အ့ဖ့းစူး 4
4
တဲၤန့ၤဘၱစဲာ်တပွဲၤလီၤ
1ယဲၤ, ထဲၢ်အလၤတ့ၢ်တဲၤကၱတၱၢ်ပူၤဒဳအမဲၤဘၱာ်စဲာ်အတဲၤမဲၤအခဳးအစဲတပွဲၤယဳၤ, အံာ်ခဳးအံာ်အါသံ စာ်ဘိထဲၢ် သံကမဲၤထာ်ယၱၤသံ တဲၤအီၣ်သမိအတီၤ, စာ်ဘိကဘၱာ်စဲာ်ပဲၢ်လၤအခီ ဘ့စယဳၤသံအခၠၱးနဳၤ. 2ဆးလၤသဲာ်ယိပီၢ်သံ န့ၤ, အီၣ်အံာ်ပီၢ်တဲၤဘၱာ်တဲၤယူၢ် ကၱာ်တဲၤခီးသး ဒီဝၱၢ်သးဇိၤ. ဒဲလၱၢ်ပီၢ်သံတဲၤဘဲာ်လီၢ်လှဲးလၢ်ဝၤ တပွဲၤကၱာ်တပွဲၤ ဒဳတဲၤခီးသးဒီအပူၤနဳၤ. 3ဖၱးကျဳၤမှ့းပီၢ်တဲၤယံၢ်တဲၤဒွါ ဒဳကဘၱာ်စဲာ်အသး အံာ်လၤသံတဲၤစဳးတဲၤချံးအနံၤခံ ထဲၢ်အဘိာ်ကျဳၤ စဳကျဳၤပျဳာ်သံနဳၤ. 4ဝၤမၱာ်န့ၤဘၱစဲာ်တပွဲၤလီၤ, ဝၤအီၣ်အံာ်ကဘၱာ်စဲာ်အသးတမဲလီၤ, အစာ်ဘိ ကဘၱာ်စဲာ်ယဳၤကဲၤကဲာ်ဒဳ တဲၤမူၤလဲၢ်ဆးရှံတမဳၤ လီၤအနံၤခံနဳၤ. 5ကဘၱာ်စဲာ်အီၣ်တပွဲၤလီၤ, တဲၤဘူၣ်တဲၤနဲၢ်မၱာ်တမဳၤလီၤ, တဲၤဖဳးစူထံမၱာ် တမဳၤလီၤ, 6ကဘၱာ်စဲာ်မၱာ်ပၠၤလၢ်ခဳးဖဳးလဳစါစဲး အပာ်တပွဲၤလီၤ, ထဲၢ်အအူအံာ်တဲၤလဳစါစဲး, အဒဲလၱၢ်ထာ်အတဲၤမဲၤဒဳပၠၤကိအပွဲၤအပူၤ, ကၱာ် အအီၣ်ဒဳပၠၤကိအပွဲၤအပူၤနဳၤ.
7ဝၤနံၤဘဲာ်တဲၤအံာ်လၤအစီးကျၱးလၤဆါ ဒဳခရၱာ်အံာ်လၤနံၤကဲၤဝၤတပွဲၤတပွဲၤလၤဓူၢ်နဳၤ. 8အစာ်ဘိစဲာ်စါထံဒီၣ်,
“ဘ့စလ့ၤထာ်ဒဳတဲၤလ့ၤအထာ်ယၱၤကဓူအခၠၱးနဳၤ,
စလ့ၤယဳၤအံာ်အဘဲာ်ဖီးဘဲာ်စဳအီၣ်အဲးအီးအိးဒဳး,
စအံာ်ကဲၤပၠၤတစီာ်တဲၤအံာ်လၤ.”
9ဘၱာ်စဲာ်ထာ်ဒဳအလ့ၤထာ်ယၱၤကဓူနဳၤ, မၱာ် တၤနဲၢ်. အထာ်ပဳၤမၱာ်အအူဆူးဘၱာ်စဲာ်လ့ၤလၤဒဳ လၢ်ခဳး, ထဲၢ်တဲၤလ့ၤအလၤယီၢ်ကဓူနဳၤ. 10မဲၤ ကနဳၤဒဳၣ်, ပၠၤထဲၢ်အလၤတပွဲၤနဳၤမၱာ်တပွဲၤလီၤ, ထဲၢ်အလ့ၤထာ်ဒဳတဲၤလ့ၤအထာ်ယၱၤဒဳၣ်လံ မီၢ်ခဳးတပွဲၤနဳၤ, စာ်ဘိထဲၢ်အကမဲၤပ့ထာ်တဲၤလဳ စါစဲးအနံၤခံလီၤ. 11စဲာ်, ထဲၢ်အအံာ် “ပၠၤလၢ် ခဳးဖဳးတဲၤအံာ်လၤ” တပွဲၤနဳၤ, အံာ်လၤနံၤကဲၤ ပၠၤတစီာ်စီာ် အကမဲၤအပျဲၢ်အဘီၣ်, တစီာ်စီာ်အကမဲၤဝံအတဲၤမဲၤ, တစီာ်စီာ်မၱာ်အကဒီဆးအံာ်ပၠၤ တဲၤသးလဳၢ်သးလၤအဝၱၤအကဲ, အလဝ့ၤတစီာ် မၱာ်တဲၤအီၣ်ပျဳာ်ဆရၣ် ကၱာ်ဆရၣ်သဲာ်လှိတဲၤလီၤ. 12စမဲၤတဲၤအယဳၤမၱာ်စာ်ဘိထဲၢ်စကပြးနှဲးတီၤ လီၤ ကဘၱာ်စဲာ်အပၠၤလဳစါစဲး အကမဲၤခရၱာ်အတဲၤခၱတဲၤပွဲၤအတဲၤမဲၤကၱာ် ကမဲၤလ့ၤထာ်လ့ၤထိ ခရၱာ်အန့ၤဘၱစဲာ်အနံၤခံနဳၤ. 13မဲၤကနဳၤဒဳၣ်, ဝၤ လဳစါစဲးကလဲၢ်ပျဳာ်ထာ်ကီဝၤနဲၤဒဳတဲၤဘူၣ်တမဳၤ လီၤအပူၤ ကၱာ်တဲၤသၱာ်ဟဲလၤတံၤ ကဘၱာ်စဲာ် အဖဳးအပူၤ, ဝၤကဖၱထာ်ကီပၠၤအဓဳၤထာ်ပွ့ၤထာ်, ကၱာ်ထိးထာ်ထာ်ဘးကီခရၱာ်အတဲၤပ့ထာ်ဇီၤထာ် အနှဲး ဒါနဳၤ. 14အနဳၤတပျာ်, ဝၤတမၱာ်ပ့ၤအပံၤ စဖဳးထဲၢ်အဘဲာ်စွံးတဝ့ၤဝၢ်ကၱာ်မှီးတဝၱၢ်တဝ့ၤ အံာ်ဝၤဒဳအလှီးအပျဲးတဲၤတစီာ်အကလံၤကျဲ, ထဲၢ်အသဲပၠၤဒဳ တဲၤကဲတဲၤအိးတစီာ်အတဲၤလှီး တဲၤပျဲာ်ပ့ၤနီး. 15မၱမၱာ်, ဒဳတဲၤယၱၢ်ဘဲာ်အတၱၢ် အမှးကၱာ်တဲၤဘဲာ်လီၢ်အပူၤ, ဝၤကဘဲာ်ဓဳၤထာ် ဒဳကျဲးကိအဘီဒဳအမၱာ်တဲၤအခဳး, ခရၱာ်အပူၤနဳၤ. 16ဒဳစပူၤ, တဲၤအဆဳအကျၤလဳစါစဲးဘဲာ်ဒီၣ်ယါ ဘူၣ်ဝဲၢ်ကဲၤ အလ့ၤကၱာ်အလ့ၤ, ဒဳတဲၤန့ၤဘၱစဲာ်အလီၤ, ထဲၢ်အမဲၤဇဳၤလှဲးလၢ်ဝၤနဳၤ. ကၱာ်ဒီဘ့အဆဳ အကျၤ တကျၤကၱာ်တကျၤ မဲၤအတဲၤမဲၤနဳၤ, တဲၤန့ၤဘၱစဲာ်သဒဲပွဲၤ ဘီာ်ဓဳၤထာ်အံာ်အန့ၤကၱာ် တဲၤဘဲာ်လီၢ်လီၤ.
တဲၤအီၣ်သမိအသဲဒဳခရၱာ်အပူၤ
17ကနဳၤအစဲ, ဒဳဘၱာ်စဲာ်အမံၤအပူၤယအံာ်သဓံသံ, အကတအီၣ်သမိပ့ၤပီၢ်စာ်ဘိပွဲၤ သူကူာ်ဖဳး, ထဲၢ်အတဲၤကမဳၤကမၢ်တနံၤလှူၣ်နံၤ တါတမံနီး, 18အသးမၱာ်အခံးသရူကဲၤတစီာ်နဳၤ. စဲာ်တစီာ်ဟဲးပၢ်ကဲၤကဘၱာ်စဲာ်အတဲၤအံာ် ထဲၢ်တဲၤသမိ. မၤနဲၢ်ဒဳၣ်, စဲာ်တစီာ်တအီၣ်ကၱာ် တဲၤထၱနံၤကိၢ်နံၤနီး ကၱာ်အသးဆးတကျဲးကဲၤ အခဳးအစဲနဳၤ. 19စတဲၤသါဝၢ်သးပျဲၢ်တအီၣ်ပ့ၤ နီး အခဳးအစဲ, စအံာ်လၤကဲစန့ၤဘၱစဲာ်ဒဳတဲၤကၱ ကဲာ် မဲၤလှီ, တဲၤစၱးပိာ်စၱးသဳအနံၤခံ ကၱာ်တဝဳၤ အံာ်ခးအံာ်ကဲၤအန့ၤနီး.
20တဲၤအယဳၤတစီာ်တဘဲာ်မဲၤလှိနံၤဒဳခရၱာ် အအီၣ်နီး. 21သံသၱာ်ဟဲဘဲာ်ထဳစဝၱၤစကဲ, ကၱာ် အစာ်ဘိသံမၱာ်ကဲၤစပျဲၢ်စဘီၣ်တစီာ်နဳၤ, သံဘဲာ် သဲာ်အံာ်ဟူထဳတဲၤအဘဲာ်အပီၤ ထဲၢ်အအီၣ်ဒဳ ခရၱာ်အပူၤနဳၤ. 22မဲၤကနဳၤဒဳၣ်, သူဖျူးလၤတ့ၢ် ကဲပီၢ်သံတဲၤအီၣ်သမိအလံၤအဝှဲ, ထဲၢ်အလှီး အပျဲာ်နံၤသံ ဒဳတဲၤကဲတဲၤအိးအပူၤတစီာ်နဳၤ. 23သံသးကၱာ်သံတဲၤကမဳၤကမၢ် ကဘဲာ်မဲၤသဲထာ် က့ၤပ့ပ့ဇီၤဇီၤ, 24ကၱာ် သံဘဲာ်ကိထာ်သီးထာ် တဲၤန့ၤဘၱစဲာ်အသဲ, ထဲၢ်အဘဲာ်ဘီာ်လၤအယၢ် သိးကၱာ်ကဘၱာ်စဲာ်အဲ, ကၱာ်အဒဲလၱၢ်အန့ၤဒဳတဲၤ အီၣ်အသဲထဲၢ်အတၱၢ်အမှးကၱာ်အစါအထံနဳၤ.
25မဲၤကနဳၤဒဳၣ်, ဒီၣ်ပျဲးပ့ၤပီၢ်မဲး. သံ ကိအပွဲၤမၱာ်ခရၱာ်အန့ၤဘၱစဲာ်အခဳးအစဲ, ယၱၢ်ဘဲာ် ထၱးလှဲးပီၢ်လၢ်ဝၤ ဒဳတဲၤတၱၢ်တဲၤမှးအပူၤ, မၤနဲၢ် ဒဳၣ်, ဝၤလဳစါစဲးမၱာ်ကဲၤခရၱာ်အန့ၤဘၱစဲာ်ယၢ်သိး သိးအခဳးအစဲနဳၤ. 26သံကသဲးထဲးဒဳၣ်, အံာ် ပီၢ်မဲးသံတဲၤသဲးထဲးနှးသံကါ အကမဲၤတဲၤခီၣ်ဝဲၤ မဲး. သဲးထဲးပီၢ်မဲးထိလူၤမူၤလၤတ့ၢ်နံၢ်တၱၢ်သံမဲး. 27အံာ်ပီၢ်မဲးမဳၤဒဲးလၱးအခွဲးဒဳ အကလှီးလှၱလှီး ပျဲးနံၤသံအနံၤခံမဲး. 28ပၠၤထဲၢ် အအၣ်ဟူၣ်မဲၤ ကဲတဲၤတစီာ်နဳၤ, ဆီတဘးပီၢ်တဲၤအၣ်ဟူၣ်အၣ် တကျဳ, ဖၱးမဲၤအၣ်ပီၢ်ဒဳ တဲၤတၱၢ်တဲၤမှးအပူၤ, စာ်ဘိထဲၢ်သံကနံၤဘဲာ်သံနံၤခံ ကၱာ်သံကမဲၤ ဇဳၤဇၤပၠၤအအဲတအီၣ်နီးတစီာ်အနံၤခံခံ. 29တဲၤယၱၢ်ဘဲာ်အကၱကဲာ်မဲၤလှီနဳၤ, အံာ်မဲးအဟဲး ထာ်ဒဳသံဧီၢ်ဗူမဲး, မၱာ်ယၱၢ်ဘဲာ်ပီၢ်တဲၤယၱၢ်ဘဲာ် အမီၤအအဲးထဲၢ်အမဲၤလ့ၤထာ်လ့ၤထိတဲၤ, စာ် ဘိထဲၢ်ပၠၤအဆီးခ့န့းဘဲာ်တစီာ်ကနံၤခဳးနံၤအါ ပီၢ်နဳၤ. 30မဲၤသးတမီၤပီၢ်မဲး ကဘၱာ်စဲာ်အသးစါထံမဲး, မၤနဲၢ်ကဘၱာ်စဲာ်အသးစါထံမၱာ် တဲၤတီၤမှါ အံာ်သံ ဒဳတဲၤယဳၤက့ၤစာ်က့ၤအမူၤတနံၤအနံၤခံ လီၤ. 31လဲၢ်တၤကဲ ကယါမၱာ်တဲၤသးဆဲ, တဲၤသဲးထဲးဒီၣ်ဒဲ, တဲၤသဳာ်ဓဳၤသးခီ, တဲၤကဳၤ တဲၤတြး, တဲၤဒီၣ်ကဲဒီၣ်အိး ကၱာ်တဲၤတဝဲၢ်တဆဲနီးတစီာ်ကိမံၤထံတၤနဳၤ. 32ခီးသးဒီလှဲးပီၢ် လၢ်ဝၤ, ခီၣ်ဝဲၤလှဲးပီၢ်လၢ်ဝၤ, ဘါပျဲးလှဲးပီၢ်လၢ် ဝၤအတဲၤမဲၤကမဲာ်, အစာ်ဘိ ကဘၱာ်စဲာ်အီၣ်ဒဳ ခရၱာ်အပူၤ ဘါပျဲးကဲၤသံတဲၤမဲၤကမဲာ်အခီနဳၤ.
Currently Selected:
အ့ဖ့းစူး 4: GBA
Highlight
Copy
Compare
Share
Want to have your highlights saved across all your devices? Sign up or sign in
Geba Roman New Testament © Bible Society of Myanmar, 2021.
