متى 23

1وصار يسوع يحكي مع الناس ومع أتباعو 2ويقول: قعدوا الفريسيين وجماعة الكتبة على كرسي موسى 3عشان هيك اعملو شو بقولولكو وردّوا عليهن في كل شي. بس تقلدوش أعمالهن لأنهن بيحكو بدون ما يعملو. 4وبِحَمْلو الناس أكثر من طاقتهن بطلبات حِملها تقيل وهني مش مستعدين يحركوها بأصبعهن 5وكل أعمالهن بعملوها عشان يقولو شوفوني يا ناس. بُرُبطوا على روسهن وإيديهن علب للصلاة فيها آيات وبعّرضو العلب وبِطَولو دناديش أواعيهن. 6بحبو يقعدو في صدر البيت وقت العزومة وفي أهم مكان وقت العبادة. 7وبحبو كثرة السلامات في الأسواق لما الناس بتعظمهن بالألقاب. 8بس إنتو تطلبوش عظمة الألقاب لأنو فيش عندكو غير معلم واحد وكلكو إخوة. 9وفيش عندكو غير أبو واحد وهو في السما عشان هيك تستعملوش بيناتكو لقب أب على الأرض. 10وفيش عندكو غير قائد واحد وهو المسيح عشان هيك تستعملوش بيناتكو لقب قائد. 11أعظم واحد بيناتكو هو خادمكو 12واللي بتكبّر بتنزل قيمتو واللي بتواضع بترتفع قيمتو.

13‏-14يا ويلكو يا جماعة الكتبة والفريسيين، يا موجهنين، عم بتسكروا أبواب ملكوت السموات قدام الناس. لا بتفوتو ولا بتخلو الناس تفوت.

15يا ويلكو يا جماعة الكتبة والفريسيين، يا موجهنين، بِدَّوْرُو بكل بلاد العالم عشان تقنعوا بني آدم واحد يصير يهودي مثلكو، ولما بصير يهودي بتسوّوه شيطان أكثر منكو ع مرتين.

16يا ويلكو، يا قادة يا عميان، بتعلموا الناس إنو بنفعش الحلفان بالهيكل بس الحلفان بذهب الهيكل بينفع. 17يا جهّال ويا عميان: مين أهم الذهب واللا الهيكل اللي بخلّي الذهب يصير مقدس؟ 18وبتقولو بِنْفَعِش الحلفان بالمذبح بس بينفع الحلفان بالتقدمة اللي عليه. 19يا عميان، مين أهم التقدمة واللا المذبح اللي بقدس التقدمة؟ 20اللي حلف بالمذبح بيحلف فيه وبكل اللي عليه 21واللي حلف بالهيكل بيحلف فيه وبالساكن فيه. 22واللي حلف بالسما بيحلف بعرش الله وبالقاعد عليه.

23يا ويلكو يا جماعة الكتبة والفريسيين، يا موجهنين، بتعطوا لألله عُشر كمية النعنع والزعتر والكمون بس اهملتوا تعليمات الله الأهم، العدالة، والرحمة، والأمانة. كان لازم تعملوا هاي الأشياء وتهملوش هديك. 24يا قادة يا عميان، بتصفّو السوائل عشان تقيمو قارصة بس بتبلعو الجمل.

25يا ويلكو يا جماعة الكتبة والفريسيين، يا موجهنين، بطّهروا الصحن والكُبَّاي من بره بس من جوه بتعبوهن سرقة وطمع. 26يا فريسيين يا عميان، طهروا بالأول جوّات الكُبَّاي حتى تتطهر الكُبَّاي من برَّه.

27يا ويلكو يا جماعة الكتبة والفريسيين، يا موجهنين، بتشبهوا القبور اللي مدهونه بلون أبيض ومبينة حلوة من برة بس من جوه مليانة عظام اموات ونجاسة. 28انتو بتبينوا قدام الناس، قديسين من بره، بس من جوه إنتو مليانين وجهنة واجرام ضد الله.

29يا ويلكو يا جماعة الكتبة والفريسيين، يا موجهنين، بتِبنوا مزارات لقبور الأنبيا وبتزينو قبور القديسين 30بتقولو: لو عشنا أيام زمان كان ما قبلناش نعمل زي أهلنا اللي قتلوا الأنبيا. 31وهيك إنتو بتعترفو إنكو ولاد اللي قتلوا الأنبيا. 32كملوا شُغل أهلكو 33يا عيلة حيايا وأفاعي: كيف بدكو تهربوا من جهنم ودينونة الله؟ 34أنا ببعتلكو أنبياء وحكماء ومعلمين. وانتو بتقتلوهن وبتصلبوهن وبتجلدوهن في معابدكو وبتلاحقوهن من مدينة لمدينة. 35فراح الله يحاسبكو على كل نقطة دم للناس الأبرياء اللي انسفك دمهن على الأرض من وقت هابيل البار لحد زكريا ابن برخيا اللي قتلتوه بين قدس الأقداس والمذبح. 36عنجد بقولكو كل هاي الدينونة راح توقع ع راس هذا الجيل.

37يا أهل أورشليم ويا سكانها، يا اللي بتقتلو الأنبيا وبترجمو الرسل. أكم من مرة كنت بدي اجمعكو لعندي زي ما بتجمع الجاجه صوصانها تحت جناحاتها بس إنتو بدكوش. 38واسه راح ينخرب بيتكو 39ومن إسه مش راح تشوفوني لحد ما يصير الوقت اللي تقولو فيه: بركة الله مع اللي بيجي باسم الرب.

Currently Selected:

متى 23: CGB

Highlight

Compare

Copy