ကလၤတံ 5
5
ခရၱာ်ဖဳးအတဲၤအီၣ်လှိအီၣ်လၤ
1ဘ့ခရၱာ်ဘးလှိဝၤနဳၤ, စတဲၤသးအဲးနံၤမၱာ် ဝၤကအီၣ်လှိအီၣ်လၤသဲာ်ယိလီၤ. အီၣ်မှ့းအီၣ်ကျဳၤပီၢ်အစာ်ဘိပၠၤအအီၣ်လှိအီၣ်လၤအခီနဳၤ, ကၱာ်အံာ်ပ့ၤမဲးပၠၤနှးဇိၤသံတဗွဲပ့ၤမဲး.
2ဆီးခ့န့းပီၢ်. ယဲၤ, စီၤပီလူးဒီဆးသံ, သံကအံာ်မၤသံဖ့းခံဘဲာ်ဟိရကၱနဳၤ, ခရၱာ်တချဳထာ်မၤမ့ၤတပွဲးသံနံၤခံတမံနီး. 3ဒဳတဲၤအံာ်သဓံသံအတဲၤယၱၢ်ဘဲာ်အပူၤယဒီဆးသံတပျာ်ပ့ၤ, ကယါပၠၤအခးဟိရကၱအဖ့းခံတစီာ်နဳၤ, ကလိၤကိာ်မဲၤကိာ်လဳဘဲာ်တဲၤမှဲးလၤတစီာ်နဳၤ. 4ပရၤဆါသံထဲၢ်အဝူၤသဲတဲၤပၤ အကမဲၤဝၱၤမဲၤစါအန့ၤဒဳ ကဘၱာ်စဲာ်အနံၤခံကၱာ်ဆီၤခ့န့း တဲၤမှဲးလၤ ဒဳၣ်, မၱာ်သံထဳးပၢ်ထဳသံန့ၤကၱာ်ခရၱာ်လီၤ. သံဆူးပးလဳၢ်ထဳကဘၱာ်စဲာ်အလှူၣ်အတါ. 5မၱာ်ကဲာ်တစီာ်ယဳၤနဳၤ, ကဘဲဒီဆးကၱာ်ကဘၱာ်စဲာ်အသးစါထံအကဝၢ်လှဲးတဲၤဘူၣ်အအံာ်လၤနံၤကဲၤတဲၤဆးရှံအံာ်စအီၣ်ဆိဧိၢ်အံာ်ကဲၤတစီာ်နဳၤ. 6မၤနဲၢ်ဒဳၣ်ဒဳခရၱာ်ယ့ၣ်ရှူးအပူၤနဳၤ, နဘဲာ်တဲၤဟိရကၱအဖ့းခံမၱာ်ဝၱၤ, နတဘဲာ်နီၤမၱာ်ဝၱၤ, အချဳထာ်မၤမ့ၤ တအီၣ်တပွဲးတမံနီး, မၱာ်တဲၤဘူၣ်ဝၤအီၣ်အံာ်ဝၤသး ပူၤဒဳတဲၤဘဲာ်လီၢ်အပူၤနဳၤ.
7သံကဳၤထာ်အဲးဇဲၤနဲၤထဳတဲၤစွဲးသီတြီၤလၢ်ဝၤ, ပီၢ်ပွဲၤမဲၤဖံးလၤယီၤလၤကဲၤသံတဲၤ ဆီးခ့န့းတဲၤတၱၢ်တဲၤမှးအလ့ၢ်ပွဲၤ. အသကါထာ်သံကါမၱာ်ပီၢ်ပွဲၤ. 8အယဳၤသံဘၱာ်စဲာ်တပွဲၤတသကါထာ်သံကါနီး. 9အလါမၱာ်ကမံၤတကၱးဖဳးနဳၤဟဲးပြဲၤကဲၤသံဟၱးကျဲ. 10ယသၱာ်ဟဲတပွဲးထဲၢ်ဒဳတဲၤအီၣ်ပျဳာ်ဘၱာ်စဲာ်အပူၤသံကလၤကျၤကိာ်တပွဲးယဲၤ, ကၱာ်ကယါပၠၤအမဲၤကသီကရီၤသံကအီၣ် မၤတပွဲၤပွဲၤနဳၤ, စကဘဲာ်စံးရးတပွဲးနဳၤ.
11မၱာ်ယဲၤနဳၤ, သဲပူၤဝ့ၤတစီာ်, ယကသိၣ် အံာ်သီအံာ်မၤတဲၤဟိရကၱအဖ့းခံဒဳၣ်, ယကဘဲာ်လိၤမဲၤဆဲးညဲဝ့ၤမၤနဲၢ်. ခဳနဳၤယဳၤ ယကမဲၤဝ့ၤကနဳၤဒဳၣ်, တဲၤထာ်ဒ့ဒီၣ်ခရၱာ်အသဳာ်ပျီၤကအီၣ်ဝ့ၤတပွဲးဧါ. 12ယသးအဲးနံၤပၠၤထဲၢ်အမဲၤဒၱာ်ဒါ သံတစီာ်ကမဲၤပီၢ်ထိအကူဓူၤနဳၤ, ကၱာ်အံာ်ပီၢ်စဲာ် တစီာ်ကတဒူးဓူၢ်ဒူးထါလၤက့ၤအန့ၤနီးနဳၤ.
13သဲပူၤဝ့ၤတစီာ်, အစာ်ဘိ သံသၱာ်ဟဲအသရ့နဳၤ, သံဘဲာ်ယဳၤလ့ၤကဲၤဒဳတဲၤအီၣ်လှိအီၣ်လၤအလ့ၤနဳၤ. မၱာ်ဆီးအံာ်ပီၢ် စာ်ဘိထဲၢ် အကတ မဲၤ နံၤပီၢ်သံတဲၤမဲၤမီၤအံာ်အန့ၤနီးနဳၤ. မဲၤအံာ်လှဲးပီၢ်လၢ်ဝၤတပွဲၤကၱာ်တပွဲၤ ဒဳတဲၤ ဘဲာ်လီၢ်အတဲၤဖၱးတဲၤမဲၤအပူၤနဳၤ. 14မၤနဲၢ်ဒဳၣ်တဲၤမှဲးလၤအကျဳၤပူၤမှၱးတဲၤမှဲးလၤတမှိလီၤ. “ဘဲာ်လီၢ်ပီၢ်ပွဲၤဘိးထၱးနဲၤအစာ်ဘိနဘဲာ်လီၢ်လၤက့ၤနန့ၤနဳၤ.” 15သံကကဳၤကၱာ်ကယဲၤလၢ်ဝၤတပွဲၤ ကၱာ်တပွဲၤ, ကၱာ်ကသဖ့းသဝၢ်လှဲးလၢ်ဝၤဒဳၣ်, စာ်ပီၢ်, သံကမဲၤဟဲးဝၱၤဟဲးကဲတပွဲးလၢ်ဝၤလီၤ.
သးစါထံကၱာ်တဲၤဘဲာ်လီၢ်
16ယသးအဲးဒီၣ်မၱာ်ကယဳၤ, သံကဘဲာ်ထိးနၢ်အံာ်ကၱာ်မၤသးစါထံနဳၤ, သံလၤတ့ၢ်နံၢ်တဲၤမဲၤမီၤအံာ်အန့ၤအစဲတအီၣ်နီး. 17မၤနဲၢ်ဒဳၣ်, တဲၤမဲၤမီၤအ န့ၤမၱာ်အထာ်ဒ့ဒီၣ်သးစါထံ, သးစါထံမၱာ်အထာ်ဒ့ဒီၣ်တဲၤအနဳၤတဇဲၢ်နဳၤ, ကၱာ်တဲၤအယဳၤကၠံၢ်မဳၤမၱာ်အထာ်ဒ့ဒီၣ်လှဲးဆိးလၢ်ဝၤအခဳးအစဲ, သံတလိၤကိာ်သဲာ်ယိကဲာ်ထာ်သံတဲၤပဲၢ်လၤသးအအဲးတစီာ်နဳၤနီး. 18သံကဘဲာ်သဲလ့ၤအံာ်မၤသးစါထံနဳၤ, သံတအီၣ်ဘဲာ်ဒဳတဲၤမှဲးလၤအကါ လဲၢ်နီး.
19ဒဳတဲၤမဲၤမီၤန့ၤအပူၤနဳၤတဲၤအတအဲးတအီနီးအီၣ်ထာ်အမဳအမဳၤလီၤ. တဲၤလၤသူးလၤကမဲာ်, တဲၤခဳးရဳးခးရးကၱာ်ဖ့းဟၱးအတဲၤကၱကဲာ်မဲၤလှီတစီာ်နဳၤ. 20တဲၤသဘဲတဲၤယီၤတဲၤယၤ, တဲၤသူတဲၤကၠး, တဲၤထာ်ဒ့ဒီၣ်, တဲၤမဲၤထၱးမဲၤပဳၤ, တဲၤသးကျးသးဆဲ, တဲၤသဲးထဲးဒီးဒဲကၱာ်တဲၤသးအဲးနံၤဓဳၤ. တဲၤလၤမူၤလၤဖးကၱာ်တဲၤတလၤယံၢ် နီး. 21တဲၤဒီၣ်တၱၢ်ဒီၣ်တဲၤ, တဲၤအီမှူးအၣ်ပီး, တဲၤမှူးပီးထီးအၱးလဳစါစဲးနဳၤ. ခဳနဳၤယဳၤ ယအံာ်သဓံသံ, လှ့မီၤစဲခဳးနဳၤမၱာ်မၱာ်ယအံာ်သဓံထဳသံသံ. ပၠၤအမဲၤကနဳၤတစီာ်နဳၤကတနံၤဘဲာ်ကီကဘၱာ်စဲာ်အထံအက့ၤနီး.
22သးစါထံအတဲၤအံာ်လၤမၱာ်အစီးကျၱးလၤဆါ, တဲၤဘဲာ်လီၢ်, တဲၤမီၤတဲၤမၤ, တဲၤစဳးတဲၤချံး, တဲၤခီးသးဒီဝံၢ်သးဇဳၤ, တဲၤသဳးဝၱၤသးမီၤ, တဲၤအဲးတဲၤအီ, တဲၤတၱၢ်တဲၤမှး, 23တဲၤဆးလၤသဳးဆးလၤသး ကၱာ်တဲၤနဳၤတဲၤပဲၤလၤက့ၤတဲၤဖ့းတဲၤဟၱး. တဲၤမှဲးလၤဒၱာ်ဒါတဲၤအယဳၤတစီာ်တအီၣ်တပွဲးနီၤဟဳ. 24ပၠၤအဘဲာ်ကၠးခရၱာ်ယ့ၣ်ရှူးတစီာ်နဳၤ, ထးလၤကျဳၤသံအန့ၤဒဳတဲၤဖ့းတဲၤဟၱးကၱာ်တဲၤသးအဲးနံၤလဳစါစဲးထဳ. 25သးစါ ထံအံာ်ကဲၤဝၤတဲၤအီၣ်သမိအခဳးအစဲ, သးစါထံကလ့ၤအံာ်ဒီဧဲၤဝၤဒဳအလှီမီၢ်နဳၤ. 26ဝၤတဘဲာ်ပဲၢ်ထာ်ထိဝၤန့ၤ, မဲၤဓဳၤထာ်လှဲးလၢ်ဝၤ အသးနီးကၱာ်သးကျးသးဆဲလှဲးလၢ်ဝၤတပွဲၤကၱာ်တပွဲၤနီး.
Currently Selected:
ကလၤတံ 5: GBA
Highlight
Copy
Compare
Share
Want to have your highlights saved across all your devices? Sign up or sign in
Geba Roman New Testament © Bible Society of Myanmar, 2021.
