1 Timoteusa 5
5
Erero lyovapuli peke‐peke
1Mugara gokukurupa nokumutugumukira si unene, nye o mu korangede ngwendi oguho. Ava vasesu mo o va rugane ngwendi vamumbya woge. 2Vakadi wokukurupa o va rugane ngwendi onyoko, ano ava wovasesu mo ngwendi vampanza woge, moukuhuki naunye.
3O fumadeke ava va fisa vaya vawo, ava va fisa sili‐sili. 4Mufisayendi nsene ga kara novana vendi nonontekuru dendi, va lironge tanko kurera mambo gawo, makura va rugwide kuwoko vakurona vawo, yeeyi eyi yiwa, yiyo ga hara po Karunga. 5Ano mufisayendi mwene‐mwene, ogu ga pira ogu gokumupakera mbili, a huguvare mwaKarunga, ta kanderere oku ta hundire masiku nomutenya asi a mu kwafe. 6Nye mufisayendi ogu ga litura moruhonda, nare ga fa, nampili nomwenyo ana kara. 7Yininke eyi yi va tantera, ntani va pira usima. 8Muntu ogu a dili kupakera mbili ekoro lyendi, unene vava vembo lyendi, ogo epuro ana patana, ano udona wendi wa ka pita, wogu ga dira kupura hasa.
9Momalikwamo kutjangera mo mufisayendi ogu ga sika konomumvho nomurongo ntano‐nazimwe, nye googu ga kere nomugara gumwe tupu. 10Age hena a kare noundipo woyirugana yoyiwa yokurera nawa vana vendi nokuyeta nawa vagenda nokukuhwa nompadi dovapongoki nokukwafa ava vana kara moudigu nokulihameka koyirugana yoyiwa nayinye.
11Vafisavaya vawo wovanona nokuvatura mo si momalikwamo, yeeyi kaharu kawo taka va hamesere kononkwara, makura tava zumbu Kristusa. 12Awo makura tava zi mepanguro, morwa va zona etumbwidiro lyawo lyomuhowo. 13Awo tava gendagura nye tunda embo zende embo, tava lirongo udwa. Nye kapisi udwa welike vana kulironga, nani nye noyikavauka nokulitura mononkango da hana si dawo, yeeyi tava uyunga eyi ya dira kuzira mo. 14Ano ame kuna hara asi, vafisavaya vawo wovanona va va kware va rete vana, ava rere mambo gawo, awo va ha pa nonkore detu evega lyokutuuyunga momudona. 15Yeeyi vafisavaya vawo vamwe nare va puka, yiyo vana kukwama Satana. 16Mupuli ntene ana kara novafisavaya vawo ndi vakadi vawo mekoro lyendi, a va kwafe, asi mbungakriste zi dire kumona udigu, azo ngano zi kwafe ko nye vafisavaya vawo ava va pira vakwafi.
17Vakurona wombungakriste ava ava zi pitisire nawa, ava va fumadeke unene, unene vava ava rugana unene mokuudisa nomokuronga. 18Yeeyi matjangwa kwa tanta asi, “Hove zina kuhwaga nombuto, nokuzimanga si kokana,” hena asi, “Murugani ga fira kumupa mfeto zendi.” 19Nokupura si yokupa usima mukurona gombungakriste, ntudi nondipo mbali ndi ntatu dina kara po ntani. 20Ava vana kuzona, kuvatugumukira, azo mbungakriste kuna kutara, vakwawo ntani va yi tjira.
21Ame tani ku ganesa kosipara saKarunga nesi saJesus Kristusa novaengeli ava va horowora, asi o sikise mo nompangera edi nadinye wa hana matangano, ndi asi o gende muntu konhi. 22Nokugenderera si kukambeka muntu mawoko, o mu pongwere mosirugana saHompa. Ove hena walye o litura mononzo dovantu, nye ove kara ono kuhuka.
23Walye o nu mema gelike, nye o makere hena nakauke vhinyu morwezimo lyoge eli lya ha pu kukora‐kora.
24Nonzo dovantu vamwe kwa kara poruzera, ado kuvapitira komeho mepanguro, ano davamwe kuvakwama monyima. 25Yirugana yoyiwa nayo ngosikwawo kuhoroka poruzera, neyi ya dira kuhoroka poruzera, nokuvhura si kuyihoreka.
Currently Selected:
1 Timoteusa 5: KWN
Highlight
Share
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
