متى 19

1ولما خلّص يسوع حكيو ترك منطقة الجليل وراح لمنطقة اليهودية عن طريق نهر الأردن. 2ولحقوه لهناك جمهور كبير وشفا كل مريض معاهن.

3واجا لعندو ناس من الفريسيين عشان يوقعوه وسألوه: هل الدين بِسْمَح إنو الزلمة يطلق مرتو كيف بدو؟ 4جاوبهن يسوع وقالهن: ما قريتوش كلمة الله اللي بتعلمنا إنو الخالق من البداي عمل البشر ذكر وأنثى؟ 5وعشان هيك بستقل الزلمة عن أبوه وإمو وبرتبط بمرتو وبصيرو ال 2 جسم واحد. 6هني جسم واحد مش 2 مستقلين ومش لازم يفك الإنسان الرباط اللي عملو الله. 7اعترضو الفريسيين وقالو: طيب ليش موسى أعطى وصية للزلمة إنو إذا بدُّش مرتو خليه يعطيها ورقة طلاق؟ 8جاوبهن يسوع وقالهن: ترتيب الله في الخليقة إنو ميْكُنش في طلاق بس موسى سمحلكو إنو الزلمة يطلق مرتو لأنو قلبكو زي الحجر. 9وبقولكو إنو إللي بطلق مرتو وبتجوز كمان مَرَّة بكون زاني إلا إذا كانت مرتو الأولى خاينة. 10فقالو التلاميذ ليسوع: إذا كان هيك أحسنلو الواحد ما يتجوزش. 11جاوبهن يسوع وقال: مش الكل راح يقبل كلامي إلا إذا ساعدهن الله. 12في بشر بقدروش يتجوزوا لإنهن هيك انولدوا. وفي أشخاص خسرو قدرتهن بسبب الناس. وفي ناس قرروا ما يتجوزوش عشان ملكوت السموات. واللي بقدر يقبل خليه يقبل.

13وبعد هادا الحكي جابت الناس ولادها الزغار لعند يسوع حتى يحط إيديه عليهن ويصلي عشانهن بس التلاميذ أبعدوهن 14فقالهن يسوع: فلتو الأولاد وتمنعوهِنِّش ييجو لعندي لأنو ملكوت السموات للناس إللي زيهن. 15وحط إيديه عليهن وبعدين ترك المحل.

16وأجا لعندو زلمة وسألو: يا معلم، شو العمل المنيح اللي لازم أعملو عشان آخُذ الحياة الأبدية؟ 17جاوبو يسوع وقالو: ليش بتسألني عن العمل المنيح؟ واحد هو المنيح. وإذا بدك الحياة الأبدية طيع الوصايا. 18فسألو الزلمة: أي وصايا؟ جاوبو يسوع وقالو: تقتلش، تزنيش، تسرقش، تشهدش بالكذب ضد الناس في المحاكم 19إكرم أبوك وإمك وحِب كل إنسان قد ما بتحب نفسك. 20رد الشب وقالو: أنا طِعت كل اللي انت قلتو شو ظل ناقص؟ 21فقالو يسوع: إذا بدك ما يكنش عندك إشي ناقص روح بيع ممتلكاتك وأعطي الفُقرا وهيك راح يكُنْلَك كنز في السما وتعال انضم لجماعتي. 22لما سمع الشب هاي الكلمات ترك المحل وكان زعلان لأنو كان عندو ممتلكات كثيرة.

23فقال يسوع لتلاميذو، عنجد بقولكو صعب إنو غني يفوت عملكوت السموات. 24وبقول كمان: أسهل للجمل إنو يفوت من خزق الإبرة من إنو الغني يفوت عملكوت الله. 25انصدمو التلاميذ ع الآخر من ها الحكي وقالو: إذا هيك مين بِقْدَر يخلص؟ 26إطلّع عليهن يسوع وقالهن: بالنسبة للبشر مستحيل يقدرو بس الله بِقْدَر على كل إشي. 27وقتها قال بطرس ليسوع: طيب إحنا تركنا كل إشي وصرنا تلاميذك شو راح يصير فينا؟ 28فرد يسوع وقال: عنجد بقولكو إنتو اللي صرتو تلاميذي في الخليقة الجديدة راح تقعدوا على 12 عرش وتحكمو قبائل إسرائيل ال 12 لما ابن الإنسان بيقعد على عرش المجد تبعو. 29وكل إنسان ترك بيت أو أخ أو أخت أو أب أو إم أو أولاد أو أراضي عشاني راح يتكافئ 100 ضعف وتكون إلو الحياة الأبدية. 30وكثيرين من اللي إسه أعظم الناس راح يصيرو أقل الناس واللي إسه أقل الناس راح يصيروا أعظم من الكل.

Currently Selected:

متى 19: CGB

Highlight

Compare

Copy