اوّلِ پِترُس 1

فصلِ اوّل

دُعا و سلام

1 از طرفِ پِترُس، رسُولِ عیسیٰ مسیح، بَلدِه مُسافِرای که دَ منطقه های پُنطُس، غلاتیه، کَپَدوکیه، آسیا#۱‏:۱ بَلدِه معلُومات دَ بارِه آسیا دَ فهرِستِ لُغات رُجوع کُنِید. و بِطِینیه تِیت‌پَرَک شُده، 2بَلدِه کسای که دَ وسِیلِه شِناختِ اَزَلی آتِه مو خُدا اِنتِخاب شُد و روحِ شی اُونا ره تقدِیس کد تا اِطاعَت کُنه و خُونِ عیسیٰ مسیح دَ بَلِه ازوا پاش دَده شُنه:#خرُوج ۲۹‏:۲۱؛ لاویا ۸‏:۳۰؛ اوّلِ پِترُس ۲‏:۹. فَیض و سلامَتی پِرَیمو نصِیب شُمو شُنه.

اُمِیدِ زِنده

3حمد-و-ثنا دَ خُدا و آتِه مَولای مو عیسیٰ مسیح که دَ وسِیلِه رَحمتِ بُزُرگ خُو از طرِیقِ دُوباره زِنده کدونِ عیسیٰ مسیح از مُرده ها، مو ره از نَو تَوَلُد کد، بَلدِه یگ اُمِیدِ زِنده 4و بَلدِه میراثی که نَه از بَین موره و نَه خراب مُوشه و نَه پژمُرده، بَلکِه دَ عالمِ باله بَلدِه شُمو نِگاه شُده. 5و شُمو دَ وسِیلِه قُدرتِ خُدا از طرِیقِ ایمان خُو بَلدِه نِجاتی حِفظ شُدید که اَماده شُده تا دَ آخِر زمان ظاهِر شُنه. 6دَ امزی باره غَدر خوش بَشِید، حتیٰ اگه آلی بَلدِه یگ زمانِ کم لازِم شُده که شُمو دَ وسِیلِه آزمایشای رقم رقم غَمگی-و-پَریشان شُنِید 7تا اَصل بُودونِ ایمان شُمو که از طِلّای از بَین رفتَنی کده -- که دَ وسِیلِه آتِش آزمایش شُده -- بااَرزِشتَر اَسته، دَ وختِ ظهُورِ عیسیٰ مسیح باعِثِ تعرِیف و اِفتخار و اِحترام شُمو شُنه. 8باوجُودِ که شُمو مسیح ره نَدِیدید، اُو ره دوست دَرِید و اگرچِه فِعلاً اُو ره نَمِینگرِید، ولے دَزُو ایمان دَرِید و قد خوشی که بیان نَمُوشه و پُرجلال اَسته خوشحالی مُونِید، 9چراکه شُمو حاصِلِ ایمان خُو، یعنی نِجات جان های خُو ره دَ دِست میرِید. 10دَ بارِه امزی نِجات، پَیغمبرا مُطالِعه و تحقِیقِ غَوُج کده، امُو پَیغمبرا که دَ بارِه فَیضی که بَلدِه شُمو مُقرَر بُود، پیشگویی کده. 11اُونا تحقِیق مُوکد که سُون کُدَم زمان یا کُدَم شرایط روحِ مسیح که دَ وجُودِ ازوا بُود اِشاره مُونه، وختِیکه پیش از پیش دَ بارِه رَنج های مسیح و دَ بارِه بُزُرگی-و-جلالِ بعد از رَنج ها پیشگویی کد. 12اوخته دَزوا بَرمَلا شُد که اُونا نَه بَلدِه خودون خُو، بَلکِه بخاطرِ ازشُمو خِدمت مُوکد دَ بارِه امی چِیزا که آلی دَز شُمو اِعلان شُد. امی چِیزا از طرِیقِ کسای که خوشخبری ره دَز شُمو اَوُرد دَ وسِیلِه روح اُلقُدس که از عالمِ باله رَیی شُده دَز شُمو اِعلان شُد. حتیٰ ملایکه ها ام آرزو دَره که دَ امزی چِیزا نظر کُنه.

پاک و مُقَدَّس بَشِید

13پس فِکر خُو ره دَ کار بِندَزِید#۱‏:۱۳ دَ جای «فِکر خُو ره دَ کار بِندَزِید» دَ زِبونِ یونانی «کمرِ فِکر خُو ره بسته کنِید» نوِشته یَه. و هُوشیار بَشِید؛ تمامِ اُمِید خُو ره دَ فَیضی بسته کُنِید که عیسیٰ مسیح دَ وختِ ظهُور خُو بَلدِه شُمو میره. 14رقمِ بچکِیچای بااِطاعَت بَشِید و زِندگی خُو ره قد خاهِشاتِ نَفسانی دَورِه جِهالت خُو شکل نَدِید، 15بَلکِه رقمِ امزُو مُقَدَّس که شُمو ره کُوی کده، شُمو ام دَ تمامِ رفتار خُو پاک-و-مُقَدَّس بَشِید. 16چُون نوِشته شُده: ”مُقَدَّس بَشِید، چراکه ما مُقَدَّس اَستُم.“#لاویا ۱۱‏:۴۴؛ ۱۹‏:۲.

17ازی که شُمو امُو ره آتِه آسمانی مُوگِید که تمامِ مردُم ره بِدُونِ طرفداری مُطابِقِ اعمالِ ازوا قضاوَت مُونه، پس دَورونِ مُسافِرَت خُو ره دَزی دُنیا قد خُداتَرسی تیر کُنِید، 18چُون شُمو مِیدَنِید که از راه-و-رفتارِ بےفایدِه که از بابه‌کَلونای شُمو مَنده بُود بازخرِید شُدِید، نَه قد چِیزای از بَین رفتَنی مِثلِ طِلّا و نُقره، 19بَلکِه قد خُونِ بااَرزِشِ مسیح، که مِثلِ خُونِ بارِه بےنُقص و بےعَیب بُود. 20اُو پیش از خِلقتِ دُنیا بَلدِه امزی مقصد اِنتِخاب شُد، لیکِن دَ زمانِ آخِر بَلدِه شُمو ظاهِر شُد 21که دَ وسِیلِه ازُو شُمو دَ خُدا ایمان اَوُردید، دَ خُدای که اُو ره از مُرده ها دُوباره زِنده کد و دَزُو بُزُرگی-و-جلال دَد تا ایمان و اُمِید شُمو دَ خُدا بَشه. 22آلی که شُمو جان های خُو ره دَ وسِیلِه اِطاعَت کدو از حقِیقت پاک کدِید تا بَلدِه بِرارو مُحَبَتِ بِرادرانه و خالِص دَشته بَشِید، پس یگدِیگِه خُو ره از تَی دِل سخت دوست بِدَنِید، 23چراکه شُمو از نَو تَوَلُد شُدید، نَه از تُخمِ از بَین رفتَنی، بَلکِه از چِیزی که از بَین نَموره، یعنی از کلامِ خُدا که زِنده و اَبَدی اَسته. 24چُون نوِشته شُده:

”تمامِ اِنسان ها رقمِ عَلَف اَسته

و تمامِ شان-و-شَوکتِ ازوا مِثلِ گُلِ عَلَف.

عَلَف پژمُرده مُوشه و گُل شی مِیریزه،

25لیکِن کلامِ خُدا تا اَبَد باقی مُومَنه.“

و اِی امُو کلام اَسته که دَ عِنوانِ خوشخبری بَلدِه شُمو اِعلان شُد.

Currently Selected:

اوّلِ پِترُس 1: HAZ

Highlight

Copy

Want to have your highlights saved across all your devices? Sign up or sign in

Text of this book may be quoted in any form (written, visual, electronic or audio) up to and inclusive of five hundred (500) verses without express written permission of the publisher, provided the verses quoted do not amount to a complete book of the Bible nor do the verses quoted account for 25% of the total text of the work in which they are quoted. Notice of copyright must appear on the copyright page of the work as follows:

Scripture taken from Hazaragi Bible.

Learn More About Hazaragi Bible