မတဲ 21

မာꩻအောင်ႏပွယ်ꩻနွို့သော့ꩻဝေင်ꩻယေရုသလမ်ႏကို

(မာကု ၁၁:၁–၁၁။ လုကာ ၁၉:၂၈–၄၀။ ယောဟန် ၁၂:၁၂–၁၉)

1နုဲင်ႏဗွေႏယေသျုတွမ်ႏ ဝွေꩻဗွေႏ တပဲ့တောႏဖုံႏ ထွိုင်ႏဖျော်လွဉ်ဗော့ꩻ ဝေင်ꩻယေရုသလမ်ႏထျꩻနဝ်ꩻ ဝွေꩻသီးလွဉ် ဒုံဗဲက်ဖါဂေ ကအဝ်ႏကောင် သံလွေင်ထျꩻနဝ်ꩻသွူ။ နဝ်ꩻကို ဗွေႏယေသျု အွဉ်ႏစွꩻလွေꩻရီး အတပဲ့တွော့ꩻဝင်ꩻနီ၊ 2တွမ်ႏငဝ်းထွန်ႏနုဲင်းယိုဖုံႏ၊ “သီလွေꩻငါႏရီး ဒုံနဝ်ꩻတွော့ꩻ တလဲင်ႏချင်ꩻ သီအီႏထီႏ သေလာꩻမွူးတဗာႏ အဝ်ႏစွိုင်ခါꩻ အပေႏထျꩻ နဝ်ꩻသွူ။ စေသေလာꩻဖြွီꩻတွော့ꩻ အီလွဉ်သွော့ ခွေထျꩻဟုဲင်း။ 3ပါꩻတဖြာꩻဖြာꩻ မဉ်ႏဒေါ့ꩻ တစွိုးစွိုးနဝ်ꩻ ဒေါ့ꩻဖေႏသွော့ဝွေꩻ၊ ‘ သေလာꩻဖုံႏနဝ်ꩻ ဗွေႏဆရာႏ အဝ်ႏလိုႏ၊’ နုဲင်းနဝ်ꩻထွူ ဝွေꩻအီႏအွဉ်ႏစွꩻလွေꩻဒျာႏ လာꩻ တလဲင်ႏချင်ႏ” နုဲင်းနဝ်ꩻသွူ။

4ကထွာ နုဲင်းယိုနဝ်ꩻ ဖေႏနေး ကဗွေမဲဉ်ႏလွဉ်ꩻဒျာႏ နုဲင်းပရောဖဲစ် ကဒေါ့ꩻလဲဉ်းဒါႏ၊

5 # ဇာ ၉:၉။ “ဒေါ့ꩻနယ်ဖေႏသွော့ ဝေင်ꩻသိအုံ၊

ထွားဟုဲင်း၊ သီခွန်တန်နဝ်ꩻ အဝ်ႏကျွꩻလွဉ် သီထျꩻကွေး၊

ဝွေꩻနဝ်ꩻ အွဉ်ႏချဖွိုႏ အသꩻတဲင် ထုမ်းနေးစွဉ်ႏ သေလာꩻမွူးတဗာႏ၊

ပါတွမ်ႏ သေလာꩻပေႏတဗာႏ” နုဲင်းနဝ်ꩻသွူ။

6နဝ်ꩻမꩻ တပဲ့တောႏဖုံႏ လွေꩻတဲင် နုဲင်းဗွေႏယေသျု ကထွဉ်ႏလဲဉ်းဒါႏဝွေꩻသီး ဖေႏကမာꩻနဝ်ꩻ ဝွေꩻသီး မာꩻစွဉ်ႏနဝ်ꩻသွူ။ 7ဝွေꩻသီးအီလွဉ် သေလာꩻမွူးတွမ်ႏ အပေႏနဝ်ꩻတွော့ꩻ ဝွေꩻသီး ဆဲင်ꩻယွုံးတန်ဖုံႏနဝ်ꩻ အွဉ်ႏဒါ သေလာꩻဖုံႏ ငင်းလောင်းတဲင် ဗွေႏယေသျု ထင်ႏထုမ်းစွဉ်ႏနဝ်ꩻသွူ။ 8လိုꩻစွိုꩻအာတစွိုꩻ ဝွေꩻသီး ဆဲင်ꩻယွုံးတန်ဖုံႏနဝ်ꩻ အွဉ်ႏဒါ တဖူꩻတန်လောင်းတွော့ꩻ၊ အလင်ဖုံႏနဝ်ꩻ ဖဲ့ꩻသေင်ႏပင်ဖုံႏ အွဉ်ႏဒါစွဉ်ႏ တဖူꩻတန်လောင်းသွူ။ 9#သာ ၁၁၈:၂၅၊ ၂၆။ လိုꩻစွိုꩻဖုံႏ ကအဝ်ႏထောင်လွေꩻရီး ဗွေႏယေသျုဆꩻငါတွမ်ႏ လိုꩻကအဝ်ႏထောင်လွဉ်ꩻ ဆꩻချာသားနဝ်ꩻ ခြောဝ်စစွဉ်ႏ၊ “အုပ်ꩻရောင်သွော့ ဒါဝိဒ် ပိုခိုနဝ်ꩻဟုဲင်း။ ကကျွꩻလွဉ်ဒါႏတွမ်ႏ ထာဝရဘုရာꩻ အမဉ်ꩻတောႏ နာႏမနဝ်ꩻ ဗွေႏဘုရာꩻ ယံကဖေႏသွော့ မင်္ဂလာႏဟုဲင်း။ အုပ်ꩻသွော့ ဗွေႏဘုရာꩻဟုဲင်း” နုဲင်းနဝ်ꩻသွူ။

10ဗွေႏယေသျု ထွိုင်ႏနွို့သော့ꩻ ဝေင်ꩻယေရုသလမ်ႏချိန်ႏ လိုꩻတဝေင်ꩻလွုမ်းနဝ်ꩻ ရောင်သန်စွဉ်ႏထာꩻသွူ။ လိုꩻဖုံႏရီ၊ “ဝွေꩻနဝ်ꩻ ထွာပါꩻမုဲင်ꩻဟောင်း” နုဲင်းနဝ်ꩻသွူ။

11လိုꩻစွိုꩻဖုံႏ လဝ်းချာ၊ “ယိုနဝ်ꩻထွာ ပရောဖဲစ် ယေသျုသွူ။ အဝ်ႏကာလိလဲခမ်း၊ ဝေင်ꩻနာဇရဲစ်လွဉ်” နုဲင်းနဝ်ꩻသွူ။

ဗွေႏယေသျုကျွꩻလွေꩻဗိမာန်ႏတောႏကျောင်ꩻ

(မာကု ၁၁:၁၅–၁၉။ လုကာ ၁၉:၄၅–၄၈။ ယောဟန် ၂:၁၃–၂၂)

12ဗွေႏယေသျု လွေꩻသော့ꩻ ဗိမာန်ႏတောႏ ကျောင်ꩻကိုတဲင် ဝါးထန်ႏထိုꩻလို့ လိုꩻကအဝ်ႏဖြေꩻစာ သော့ꩻထာꩻ နဝ်ꩻကိုသားဖုံႏသွူ။ ဝွေꩻဗွေႏ နွန်ႏဝန်ထိုꩻစွဉ်ႏ ရွဉ်လုဲင်ႏသား ခွုံႏတွမ်ႏ ဝါးကွူစာသား အုံလင်ꩻလူးဒါႏ ခွုံႏဖုံႏတဲင်၊ 13#ဟေသျာ ၅၆:၇၊ ယေ ၇:၁၁။ ဒေါ့ꩻဖေႏဝွေꩻသီး၊ “လိတ်ကျမ်ꩻကို တဲမ်းသေꩻခါꩻ ဗွေႏဘုရာꩻမိန်း၊ ‘ခွေဗိမာန်ႏတောႏကျောင်ꩻနဝ်ꩻ အီႏဟဲ့ꩻဗာႏ ဆုတောင်ꩻလမ်း” ကွဲႏတွော့ꩻ ဗိမာန်ႏတောႏကျောင်ꩻနဝ်ꩻ သီမာꩻထိုꩻစွဉ်ႏ တခွန်ꩻဖုံႏ အုံငိပ်ꩻခင်ႏလမ်း နုဲင်းမုဲင်ꩻ” နုဲင်းနဝ်ꩻသွူ။

14လိုꩻမဲ့ခေ့ꩻတွမ်ႏ လိုꩻခင်ႏပနဲဉ်ႏဖုံႏနဝ်ꩻ လွဉ်ထေ့ဝွေꩻဗွေႏထျꩻ ဗိမာန်ႏတောႏ ကျောင်ꩻကိုတဲင် ဝွေꩻဗွေႏ လုမ်ꩻလာꩻဟဝ်ဖေႏစွဉ်ႏ ဝွေꩻသီးနဝ်ꩻသွူ။ 15ဝွေꩻဗွေႏမာꩻထာꩻ ဟဝ်အံႏဖြာႏခရာႏဖုံႏတွမ်ႏ လိုꩻပေႏဖုံႏ အဝ်ႏခြောဝ်သော့ꩻထာꩻ ဗိမာန်ႏတောႏ ကျောင်ꩻကိုရိုꩻ၊ “အုပ်ꩻသွော့ ဒါဝိဒ်ပိုခိုနဝ်ꩻဟုဲင်း” နုဲင်းနဝ်ꩻနဝ်ꩻ ယဇ်ပရောဟိတ်တန်တွမ်ႏ ကျမ်ꩻဒါႏဆရာႏဖုံႏ ထွိုင်ႏထီႏချိန်ႏ ဝွေꩻသီးသꩻလျား စွဉ်ႏထာꩻနဝ်ꩻသွူ။ 16#သာ ၈:၂ (LXX)။ နဝ်ꩻမꩻ ဝွေꩻသီးရီ ဗွေႏယေသျု၊ “ဝွေꩻသီးအဝ်ႏဒေါ့ꩻ တမုဲင်ꩻနဝ်ꩻ နာꩻဟွိုန်နေဟောင်း” နုဲင်းနဝ်ꩻသွူ။

ဗွေႏယေသျု လဝ်းချာ၊ “မွေး၊ ခွေအဝ်ႏဟွိုန်ဒျာႏ၊ ‘ လိုꩻပေႏဖုံႏတွမ်ႏ လိုꩻပေႏဆားဖုံႏ ဖေႏကအုပ်ꩻနဝ်ꩻ ဝွေꩻဗွေႏ သွဉ်သင်ဖေႏလဲဉ်း’ ကရိုꩻဒါႏကျမ်ꩻငဝ်းနဝ်ꩻ သီတဖတ်ဖိုတဝ်းဟောင်း’” နုဲင်းနဝ်ꩻသွူ။

17ဗွေႏယေသျု အွဉ်ႏကုဲင်ထိုꩻ ဝွေꩻသီးတဲင် ထန်ႏလွေꩻထိုꩻ ဝေင်ꩻဗေတနိတွော့ꩻ ဝွေꩻဗွေႏဗေင်ႏနဝ်ꩻကို တနာꩻနဝ်ꩻသွူ။

ဗွေႏယေသျုကဉ်ႏစာႏသမုတ်ဖက်ꩻဒွိုႏဆꩻမွူး

(မာကု ၁၁:၁၂–၁၄။ ၂၀–၂၄)

18မွူးရဝ်ꩻခိုႏစဝ်းစဝ်း ဗွေႏယေသျု သဲင်ꩻချာယင်း ဝေင်ꩻတဲင် တဖူꩻလောင်းနဝ်ꩻ ဝွေꩻဗွေႏ အဝ်ႏဟို့ꩻခိုးထာꩻအံႏသွူ။ 19ဝွေꩻဗွေႏထီႏ ဖက်ꩻဒွိုႏဆမွူး တမွူး အဝ်ႏတဖူꩻတန်ထျꩻတဲင် ဝွေꩻဗွေႏ လွေꩻထေ့စွဉ်ႏ သေင်ႏမွူးထျꩻ၊ ကွဲႏတွော့ꩻ လွိုအလာႏဖုံႏနဝ်ꩻ မော့ꩻတဝ်း တမုဲင်ꩻမုဲင်ꩻနဝ်ꩻသွူ။ နဝ်ꩻမꩻ ဝွေꩻဗွေႏ မိန်းသေင်ႏမွူး၊ “နာꩻနဝ်ꩻ မုဲင်ꩻခါတဲ့ အီႏတရာႏထဲင်း ဗာႏတဝ်းဒွုမ်” နုဲင်းနဝ်ꩻသွူ။ တလဲင်ႏချင်ꩻ ဖက်ꩻဒွိုႏဆꩻမွူး သဲင်ထိုꩻစွဉ်ႏသွူ။

20တပဲ့တောႏဖုံႏ ထွိုင်ႏထီႏနုဲင်းယိုတဲင် ဝွေꩻသီး အံႏဖြာႏငါႏသွူ။ ဝွေꩻသီးရီ၊ “ဖက်ꩻဒွိုႏဆမွူးမွော့ꩻ သဲင်မွိုင်ငါႏ နုဲင်းမုဲင်ꩻဟောင်း” နုဲင်းနဝ်ꩻသွူ။

21 # မ ၁၇:၂၀၊ ၂ကော ၁၃:၂။ ဗွေႏယေသျု လဝ်းချာ၊ “ခွေဒေါ့ꩻဖေႏသီ အမွေးအမဲဉ်ႏ၊ သီထာꩻယွုမ်း မဉ်ႏအဝ်ႏတွော့ꩻ သင်ႏသရ မဉ်ႏအဲဉ်ထဝ်း နုဲင်းခွေကမာꩻလဲဉ်းဒါႏ ဖက်ꩻဒွိုႏဆမွူးယိုနဝ်ꩻ သီအီႏမာꩻနွောင်ꩻသွူ။ နဝ်ꩻလွုမ်ꩻ တကာႏတဝ်း သီအီႏလဲင်ꩻရိုꩻဖေႏနွောင်ꩻ ကောင်ပူႏယို၊ ‘ထွိုင်ႏတဲင် အွဉ်ႏထဲ့သော့ꩻ နာꩻနမ်း ပင်ႏလယ်ႏကိုဟုဲင်း’ နုဲင်းနဝ်ꩻနဝ်ꩻ သီအီႏမာꩻနွောင်ꩻ နဝ်ꩻသွူ။ 22သီထာꩻယွုမ်း မဉ်ႏအဝ်ႏနဝ်ꩻ သီဆုတောင်ꩻစွဉ်ႏ အမျိုꩻမုဲင်ꩻ တယဝ်း အီႏလꩻ” နုဲင်းနဝ်ꩻသွူ။

ရီပွိုင်းဝွို့တွမ်ႏဗွေႏယေသျုဩဇာႏအာႏဏာႏခရာႏ

(မာကု ၁၁:၂၇–၃၃။ လုကာ ၂၀:၁–၈)

23ဗွေႏယေသျု သဲင်ꩻလွဉ်ချာ ဗိမာန်ႏတောႏကျောင်ꩻတဲင် နုဲင်းဝွေꩻဗွေႏကအဝ်ႏ သွဉ်သင်နဝ်ꩻ ယဇ်ပရောဟိတ် တန်ဖုံႏတွမ်ႏ လိုꩻတန်ဖုံႏ လွဉ်ဝွေꩻဗွေႏထျꩻ တဲင်ရီ၊ “နာꩻကအဝ်ႏမာꩻဒါႏ ယိုဖုံႏနဝ်ꩻ လꩻအခွင်ꩻ မုဲင်ꩻကိုဟောင်း။ ပါꩻမုဲင်ꩻဖေႏနာꩻ အခွင်ꩻစားယိုဟောင်း” နုဲင်းနဝ်ꩻသွူ။

24ဗွေႏယေသျု လဝ်းချာ ဝွေꩻသီး၊ “ခွေအီႏရီကသီ ငဝ်းရီတစွိုးတဲင် သီမဉ်ႏဖြေႏချာခွေ ငဝ်းဖြေႏတစွိုးနဝ်ꩻ နုဲင်းခွေကအဝ်ႏမာꩻဒါႏ စားယိုဖုံႏ လꩻအခွင်ꩻမုဲင်ꩻကိုနဝ်ꩻ ခွေအီႏဒေါ့ꩻနယ်ဖေႏ သီသွူ။ 25ယောဟန် ကဖေႏဒါႏ ဗတ္တိဇံႏ ထီမင်္ဂလာႏနဝ်ꩻ လꩻအခွင်ꩻမုဲင်ꩻကို။ လꩻလွဉ် ဗွေႏဘုရာꩻထျꩻနဲ့၊ မဉ်ႏတမွေးတဝ်း အလꩻလွဉ်လိုꩻထျꩻ အခွင်ꩻနဲ့ဟောင်း” နုဲင်းနဝ်ꩻသွူ။

ဝွေꩻသီးငဝ်းအာစ လို့ဝင်ꩻတဲင် တွိုင်ႏပင်ႏ၊ နီအီႏရိုꩻဖေႏဗာႏ နုဲင်းမုဲင်ꩻဟောင်း။ နီမဉ်ႏလဝ်းဖြေႏချာ၊ ‘အဝ်ႏဗွေႏဘုရာꩻထျꩻ’ နုဲင်းနဝ်ꩻနဝ်ꩻ ဝွေꩻအီႏရိုꩻဖေႏနီ၊ ‘ပေါ့ꩻနုဲင်းနဝ်ꩻနဝ်ꩻ ပွိုးတမုဲင်ꩻ သီတယွုမ်းတဝ်း ယောဟန် နုဲင်းမုဲင်ꩻဟောင်း၊’ နုဲင်းနဝ်ꩻတဲင်၊ 26ကွဲႏတွော့ꩻ နီမဉ်ႏရိုꩻ၊ ‘အဝ်ႏလိုꩻထျꩻလွဉ်၊’ နုဲင်းနဝ်ꩻနဝ်ꩻ ပွိုးတွော့ꩻ ဝွေꩻသီး ကားကအဝ်ႏနဝ်ꩻ အဝ်ႏလက်ခံႏ ယောဟန်ထွာ ပရောဖဲစ် တပါꩻနဝ်ꩻမꩻ၊ နီငမ်းသꩻဗာႏ လိုꩻဖုံႏ” နုဲင်းနဝ်ꩻသွူ။ 27နဝ်ꩻမꩻ ဝွေꩻသီး လဝ်းချာ ဗွေႏယေသျု၊ “နီတသေတဝ်း၊” နုဲင်းနဝ်ꩻသွူ။

တဲင်ဝွေꩻဗွေႏ ဒေါ့ꩻဖေႏ ဝွေꩻသီး၊ “ပေါ့ꩻနုဲင်းနဝ်ꩻ နုဲင်းခွေကအဝ်ႏမာꩻဒါႏ ယိုဖုံႏခရာႏ လꩻအခွင်ꩻ မုဲင်ꩻကိုနဝ်ꩻတဲ့ ခွေအီႏတဒေါ့ꩻနယ်တဝ်း သီသွူ။

ပိုခိုဝင်ꩻနီဥပမာႏ

28“ယိုခါ သီထင်း နုဲင်းမုဲင်ꩻဟောင်း။ တလဲင်ႏသား နဝ်ꩻကိုနဝ်ꩻ ပါꩻတဖြာꩻ အပိုခိုအဝ်ႏ ဝင်ꩻနီသွူ။ ဝွေꩻလွေꩻထေ့ ပိုအဖြာꩻတန်ထျꩻ တဲင်ဒေါ့ꩻ၊ ‘ပိုခို၊ ဟန်ႏနီꩻနဝ်ꩻ လွေꩻတွော့ꩻ မာꩻသွော့ထာꩻမာꩻ တဗဲစ်ဥယျာဉ်ႏ ခြံကိုဟုဲင်း၊’ နုဲင်းနဝ်ꩻသွူ။ 29ဝွေꩻလဝ်းချာ၊ ‘ခွေတမဉ်လွေꩻတဝ်း၊’ နုဲင်းနဝ်ꩻသွူ။ ကွဲႏတွော့ꩻ တညတဝ်း ဝွေꩻသꩻပြောင်ꩻတဲင် လွေꩻယင်းနဝ်ꩻသွူ။ 30နဝ်ꩻထွူ အဖါနဝ်ꩻ လွေꩻထေ့ပိုခို အလင်တဖြာꩻထျꩻတဲင် ဒေါ့ꩻဗွိုန်နုဲင်းနဝ်ꩻ နေနေသွူ။ ဝွေꩻလဝ်းချာ၊ ‘မွေးသွူ၊ ဖါ ၊’ ကွဲႏတွော့ꩻ ဝွေꩻတလွေꩻတဝ်းသွူ။ 31ဝွေꩻသီး ဝင်ꩻနီယို အဖြာꩻမုဲင်ꩻနဝ်ꩻ မာꩻလွဉ်ꩻ နုဲင်းအဖါ အလိုႏဟောင်း” နုဲင်းနဝ်ꩻသွူ။

ဝွေꩻသီးလဝ်းချာ၊ “အဖြာꩻတန်” နုဲင်းနဝ်ꩻသွူ။

နဝ်ꩻမꩻ ဗွေႏယေသျု ဒေါ့ꩻဖေႏဝွေꩻသီး၊ “ခွေဒေါ့ꩻဖေႏသီ။ အခွဉ်ႏကောက် သားဖုံႏတွမ်ႏ လိုꩻမူႏ စာအံႏနမ်းဖုံႏနဝ်ꩻ အီႏနွို့လွေꩻသော့ꩻ ရီးကသီ ဗွေႏဘုရာꩻ ခမ်းထီကိုသွူ။ 32#လု ၃:၁၂၊ ၇:၂၉၊ ၃၀။ ပွိုးဗတ္တိဇံႏဆရာႏ ယောဟန် ကျွꩻလွဉ်ထေ့သီထျꩻ၊ ဖေႏကထောင် တဖူꩻစွို့ꩻစွဉ်ႏနဝ်ꩻ အွဉ်ႏနယ်သီစွဉ်ႏတဲ့ သီတယွုမ်းတဝ်း ဝွေꩻနဝ်ꩻသွူ။ ကွဲႏတွော့ꩻ အခွဉ်ႏကောက်ꩻသားတွမ်ႏ လိုꩻမူႏ စာအံႏနမ်းဖုံႏနဝ်ꩻ ယွုမ်းဝွေꩻနဝ်ꩻသွူ။ သီလဲင်ꩻထီႏနေးသွူ နုဲင်းယိုစွဉ်ႏတဲ့ သီသꩻတပြောင်ꩻကြဲုင်ꩻ တဝ်းတဲင် တယွုမ်းတဝ်း ဝွေꩻနဝ်ꩻသွူ။

ခတ်ꩻအံႏဒါႏတဗဲစ်ဥယျာဉ်ႏခြံသားပွုံႏပမာႏ

(မာကု ၁၂:၁–၁၂။ လုကာ ၂၀:၉–၁၉)

33 # ဟေသျာ ၅:၁၊ ၂။ “ဗွေႏယေသျုဒေါ့ꩻ၊ “နာႏယင်း ငဝ်းဥပမာႏ အလင်ဟုဲင်း။ တလဲင်ႏသား နဝ်ꩻကို ခြံဗွေႏတဖြာꩻနဝ်ꩻ ဆို့ꩻသေꩻခါꩻ တဗဲစ်ဥယျာဉ်ႏခြံ တဟိုႏ၊ အဖေါင်ꩻခူသေꩻခါꩻ ဥယျာဉ်ႏခြံ၊ ကအီႏနျꩻပဲစ်ꩻ တဗဲစ်ရာႏနဝ်ꩻ ခူႏခါꩻထာꩻအောင်ႏ တအောင်တဲင် တယ်ႏခါꩻပွေါးထွားတာႏ ရန်းခြေင်ႏတွိုက်ထိုသွူ။ နဝ်ꩻထွူ တဗဲစ်ဥယျာဉ်ႏ ခြံဗွေႏနဝ်ꩻ ဝွေꩻခတ်ꩻထိုꩻဖေႏ ကောခတ်ꩻသားတွော့ꩻ အွဉ်ႏကုဲင်အလမ်းတဲင် ထန်ႏထိုꩻတဖူꩻနဝ်ꩻသွူ။ 34ဒဲ့ꩻစုသိမ်ꩻ တဗဲစ်ရာႏဖုံႏချိန်ႏ ထွိုင်ႏတွိုႏ၊ ဖေႏကလꩻ ဝွေꩻခြံခတ်ꩻခနဝ်ꩻ ဝွေꩻအွဉ်ႏစွꩻလွေꩻ ဝွေꩻအသွဉ်းဖုံႏ ခြံခတ်ꩻသားထျꩻနဝ်ꩻသွူ။ 35ခြံခတ်ꩻသားဖုံႏနဝ်ꩻ ဆွမ်ꩻထိုꩻ ခြံဗွေႏအသွဉ်းဖုံႏ၊ တဖြာꩻနဝ်ꩻ တွဲႏစွဉ်ႏခွဉ်း၊ အလင်တဖြာꩻနဝ်ꩻ မာꩻသီထိုꩻတဲင် အလင်တဖြာꩻနဝ်ꩻ ဝွတ်စွဉ်ႏလုံးတူႏနဝ်ꩻသွူ။ 36ခြံဗွေႏခိုနဝ်ꩻ ပသာဖျင်ယင်း သွဉ်းအလင်ဖုံႏ အာကယ်ꩻက အရီးတလဲင်ႏတဲင် ခြံခတ်ꩻသားဖုံႏနဝ်ꩻ မာꩻစွဉ်ႏဝွေꩻသီး အနယ်ꩻနုဲင်းနဝ်ꩻနေနေသွူ။ 37အဆုဲင်ꩻသွတ်ꩻ ဝွေꩻအွဉ်ႏစွꩻလွေꩻ ဝွေꩻပိုခို ဝွေꩻသီးထျꩻသွူ။ ဝွေꩻဒေါ့ꩻ ၊ ‘အမဲဉ်ႏနဝ်ꩻ ဝွေꩻသီး အီႏရိုႏသေႏ ခွေပိုခို’ နုဲင်းနဝ်ꩻသွူ။ 38ကွဲႏတွော့ꩻ ခြံခတ်ꩻသားဖုံႏ ထွိုင်ႏထီႏအပိုခိုနဝ်ꩻ ဝွေꩻသီးဒေါ့ꩻဖေႏလို့ဝင်ꩻ၊ ‘ယိုနဝ်ꩻထွာ ခြံဗွေႏသားပိုခိုဒျာႏ။ လွဉ်ဟုဲင်း၊ အွဉ်ဝင်ꩻ မာꩻသီတွမ် ဝွေꩻတွော့ꩻ နီထူႏထိုꩻတွမ် ဝွေꩻဥစ္စာႏပစ္စေꩻနယ်၊’ နုဲင်းနဝ်ꩻသွူ။ 39နဝ်ꩻမꩻ ဝွေꩻသီး ဆွမ်ꩻဝွေꩻတဲင် နုဲင်ႏထန်ႏထိုꩻ ဥယျာဉ်ႏခြံ ကောင်းထန်ႏဖဲ့ꩻတွော့ꩻ မာꩻသီစွဉ်ႏ ဝွေꩻနဝ်ꩻသွူ။

40ဗွေႏယေသျုရီ၊ “ယိုခါ၊ ခြံဗွေႏ ထွိုင်ႏလွဉ်ချိန်ႏ ဝွေꩻအီႏမာꩻ ခြံခတ်ꩻသားဖုံႏ နုဲင်းမုဲင်ꩻဟောင်း” နုဲင်းနဝ်ꩻသွူ။

41ဝွေꩻသီးလဝ်းချာ၊ “ဝွေꩻအီႏ မာꩻသီထိုꩻမွေး လိုꩻကုဲင်ဖုံႏ စားနဝ်ꩻတွော့ꩻ တဗဲစ်ဥယျာဉ်ႏခြံနဝ်ꩻ ခတ်ꩻဖေႏတော လိုꩻလင်ဖုံႏ အချိန်ႏရဲ့သိမ်ꩻတွိုႏ ကအီႏဖေႏမဲဉ်ႏဒါႏ ဝွေꩻခြံခတ်ꩻခသားဖုံႏထျꩻ” နုဲင်းနဝ်ꩻသွူ။

42 # သာ ၁၁၈:၂၂၊ ၂၃။ ဗွေႏယေသျု ဒေါ့ꩻဖေႏဝွေꩻသီး၊ နုဲင်းလိတ်ကျမ်ꩻ ကအဝ်ႏရိုꩻဒါႏနဝ်ꩻ သီတဖတ်ဗာႏဖိုတဝ်း နဲ့ဟောင်း။

‘လမ်းတယ်ႏသား ကပယ်ႏထိုꩻဒါႏ လုံးတူႏ သွုံꩻတလꩻတဝ်းနဝ်ꩻ၊

‘ထွာခွိုန်ꩻတော အရေꩻတန်သွတ်ꩻ ခင်ႏလမ်းကို။

ယိုနဝ်ꩻ ထာဝရဘုရာꩻ မာꩻထွာလဲဉ်း နဝ်ꩻသွူ။

ကထီႏဗာႏနဝ်ꩻနဝ်ꩻ ဟဝ်အံႏဖြာႏငါႏ ခွိုင်းကားမုဲင်ꩻ၊’ နုဲင်းနဝ်ꩻသွူ။

43ဗွေႏယေသျု ဒေါ့ꩻသမ်းထဲင်းယင်း၊ “နဝ်ꩻမꩻ ခွေဒေါ့ꩻဖေႏသီ၊ ဗွေႏဘုရာꩻခမ်းထီ နဲင်ႏငံႏတောႏ ကအဝ်ႏသီထျꩻနဝ်ꩻ အီႏထူႏညာꩻထိုꩻတဲင် ဖေႏထိုꩻတော လိုꩻဖုံႏ ကအီႏရာႏအာ သားဖုံႏနဝ်ꩻသွူ။ 44ပါမုဲင်ꩻထဲ့လူး လုံးတူႏယို အီႏဖြဲ့ꩻပဉ်ခဝ်ခဝ်တဲင် လုံးတူႏမဉ်ႏထဲ့လူး ပါꩻတဖြာꩻလောင်း၊ ဝွေꩻနဝ်ꩻ အီႏပဲစ်ꩻဖွန်ႏထိုꩻနဝ်ꩻသွူ။

45ယဇ်ပရောဟိတ်တန်ဖုံႏတွမ်ႏ ဖါရိသဲဖုံႏ ထွိုင်ႏဟွိုန် ဗွေႏယေသျု ငဝ်းဥပမာႏနဝ်ꩻ ဝွေꩻဗွေႏအဝ်ႏဒေါ့ꩻ ပွိုင်းဝွို့ ဝွေꩻသီး ခရာႏဖုံႏနဝ်ꩻ အဝ်ႏသေသွူ။ 46နဝ်ꩻမꩻ ဝွေꩻသီး ကျံႏဆွမ်ꩻစွဉ်ႏ ဝွေꩻဗွေႏသွူ။ ကွဲႏတွော့ꩻ ဝွေꩻသီး အဝ်ႏငမ်းသꩻဗာႏ လိုꩻစွိုꩻဖုံႏ ကအဝ်ႏယွုမ်း ဗွေႏယေသျုနဝ်ꩻထွာ ပရောဖဲစ်တပါꩻ နဝ်ꩻသွူ။

Currently Selected:

မတဲ 21: PBCL

Highlight

Copy