2 Timoteusa 2

Mukwayita gomuwa gwaJesus Kristusa

1Ano ove munwange, nkondopa konkenda ezi atu gwana momalikwatakano naJesus Kristusa. 2Nonkango edi wa zuvha kwange ado nondipo dononzi kuna kutara, di gava kovagara wokuvhura kuhuguvara, nawo ngava vhure hena kudironga vakwaawo.

3O kare mudidimiki momaudigu, moomu a kara mo mukwayita gomuwa gwaJesus Kristusa. 4Mukwayita moyirugana yendi kwa hara a hafese mupitisili gwendi, kapisi a liture hena mweyi yokuparura rutu. 5Ogu a duka moudano wokulirombera, kapi a gwana nkata zefundo, nsene a dina noveta edi da kara po. 6Ndimi ezi azi rugana unene, yizo azi howo kulihunga nombuto. 7O gazare nayinye eyi nina kukutantera, makura Hompa ngano ta ku pe nondunge dokukwata egano yininke nayinye.

8Diworoka asi, Jesus Kristusa gemezimo lyaNdafita, Karunga kwa mu vhumbura koufe, moomu za tanta Mbudi zoNgwa ezi ani udisa. 9Ame kuhepera morwaMbudi zoNgwa ezi ani udisa, kupandeka nge ngwendi munamahaka. Nye nonkango daKarunga kapi ava di pandeke. 10Ame yiyo ani didimikire mwanayinye eyi morwavahoroworwa vaKarunga, asi nawo ngava gwane eparu mwaJesus Kristusa, kumwe nouyerere wanarunye. 11Nonkango edi dosili asi:

“Nsene twa fa kumwe nendi,

ngatu ka kara hena nomwenyo kumwe nendi.

12Nsene tu didimika ngorooro,

ngatu ka pangera kumwe nendi.

Nye nsene tu mu patana,

nage nga tu patana.

13Ose nampili tu dire kulimburukwa kwendi,

age kukara ngorooro mulimburukwi,

yeeyi age nokuvhura si kulikumbagera mwene.”

Murugani gokulimburukwa

14O diworokese mbunga zoge, to va korangeda kosipara saKarunga asi, walye ava litatagana morwanonkango, yeeyi malitatagano gangoso kutupu sikwafo, ago kupukisa tupu vapurakeni. 15Kondja o moneke kwaKarunga asi ove murugani gokulimburukwa, ogu a dili kufa nomuga sirugana sendi, ogu a toona nawa nonkango daKarunga dousili. 16Livageka nonzogera donondona doyikavauka, yeeyi ado kutwara vantu ure naKarunga. 17Ano nonkango dawo kulya vapurakeni vado ngwendi sironda sokuhanza. Vamwe po vangesi oHimeneusa naFiretusa. 18Awo va tunda mo mweyi yosili, yeeyi awo kutanta asi, evhumbuko lyokoufe nare lya pita. Makura yiyo va zumbisisa vamwe epuro lyawo. 19Nye etateko lyaKarunga lya kora. Amo kwa tjangera mo nonkango edi asi, “Hompa ga diva ava vendi mo,” hena asi, “Nkenye ogu a tumbura edina lyaHompa, a sige kurugana yoyidona.”

20Membo lyenene kapi amu kara yipako yongorodo neyi yosisiliveli tupu yelike, nye amo kukara mo hena neyi yositji neyi yerova. Eyi yomutompo kuyiruganesa pomazuva goyipito, ano eyi ya hana mutompo kuyiruganesa pomazuva‐zuva. 21Nsene pa kara nye ogu ana kulikuhura kwanayinye eyi yoyidona, age kukara nye sipako somutompo sa pongoka sokuruganesa Hompa, sa wapera kuruganesa nkenye sirugana sosiwa. 22Tjwayuka madowo gosiudinkantu, ove o kondjere po uhungami nepuro neharo nombili kumwe nava ava kugu Hompa nomutjima gomuzera. 23Nyoka nompata dougova da hana nondunge, yeeyi wa diva asi, ado kureta mutangu. 24Mukereli gwaHompa kapi a kara nonompata. A kare nombili kovantu navenye, age hena a dive kuronga oku ta lidimikire yoyidona. 25A pukurure nombili vakondjesi vendi, nani mpange Karunga kuvhura a va tezwilise va dive usili, 26va pweke mo mosiraha saSatana, ogu ga va kwatere asi ava rugane eyi ga hara.

Currently Selected:

2 Timoteusa 2: KWN

Highlight

Copy