ကလၤတံ 4
4
1ယကဒီဆးဒီသံအလဝ့ၤတမဳၤဗ့ၤ, အမီၤနံၤဘဲာ်တဲၤအံာ်လၤတပွဲၤနဳၤ, စကနံၤဘဲာ်နီၣ်သီတဲၤကိမံၤထံတၤနှီနူၤ, စကဗံဆဲးဖဳးဝ့ၤမၤဒဳၣ် စတအီၣ်စီးကျၱးကၱာ်ဇိၤပွဲၤတပွဲၤနီး. 2ထိစဒ့ာ်ဘးအစာ်ဘိစပာ်အတဲၤသးအဲးနံၤအီၣ်နဳၤ, စအီၣ်ဘဲာ်ဝ့ၤအစာ်အံာ်ခွဲးအံာ်စဲာ်တစီာ်အကါလဲၢ်လီၤ. 3ခဳနဳၤယဳၤဝၤတဓဳၤဘးနှၱနီးယဳၤနဳၤ, ဝၤမၱာ်လၢ်ခဳးဆဳးဖြဳဆးဖြးအဇိၤအပွဲၤလီၤ. 4ပရၤဆါအခၠၱးဘဲာ်တပျာ်, ကဘၱာ်စဲာ်သဓဳလ့ၤစဖဳးအအီၣ်လၤကိာ်အမံၤမှူးတပွဲၤ, အီၣ်လၤကဲၤတဲၤမှဲးလၤအကါလဲၢ်, 5စာ်ဘိထဲၢ်စကမဲၤလှိထာ်ပၠၤအအီၣ်တဲၤမှဲးလၤအကါလဲၢ်တစီာ်ကၱာ်အကမဲၤဖၱထာ်ပီၢ်ဝၤအဘဲာ်မဲၤဖဳးတစီာ်နဳၤ.
6သံမၱာ်ကဘၱာ်စဲာ်အဖဳးအလံၤနဳၤလှၱထာ်ဖျီထာ်ကဲၤဒဳစတဲၤသဓဳလ့ၤစဖဳးအသးစါထံဒဳဝၤသးပူၤနဳၤ. သးစါထံထဲၢ်အယဳၤထာ်, “အးဘၤ, အပာ်” ကၱာ်အယဳၤမၱာ်အမဲၤဖၱထာ်သံတဲၤဖဳး. 7မဲၤကနဳၤဒဳၣ်, နတမၱာ်ပ့ၤဇိၤပွဲၤတပွဲၤနီး. နမၱာ်ကဲၤဖဳးတပွဲၤ, ကၱာ်ဘ့ာ်မ့ကဘၱာ်စဲာ်ကမဲၤဖၱထာ် နဲၤတဲၤဖဳးဒဳၣ်, စကအံာ်လၤကီနဲၤတဲၤအမီၤနံၤဘဲာ်စတဲၤအံာ်လၤက့ၤတစီာ်နဳၤ.
စီၤပီလူးအတဲၤဘဲာ်ရှဳကလၤတံဖဳးတစီာ်အနံၤခံ
8လှ့အအူဆူးနဳၤ သံတသၱာ်ဟဲကဲၤကဘၱာ်စဲာ်နီး, မၱာ်ဘၱာ်စဲာ်အလဝ့ၤထဲၢ်အတမၱာ်ဘၱာ်စဲာ်နီးတစီာ်အဇိၤအပွဲၤ. 9ပရၤဆါခဳနဳၤယဳၤသံအဳလါကဲၤကဘၱာ်စဲာ်, မၱတမၱာ်နီး ကဘၱာ်စဲာ်အဳလါကဲၤသံတခီ. သံကက့ၤဘးထၱးဇၤတဲၤထဲၢ်အခဳးဇ့ၤအါဇ့ၤကၱာ် အတမဲၤဇၤတၤတမံနီးတစီာ်အဇိၤအပွဲၤစာ်တဲၢ်. 10သံပဲၢ်ဓဳၤပဲၢ်မူၤကဲၤ မူၤနံၤမူၤသဲ, သံဒ့ာ်သံလှဲ တစီာ်နဳၤ. 11ယဘဲာ်ရှဳဘဲာ်မၤဇၱၢ်ကဲၤသံနံၤခံ. ယမဲၤတဲၤသံနံၤခံလဳစါစဲးတစီာ်မၱာ်အကဲာ်ထာ်ကဲၤတဲၤအနှးနှါလီၤတခီဧါ.
12သဲပူၤဝ့ၤတစီာ်, ယတၤမီၤဘဲာ်သံ, ယၢ်သိးပီၢ်ယဲၤအစာ်ဘိယမၱာ်အယၢ်သိးကဲၤ သံနဳၤ. လှ့အအူဆူးနဳၤသံတမဲၤဆဲသးကဲၤယဲၤ တပျါနီး. 13သံသၱာ်ဟဲတပွဲးထဲၢ်လှ့ယဒီထိး လၤနံၤသံအကါထၱးကဓူတပျာ် မၱာ်ဒဳတဲၤရွှံးတဲၤဆဲ အပူၤနဳၤ. 14သံတဒဲလၱၢ်ကဲၤထဲၢ်သံသးပျဲၢ်ကၱာ်သးကဲကဲၤဒဳယတဲၤဆဲအစဲနဳၤတကၱနီး, မၱာ်သံဖၱးနံၤကဲၤယဲၤအစာ်ဘိကဘၱာ်စဲာ်အပွဲၤဇဳၤနဳၤ, မဲၤအစာ်ဘိယဲၤမၱာ်ယ့ၣ်ရှူးခရၱာ်သဲန့ၤနဳၤ. 15ဘ့နဳၤအခဲသံသးလဳၢ်သးလၤအံာ်ဆိးတပွဲၤသဲနၱၢ်. ခဳနဳၤယဳၤတၤမဲၤကဲၤသံနဲၢ်. ယဝှိးဒါကဲာ်ထာ်တပွဲးပွ့သံကစၱးဝၱဖျီးလၤတ့ၢ်ဝှါသံကၢ်ဓူဖျဳးကၱာ်သံကအံာ်ယဲၤနဳၤ. 16ယဒီၣ်တဲၤအဘဲာ်မဲၤဖၱထာ်ကဲၤယဲၤသံဒ့ဒီၣ်ဧါ.
17တဲၤပၢ်ဝဲၢ်တဲၤကမဲာ်အီၣ်ထာ်ကိာ်ဒဳ စဲာ်တစီာ်သးအဲးစွံးနံၢ်သံ ဒဳတဲၤလဲၢ်ပၢ်သံကၱာ်ယဲၤ, စာ်ဘိထဲၢ်စဲာ်တစီာ်ကဖၱးနံၤသံနဳၤ. 18တဲၤစွံးနံၤပၠၤမၱာ်တဲၤအအဲးသဲာ်ယိတမဳၤ, ကၱာ်အကတမၱာ် ပီၢ်ထ့ယအီၣ်ကိာ်ဝ့ၤသံကါလီၤနီး. 19အဳယဖဳးယလံၤတ စီာ်, ယကခီးအံာ်ဘဲာ်တဲၤဖူဆဲဒဳတဲၤဖဳးဇ့ၤလၤအံာ်က့ၤသံတပျာ်ပ့ၤနဳၤ, ထိသံမၱာ်ခရၱာ်အဟိကလဲၤနဳၤ. 20ယသးအဲးအီၣ်ကိာ်သံကါခဳနဳၤယဳၤ, စာ်ဘိထဲၢ်ယကဒဲလၱၢ်ထာ်ယတဲၤ ပဲၢ် သဳးပဲၢ်သးသံခဳးနှဲးနှဲးမၱာ်တၤနဲၤနဳၤ. ယဘဲာ်ရှဳဘဲာ် မၤဇၱၢ်ကဲၤသံနံၤခံလီၤ.
တဲၤအဒိအဘဲာ်ကၠးနီၢ်ဟၤကၢ်ကၱာ်နီၢ်စၤရါ
21သံသးအဲးအီၣ်တဲၤမှဲးလၤအကါလဲၢ်ဧါ. မဲၤကနဳၤဒဳၣ်, ဆီးခ့န့းပီၢ်တဲၤမှဲးလၤဒီၣ်တၤနဲၤနဳၤ. 22အဒီၣ်မၱာ်, အစာ်ဘိသံကမဳၤထာ်နံၤနဳၤ, စီၤအၤဘြၤဟၣ်အဖဳးခဳအီၣ်ကၠံၢ်ပွဲၤ, တပွဲၤမၱာ်စဲာ်ကၱာ်ဇိၤမဳၤအဖဳး, တပွဲၤမၱာ်စဲာ်ကၱာ်အမံၤမှူးအီၣ်လှိအီၣ်လၤအဖဳး. 23ဇိၤမဳၤတပွဲၤမၱာ်အအီၣ်လၤစာ်ဘိအနဲၤနီၤနဳၤ. အမံၤမှူးအအီၣ်လှိအီၣ်လၤတပွဲၤမၱာ်အအီၣ်လၤကဲၤ အစာ်ဘိတဲၤအၣ်မါခးအံာ်အဓ့နဳၤ. 24အယဳၤမၱာ်မဲၤစာ်ဘိတဲၤထာ်ခဳးကါ နဳၤ. အမံၤမှူးကၠံၢ်ပွဲၤလၤကၱာ်တဲၤအဳလါဖျးလၤကၠံၢ်ဓဲ. အအူဆူးတပွဲၤအီၣ်ဒဳစံၤနါခီးလီခဳး ကၱာ်စဖဳးစလံၤတစီာ်မၱာ်ဇိၤဖဳးပွဲၤဖဳး, ထဲၢ်နီၢ်ဟၤကၢ်နဳၤ. 25မၤနဲၢ်ဒဳၣ် စံၤနါခီးလီမၱာ်အအီၣ်ဒဳက့ၤဧ့ရ့းနဳၤကၱာ်အမၱာ်ယရူၤရှလ့ၣ်အူးအဟိအကလဲၤထဲၢ်အမၱာ်ဇိၤပွဲၤအစာ်ဘိစဖဳးစလံၤတစီာ်နဳၤ. 26မဲၤနီၣ်သီဒဳၣ်, ယရူၤရှလ့ၣ်အူးအအီၣ်ဒဳမီၢ်ခဳးနဳၤမၱာ်အအီၣ်လှိအီၣ်လၤကၱာ်အမၱာ်ဝၤမဳၤမဳၤ. 27မၤနဲၢ်, စဲာ်စါထံဒီၣ်ကဲၤကယဳၤ,
“သဳးလဳၢ်သးလၤအံာ်ပီၢ်, နဲၤ, အမံၤမှူးထဲၢ်အဆီတဖဳး.
ကဲာ်ဧဳၤထာ်ပီၢ်ဒဳတဲၤသဳးလဳၢ်သးလၤအံာ်ကၱာ်တဲၤသးကနၢ်အံာ်အပူၤနဳၤ.
နဲၤထဲၢ်အဖူတဆဲတခါနီးတပွဲၤနဳၤ.
မၤနဲၢ်ဒဳၣ်, အဘဲာ်ပၢ်ဖျီးမံတပွဲၤအဖဳး အီၣ်အဲးဒဳၣ်လံကဲၤ မှဲအဖၱးစူးတပွဲၤနဳၤ” အဒီၣ်ကဲၤဓဳၤ.
28ခဳနဳၤယဳၤ, သံ, ယသဲပူၤဝ့ၤတစီာ်, သံမၱာ်ကဲၤတဲၤအၣ်မါခးအံာ်အဖဳးအစာ်ဘိစီၤအံၤစဲးနဳၤ. 29ကၱာ်အပံၤစဖဳးအအီၣ်လၤအစာ်ဘိအနဲၤနီၤတပွဲၤမဲၤနဳၤမဲၤဇၱၢ်ကဲၤအပံၤစဖဳးအအီၣ်လၤကၱာ်သးစါထံအခီ, ခဳနဳၤယဳၤတဲၤမဲၤအန့ၤကနဳၤလီၤလီၤ. 30ပရၤဆါဒဳၣ်, စဲာ်စါထံဒီၣ်စာ်တဲၢ်. “နှးဟဲးဖျီးမံပီၢ်ဇိၤမဳၤကၱာ်ဇိၤဖဳး. ဇိၤမဳၤအဖဳးနဳၤ နံၤဘဲာ်ပျဳာ်ဘဲာ်အမံၤမှူးအအီၣ်လှိအီၣ်လၤတပွဲၤအဖဳးတဲၤအံာ်လၤက့ၤတစီာ်နဳၤနီး” နဳၤဧါ. 31မဲၤကနဳၤအခဳးအစဲ, ယသဲပူၤဝ့ၤတစီာ်, ဝၤ တမၱာ်ဇိၤမဳၤတပွဲၤအဖဳးအလံၤနီး, မၱာ်အမှဲအအီၣ်လှိအီၣ်လၤတပွဲၤအဖဳးတခီ.
Currently Selected:
ကလၤတံ 4: GBA
Highlight
Copy
Compare
Share
Want to have your highlights saved across all your devices? Sign up or sign in
Geba Roman New Testament © Bible Society of Myanmar, 2021.
