1 Timoteusa 6
6
Yovapika
1Vapika navenye ava fumadeke ohekurwawo, asi va dire kuswawisa edina lyaKarunga nerongo lyetu. 2Vapika ava va kara nohekurwawo wovapuli, walye ava va dini asi morwa vana kara vakwaawo. Nye awo ava va ruganene nye unene, yeeyi ohekurwawo ava ava kwafa, vapuli, awo kwa va hara.
Erongo lyemepuko nemonazuni
O ronge yininke eyi oku to yi va korangedere. 3Nsene pa kara ogu ana kuronga namopeke, ga hana kuliza nononkango dosili daHompa gwetu Jesus Kristusa nerongo lya hamena kwaKarunga, 4gwangoso mulinenepeki, age nayimwe si ga diva. Nye age kwa dowokera yoyidona, ngwendi nompata nomalitatagano gokuhamena nonkango, omu amu tundilire mfudu nonompata nomarundiro nonkoko, 5nonomutangu da hana sikwafo. Vantu ava nondunge dawo kwa zonauka, ano usili nare wa va diruka. Awo kugazara asi moukerelikarunga yimo mokugwanena emona. (Ligusa mo movantu vangoso!)
6Nhi, ukwakarunga kugawopeka sili muntu, ntene a litara asi, eyi ga weka yina mu gwanene. 7Mouzuni kapi twa reta mo yuma, ose hena kapi ngatu pitura mo yuma. 8Ano ntene tuna kara nonondya nomudwaro, ngano yi tu gwanene makura. 9Nye ava va hara kugawopa, kuza momaheteko nomoyiraha yomadowo gomanzi gougova gokuretesa ehudi lyenzi. Ago hena kukoreka vantu moupongo nemezonauko. 10Ano edowo lyokudowokera emona, yilyo ntundiliro zomaudona nagenye. Nye vamwe eyi va li dowokera, yiyo lina va gusa mo mepuro, makura vana lizweke nye momaruhodi gomanzi.
Timoteusa tava mu korangeda
11Ano ove ko, muntu gwaKarunga, likara ure noyininke oyo nayinye, o kondjere uhungami netjirokarunga nepuro neharo nedidimiko nouwa womutjima.
12Lirombera elirombero lyewa lyepuro, asi o gwane mwenyo gwanarunye. Yeeyi yigo va ku zigidira, apa wa tongwenene nawa epuro lyoge komeho zonondipo dononzi. 13Kosipara saKarunga, ogu a gava mwenyo kwanayinye, nakwaJesus Kristusa, ogu ga gavere undipo wouwa kosipara saPontiusi Piratusa, nina kukutanterera asi: 14O limburukwe kompangera ezi, to zi sikisa mo nawa‐nawa wa hana epuko dogoro nekezuva eli nga horoka Hompa gwetu Jesus Kristusa. 15Ogu nga mu horora posiruwo sendi, Karunga gefumano, Mupangeli thi gwanayinye, Hompa gohompa noHamba gonohamba. 16Karunga gelike thi a dili kufa. Age kwa kara mouzera wa ha si kuvhura kuhedera muntu. Nagumwe si ga mu mona rumwe, age hena nagumwe si gokuvhura kumumona. Age ava mu fumadeke, age a pangere narunye‐narunye. Amen.
17O korangede vanangawo woyininke yomouzuni ou asi walye ava linenepeke ndi asi va ture nomutjima dawo memona eli lya hana mutompo, nye ava huguvare Karunga ogu a tu pe yininke yoyinzi yokutuhafesa. 18O va korangede ava rugane yoyiwa, va gawope moyirugana yoyiwa, va kare ugavi wokupa ko vakwaawo. 19Omu mwangesi tava lipungwire emonazuni, li kare etateko lyewa lyeyi yokomeho, nkumwe ngava gwane po mwenyo gwanarunye gosili.
20Timoteusa, o takamese eyi va ku huguvarera. O likare ure noyiuyunga yokunyata ya hana mulyo nonompata dougova ou ava tumbura vamwe mepuko asi awo nondunge po. 21Vamwe va u tambura, makura yiyo wa va zumbanesesa epuro.
Karunga a mu fire nkenda namuvenye! Amen.
Currently Selected:
1 Timoteusa 6: KWN
Highlight
Share
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
