متى 25

1ملكوت السموات بشبه 10 بنات مش متجوزات وحاملات ضو بِضْوي بالزيت وطلعوا يستقبلوا العريس. 2خمس بنات كانوا شاطرات والخمسة التانيات كانوا غبيات 3لأنهن جابو الضو بس ما جابوش معهن قناني زيت. 4بس الشاطرات أخذو معهن قناني زيت 5لما تأخر العريس نعسوا البنات وناموا. 6وفي نص الليل سمعوا صياح بقول أجا العريس اطلعوا اسه استقبلوه 7ففاقو كل البنات وزبّطوا الضو تبعهن 8في هداك الوقت قالت الغبيات للفهمنات: اعطونا من الزيت اللي معكو لأنو الضو تبعنا عم بيطفي 9جاوبوهن الفهمنات وقالولهن: مش راح يكفي إلنا وإلكو. عشان هيك روحو عند البياعين واشتروا زيت. 10بس لما راحوا يشتروا زيت أجا العريس. وبعد ما فاتوا البنات الجاهزات معو على العرس سكّروا الباب. 11بعد فترة أجو باقي البنات وقالوا: يا سيد، يا سيد افتحلنا الباب. 12فبجاوبهن وبقولهن: عنجد بقولكو — أنا بعرفش ولا حدا منكو. 13عشان هيك كونوا منتبهين لأنكو بتعرفوش لا اليوم ولا السيعة اللي بييجي فيها ابن الإنسان.

14لأنها مثل زلمة سلّم خدامه مصرياته قبل ما يسافر 15فوكّل كل خادم بحسب قدرته، أعطى الأول كيس مصاري فضة والثاني كيسين والثالث خمس أكياس. 16راح أبو الخمس أكياس طوالي وتاجر في المصاري فربح كمان خمس أكياس فضة 17وكمان أبو الكيسين ربح بنفس الطريقة كمان كيسين فضة 18بس الخادم اللي معو كيس واحد حفر في الأرض وخبا كيس الفضة اللي أخذه من سيده. 19وبعد وقت طويل رجع السيد لعند خدامه عشان يشوف شو صار بمصرياته. 20فأجا لعندو صاحب الخمس أكياس وقدملو 10 أكياس وقالو: يا سيدي، اعطيتني 5 أكياس وهياني برجعلك إياها مع 5 أكياس مربح. 21فقالو السيد: برافو عليك، إنت خدّام منيح وأمين، كنت أمين بالمبلغ الصغير فراح أحطك مسؤول ع مبلغ كبير. تعال افرح مع سيدك. 22وأجا لعندو صاحب الكيسين وقدملو 4 أكياس وقالو: يا سيدي، اعطيتني كيسين وهياني برجعلك إياها مع كيسين مربح. 23فقالو السيد: برافو عليك، إنت خدّام منيح وأمين. كنت أمين بالمبلغ الصغير فراح أحطك مسؤول ع مبلغ كبير. تعال افرح مع سيدك. 24وأجا وراه صاحب الكيس وقدملو كيس واحد بس وقالو: يا سيدي، أنا بعرف إنك إنسان صعب، بتحصد مع إنك ما زرعتش وبتجمع مع إنك ما بذرتش 25فخفت ورحت خبيت كيسك في الأرض. وهياني برجعلك مصرياتك. 26فرد عليه السيد وقالو: يا خدّام يا كسلان ويا شرير، عنجد بتعرف إنو أنا بحصد بدون ما أزرع وبجمع بدون ما أبذر؟ 27إذا هيك كان لازم تحط المصاري في البنك عشان لما أرجع آخذها مع الفايدة. 28وقال السيد: خذوا منو الكيس وأعطوه للي معو ال 10 أكياس. 29لأنو في ناس راح تكسب أكثر بكثير من اللي عندها وناس تانيه راح تخسر لحد ما يبطل عندها ولا إشي. 30والخدّام اللي فيش منو فايدة ارموه بره وين في ظلام وعياط وطقطقة اسنان.

31ووقت ما بييجي ابن الإنسان بالعظمة ومع كل ملايكتو راح يقعد على عرش المجد تبعو 32وراح يوقفو قدامو كل الشعوب وراح يفرقهن عن بعض مثل ما بفرق الراعي الغنم عن المعاز. 33وبحط الغنم ع يمينو والمعاز ع شمالو 34وقتها بيحكي الملك وبقول للي ع يمينو: يا اللي عندكو بركة أبوي، تعالو عشان تمتلكوا الملكوت اللي حضّرو الله عشانكو من وقت ما خلق العالم. 35لأنو لما كنت جوعان طعمتوني ولما كنت عطشان شربتوني ولما كنت متغرب قبلتو أنام في بيوتكو 36ولما كنت بدون أواعي لبّستوني ولما كنت مريض درتو بالكو علي ولما كنت محبوس زرتوني 37وقتها بجاوبوه الناس الأُمنا مع الله وبقولو: يا رب، إيمتى شُفناك جوعان وطعمناك أو شفناك عطشان وشربناك؟ 38إيمتى شُفناك متغرب وقبلنا إنك تنام في بيوتنا أو شُفناك بدون أواعي ولبسناك؟ 39إيمتى شُفناك مريض أو محبوس وزرناك؟ 40بجاوبهن الملك وبقولهن: عنجد بقولكو، كل مرّة عملتو هاي الأشياء لواحد من إخوتي الزغار كإنكو عملتو معي. 41وبعدين بيحكي الملك وبيقول للي ع شمالو: يا ملاعين، ابعدو عني. مصيركو النار الأبدية اللي حضّرها الله لإبليس والشياطين اللي معو. 42لأنو لما كنت جُعان ما حداش طعماني ولما كنت عطشان ما حداش شربني 43ولما كنت متغرب ما حداش قِبل أنام في بيتو ولما كنت بدون أواعي ما حداش لبسني. ولما كنت مريض ومحبوس ما حداش دار بالو علي. 44وقتها بجاوبوه وبقولولو: يا رب، إيمتى شُفناك جُعان أو عطشان أو متغرب أو بدون أواعي أو مريض أو محبوس وما ساعدنكاش؟ 45فبجاوبهن وبقولهن: عنجد بقولكو، كل مرّة ما عملتوش هاي الأشياء لواحد من إخوتي الزغار كإنكو ما عملتوهاش معي. 46وهيك بكون مصيرهن العقاب الأبدي أمّا الأُمنا مع الله فنصيبهن الحياة الأبدية.

Currently Selected:

متى 25: CGB

Highlight

Compare

Copy