2 Timoteusa 1
1
Ekundo
1Mbilive ezi kuna kutunda kwaPaurusa, ogu ga panga Karunga asi ni kare mupositoli gwaJesus Kristusa, ni udise mwenyo ogu va tu tumbwidira momalikwatakano naJesus Kristusa. 2Tani ku tjangere ove, Timoteusa, munwange ogu na hara: Karunga Guhyetu naHompa gwetu Jesus Kristusa va ku fire nkenda oku tava ku zaverere oku tava ku pe mbili.
Epanduro nekorangedo
3Tani pandura Karunga ogu ani kerere nezwi lyewa lyomomutjima, moomu ngava yi rugana omama. Ame kupandura Karunga pokukudiworoka nkenye apa momakanderero gange, masiku nomutenya. 4Nsene mahodi goge na diworoka, ame kuhara unene asi ni ku mone, makura ni gwane ehafo lyenene. 5Ame kudiworoka epuro lyosili eli wa kara nalyo, epuro eli va kere nalyo onyokokuru Roise nonyoko Eunike. Ame na yi diva nawa‐nawa asi nove kolili. 6Morwayininke yangesi yiyo nina kukudiworokesa asi o hwamenene uhwi wonkenda ou ga ku pera Karunga pokukukambeka ame mawoko gange. 7Yeeyi Karunga kapi ga tu pa mpepo zowoma, nani nye kwa tu pa mpepo zononkondo nezi zeharo nezi zokulipangera.
8Walye o fu nomuga mokusanseka Hompa, ndi mwarwange ame, nkwate zendi. Nye tu hepereni kumwe Mbudi zoNgwa kononkondo edi a tu pe Karunga. 9Karunga kwa tu parura, yiyo ga tu zigida tu kare muhoko gwendi. Kapi ga tu zigidira morwewapo lyoyirugana yetu, nani morwamagazaro gamwene noufenkenda wendi. Ufenkenda ou kwa u tu pera mwaJesus Kristusa, awo uzuni simpe patupu. 10Awo kwa u tu horwera pehoroko lyaMuzowoli gwetu Jesus Kristusa. Kristusa yige ga mana po nonkondo donomfa, makura ga retera muntu mwenyo gokudira kuzonauka moMbudi zoNgwa.
11Karunga kwa tulira nge mouudisi nomoupositoli nomourongi, asi ni udise Mbudi zoNgwa. 12Azo yizo nina kuhepera ngesi. Nye ame nokufa si nomuga, yeeyi na mu diva ogu na pura. Ame hena na diva asi, age ga kara nononkondo dokukara nosinka seyi ya tumbukira nge dogoro kEzuva lyewizo lyaJesus Kristusa. 13O kwame sihonena sononkango donongwa edi wa zuvha kwange, ove o kwaterere kepuro nekeharo eli twa kara nalyo momalikwatakano naJesus Kristusa. 14Yininke yoyiwa eyi ya ku tumbukira, yi pungwisa koMpepo zoKupongoka ezi za kara mwetu.
15Wa diva asi, navenye ava va tunga mosirongo saAsiya, va zumba nge, oFigerusi naHeremogenesi nawo ngosikwawo. 16Hompa ngano ta fire nkenda embo lyaOnesiforusi, yeeyi age nga hengagwida nge rorunzi. Age kapi nga fu nomuga asi modorongo na kara, 17napa ga wizire moRoma, kwa paparere nge nomupampi dogoro ta gwana nge. 18Hompa ngano ta mu ninki, nga gwane nkenda kwendi mezuva olyo! Amesi wa diva nawa‐nawa omu nga kwafa nge unene moEfeso.
Currently Selected:
2 Timoteusa 1: KWN
Highlight
Share
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
