متى 18

1وفي نفس اليوم أجو التلاميذ لعند يسوع وسألوه: مين أعظم واحد في ملكوت السما؟ 2فقام يسوع ونادى طفل ووقفه بالنُّص 3وحكالهن: عنجد بقولكو إذا بتتغيروش وبتصيروا مثل الأطفال مستحيل تفوتو ع ملكوت السما. 4وكل واحد بصير بتواضعو مثل هذا الطفل هو الأعظم في ملكوت السما. 5واللي بيستقبل طفل واحد زي هذا باسمي كأنو بيستقبلني.

6الإنسان اللي بضر إيمان واحد من هدول الزغار المتعلقين فيّ أحسنلو لو يعلقو ع رقبتو حجر الطحن الكبير اللي بجرو الحمار وبعدين يرموه عشان يغرق في قاع البحر. 7يا ويل الناس من مصايد الشر لأنو فش مهرب من مواجهتها بس يا ويلو اللي بركّب المصيدة. 8فإذا إيدك أو إجرك هي سبب خطيتك اقطعها وإرميها، أحسنلك تكون مع الرب بإيد وحدة أو إجر وحدة من أنو يكون عندك اجرتين أو ايدتين وأنت مرمي في النار الأبدية. 9وإذا عينك هي سبب خطيتك اقلعها وارميها، أحسنلك تكون مع الرب بعين وحدة من إنو يكون عندك عينتين وأنت مرمي في نار جهنم.

10‏-11أوعكو تستخفوا بواحد من هدول الزغار لأنو الملايكة اللي بتخدمهن في السما معها إذن كل الوقت أنها تدخل لعند أبوي السماوي 12شو بتفكرو عن إنسان عندو 100 خروف ولما ضاع واحد منهن ترك ال 99 في المرعى وراح يدور ع الخروف الضايع؟ 13وعنجد بقولكو لما بلاقيه رح يفرح فيه أكثر من ال 99 اللي ما ضاعوش. 14هذا هو اللي بدو إياه أبوي السماوي بدوش ولا واحد من هدول الزغار أنو يهلك.

15وإذا أخوك المؤمن غلط روح صححو انت وياه لحالكو فإذا رد عليك بتكون ربحت أخوك 16وإذا ما ردش زورو كمان مرة مع أخ أو أخين حتى الكلام يكون مأكد من شخصين أو ثلاثة. 17وإذا بعنّد قول للكنيسة وإذا بردّش ع الكنيسة عاملو زي واحد مش مؤمن أو زي اللي بلمّوا ضرايب روما. 18عنجد بقولكو أي إشي بتمنعوه في الأرض هو ممنوع في السما وأي إشي بتسمحو فيه في الأرض هو مسموح في السما 19فإذا اتفقوا 2 منكو عل الأرض في أي قرار وطلبوه في الصلاة رح يستجيب إلكو أبوي اللي في السما. 20لأنو لما بكون 2 أو 3 مجتمعين باسمي بكون أنا بيناتهن.

21وبعد ما خلص يسوع حكي أجا لعندو بطرس وسألو: يا رب، أكم مرة أسامح أخوي اللي بيغلط في حقي؟ لحد 7 مرات؟ 22رد عليه يسوع وقالو: مش لحد 7 مرات . . . لحد 70 مرة سبع مرات! 23خليني اشرحلك. ملكوت السموات زي قصة واحد ملك بدو يحاسب المسؤولين الكبار 24فلما بدي يفحص الحسابات دخّلو لعندو واحد من المسؤولين اللي عليه دين كبير بمليارات الشواقل 25ومعوش يدفع الدين فأمر الملك أنو يبيعوه هو ومرتو وولاده وكل ممتلكاته ويجيبولو المصاري 26ركع الزلمة وحط وجهو ع الأرض وترجى الملك وقالو اصبر علي وبدفعلك كل الدين 27شفق الملك عليه وسامحو بكل الدين واعطاه حريتو 28ولما طلع هذا المسؤول من عند الملك شاف مسؤول تاني كان مديونلو بمبلغ صغير، أكم ألف شيقل فمسك بخناقو وقالو ادفع شو عليك. 29ركع زميلو وحط وجهو ع الأرض وترجاه وقالو اصبر علي وبدفعلك كل الدين 30رفض طلبو ورماه في السجن لحد ما يدفع اللي عليه. 31لما شافو المسؤولين التانيين شو صار إضايقو كثير وراحو خبروا الملك بكل اللي صار 32فراح الملك ناداه وقالو: يا شرير سامحتك بكل الدين اللي عليك لأنك ترجيتني 33طب مش كان لازم أنت كمان ترحم صاحبك زي ما أنا رحمتك؟ 34وغضب الملك عليه وسلمو لعسكر السجن عشان يعاقبوه لحد ما يدفع كل اللي عليه. 35هيك راح يعمل أبوي السماوي مع كل واحد بسامحش أخوه من كل قلبه.

Currently Selected:

متى 18: CGB

Highlight

Compare

Copy