متى 24

1ولما طلع يسوع وترك الهيكل أجو عندو التلاميذ وقالولو شوف عظمة المبنى تبع الهيكل 2فقالهن يسوع: شايفين كل هذا البِنى؟ عنجد بقولكو مش راح يبقى فيه ولا حجر على حجر.

3ولما كان قاعد لحالو ع جبل الزيتون اجو التلاميذ لعندو وسألوه: قُلّْنا وينتى رح تصير هاي الأشياء وشو العلامة لمجيئك ولنهاية الدهر؟ 4جاوبهن يسوع وقالهن: انتبهوا انكو ما تنخدعوش. 5لأنو الخداعين كثار وراح ييجو باسمي ويقولو أنا المسيح وكثير ناس رح تنخدع. 6ورح تسمعوا كل الوقت بحروب وأخبار حروب. افهموا وتهكلوش هَم لأنو هاي الأشياء لازم تصير بس النهاية بعدها ما اجتش. 7وراح يتحاربوا البلاد والشعوب وراح يصير مجاعات وهزات أرضية. 8وهاي الأشياء كلها زي بداية الطِلق لمّا المره بدها تخلّف. 9وراح يعتقلوكو ويعذبوكو ويقتلوكو وبسببي راح كل الدنيا تكرهكو. 10وكثيرين منكو راح يتركوا الإيمان ويخونوا ويكرهوا بعض. 11وراح يكثروا الأنبياء الكذابين ويكثروا اتباعهن 12ولأنو الإجرام ضد الله راح يكثر راح تُفتر محبة ناس كثيرين. 13بس اللي بوقّف ضد الشر للآخر راح يخلص. 14والمؤمنين راح يوَصْلُوا الأخبار الحلوة عن ملكوت الله لكل العالم ويشهدوا لكل الشعوب وبعدين بتيجي النهاية.

15ولما بتشوفوا الدمار النجس اللي حكى عنو النبي دانيال موجود في الهيكل وإن شاء الله تفهموا المقصود، 16خلي اللي في منطقة اليهودية يهربوا بسرعة على الجبال، 17واللي على سطح البيت بلاش ينزل على البيت عشان يوخذ أغراضو 18واللي بيشتغل في الأرض بلاش يرجع عشان يوخذ أواعيه. 19يا ويل الحبالى واللي بِرَضعو في هداك الوقت. 20وُصَلّوا إنو مَ يكونش وقت الهروب في الشتا أو في يوم سبت 21لأنو رَح يكون الوقت وقت صعب كثير ولا مرة صار زيو من بداية العالم لحد إسه ولا رَح يصير زيو كمان مرة. 22ولو ربنا ما قصّرش أيامات الضيق مَ كنش نجي ولا بني آدم واحد. وهو قصّر وقت العذاب عشان اللي اختارهن. 23وفي هادا الوقت إذا قالكو حدا: المسيح موجود هون أو هناك فمتصدقوش. 24لأنو رَح يكثروا الكذابين اللي بقولوا "أنا المسيح" أو "أنا نبي" ورَح يخدعوا الناس بأعمال عظيمة وعجيبة لدرجة إنهن ممكن يقدروا يخدعوا المختارين. 25هياني حذرتكو قبل ما تصير هاي الأشياء. 26فإذا واحد قالكو: اطلعوا عند المسيح ع البرية، تردوش عليه. أو قالكو: ادخلوا عند المسيح المتخبي في البيت، ما تصدقوش. 27لأنو لما بييجي ابن الإنسان بكون مجيئه واضح مثل البرق اللي بضوّي الشرق والغرب. 28والمثل بقول بتبيّن الجثة من تجمع النسور.

29وطوّالي بعد ضيق هديك الأيامات بتخسر الشمس ضوها وببطل القمر يضوي وبتوقع النجوم من السما وبصير زلزال لكل قوة في السموات 30وقتها بتبيّن علامة ابن الإنسان في السما فبتصير كل شعوب الأرض تعيّط وبيشوفوا ابن الإنسان على غيوم السما بعظمة كبيرة وسلطان. 31وبوَدّي ملايكتو بصوت بوق عظيم فبيجمعوا الناس المختارين من كل محل في العالم.

32وتعلّموا الدرس من التينة. لما غصنها بِخضَر والورق بيطلع عليها اعرفوا إنو قرّب الصيف. 33ولما انتو تشوفوا كل هاي الأشياء اعرفوا إنو الوقت قريب وكأنّو ورا الباب. 34عنجد بقولكو مش راح يموت هذا الجيل قبل ما تصير كل هاي الأشياء 35والسما والأرض بتختفي بس كلماتي مش راح تختفي.

36وبالنسبة لوقت المجيء فولا حدا ولا ملايكة السما ولا الابن بيعرفوا اليوم والساعة. فش حدا بيعرف الوقت إلا الأب. 37مجيء ابن الإنسان راح يكون زي ما كانت أيامات نوح. 38كانوا في هديك الأيامات قبل الطوفان بيوكلوا وبيشربوا وبجوزوا وبيتجوزو لحد ما أجا اليوم اللي فات فيه نوح ع الفُلك. 39وما انتبهوش لحد ما أجا الطوفان وسحب كل إشي معاه، هيك راح يكون وقت مجيء ابن الإنسان. 40وقتها بكون في شخصين بشتغلو بالأرض بيوخذ ابن الإنسان واحد وبيترك الثاني. 41وبكون في تنتين بساعدوا بعض في تحريك حجر الطحن بيوخذ ابن الإنسان واحده وبيترك التانية. 42عشان هيك كونوا منتبهين لأنكو بتعرفوش اليوم اللي بييجي ربكو فيه. 43وتأكدوا إنو لو عرف صاحب البيت الوقت اللي بدو ييجي فيه الحرامي في الليل لسِهر عشان ما يخليهُش ينهب البيت. 44أنتو كمان خليكو جاهزين لأنو ابن الإنسان راح ييجي في ساعة مش راح تتوقعوها.

45مين راح يكون الخادم الأمين والفهمان اللي حطو الرب مسؤول عن أهل بيتو عشان يعطيهن الأكل في وقته؟ 46يا نيالو هذا الخادم لما بييجي الرب وبلاقيه بيعمل شو انطلب منو. 47عنجد بقولكو راح يحطو مسؤول عن كل ممتلكاتو. 48بس إذا كان الخادم شرير وفكّر إنو الرب راح يتأخر. 49وبدي يتعدّى على الخدام اللي زيّو ويوكل ويشرب مع السكرانين. 50فراح ييجي رب هذا العبد فجأة في يوم وسيعة مش متوقعها. 51ويعاقبو بنفس عقاب الموجهنين ونصيبو العياط وطقطقة الأسنان.

Currently Selected:

متى 24: CGB

Highlight

Compare

Copy