ဖံးလံးပံၤ 1
1
1ယ့ၣ်ရှူးခရၱာ်အခၱအပွဲၤ, စီၤပီလူးကၱာ်စီၤတံၤမသ့းဝှ့းနံၤ ကဘၱာ်စဲာ်အပၠၤခွံဖဳးအအီၣ်ဖံလံး ပံၤအူးအတဲၤအီၣ်ပျဳာ်အခဳးအန့ၤကၱာ် အမဲၤဇဳၤတဲၤလဳ စါစဲး, ထဲၢ်အမၱာ်တမဳၤခွံလီၤ ဒဳခရၱာ်ယ့ၣ်ရှူးအပူၤတစီာ် နဳၤ—
2ဝၤပာ် ကဘၱာ်စဲာ်ကၱာ် ဘၱာ်စဲာ်ယ့ၣ်ရှူးကအံာ်လၤဒီဧဲၤသံ တဲၤလှူၣ်တဲၤတါကၱာ်တဲၤယံၢ်တဲၤဒွါ.
စီၤပီလူးအတဲၤတၤဖံလံးပံၤအတဲၤအီၣ်ပျဳာ် အနံၤခံ
3ဘ့ယကမဳၤထာ်နံၤသံအဓ့နဳၤ, ယထါအံာ်တပွဲး ကဘၱာ်စဲာ် အလှူၣ်အတါ, 4ကၱာ်ဘ့ယတၤသဘဲသံလဳစါစဲးအနံၤခံအဓ့နဳၤ, ယသဘဲ ထာ်ဒဳတဲၤသးလဳၢ်သးလၤအပူၤ, 5မၤနဲၢ်, သံမဲၤဇဳၤကဲၤယဲၤဒဳ တဲၤသးလဳၢ်သးလၤအံာ်အဝၱၤအကဲအနံၤခံလှ့အခၣ်ထၱးထိ ခဳတနံၤယဳၤ နဳၤ. 6မဲၤကနဳၤဒဳၣ်, ယဘူၣ်သ့ပွ့ၤဒဳကဘၱာ်စဲာ်, ထဲၢ်အစး ထာ် အတဲၤမဲၤအဝၱၤအအဲးဒဳသံပူၤနဳၤ, စကမဲၤဝ့ၤ အလှီမီၢ်ထိဓဳၤဒဳတဲၤပ့ထာ် ဇီၤထာ်ဘ့ယ့ၣ်ရှူးခရၱာ်အမူၤနံၤနဳၤ. 7သံ အီၣ်သဲာ်ယိတပွဲးဒဳ ယသးအပူၤနဳၤ. မဲၤကနဳၤဒဳၣ်, ယတဲၤပဲၢ်သဳးပဲၢ်သးသံခဳး အစာ်ဘိကယဳၤ နဳၤ မၱာ်အဘဲာ်အပီၤတပွဲး. မၤနဲၢ်, ဘ့ယအီၣ်ဝ့ၤတဲၤကၱတၱၢ်အပူၤခဳနူၤယဳၤ မၱာ်ဝၱၤ, ကၱာ်ဘ့ယအီၣ်လှိအီၣ်လၤဝ့ၤကၱာ် ခးဒၱာ်ဒါအံာ်တဲၤသးလဳၢ်သးလၤ အံာ်အဝၱၤအကဲကၱာ်မဲၤမှ့းမဲၤကျဳၤဇၤအခဲ မၱာ်ဝၱၤ, သံနံၤဘဲာ်ကိာ် တပွဲးယကါတဲၤလှူၣ်တဲၤတါ ထဲၢ်ကဘၱာ်စဲာ်အံာ် လၤယဲၤနဳၤ. 8ကဘၱာ်စဲာ်မၱာ်အခးသဲသၱးယနံၤခံ ယဒီၣ်တဲၤအတၱၢ်အမှး ထဲၢ်ဘ့ယဒီၣ်ဒဳယဘဲာ် လီၢ်သံလဳစါစဲးနဳၤ မၱာ်အဟဲးထာ်ဒဳယ့ၣ်ရှူးခရၱာ် သဲန့ၤအသးပူၤနဳၤ.
9ယသဘဲတၤထာ် သံနံၤခံ စာ်ဘိထဲၢ်သံတဲၤ ဘဲာ်လီၢ်, တဲၤသၱာ်ဟဲတၱၢ်တဲၤမှး ကဓဳၤထာ်တရ့ၤ တရ့ၤပီၢ်အနံၤခံ, ခၣ်လဲးသံကပ့ၢ်ဖးဒးဖးဇၤကီ တဲၤအဘဲာ်ကၱာ်အတဘဲာ်နီး, 10ကၱာ်သံကရိၤ ဇၤပီၢ်တဲၤအအဲးကဓူနဳၤ. အနဳၤဒဳၣ်, သံကလှိ ကလၤကၱာ်ကီတဲၤတစါတထံနီးလဳစါစဲး ကၱာ်တဲၤ ဒီၣ်တဲၤဆး, ဘ့ခရၱာ်အမူၤတနံၤနဳၤ, 11သံတဲၤ အီၣ်သမိ ကပ့ထာ်ကၱာ်ကီ တဲၤတၱၢ်တဲၤမှး, တဲၤ ဝၱၤတဲၤအဲး, ထဲၢ်အမဲၤနံၤဇၤသံ မၱာ်ထ့ယ့ၣ်ရှူး ခရၱာ် ဒဳကဘၱာ်စဲာ်အတီၤအသ့းအနံၤခံ ကၱာ် တဲၤကီၢ်အံာ်ထါအံာ်အနံၤခံနဳၤ.
ယနံၤခံ တဲၤသမိမၱာ်ခရၱာ်
12သဲပူၤဝ့ၤတစီာ်, ယသးအဲးနံၤသံသၱာ်ဟဲတဲၤထဲၢ် အဖၱ ထာ်နံၤယဲၤတစီာ်နဳၤအထီးသကါနှဲးနှဲးတဲၤသးလဳၢ်သးလၤအဝၱၤအကဲ လီၤ. 13အတိၤအံာ်တဲၤနၤအပူၤကျံဖဳးကိအပွဲၤ ကၱာ် ပၠၤအလဝ့ၤတစီာ် သၱာ်ဟဲဘဲာ်ကဲၤ ထဲၢ်ယဘဲာ် တဲၤထၱးနံၢ်တဲၤကၱတၱၢ်အပူၤဒဳယမၱာ်ခရၱာ်အခၱအပွဲၤအခဳးအစဲနဳၤ. 14ဒဳယအီၣ်ဘဲာ်တဲၤကၱတၱၢ် ပူၤကယဳၤအစဲ, အမဲၤအီၣ်အဲးထာ်သဲပူၤဝ့ၤတစီာ် အတဲၤဘူၣ်ဒဳကဘၱာ်စဲာ်အပူၤ, ကၱာ်စသးခူထာ် ကဲၤကိအဆဳအခဲ ဒဳအကဒီထိးလၤတဲၤသးလဳၢ် သးလၤအံာ်အဝၱၤအကဲဒဳတဲၤခူတဲၤဟဲအပူၤနဳၤ.
15နီၣ်သီနှီနူၤ, တစီာ်စီာ်ဒီထိးလၤခရၱာ် အဝၱၤအကဲဒဳတဲၤသးကျး ကၱာ်တဲၤကဳၤတဲၤတြး အပူၤ, ပရၤဆါ, တစီာ်စီာ်ဒီထိးလၤတပွဲး ဒဳတဲၤ ပဲၢ်သဳးပဲၢ်သးအတၱၢ်အမှးအပူၤလီၤ. 16စဲာ်တစီာ် သၱာ်ဟဲ ထဲၢ်ကဘၱာ်စဲာ်အံာ်လၤယဲၤ အကဝဳၤ အံာ်ခးအံၤတဲၤသးလဳၢ်သးလၤ အဝၱၤအကဲအခဳးအစဲ, စဲာ်တစီာ် ဒီထိးလၤတပွဲး ဒဳတဲၤဘဲာ်လီၢ်အပူၤနဳၤ. 17အလဝ့ၤတစီာ်စီာ် တဒီဆးခရၱာ်အဝၱၤအကဲဒဳ တဲၤသးတနၢ်အပူၤ နီး, မၱာ်ဒဳတဲၤသးအဲးနံၤအမံၤအသဲာ်အနံၤခံလီၤ. စဲာ်တစီာ်ကမဳၤဒဳ အကအံာ်ပၤအံာ်ဆဲယဲၤဒဳၣ်လံ ကၱာ်အလ့ၤ, ဘ့ယအီၣ်ဝ့ၤတဲၤကၱတၱၢ်အပူၤအခဲ ယဳၤနဳၤ.
18စာ်တဲၢ်စာ်တဲၢ်ဝှးဝှါ, အတဘဲာ်ခဲးတပွဲး နီး. ယသးကနၢ်အံာ်တပွဲး ဒဳတဲၤမဲၤအန့ၤကယဳၤ အခဳးအစဲ. တဲၤလဲၢ်သဳးလဲၢ်သးအဘဲာ်ဝှးဝှါ, အတဘဲာ်တပီၤနီးဝှးဝှါ, ခရၱာ်အဝၱၤအကဲ မၱာ်ဘဲာ် ဒီထိးလၤဒဳကျဲးအီၣ်အဲဘီအပူၤနီၣ်သီနှီနဳၤ, ယသးကနၢ်အံာ်တပွဲး. ဒဳအလ့ၤကါမှၱာ်မၱာ် ယကသးကနၢ်အံာ်ဝ့ၤတပွဲး. 19မၤနဲၢ်, ယသၱာ်ဟဲ ဒဳသံ တဲၤတၤသဘဲယနံၤခံ ကၱာ်ဒဳယ့ၣ်ရှူးခရၱာ် အသးစါထံအတဲၤမဲၤဇဳၤအစဲ, ယကလှိထာ်ဘဲာ် တပွဲးတဲၤစဳကျဳၤနဳၤ. 20ယတဲၤသးအဲးနံၤကၱာ် ယတဲၤမူၤလဲၢ်ဆးရှံအဓဳၤကဓူမၱာ် ယကတပဲၢ် လၤတၤဘဲာ်ပီၢ်တဲၤဖၱးတဲၤမဲၤ အလၤဘဲာ်ယဲၤ တမံနီး, မၱာ်ကိအဆဳအခဲနဳၤ, လၤဆါဒဲဧဲၤ ခဳနဳၤ ယဳၤ, သးအတဲၤခူတဲၤဟဲကပ့ထာ်ဇီၤထာ်ပီၢ်ယပူၤ, သံမၱာ်ဝၱၤ, သမိမၱာ်ဝၱၤ, ခရၱာ်ကဘဲာ်တဲၤမဲၤ ရှံမဲၤထဲ ဒဳယန့ၤဘၱစဲာ်သဒဲပွဲၤနဳၤ. 21တဲၤသမိ မၱာ်ပီၢ်တၤနဲၢ်. ယနံၤခံနဳၤတဲၤသမိ မၱာ်ခရၱာ်လီၤ. တဲၤသံနဳၤ အလှူၣ်အတါအီၣ်ဒဳၣ်ချဳလီၤ. 22ပရၤ ဆါဒဳၣ်, မၱာ်ဒဳ ယအီၣ်သမိဝ့ၤအစဲဒဳၣ်, ယမဲၤတဲၤ အထာ်နံၤလၤနံၤတစီာ်ကဇၤဒဳၣ်ချဳဒဳၣ်, ယတးရိၤ ဘဲာ်လဲၢ်တမဳၤမဳၤ. ယတသၱာ်ဟဲလၤတံၤ လၤဆ့း နီး. 23ယသးဘဲာ်စွံးဒးထဳး ဒဳတဲၤကၠံၢ်မဳၤအမ့ၢ် ဇဳၤနဳၤ. ယသးအီၣ်ဆိး ဒဳအကပဲၢ်တၤကဲ ယတဲၤ အီၣ်ကၱာ်က့ၤအီၣ်သမိပျဳာ်ခရၱာ်, 24ပရၤဆါ ဒဳၣ်, ဒဳတဲၤမဲၤဇဳၤသံအနံၤခံနဳၤ, အယွံၢ်အမဳၤဒဳၣ်ချဳ မၱာ် ယကအီၣ်သမိဘဲာ်ဝ့ၤလီၤ. 25ဒဳတဲၤယဳၤအခဳးအစဲ, ယတထဲးနံၤဝံနံၤဝၤတပွဲးနီး. မဲၤကနဳၤအခဳးအစဲ, ယကအီၣ်သမိကိာ်ဝ့ၤသံကါလီၤ. ယကအီၣ်သမိ ကိာ်ဝ့ၤသံလဳစါစဲးအကါ, စာ်ဘိ ထဲၢ် ယကမဲၤအီၣ်အဲးထာ် သံတဲၤဓဳၤထာ်ထိ ထာ် ကၱာ်တဲၤသးလဳၢ်သးလၤအံာ် ဒဳတဲၤဘူၣ်တဲၤနဲၢ်အပူၤ, 26စာ်ဘိ ထဲၢ် ဘ့ကကဲာ်ထၱးလှဲးဝ့ၤကဒီလၢ်ဝၤ တပျာ်ပ့ၤနဳၤ. သံကအီၣ်ကၱာ် တဲၤပဲၢ်ဓဳၤပဲၢ်မူၤဒဳၣ်ချဳသံန့ၤ ယခဳးယစဲ ဒဳသံတဲၤအီၣ်သမိအပူၤ ပျဳာ်ပျဳာ်ကၱာ် ယ့ၣ်ရှူးခရၱာ်နဳၤ.
27ခဳနူၤယဳၤ, တဲၤအယွံၢ်ဓဳၤမဳၤဓဳၤတမံၤမၱာ် သံသးသမိအကျဲး ကဘဲာ်မၱာ်အစာ်ဘိ ခရၱာ် အတဲၤသးလဳၢ်သးလၤအံာ်အဝၱၤအကဲ အတဲၤ လဳၤပၤအီၣ်အခီနီၤ, စာ်ဘိထဲၢ် ယကလ့ၤထၱးဇၤ သံမၱာ်ဝၱၤ, တဇၤနီးမၱာ်ဝၱၤ, ယကသၱာ်ဟဲဘဲာ်ပီၢ် သံတဲၤဆီထဳးအီၣ်မှ့းအီၣ်ကျဳၤဒဳ တဲၤလဲၢ်လၤ သးတမဳၤလီၤအပူၤ, သံကဒဳးယံၢ်ပျဳာ်လၢ်ဝၤ ဒဳ တဲၤသးလဳၢ်သးလၤအံာ်အဝၱၤ အကဲ အတဲၤဘူၣ် တဲၤနဲၢ်အနံၤခံနဳၤ. 28ရှံးဆါနံၤပီၢ်မဲၤသံဒ့ဒီၣ်ရီၢ် ခဲးအလ့ၤမဲး. အီၣ်ကၱာ်ပီၢ်သးခူသးဟဲအသဲာ်ယိ, ကၱာ်တဲၤအယဳၤကအံာ်စာ်ထၱးစဲာ်တစီာ်မၱာ်အရှူး, ကၱာ်သံမၱာ်အမဲၤပဲၤတဲၤနဳၤ. မၤနဲၢ်ကဒီၣ်ဓဳၤဒဳၣ်, ကဘၱာ်စဲာ် မၱာ်အအံာ်သံ တဲၤမဲၤပဲၤလီၤ. 29သံနံၤ ဘဲာ်တဲၤအခွဲးအယာ် အကမဲၤတဲၤ ဒဳခရၱာ်အနံၤ ခံ, တဘဲာ်ထ့သံဘူၣ်စဲာ်လီၤနီး, မၱာ်သံကဓူၤဘဲာ် ခးဘဲာ်ဒဳစနံၤခံခံ. 30သံကၱာ်ယဲၤ, ကဒဳးယံၢ် လၢ်ဝၤ တဲၤဒဳးတမီၤလီၤ. မၱာ်တဲၤဒဳးထဲၢ်သံကဲာ် ထၱးယဒဳးကဲၤလှ့အအူဆူးကၱာ်သံသၱာ်ဟဲကဲၤ အခီနဳၤ, ယဒဳးဝ့ၤခဳနူၤယဳၤလီၤ.
Currently Selected:
ဖံးလံးပံၤ 1: GBA
Highlight
Copy
Compare
Share
Want to have your highlights saved across all your devices? Sign up or sign in
Geba Roman New Testament © Bible Society of Myanmar, 2021.
