အ့ဖ့းစူး 5
5
တဲၤအီၣ်သမိဒဳတဲၤလှၱကျဲ
1အစာ်ဘိ သံမၱာ်ကဘၱာ်စဲာ်အဖဳးထဲၢ်စဘဲာ်လီၢ်တစီာ်နဳၤ, ဝူၤသဲတဲၤပၤပီၢ်စာ်ဘိထဲၢ်သံ ကလါကၱာ်စဲာ်နဳၤ. 2စာ်ဘိခရၱာ်ဘဲာ်လီၢ်ကဲာ် ကၱာ်စအံာ်လၤစသးသမိကနံၤခံ အစာ်ဘိတဲၤ လှူၣ်နှူဝံာ်ထဲၢ်အဘဲာ်ကဘၱာ်စဲာ်အသးအခီနဳၤ, အီၣ်သမိအံာ်ပီၢ်တဲၤဘဲာ်လီၢ်သီၣ်ကျဲ.
3အစာ်ဘိသံမၱာ် ကဘၱာ်စဲာ်အပၠၤခွံဖဳးတစီာ် အခီ, တဲၤလၤသူးလၤကမဲာ်မၱာ်ဝၱၤ, တဲၤဟိးတဲၤ ဟီမၱာ်ဝၱၤ, တဲၤသးနံၤဓဳၤမၱာ်ဝၱၤ, တမီၤပၤထာ်အံာ် ဒဳသံလီၤမီၤပူၤနီး. 4တဲၤယၱၢ်ဘဲာ်ထဲၢ် အတမီၤ ဒီၣ်နီး, အစာ်ဘိတဲၤစၱးပိးစၱးသဳ, တဲၤဒီၣ် ကဲဒီၣ်အိး, တဲၤလိၢ်အိလိၢ်အးတစီာ်နဳၤ ဒီၣ်အံာ် ပီၢ်မဲး. မၱာ်ထါထာ်အံာ်ပီၢ်ကဘၱာ်စဲာ်တခီ. 5ပၠၤထဲၢ်အလၤသူးလၤကမဲာ်, အဟိးတဲၤဟီတဲၤ ကၱာ်အတဲၤသးနံၤဓဳၤတစီာ်နဳၤတနံၤဘဲာ်ဇၤခရၱာ် ကၱာ်ကဘၱာ်စဲာ်အထံအက့ၤတပွဲနီး. (တဲၤသးနံၤ ဓဳၤမၱာ်တဲၤသဘဲတဲၤယီၤတဲၤယၤတမဳၤလီၤ.)
6အံာ်ပီၢ်မဲးပၠၤလှီးပျဲးနံၤသံ ဒဳတဲၤယၱၢ်ဘဲာ် အနှးနှါနဳၤမဲး. မၱာ်တဲၤတစီာ်ယဳၤအစဲ, ကဘၱာ်စဲာ် အတဲၤသဲးထဲး ကလၤဘဲာ်ကီ ပၠၤအတဆီးခ့န့းစလ့ၢ်နီးတစီာ်နဳၤ. 7ကနဳၤအခဳးအစဲ, မဲၤဘဲာ်ကၠး မဲးသံန့ၤကၱာ်ပၠၤအစာ်ဘိကနဳၤတစီာ်နဳၤမဲး. 8လှ့ အအူဆူးနဳၤ သံသဲန့ၤမၱာ်ကဲၤအအီၣ်တဲၤခံးကျဲ, ပရၤဆါ, စးထာ်ဘ့သံမၱာ်ကဘၱာ်စဲာ်အပၠၤခွံဖဳး နဳၤ, သံမၱာ်ကဲၤပၠၤအအီၣ်တဲၤလှၱကျဲ. မဲၤကနဳၤဒဳၣ်, အီၣ်ပီၢ်အစာ်ဘိ ပၠၤအဘဲာ်ကၠးကၱာ်တဲၤလှၱဖဳးအခီနဳၤ. 9မၤနဲၢ်, တဲၤလှၱနဳၤအအံာ်ထာ်ကယါမၱာ် တဲၤအဝၱၤအအဲး, တဲၤတၱၢ်တဲၤမှး ကၱာ်တဲၤအဘဲာ် အပီၤကိမံၤထံတၤလီၤ. 10ဝူၤသဲတဲၤပၤမဲၤပီၢ် တဲၤမဲၤထဲၢ်အဘဲာ်ကဘၱာ်စဲာ်အသး. 11မဲၤကိာ် ပီၢ်မဲးတဲၤခံးတဲၤနဲၤအတဲၤမဲၤ, ထဲၢ်အတဝၤနဲၤနီး တစီာ် အစာ်ဘိပၠၤလဝ့ၤမဲၤနဳၤမဲး. မၱာ်မဲၤလၱၢ်ထာ် ပီၢ်ဒဳတဲၤလှၱကျဲနဳၤတခီ. 12(တဲၤထဲၢ်ပၠၤတစီာ် မဲၤဒဳတဲၤအဟူၣ်အဇီၤနဳၤ, ကယၱၢ်ဘဲာ်ထာ်အဝၱၤ အကဲမၱာ်အမီၤသါဝၢ်သးပျဲၢ်တပွဲး.) 13ကၱာ်ဒီ ကယါတဲၤထဲၢ် အဘဲာ်လ့ၤအံာ်တဲၤလှၱကျဲ တစီာ်နဳၤ, အန့ၤဒဲလၱၢ်ထာ်လှၱပျါတပွဲး. 14မၤနဲၢ်, တဲၤတမဳၤမဳၤဒဳ အဘဲာ်ဒဲလၱၢ်လှၱလှၱပျါပျါနဳၤ, ကဲာ် ထာ်တပွဲးတဲၤလှၱ. ကနဳၤအခဳးအစဲ, တဲၤဒီၣ်အီၣ်,
အဳ, ပၠၤအဆီးမံ, ဖိးသနဲးပီၢ်ခး,
ဝဲၢ်ထဳးပီၢ် ဒဳတဲၤသံအပူၤနဳၤ.
ခရၱာ်ကအံာ်လှၱထာ်အတၤလှၱ ဒဳနလီၤနဳၤ.
15ကနဳၤအခဳးအစဲ, ဆီးအံာ်ဝဳၢ်အံာ်ပီၢ်သံ တဲၤအီၣ်သမိ. မဲၤပီၢ်မဲးအစာ်ဘိ ပၠၤအကဓူၤနၤပါ တစီာ်မဲၤနဳၤမဲး, မၱာ်အီၣ်အံာ်ပီၢ်တဲၤဇၤတဲၤပျၤ. 16တဲၤအခၠၱးအခးကၱာ်တဲၤခွဲးတဲၤယာ်ထဲၢ်နနံၤ ဘဲာ်အရါနဳၤ, မဲၤအံာ်ပီၢ်စဲာ်တဲၤအဲးအနံၤခံ. မၤနဲၢ်, မူၤနံၤ အယဳၤတစီာ်မၱာ်အကၱကဲာ်မဲၤလှီ လီၤ. 17မဲၤကနဳၤဒဳၣ်, မဲၤနံၤကူၤဓံပ့ၤပီၢ်မဲးသံ န့ၤမဲး, မၱာ်ဝၢ်လှဲး သၱာ်ဟဲပီၢ် ကဘၱာ်စဲာ်အတဲၤ သးအဲးနံၤသံကမဲၤမၱာ်တၤနဲၢ်နဳၤ.
18မဲၤအံာ်ပီၢ်မဲးတဲၤအီမှူးအၣ်ပီး ထဲၢ်အမဲၤကဲမဲၤအိးသံနဳၤမဲး, မၱာ်အံာ်ပီၢ်သးစါထံပ့ထာ် သံသးပူၤ. 19ယၱၢ်ဘဲာ်ထၱးလှဲးပီၢ်လၢ်ဝၤ စဲာ် ထါထာ်အံာ်အတဲၤယၱၢ်ဘဲာ်, တဲၤသါပိၢ်ထါအံာ် ကၱာ် တဲၤကီၢ်အံာ်ထါအံာ်အတဲၤယၱၢ်ဘဲာ်, ဒဳသဳး သးအတဲၤစါတဲၤထံအပူၤနဳၤ. 20ဒဳဝၤဘၱာ်စဲာ် ယ့ၣ်ရှူးခရၱာ်အမံၤအပူၤ, ကီၢ်အံာ်ထါအံာ် ကဘၱာ် စဲာ်ပာ် ဒဳတဲၤလဳစါစဲးအပူၤအသဲာ်ယိနဳၤ.
အမှဲကၱာ်အဝၤ
21တပွဲၤကၱာ်တပွဲၤ, ခးဟိခးယီၤလှဲးပီၢ် လၢ်ဝၤ ဒဳတဲၤဒဳတဲၤယးခရၱာ်အပူၤနဳၤ.
22အမှဲတစီာ်, ခးဟိခးယီၤပီၢ်သံဝၤအစာ်ဘိ သံခးဟိခးယီၤသံဘၱာ်စဲာ်အခီနဳၤ. 23မၤနဲၢ်, အဝၤတစီာ်အီၣ်ကၱာ်တဲၤစိသလဲဒဳ အမှဲ အခဳး, အစာ်ဘိခရၱာ် အီၣ်ကၱာ်တဲၤစိသလဲဒဳ တဲၤအီၣ်ပျဳာ်အခဳးအခီနဳၤ. ခရၱာ်မဲၤလှိထာ်က့ၤတဲၤ အီၣ်ပျဳာ်, ထဲၢ်အမၱာ်စန့ၤဘၱစဲာ်နဳၤ. 24ကနဳၤအခဳးအစဲ, မှဲတစီာ်ကဘဲာ် ခးဟိခးယီၤပ့ထာ်ဇီၤ ထာ်အဝၤ, အစာ်ဘိတဲၤအီၣ်ပျဳာ် ခးဟိခးယီၤ ခရၱာ်အခီနဳၤ.
25အဝၤတစီာ်, ဘဲာ်လီၢ်ပီၢ်သံမှဲ အစာ်ဘိ ခရၱာ်ဘဲာ်လီၢ်အတဲၤအီၣ်ပျဳာ် ကၱာ်အံာ်လၤကဲအသးအခီနဳၤ. 26စမဲၤကဲၤကယဳၤ မၱာ်အစာ်ဘိ စကလဲၢ်စါထံ တဲၤအီၣ်ပျဳာ်ဒဳကဘၱာ်စဲာ်အနံၤခံ, ဒဳ ကဘၱာ်စဲာ်အလ့ၢ်အဝှဲး ဘ့စဝှူစဘါကဲအံာ်ဝှါထံ အလ့ၤကါ, 27စာ်ဘိထဲၢ်စကနံၤဘဲာ်စနံၤခံ တဲၤအီၣ်ပျဳာ် ထဲၢ်အဝၱၤအမီၤ, အတပဲးအဲးပအး စၱဝၱၢ်စါဝၢ်နီး, အတတံးတြူၤတၱးဖၱနီး, အပျၱအစါလဳစါစဲး, ကၱာ်အဘဲာ်ဒီၣ်ဘဲာ်ဆးအလ့ၤတအီၣ် နီးနဳၤ. 28အဝၤတစီာ်တးကၱာ်စဘဲာ်လီၢ်စမှဲ အစာ်ဘိစဘဲာ်လီၢ်လၤက့ၤစန့ၤအခီနဳၤ. ပၠၤထဲၢ် အဘဲာ်လီၢ်အမှဲ မၱာ်အဘဲာ်လီၢ်လၤက့ၤအန့ၤ ဘၱစဲာ်လီၤ. 29(ပၠၤထဲၢ်အတဝဲၢ်တဆဲအန့ၤ ဘၱစဲာ်နီး အီၣ်ပီၢ်တပွဲၤပွဲၤဧါ. မၱာ်စအံာ်အၣ်အံာ် အီ, ဝဳၤအံာ်ကဲာ်အံာ်စန့ၤ အစာ်ဘိ ခရၱာ်မဲၤနံၤ အတဲၤအီၣ်ပျဳာ်အခီနဳၤလီၤ. 30မၤနဲၢ်, ဝၤမၱာ် အအီၣ်ဝဲၢ်ခရၱာ်အန့ၤဘၱစဲာ်အလီၤတစီာ် လီၤ.) 31အစာ်ဘိတဲၤဝှ့းလၤအီၣ်, “ကယဳၤအခဳး အစဲ, အမံၤခဳကဟဲးပၢ်အမဳၤအပာ် ကၱာ်လဲၢ်ပျဳာ် အန့ၤအမှဲ, ကၱာ်ပၠၤကၠၱၢ်ပွဲၤကကဲာ်ထာ်ကီ တဲၤန့ၤ ဘၱစဲာ်တပွဲၤလီၤ.” 32ယဒီၣ်ဇၤ တပွဲးဒဳ တဲၤ တၱၢ်တဲၤမှးအအီၣ်ဟူၣ်အီၣ်ဘံာ် ဘဲာ်ဒဲလၱၢ်ထာ် ဒဳတဲၤ ဝှ့းလၤယဳၤမၱာ် အဘဲာ်ကၠးခရၱာ်ကၱာ်အတဲၤ အီၣ်ပျဳာ်နဳၤ. 33ပရၤဆါ, မၱာ်အဘဲာ်ကၠးသံ တပွဲၤကၱာ်တပွဲၤလီၤ. အဝၤကိအပွဲၤဘဲာ်ဘဲာ် လီၢ်အမှဲအစာ်ဘိ စဘဲာ်လီၢ်လၤ က့ၤစန့ၤနဳၤ, ကၱာ်အမှဲကိအပွဲ ဘဲာ်ဒဳ ဘဲာ်ယးဘဲာ်အဝၤလီၤ.
Currently Selected:
အ့ဖ့းစူး 5: GBA
Highlight
Copy
Compare
Share
Want to have your highlights saved across all your devices? Sign up or sign in
Geba Roman New Testament © Bible Society of Myanmar, 2021.
