متى 17

1وبعد 6 أيام راحو بطرس ويعقوب ويوحنا مشوار مع يسوع. يوحنا بكون أخوه ليعقوب. طلعو الأربعة ع جبل عالي وفش حدا تاني معاهن. 2وهناك تغير شكل يسوع قدام عينيهن. صار وجوّ منور مثل الشمس وأواعيه زي كأنها بتشع نور أبيض 3وبعدين شافو موسى وإيليا عم بِحكو مع يسوع 4فقال بطرس ليسوع: يا رب، منيح إنو إحنا هون. إذا بدك بعمل هون 3 عرايش. واحدة إلك ووحده لموسى ووحده لإيليا. 5وقبل ما خلص حكي غطتهن غيمة ملانة نور وبعدها سمعو صوت من الغيمة بقول: هذا هو ابني المحبوب اللي انشرحلو قلبي. اسمعو كلامو. 6لـما سمعو التلاميذ الصوت وقعو وكانت وجوهن ع الأرض من كثر الخوف 7فقرّب عليهن يسوع ومسكهن وقالهن: قومو وما تخافوش. 8رفعوا عينيهن لفوق وما شافوش حدا تاني غير يسوع.

9وهني نازلين من الجبل وصاهن يسوع وقالهن: تحكوش لحدا عن الرؤيا اللي شفتوها لحد ما يقوم ابن الإنسان من بين الأموات. 10وسألوه التلاميذ وقالولو: ليش جماعة الكتبة بقولو إنو إيليا لازم ييجي قبل المسيح؟ 11جاوبهن وقالهن: صحيح إنو إيليا بيجي بالأول وبرجّع كل إشي لمحلو 12وأنا بقولكو إنو إيليا صار جاي وبدل ما يعرفوه عملو فيه عمايلهن وكمان راح يعذبو ابن الإنسان. 13وقتها فهموا التلاميذ إنو يوحنا المعمدان هو المقصود.

14نزلو من الجبل وكان في ناس كثير وقرب زلمة وركع قدام يسوع 15وقالو: يا رب، ارحم ابني لأنو متوجع كثير ومريض بالصرع. وبيوقع كثير مرات في النار أو في المي 16وجيبتو لعند تلاميذك بس ما قدروش يشفوه 17رد يسوع وقال: يا ناس اللي ماعندهاش إيمان وقلبها أعوج لوينتى راح أظل معاكو؟ لوينتى بدي أظل اتحملكو؟ جيبولي إياه لهون. 18وبعد ما نهر يسوع عالشيطان وأمرو إنو يطلع شفي الشب طوالي. 19وقتها قربو التلاميذ ع يسوع وسألوه بدون ما يسمعو الناس: ليش إحنا ما قدرناش نطرد هذا الشيطان؟ 20‏-21جاوبهن يسوع وقالهن: لأنو إيمانكو مش كافي. وعنجد بقولكو لو إيمانكو قد حبة الخردل وأمرتو هذا الجبل: روح من هون لهناك لراح، وفش إشي بتقدروش تعملوه.

22والتقى يسوع مع تلاميذو في منطقة الجليل وقالهن: عن قريب راح يسلمو ابن الإنسان للناس 23اللي راح تقتلو. بس راح يقوم في اليوم الثالث. سمعوه التلاميذ وحزنوا كثير.

24وبعد ما وصلوا كفرناحوم أجو تبعون ضرايب الهيكل لبطرس وقالولو: بدوش معلمكو يدفع الضريبة؟ 25فقالهن: طبعا بيدفع. وراح ع البيت لعند يسوع وقبل ما يحكي سألو يسوع: شو رأيك يا سمعان؟ من مين بلمو ملوك الدنيا الجزية والمصاري من ولادهن واللا من الغربا؟ 26جاوبو بطرس: من الغُربا. فقالو يسوع: عشان هيك الأولاد معفيين من الضرايب. 27بس عشان مانكونش حجر عثرة في طريقهن روح ع البحيرة وارمي الصنارة وأول سمكة بتصيدها افتح تمها راح تلاقي مصاري بالزبط قد الضريبة عني وعنك. وروح إدفعلهن إياها.

Currently Selected:

متى 17: CGB

Highlight

Compare

Copy