwire koJerusarema kumwe naBaranabasa, naTitusa nage tani mu pitura. 2Ame kwa zililire ko, morwa Karunga yige ga yi horwerere nge asi ni ze ko. Mokagongi kovapitisili wombungakriste yimo na va fwatwililire Mbudi zoNgwa ezi ani udisire vapagani. Kapi na here asi yirugana yange yanare neyi yokomeho ngayi ze momema. 3NaTitusa si ogu twa kere nendi, kapi va mu sininikire asi va mu rugane yovamba, nampili ngomu ga kere Mugereka. 4Nye valininkisi vamwe kwa livakerere mokatji ketu va ya tare katarerera emanguruko lyetu eli twa kara nalyo mwaJesus Kristusa, makura va tu pirure upika. 5Ose kapi twa ligava nampili nakauke, yeeyi ose kwa here tu mu poperere usili woMbudi zoNgwa.

6Ava va limona upitisili — nkenye omu va fanena ame nombili si — yeeyi Karunga kapi a pangura a tare tanko ekuto lyomuntu. Owo vapitisili kapi hena va gwederera nge ko yapeke, 7morwa va mona asi Karunga kwa pa nge yirugana yokuudisira Mbudi zoNgwa vapagani ava va dira kurugana yovamba, moomu ga pa Peturusa yirugana yokuudisira Mbudi zoNgwa Vajuda. 8Yeeyi Karunga ogu ga tura Peturusa a kare mupositoli goVajuda ava va rugana yovamba, yige hena ga tura nge name ni kare mupositoli govapagani ava va dira kurugana yovamba. 9OJakopo naPeturusa naJohanesa, ava asi yiwo vapitisili, kwa dimbwilire asi Karunga ga si pa nge sirugana esi; makura tava limorora nomawoko naBaranabasa name, si kare sidiviso somalizuvho goyirugana, asi ose tu ze kovapagani, makura awo va ze koVajuda. 10Eyi va ka tu tanterere ko, yokutara nohepwe eho, name hena yiyo na korera nye oyo kurugana.

Paurusa ta nyokere Peturusa moAntiyokiya

11Apa ga wizire Peturusa moAntiyokiya, ame kwa mu vyukire moyitarameho, yeeyi epuko lyendi kwa monekere nawa‐nawa. 12Yeeyi nare nga li novakriste wokutunda moupagani, ano eyi ga mona ava va tundire kwaJakopo vana wiza, makura ta ligusa mo, yeeyi age kwa tjilire ava va here kurugana yovamba vapagani. 13Vakriste woVajuda vamwe nawo kwa mu honenene mokulininkisa, naBaranabasa googu nage ta yombere mo mokulininkisa kwawo. 14Ano ame eyi na mona asi yikara yawo kapi yina kuliza nousili woMbudi zoNgwa, makura tani tantere Peturusa moyitarameho yanavenye asi, “Ove no o Mujuda, yiyo wa kara ngwendi mupagani, kapisi ngwendi Mujuda. Omu no sininika hena vapagani asi va kare ngwendi Vajuda ngapi?”

Vajuda novapagani epuro yilyo lyokuvaparura

15Hawe, ose tu Vajuda womvharerwa, kapisi vapagani wononzo. 16Nye twa diva asi muntu, Karunga yige a mu hungamekesa kepuro lyokupura Jesus Kristusa, kapisi morwakusikisa mo eyi za tanta Veta. Nose si kwa pulira Jesus Kristusa asi Karunga a tu hungamekesa kepuro lyokupura Kristusa, kapisi mokurugana eyi za tanta Veta. Yeeyi nagumwe si ogu a hungamekere Karunga pokusikisa mo eyi za tanta Veta. 17Ano nsene ose tuna kukondja asi va tu hungamekere mwaKristusa, nyose hena vana kumona unzoni ngwendi vapagani, makura Kristusa yige nye a panda po nonzo ndi? Nampili kuna manga! 18Yeeyi nsene ni vareka kutungurura eyi na zungwilire, tani limonekesa asi ame ni munzoni nawa‐nawa. 19Kombinga zoVeta ame na fa koVeta zene za dipaga nge asi ni kerere nomwenyo Karunga. Ame kwa fa kumwe naKristusa kosilivindakano. 20Kapisi nyame hena na kara nomwenyo, nye Kristusa yige ana kara nomwenyo mwange. Ano mwenyo ogu na kara nago morutu oru, kuna kerere nago mokupura MunwaKarunga, ogu ga hara nge, yiyo ga gavera nge mwenyo gwendi panzambo. 21Ame nokuswaura si nkenda zaKarunga. Yeeyi nsene asi muntu kumuhungamekesa kesikisomo lyoVeta, kuninka asi ntudi Kristusa nayimwe si eyi ga fira no.

Currently Selected:

Vagaratiya 2: KWN

Highlight

Copy