အ့ဖ့းစူး 6
6
ဖဳးလံၤကၱာ်မဳၤပာ်တစီာ်
1အဖဳးတစီာ်, ဆီးခ့န့းပီၢ်မဳၤပာ်အလ့ၢ်ဒဳ ဘၱာ်စဲာ်အပူၤနဳၤ, မၤနဲၢ်ဒဳၣ် တဲၤအယဳၤမၱာ်တဲၤ အဝၱၤအအဲး ဒဳသံကမဲၤဘဲာ်နဳၤ. 2“ဒဳဘဲာ်ယး ဘဲာ်ပီၢ်နမဳၤကၱာ်နပာ်” မၱာ်တဲၤမှၤလၤအခၣ်ထၱး ကဓူ အအီၣ်ဒဳစဲာ်စါထံအပူၤထဲၢ်အအီၣ်ကၱာ်တဲၤ အဳလါ, 3“သံကမဲၤသၱာ်အၣ်ဇၤ, ကၱာ် သံကအီၣ်ခိးအီၣ်နၤကီဒဳထံက့ၤ, ထဲၢ်ကဘၱာ်စဲာ်အံာ် လၤနံၤသံတဘဲာ်အပူၤနဳၤ.”
4မဳၤပာ်တစီာ်, မဲၤပီၢ်မဲး စာ်ဘိထဲၢ်သံဖဳး တစီာ်အသးကဓဳၤထာ်နဳၤမဲး, မၱာ်ဘဳာ်အံာ်ဓဳၤထာ် ပီၢ် စဲာ်အစာ်ဘိ ကဘၱာ်စဲာ်အတဲၤသိၣ်တဲၤသီ ကၱာ်အကျဲးသအီအပူၤနဳၤ.
ဇိၤပွဲၤကၱာ် အဘၱာ်စဲာ်
5တဲၤမဲၤဖဳးတစီာ်, ဆီးခ့န့းပီၢ် သံဘၱာ်စဲာ်တစီာ်အလ့ၢ်ဒဳတဲၤရှံးဆါသးကနၢ်အပူၤနဳၤ. မဲၤပီၢ်ဒဳ တဲၤသဳးတနၢ်သးတနၢ်အပူၤ, အစာ်ဘိသံမဲၤ ခရၱာ်အတဲၤမဲၤအခီနဳၤ. 6မဲၤပီၢ်မဲး ပွ့းစကစာ် ထၱးကၱာ် ဘဲာ်သဳးဘဲာ်သးအနံၤခံလီၤမဲး, မၱာ်မဲၤ လဳၢ်သဳးလဳၢ်သးပီၢ်တဲၤထဲၢ်အဘဲာ်သးကဘၱာ်စဲာ် ကၱာ်အစာ်ဘိခရၱာ်အတဲၤမဲၤဖဳးအခီနဳၤ. 7မဲၤပီၢ်တဲၤမဲၤဖဳးအတဲၤမဲၤ ဒဳတဲၤသးလဳၢ်သးလၤအပူၤ, အစာ်ဘိသံ မဲၤကဘၱာ်စဲာ်အတဲၤမဲၤနဳၤ. 8သံ သၱာ်ဟဲတပွဲး ထဲၢ်ကဘၱာ်စဲာ် ကအံာ်ဆိးအံာ်လှဲ ကဲာ်ကိအပွဲၤ, တဲၤမဲၤဖဳးမၱာ်ဝၱၤ, ပွဲၤအီၣ်လှိမၱာ်ဝၱၤ, ဒဳဝၤတဲၤဖၱးတဲၤမဲၤ အဝၱၤအအဲးအစဲနဳၤ.
9အဘၱာ်စဲာ်တစီာ်, မဲၤနံၤပီၢ် သံဇိၤသံပွဲၤ အစာ်ဘိကနဳၤအခီ, ကၱာ်မဲၤနဳၤမဲၤဇၱၢ်ပီၢ်မဲးစဲာ်တစီာ်မဲး. သံကၱာ်သံဇိၤတစီာ်အဘၱာ်စဲာ် မၱာ်အအီၣ် ဒဳမီၢ်ခဳးတပွဲၤလီၤနဳၤ.
ကဘၱာ်စဲာ်အတဲၤဒဳးအကြဳၢ်အဘူ
10တဲၤယၱၢ်ဘဲာ်အလ့ၤကါကဓူမၱာ်, အီၣ်ပ့ ထာ်ကၱာ်ပီၢ်တဲၤခဳးတဲၤအါ ဒဳဘၱာ်စဲာ်အပူၤ, ကၱာ်စတဲၤစိသလဲအခဳးအအါအပူၤနဳၤ. 11ကိထာ်သီး ထာ်ပီၢ် ကဘၱာ်စဲာ်အံာ်လၤနံၤသံ တဲၤဒဳးအကြဳၢ် အဘူသဒဲကြဳၢ်, စာ်ဘိထဲၢ် သံကခးဒၱာ်ဒါအံာ်ဇၤ ပီၢ်သံန့ၤ မဳၤဒဲးလၱးအတဲၤလှီးလှၱလှီးပျဲးတစီာ်နဳၤ. 12မၤနဲၢ်ကဒီၣ်ဓဳၤဒဳၣ်, ဝၤတဒဳးတဖၠးတဲၤကၱာ် ပၠၤနီး, မၱာ်ဝၤဒဳးသးအကၱကဲာ် ထဲၢ်အစိသလဲအီၣ် ဒဳမီၢ်ခဳး, အအူအံာ်ထံက့ၤတစီာ်, အခဳးအန့ၤ တစီာ် ကၱာ်လၢ်ခဳးအစိသလဲ ထဲၢ်အမဲၤအီၣ်ထာ် တဲၤခံးတဲၤနဲၤအယဳၤတစိၤတစီာ်လီၤ. 13မဲၤ ကနဳၤဒဳၣ်, ကြဳၢ်ထာ်ဘူထာ်ဘူပီၢ်သံန့ၤ တဲၤကြဳၢ် တဲၤဘူထဲၢ် ကဘၱာ်စဲာ်အံာ်လၤသံခဳနူၤယဳၤ, ကၱာ်ဒီ ဘ့မူၤနံၤ အကၱကဲာ်မဲၤလှီ လ့ၤဓဳၤထၱးသံနဳၤ, သံခး ရှံဒ့ဒီၣ်ရီၢ်ခဲးကဇၤပီၢ်, ကၱာ်ဘ့တဲၤဒဳးတဲၤဖၠးဝှါ အခၠၱးနဳၤ, သံကဆီထဳးအီၣ်ဇၤဝ့ၤပီၢ်အနံၤခံနဳၤ.
14ဆီထဳးအီၣ်နှဲး, ကၱာ်ကီးဝဲၢ်ကျဳၤ မှ့းတ့း ကျ့းပီၢ်တဲၤတၱၢ်တဲၤမှးအနှၱယၢ်ပံၤသံယၤဓ့ၢ်လီၤ, ကၢ်ထာ်တဲၤသဳးတနၢ်သးတနၢ်အသးမီၢ်တဒါ, 15ကီးထာ်ပီၢ်တဲၤသးလဳၢ်သးလၤအံာ် အဘဲာ် ကၠးတဲၤစဳးတဲၤချံးအခၣ်တကီး. 16ဒဳၣ်လံကၱာ် အနဳၤ, စာ်ဘိထဲၢ်သံကမဲၤလၤပၱၢ်ကဲာ်ထာ်ပီၢ် မှၱးအပျ့ၤ ထဲၢ်မဳၤဒဲးလၱးခဲးအံာ်သံနဳၤ, အီၣ် အံာ်သဲာ်ယိပီၢ်သံစူ ခီးပူၤတဲၤဘူၣ်တဲၤနဲၢ်အကဓၢ်, 17ကၱာ်ပျိာ်ထာ်ပီၢ်တဲၤယဳၤက့ၤစာ်က့ၤ အခဳးပျဳာ်ထးလး, ကၱာ်ပိာ်ကျဳၤအံာ်မှ့း ကဘၱာ်စဲာ် အလ့ၢ်အဝှဲးအဒာ်ဆ့ ထဲၢ်သးစါထံအံာ်လၤနဲၤနဳၤ. 18မဲၤတဲၤအယဳၤလဳစါစဲးဒဳတဲၤတၤသဘဲအပူၤ, ကၱာ်တၤပီၢ်ကဘၱာ်စဲာ်အတဲၤမဲၤဇဳၤ. သဘဲထာ်ပီၢ် အသဲာ်ယိ, အစာ်ဘိသးစါထံသဲသံအခီနဳၤ. ဒဳ တဲၤယဳၤအဝၱၤအကဲနဳၤ, ဆီးမီတိၤအံာ်ကၱာ်ထဳးဇ့ၤ လၤပီၢ်မဲး သံခဳးသံအါမဲး. တၤသဘဲထာ် သဲာ် ယိပီၢ်ကဘၱာ်စဲာ်အပၠၤစါထံ လဳစါစဲးအနံၤခံ. 19တၤသဘဲထာ်ပီၢ်ယနံၤခံ, စာ်ဘိထဲၢ်ကဘၱာ်စဲာ် ကအံာ်သၱာ်ဟဲပီၢ်ယဲၤ ဘ့ယအီၣ်ပြးနှဲးတီၤလီၤ ယန့ၤအကယၱၢ်ဘဲာ်နဳၤ, ဒဳၣ်ယကဒီဆးသၱာ်ဟဲ ဇၤပီၢ်ပၠၤ တဲၤသးလဳၢ်သးလၤအံာ်အတဲၤအီၣ်ဟူၣ် အီၣ်ဘံာ်အဝၱၤအကဲ ဒဳတဲၤသးခူသးဟဲအပူၤနဳၤ. 20ဒဳတဲၤသးလဳၢ်သးလၤအံာ်အဝၱၤအကဲအနံၤ ခံနဳၤ, ယမၱာ်အမဲၤဇဳၤတဲၤ, နီၣ်သီနှီ နူၤခဳနူၤယဳၤ, ယအီၣ်ကဲၤတဲၤကၱတၱၢ်ပူၤ. သဘဲထာ်ပီၢ်ယနံၤခံ စာ်ဘိထဲၢ် ယကဒီဆးခူသကျးဇၤပီၢ်တဲၤသးလဳၢ် သးလၤအံာ်အဝၱၤအကဲ အစာ်ဘိယမီၤဒီၣ်နဳၤ.
တဲၤနှူဆဲးအကူဓူၤလါ
21သဲပူၤဝ့ၤထဲၢ်ယဘဲာ်လီၢ်စီၤတူဃံၤကူး, ထဲၢ်အမဲၤဇဳၤယဲၤ ကဘၱာ်စဲာ်အတဲၤဖၱးတဲၤမဲၤ ဒဳ တဲၤမဲၤတၱၢ်မဲၤမှးအပူၤတပွဲၤ ကဒီဆးကီသံယဝၱၤ ယကဲ, စာ်ဘိထဲၢ်သံကသၱာ်ဟဲပီၢ်တဲၤမဲၤအန့ၤ ကၱာ်ယဲၤလဳစါစဲးတစီာ်နဳၤ. 22ကနဳၤအခဳးအစဲ, ယသဲလ့ၤကီစဲာ် ဒဳသံအီၣ် စာ်ဘိထဲၢ် စကဒီဆး သံ ဝၤဝၱၤဝၤကဲလဳကျံးကျး ကၱာ်အံာ်ခဳးအံာ်အါပီၢ် သံအနံၤခံနဳၤ.
23ပာ်ဘၱာ်စဲာ် ကၱာ်ဘၱာ်စဲာ်ယ့ၣ်ရှူးခရၱာ် ကအံာ်လၤဒီဧဲၤ အဘူၣ်စဲာ်လဳစါစဲးတစီာ် တဲၤစဳးတဲၤချံး, တဲၤဘဲာ်လီၢ်သီၣ်ကျဲကၱာ်တဲၤ ဘူၣ်တဲၤနဲၢ်. 24ကဘၱာ်စဲာ်အလှူၣ်အတါ ကလၤ ဘဲာ်ဒီဧဲၤ ပၠၤထဲၢ်အဘဲာ်လီၢ် ဝၤဘၱာ်စဲာ် ယ့ၣ်ရှူးခရၱာ် ဒဳတဲၤဘဲာ်လီၢ်သဲာ်ယိလၤထူလၤပျဳၤ တစီာ်နဳၤ.
Currently Selected:
အ့ဖ့းစူး 6: GBA
Highlight
Copy
Compare
Share
Want to have your highlights saved across all your devices? Sign up or sign in
Geba Roman New Testament © Bible Society of Myanmar, 2021.
