အ့ဖ့းစူး 3
3
စီၤပီလူးအတဲၤဖၱးတဲၤမဲၤ ပွဲၤနံၢ်ဒီၣ်အနံၤခံ
1ကနဳၤအခဳးအစဲ, ဒဳခရၱာ်ယ့ၣ်ရှူးကၱာ် သံပွဲၤနံၢ်ဒီၣ်တစီာ်အနံၤခံ, တဲၤကၱတၱၢ်ဖဳး, ယဲၤ, စီၤပီလူး, တၤသဘဲတဲၤကဘၱာ်စဲာ်အီၣ်လီၤ. 2ယဘူၣ်တပွဲး ဒဳဘၱာ်စဲာ်အလှူၣ်အတါအပူၤ, စအံာ်လၤယဲၤ အကမဲၤတဲၤအအဲး ဒဳသံ နံၤခံလီၤ. 3ကဘၱာ်စဲာ်ဒဲလၱၢ်ထာ်အတဲၤဟူၣ် တဲၤဇီၤကၱာ်မဲၤသၱာ်ဟဲကဲၤယဲၤ. (ယဝှ့းဒီဆးထဳ သံအကျဳၤပူၤထဳ, 4ကၱာ်သံကဖးဘဲာ်ကဒီ ယတဲၤဝှ့းအယဳၤဒဳၣ်, သံကသၱာ်ဟဲတပွဲး အဘဲာ်ကၠး ယတဲၤသၱာ်ဟဲခရၱာ်အတဲၤဟူၣ်တဲၤဇီၤလီၤ.) 5လှ့အခၠၱးဖျီးတလိးဝှါနဳၤ, ပၠၤလၢ်ခဳးဖဳးတစီာ်တနံၤ ဘဲာ်တဲၤအံာ်သၱာ်ဟဲတဲၤအီၣ်ဟူၣ်အီၣ်ဘံာ်အယဳၤနီး, ပရၤဆါခဳနူၤယဳၤ, ကဘၱာ်စဲာ်အသးဒဲလၱၢ်ဖျီထာ် ကဲၤဒဳစပၠၤစါထံ, အပျဲၢ်အဘီၣ်တစီာ်ကၱာ်ဝံတစီာ်နဳၤ. 6တဲၤအီၣ်ဟူၣ်အီၣ်ဘံာ်မၱာ် ပွဲၤနံၢ်ဒီၣ်တစီာ်နံၤ ဘဲာ်ကိာ်ဇၤ ကဘၱာ်စဲာ်အတဲၤသးလဳၢ်သးလၤ အံာ်အဝၱၤအကဲ ပျဳာ်ပျဳာ်ကၱာ်ယူဒၤဖဳးတစီာ်နဳၤ, စဲာ်တစီာ် မၱာ်ပၠၤအန့ၤဘၱစဲာ်တပွဲၤလီၤ ကၱာ်နံၤ ဘဲာ်ပျဳာ်ဇၤလၢ်ဝၤ ကဘၱာ်စဲာ်အတဲၤအဳလါ ဖျးလၤဒဳခရၱာ်ယ့ၣ်ရှူးအပူၤနဳၤ.
7ယဘဲာ်မဲၤဖၱထာ်ကဲၤတဲၤသးလဳၢ်သးလၤ အံာ်အဝၱၤအကဲအခၱအပွဲၤ ဒဳကဘၱာ်စဲာ်အံာ်လၤ နံၤလၤဆါ, အမဲၤတဲၤအီၣ်ကၱာ်တဲၤစိသလဲဒဳယပူၤနဳၤ. 8ယမၱာ်နီၣ်သီအရှံးဖဳးဒဳၣ်လံ ပၠၤစါ ထံအရှံးဖဳးကဓူနှီနူၤ, ကဘၱာ်စဲာ်အံာ်လၤလၤဓူ ယဲၤအကဒီထိးလၤနံၤ ပွဲၤနံၢ်ဒီၣ်တစီာ် အဘဲာ်ကၠး ခရၱာ်အတဲၤလံၢ်ဓဳၤပွၱၤသဲထဲၢ်ပၠၤဝၢ်လှဲးတလဳၢ် ဇၤ နီး, 9ကၱာ်အကအံာ်ပၠၤလဳစါစဲးစာ်ထၱးကဘၱာ်စဲာ် လဲၢ်ဟူၣ်ကဲၤတစီာ်နဳၤ. ကဘၱာ်စဲာ်, ထဲၢ်အဘီာ် လၤတဲၤကိမံၤထံတၤနဳၤ, ဘဲလဲၢ်ဟူၣ်ကဲၤဒဳ ဒ့ာ် ဖျီးတလိး လှ့လၢ်ခဳးအီၣ်ထာ် အခၣ်ထၱး ပ့ၤပ့ၤနဳၤ, 10စာ်ဘိထဲၢ်ခဳနူၤယဳၤ, ဒဳ တဲၤအီၣ် ပျဳာ် အခဳးအစဲ, မီၢ်ခဳးပွဲၤဇဳၤအအူအံာ်တဲၤ တစီာ် ကၱာ်မီၢ်ခဳးအတဲၤစိတဲၤသလဲတစီာ် ကမဲၤ လှိသၱာ်ဟဲနံၤကီ ကဘၱာ်စဲာ်အတဲၤဇၤတဲၤပျၤအမဳ အမဳၤနဳၤ. 11ကဘၱာ်စဲာ်မဲၤတဲၤအယဳၤအစာ်ဘိ စတဲၤကဳတဲၤကၠး အလၤထူလၤပျဳၤအီၣ်အခီနဳၤ, ထဲၢ်စကမဲၤပ့ထာ်ဇီၤထာ်အံာ် ဒဳဝၤဘၱာ်စဲာ်ခရၱာ် ယ့ၣ်ရှူးနဳၤ. 12ဒဳဝၤအီၣ်ဒဳခရၱာ်အပူၤကၱာ်ဝၤဘူၣ် ကဲၤစဲာ်အခဳးအစဲ, ဝၤအီၣ်ကၱာ်တဲၤသးခူသးဟဲ အကလ့ၤနံၢ်ဒဳကဘၱာ်စဲာ်အလှီမီၢ် ဒဳတဲၤဘူၣ်လၤ အံာ်သ့ ပွ့ၤဝၤန့ၤအပူၤနဳၤ. 13ကနဳၤအခဳးအစဲ, ယတၤမီၤဘဲာ်သံ စာ်ဘိထဲၢ်သံသးကတဟဲးဝၱၢ် ဟဲးကဲပီၢ်ဒဳယခးတဲၤသံနံၤခံအခဳးအစဲမဲး. တဲၤအယဳၤလဳစါစဲးမၱာ်သံကနံၤလှူၣ်နံၤတါအနံၤခံလီၤ.
ခရၱာ်အတဲၤဘဲာ်လီၢ်
14ဒဳတဲၤအယဳၤအခဳးအစဲ, ယဓဳၢ်နှဳလါဒဳ ပာ်အလှီမီၢ်, 15ပၠၤကိအကမူၤအအီၣ်မီၢ်ခဳး ကၱာ် လၢ်ခဳး နံၤဘဲာ်ကဲၤစမံၤအတၱၢ်အမှးတပွဲၤနဳၤ အလှီမီၢ်နဳၤ. 16ယတၤသဘဲထာ်ကဘၱာ်စဲာ်, အပ့ထာ်ဇီၤထာ်ကၱာ်တဲၤရှံတဲၤထဲတပွဲၤ ကအံာ်လၤနံၤပီၢ်သံတဲၤစိတဲၤသလဲဒဳ ကဘၱာ် စဲာ်အသး, စာ်ဘိထဲၢ်သံသးအခဳးအအါ ကဆိး ထာ်ပီၢ်အနံၤခံနဳၤ. 17ယသဘဲထာ်တပွဲးသံနံၤခံ, စာ်ဘိထဲၢ်ခရၱာ်ကအီၣ်ကဆီပီၢ် ဒဳသံသး ပူၤ, ဒဳသံတဲၤဘူၣ်စဲာ်အပူၤနဳၤကၱာ်သံကစဳးလၤ သံခၣ်ဝံၤကၱာ်ဆဳးလၤသံန့ၤဒဳတဲၤဘဲာ်လီၢ်သီၣ်ကျဲ အပူၤအနံၤခံ, 18ပျဳာ်ပျဳာ်ကၱာ်ပၠၤစါထံတစီာ်, သံကအီၣ်ကၱာ်ပီၢ်တဲၤစိသလဲထဲၢ်အသၱာ်ဟဲ ခရၱာ်အတဲၤဘဲာ်လီၢ်မၱာ်အခီကဲၤပွ့းတဲၢ်, အထိ ကဲၤပွ့းတဲၢ်, အထာ်ယၱၤကဲၤပွ့းတဲၢ်, အလၤယီၢ် ကဲၤပွ့းတဲၢ်နဳၤ. 19သံကသၱာ်ဟဲဘဲာ်ကီကဘၱစဲာ် အတဲၤဘဲာ်လီၢ်, ထဲၢ် ပၠၤတသၱာ်ဟဲထိးဇၤနီး နဳၤ, စာ်ဘိထဲၢ် သံကဘဲာ်မဲၤပ့ထာ်ဇီၤထာ်အံာ် ကၱာ်စတဲၤပ့တဲၤဇီၤလဳစါစဲးအနံၤခံနဳၤ.
20စဲာ်ထဲၢ် အတဲၤစိသလဲမဲၤတဲၤဒဳဝၤပူၤ ကဘၱာ်စဲာ်နဳၤ, စမဲၤကဲာ်ထာ်တဲၤဒဳၣ်လံကၱာ် ဝၤ တၤ ကၱာ်ဝၤကမဳၤနဳၤ, 21တဲၤဓီၤတဲၤသ့းကဘဲာ်ဒီဧဲၤ ဘၱာ်စဲာ် ဒဳတဲၤအီၣ်ပျဳာ်အပူၤ, ကၱာ်ဒဳ ယ့ၣ်ရှူးခရၱာ်အပူၤ, အစိၤစိၤအပွဲၤပွဲၤ, လၤထူလၤ ပျဳၤတကၱာ်, အၤမ့ၣ်.
Currently Selected:
အ့ဖ့းစူး 3: GBA
Highlight
Copy
Compare
Share
Want to have your highlights saved across all your devices? Sign up or sign in
Geba Roman New Testament © Bible Society of Myanmar, 2021.
