မတဲ 22

မင်္ဂလာႏဆောင်ႏပွယ်ꩻဥပမာႏ

(လုကာ ၁၄:၁၅–၂၄)

1ဗွေႏယေသျု သွုံꩻဖျင် ငဝ်းဥပမာႏဖုံႏတွော့ꩻ ဒေါ့ꩻဖေႏလိုꩻဖုံႏနဝ်ꩻသွူ။ “ 2“ခမ်းထီမို့ꩻလောင်းနဝ်ꩻ ဗွိုန်နုဲင်းယိုသွူ။ တလဲင်ႏသား နဝ်ꩻကိုနဝ်ꩻ ခွန်တန်တပါꩻ အဝ်ႏဖျင်ရဲဉ်ꩻဖေႏ ဝွေꩻပိုခိုတာႏ တောႏလမ်း မင်္ဂလာႏပွယ်ꩻ တပွယ်ꩻနဝ်ꩻသွူ။ 3ဝွေꩻအွဉ်ႏစွꩻလွေꩻ ဝွေꩻသွဉ်း ဖေႏကဖစ်ပင်ꩻခါꩻ ထဉ်ႏဖုံႏ ဖေႏကလွဉ်ပွယ်ꩻ၊ ကွဲႏတွော့ꩻ ဝွေꩻသီး တမဉ်လွဉ်တဝ်းဖုံႏသွူ။ 4နဝ်ꩻမꩻ ထဉ်ႏဖုံႏတာႏနဝ်ꩻ ဝွေꩻအွဉ်ႏစွꩻလွေꩻ သွဉ်းအလင်ဖုံႏ တွမ်ႏငဝ်းသတင်ꩻ နုဲင်းယိုသွူ။ ‘ယိုခါ ခွေပွယ်ꩻနဝ်ꩻ အဝ်ႏဖျင်ရဲဉ်ꩻခါꩻလဲဉ်း။ ခွေဖိုးတွမ်ႏ အဖိုꩻတန်ႏ ဖိုးထီးထွိုက်ꩻ ပေႏဖုံႏနဝ်ꩻ ဖို့ꩻသေꩻလဲဉ်းတဲင် ဖျင်ရဲဉ်ꩻခါꩻလို့လဲဉ်း နဝ်ꩻသွူ။ ကျွꩻလွဉ်ခန်း ပွယ်ꩻမင်္ဂလာႏဟုဲင်း။ 5ကွဲႏတွော့ꩻ ကဖစ်သေꩻခါꩻလဲဉ်းဒါႏ ထဉ်ႏဖုံႏနဝ်ꩻ တအွဉ်ႏရေꩻတဝ်းတဲင် ဝွေꩻသီး လွေꩻထိုꩻဒျာႏ အထာꩻမာꩻဖုံႏသွူ။ တဖြာꩻနဝ်ꩻ လွေꩻထိုꩻဒျာႏဝွေꩻခြံ၊ အလင်တဖြာꩻနဝ်ꩻ လွေꩻထိုꩻဒျာႏအဆဲင်ႏ၊ 6အလင်ဖုံႏနဝ်ꩻ ဆွမ်ꩻထိုꩻစွဉ်ႏ သွဉ်းဖုံႏ၊ တွဲႏဝွေꩻသီးတဲင် မာꩻသီထိုꩻဝွေꩻသီးသွူ။ 7ခွန်တန်နဝ်ꩻ သꩻလျားမွေး နေးစွဉ်ႏထာꩻ နဝ်ꩻမꩻ ဝွေꩻအွဉ်ႏစွꩻလွေꩻ ဝွေꩻစဲ့ꩻသားဖုံႏ၊ မာꩻသီထိုꩻစွဉ်ႏ လိုꩻကောမာꩻသီဒါႏ ဝင်ꩻသားဖုံႏနဝ်ꩻတဲင် လဲ့ꩻထိုꩻစွဉ်ႏ ဝွေꩻသီးဝေင်ꩻဖုံႏသွူ။ 8နဝ်ꩻထွူ ဝွေꩻဟဲ့ꩻ ဝွေꩻသွဉ်းဖုံႏတဲင် ဒေါ့ꩻဖေႏဝွေꩻသီး၊ ‘ခွေပွယ်ꩻ မင်္ဂလာႏနဝ်ꩻ အဝ်ႏဖျင်ရဲဉ်ꩻလဲဉ်း၊ ကွဲႏတွော့ꩻ ခွေကဟဲ့ꩻ ဖစ်လဲဉ်းဒါႏ လိုꩻဖုံႏနဝ်ꩻ တထွိုက်တန်ႏတဝ်း ပွယ်ꩻသွူ။ 9ယိုခါ လွေꩻသွော့ တဖူꩻတန်လောင်းတွော့ꩻ နုဲင်းသီကမော့ꩻဒါႏ လိုꩻဖုံႏနဝ်ꩻ ဖစ်လွဉ်အာအာသွော့။’ နဝ်ꩻမꩻ၊ 10သွဉ်းဖုံႏ ထန်ႏလွေꩻစွဉ်ႏ တဖူꩻလောင်းတဲင် ခွိုင်းကား ဝွေꩻသီး ကမော့ꩻနွောင်ꩻလိုꩻ ဟဝ်တဲ့နဝ်ꩻ၊ လိုꩻကုဲင်တဲ့နဝ်ꩻ စုဗူႏလို့တဲင် လိုꩻဖုံႏနဝ်ꩻ ဗွေသော့ꩻစွဉ်ႏ မင်္ဂလာႏ မဏ္ဍပ်ကိုနဝ်ꩻသွူ။

11“ခွန်တန်လွေꩻ အီႏနွို့ထွား ထဉ်ႏဖုံႏတဲင် ထီႏဗာႏ ပါꩻခိုတဖြာꩻ တကွဉ်ကꩻတဝ်း ပွယ်ꩻမင်္ဂလာႏခွမ်ꩻလာꩻ နဝ်ꩻသွူ။ 12ခွန်ရီဝွေꩻ၊ ‘သွꩻ၊ ပွယ်ꩻမင်္ဂလာႏခွမ်ꩻလာꩻ တပါတဝ်းနဝ်ꩻ နာꩻနွို့လွဉ်သော့ꩻဗာႏတွိုႏ ယိုကို နုဲင်းမုဲင်ꩻဟောင်း၊’ နုဲင်းနဝ်ꩻသွူ။ ကွဲႏတွော့ꩻ ပါꩻခိုနဝ်ꩻ ဒေါ့ꩻတဝ်း တမုဲင်ꩻမုဲင်ꩻသွူ။ 13#မ ၈:၁၂၊ ၂၅:၃၀၊ လု ၁၃:၂၈။ တွိုႏနဝ်ꩻ ခွန်တန်ဒေါ့ꩻဖေႏ အသွဉ်းဖုံႏ၊ ‘စွိုင်ဝွေꩻစူခင်ႏဖုံႏတွော့ꩻ သော့ꩻဝွေꩻ ထာꩻခေ့ꩻကိုဟုဲင်း။ နဝ်ꩻကို ဝွေꩻအီႏငွိုးဗာႏထာꩻတဲင် အီႏစုဲင်ဗာႏဝွေꩻတငါ’” နုဲင်းနဝ်ꩻသွူ။

14နဝ်ꩻမꩻ ဗွေႏယေသျု အွဉ်ႏသွတ်ꩻ အထာꩻဒေါ့ꩻ “ဖစ်ဟဲ့ꩻနဝ်ꩻ အာငါႏစွဉ်ႏတဲ့ လွိုက်ထူႏနဝ်ꩻ ဆေ့ꩻလွုမ်ꩻ” နုဲင်းနဝ်ꩻသွူ။

ရီပွိုင်းဝွို့စွဉ်ႏကအဝ်ႏဖေႏဗာႏဒါႏအခွဉ်ႏဖုံႏခရာႏ

(မာကု ၁၂:၁၃–၁၇။ လုကာ ၂၀:၂၀–၂၆)

15ဖါရိသဲဖုံႏ ထန်ႏလွေꩻတဲင် အီႏဒေါင် ဗွေႏယေသျု စွဉ်ႏငဝ်းရီဖုံႏနဝ်ꩻ မာꩻအစီႏစဲဉ်ႏ တစွိုးသွူ။ 16နဝ်ꩻထွူ ဝွေꩻသီးတပဲ့ဖုံႏ ယင်ဟန်ႏတွမ်ႏ လိုꩻကပါသော့ꩻဒါႏ ဟေရုဒ် ပါတီကိုသား ယင်ဟန်ႏနဝ်ꩻ ဝွေꩻသီး အွဉ်ႏစွꩻလွေꩻ ဝွေꩻဗွေႏထျꩻသွူ။ ဝွေꩻသီးဒေါ့ꩻ၊ “ဆရာႏ၊ နာꩻဒေါ့ꩻဒျာႏ အမဲဉ်ႏတရာꩻနဝ်ꩻ နီအဝ်ႏသေ။ လိုꩻဖုံႏတာႏနဝ်ꩻ နာꩻသွဉ်သင်ဖေႏ ဗွေႏဘုရာꩻ အလိုႏတောႏ အမဲဉ်ႏတရာꩻသွူ။ ပွိုင်းဝွို့တွမ်ႏ နုဲင်းလိုꩻ အထာꩻစဉ်ꩻစာꩻ ခရာႏနဝ်ꩻ နာꩻတအွဉ်ႏရေꩻတဝ်း၊ ကွပ်ပွိုး နာꩻတအွဉ်ႏရေꩻတဝ်း ပါꩻတဖြာꩻဖြာꩻ အတွက်သွူ။ 17နဝ်ꩻမꩻ ကအီႏဖေႏဗာႏ ရောမ ဧကရာဇ်ခွန်တန် အခွဉ်ႏနဝ်ꩻ ဆန်ထိုꩻ နီပညတ်ကျမ်ꩻနဲ့၊ မဉ်ႏမွေးတဝ်း ဆန်ထိုꩻတဝ်းနဲ့ဟောင်း။ နီဗွေႏထင်း နုဲင်းမုဲင်ꩻဟောင်း။ ဒေါ့ꩻနယ်ဖေႏသွော့ နီမွိုင်” နုဲင်းနဝ်ꩻသွူ။

18ဗွေႏယေသျု အဝ်ႏသေ ဝွေꩻသီး အကျံႏကုဲင်နဝ်ꩻမꩻ ဝွေꩻဗွေႏဒေါ့ꩻ၊ “သီသူႏတောႏလဲဉ်။ ကအီႏဒေါင်ခွေနဝ်ꩻ ပွိုးတမုဲင်ꩻ သီအဝ်ႏကျံႏ ဗာႏတွိုႏဟောင်း။ 19ကဖေႏဗာႏဒါႏ အခွဉ်ႏတာႏ ဒင်္ဂါꩻနဝ်ꩻ အွဉ်ႏနယ်ခွေဟုဲင်း” နုဲင်းနဝ်ꩻသွူ။

ဝွေꩻသီး အီလွဉ်ဖေႏ ဝွေꩻဗွေႏဒင်္ဂါꩻတဲင်၊ 20ဝွေꩻဗွေႏရီ ဝွေꩻသီး၊ “ယိုနဝ်ꩻ ပါꩻမုဲင်ꩻ မဲ့ငါတွမ်ႏ ပါꩻမုဲင်ꩻ မဉ်ꩻဟောင်း” နုဲင်းနဝ်ꩻသွူ။

21ဝွေꩻသီးလဝ်းချာ၊ “ဧကရာဇ်ခွန်တန် မဲ့ငါတွမ်ႏ မဉ်ꩻဒျာႏ” နုဲင်းနဝ်ꩻသွူ။

နဝ်ꩻမꩻ ဗွေႏယေသျုဒေါ့ꩻဖေႏ ဝွေꩻသီး၊ “မွေးလဲဉ်း၊ တွိုႏနဝ်ꩻ နုဲင်းကဆဲင်ႏ ဒါႏ ဧကရာဇ် ခွန်တန်နဝ်ꩻ ဖေႏသွော့ ဧကရာဇ် ခွန်တန်တဲင် နုဲင်းကဆဲင်ႏဒါႏ ဗွေႏဘုရာꩻနဝ်ꩻ ဖေႏသွော့ ဗွေႏဘုရာꩻဟုဲင်း” နုဲင်းနဝ်ꩻသွူ။

22ဝွေꩻသီးထွိုင်ႏဟွိုန် နုဲင်းယိုချိန်ႏ၊ ဝွေꩻသီး အံႏဖြာႏငါႏသွူ။ နဝ်ꩻမꩻဝွေꩻသီး အဝ်ႏဝွေꩻဗွေႏထျꩻ ထန်ႏတဲင် လွေꩻညာꩻထိုꩻစွဉ်ႏသွူ။

ရီပွိုင်းဝွို့တွမ်ႏအဝ်ႏထာꩻသီကိုထွိုင်ႏမွန်လွဉ်ခရာႏ

(မာကု ၁၂:၁၈–၂၇။ လုကာ ၂၀:၂၇–၄၀)

23 # တ ၂၃:၈။ အနီꩻနဝ်ꩻစွဉ်ႏ လိုꩻနဝ်ꩻ အဝ်ႏထာꩻသီကို အီႏတထွိုင်ႏမွန်ချာတဝ်း ကအဝ်ႏကေႏညာႏဒါႏ သာဒုကဲဖုံႏ ယင်ဟန်ႏနဝ်ꩻ လွဉ်ထေ့ ဗွေႏယေသျုထျꩻ နဝ်ꩻသွူ။ 24#ဟော်ꩻ ၂၅:၅။ ဝွေꩻသီးဒေါ့ꩻ၊ “ဆရာႏ၊ ပါꩻခိုတဖြာꩻ ပိုဖုံႏ မဉ်ႏအဲဉ်ထဝ်းဒွိုန်းတွော့ꩻ မဉ်ႏသီထိုꩻနဝ်ꩻ ဖေႏနေး ကလꩻယင်း လိုꩻကသီထိုꩻလဲဉ်း အပိုဖုံႏ၊ ဝွေꩻဖူးခိုနဝ်ꩻ တောႏလမ်းဗာႏစွဉ်ႏ မဲမုဲင်းမူႏနဝ်ꩻ မောသျေ ဒေါ့ꩻသေꩻခါꩻလဲဉ်းနဝ်ꩻသွူ။ 25ယိုခါ ပါꩻခိုတဖူးဝေး အဝ်ႏဝင်ꩻနွတ်ꩻ အဝ်ႏအုံယိုကိုသွူ။ အတန်သွတ်ꩻနဝ်ꩻ တောႏလမ်းတဲင် အပိုဖုံႏ လꩻအဲဉ်ထဝ်းဒွိုန်းနဝ်ꩻ သီထိုꩻနဝ်ꩻသွူ။ နဝ်ꩻမꩻ ကအဝ်ႏကုဲင်ဒါႏ ဝွေꩻမာမဲမုဲင်းမူႏနဝ်ꩻ ဝွေꩻဖူးခို တောႏလမ်းသွုပ် နဝ်ꩻသွူ။ 26ဗွိုန်နုဲင်းနဝ်ꩻ နေနေ အဖူးခိုဒုတိယဖြာꩻ၊ ဗꩻလွေꩻတတိယဖြာꩻတွော့ꩻ အဆုဲင်ꩻသွတ်ꩻ ဗꩻလွေꩻစွဉ်ႏ နွတ်ꩻဖြာꩻ ထွာလို့စွဉ်ႏနုဲင်းနဝ်ꩻသွူ။ 27အဆုဲင်ꩻသွတ်ꩻ ပါꩻမူႏနဝ်ꩻတဲ့ သီထိုꩻစွဉ်ႏသွူ။ 28ဝွေꩻသီး ကားကအဝ်ႏ တောႏလမ်းလို့လဲဉ်း ပါꩻမူႏနဝ်ꩻမꩻ ယိုခါ၊ အဝ်ႏထာꩻသီကို ထွိုင်ႏမွန်လွဉ်ဒါႏ အနီꩻနဝ်ꩻချိန်ႏ ဝွေꩻမူႏယို အီႏထွာဗာႏ အဖြာꩻမုဲင်ꩻ မာဟောင်း” နုဲင်းနဝ်ꩻသွူ။

29ဗွေႏယေသျု လဝ်းချာဝွေꩻသီး၊ “သီမွော့ꩻ မာႏငါႏခွိုင်းကားမုဲင်ꩻ၊ နဝ်ꩻနဝ်ꩻ ကွပ်ပွိုး သီတသေတဝ်း လိတ်ကျမ်ꩻ၊ မဉ်ႏတမွေးတဝ်း တသေတဝ်း ဗွေႏဘုရာꩻ အတန်ꩻခိုꩻနဝ်ꩻသွူ။ 30ပွိုးအဝ်ႏထာꩻသီ ထွိုင်ႏမွန်လွဉ်ချိန်ႏနဝ်ꩻ ဝွေꩻသီး အီႏဗွိုန်နုဲင်းဒျာႏ မို့ꩻလောင်းတမန်ႏဖုံႏတဲင် အီႏတတောႏလမ်းတဝ်း ထာꩻနဝ်ꩻသွူ။ 31ယိုခါ နုဲင်းကအဝ်ႏထာꩻသီ ထွိုင်ႏမွန်လွဉ်ချာတာႏ နုဲင်းဗွေႏဘုရာꩻ ကမိန်းဖေႏလဲဉ်းဒါႏ သီနဝ်ꩻ သီတဖတ်ဗာႏဖိုတဝ်းဟောင်း။ ဝွေꩻဗွေႏမိန်း၊ 32#ထလ ၃:၆။ ‘ခွေနဝ်ꩻထွာ အဗြာဟံ ဗွေႏဘုရာꩻ၊ ဣသဲစ် ဗွေႏဘုရာꩻ တွမ်ႏယာကုပ် ဗွေႏဘုရာꩻသွူ၊၊’ ဝွေꩻဗွေႏနဝ်ꩻထွာ လိုꩻသက်အဝ်ႏမွန် အဗွေႏဘုရာꩻ၊ လိုꩻသီ အဗွေႏဘုရာꩻ တမွေးတဝ်း” နုဲင်းနဝ်ꩻသွူ။

33လိုꩻဖုံႏထွိုင်ႏဟွိုန် နုဲင်းယို ဝွေꩻသီး အံႏဖြာႏငါႏ ဝွေꩻဗွေႏ ထာꩻသွဉ်သင်နဝ်ꩻသွူ။

ကတန်မျတ်ငါႏပညတ်တောႏ

(မာကု ၁၂:၂၈–၃၄။ လုကာ ၁၀:၂၅–၂၈)

34ဖါရိသဲဖုံႏ ထွိုင်ႏဟွိုန် ဗွေႏယေသျုမာꩻ ယဉ်တစ်ꩻထိုꩻ သာဒုကဲငဝ်းနဝ်ꩻ ဝွေꩻသီး လွဉ်ငီꩻလို့ဝင်ꩻတဲင်၊ 35#လု ၁၀:၂၅–၂၈။ ဝွေꩻသီးကို ကျမ်ꩻဒါႏဆရာႏ တဖြာꩻနဝ်ꩻ ကျံႏဒေါင်ဝွေꩻဗွေႏ စွဉ်ႏငဝ်းရီတစွိုးသွူ။ 36ဝွေꩻရီ၊ “ဆရာႏ၊ ပညတ်ကျမ်ꩻကိုနဝ်ꩻ ပညတ်အပါꩻမုဲင်ꩻထွာ အတန်မျတ်သွတ်ꩻဟောင်း” နုဲင်းနဝ်ꩻသွူ။

37 # ဟော်ꩻ ၆:၅။ ဗွေႏယေသျု လဝ်းချာ၊ “စွဉ်ႏနာꩻသꩻအာႏ ကားကအဝ်ႏ၊ စွဉ်ႏနာꩻဝိညာဉ်ႏ ကားကအဝ်ႏ တွမ်ႏစွဉ်ႏနာꩻဉာဏ်ႏ ကားကအဝ်ႏနဝ်ꩻ ရက်သွော့ ထာဝရဘုရာꩻ သီဗွေႏဘုရာꩻ ။’ 38ယိုနဝ်ꩻထွာ အတန်မျတ်သွတ်ꩻတွမ်ႏ အရေꩻတန်သွတ်ꩻ ပညတ်တောႏသွူ။ 39#ဝိ ၁၉:၁၈။ ဒုတိယ အရေꩻတန်သွတ်ꩻ ပညတ်နဝ်ꩻနုဲင်းယို၊ ‘နုဲင်းနာꩻကရက် နာꩻနမ်းနဝ်ꩻ ရက်သွော့ နာꩻလမ်းသောင်လမ်းထျꩻ။’ 40မောသျေ ပညတ်ကျမ်ꩻ တအုပ်လွုမ်းတွမ်ႏ ပရောဖဲစ်ဖုံႏ အထာꩻသွဉ်သင်နဝ်ꩻ အဝ်ႏအုံဒေါင်လူး ပညတ်ယိုနီစွိုး” နုဲင်းနဝ်ꩻသွူ။

ရီပွိုင်းဝွို့တွမ်ႏမေသျိယခရာႏ

(မာကု ၁၂:၃၅–၃၇။ လုကာ ၂၀:၄၁–၄၄)

41ဖါရိသဲဖုံႏ ယင်ဟန်ႏ ထွိုင်ႏစုဗူႏလို့ဝင်ꩻနဝ်ꩻ ဗွေႏယေသျုရီ ဝွေꩻသီး၊ 42“ပွိုင်းဝွို့တွမ်ႏ မေသျိယခရာႏနဝ်ꩻ သီထင်း နုဲင်းမုဲင်ꩻဟောင်း။ ဝွေꩻနဝ်ꩻ ပါꩻမုဲင်ꩻ ပိုလီꩻစွိုးခွိုꩻဟောင်း” နုဲင်းနဝ်ꩻသွူ။

ဝွေꩻသီးလဝ်းချာ၊ “ဝွေꩻနဝ်ꩻထွာ ဒါဝိဒ်ပိုလီꩻစွိုးခွိုꩻ” နုဲင်းနဝ်ꩻသွူ။

43ဗွေႏယေသျုရီ၊ “ပေါ့ꩻနုဲင်းနဝ်ꩻနဝ်ꩻ၊ ပွိုးတမုဲင်ꩻ ဝိညာဉ်ႏတောႏ တမာဒါဝိဒ် ဖေႏကဟဲ့ꩻဝွေꩻ၊ ‘ဗွေႏ’၊ နုဲင်းမုဲင်ꩻဟောင်း။ ဒါဝိဒ်ဒေါ့ꩻ၊

44 # သာ ၁၁၀:၁။ ‘ထာဝရဘုရာꩻ ဒေါ့ꩻဖေႏခွေဗွေႏ၊

ဗꩻတွိုႏစွဉ်ႏ ရန်ႏသူႏ ခွေအွဉ်ႏ နာꩻခင်ႏဆꩻလ၊

အုံလင်ꩻသွော့ ခွေစူထွေဖဲ့ꩻ ယိုကို၊၊ ’

45ပေါႏမဉ်ႏထွာ နုဲင်းနဝ်ꩻနဝ်ꩻ၊ ဒါဝိဒ်ကဟဲ့ꩻဒါႏဝွေꩻ ‘ဗွေႏ’ မေသျိယယို အီႏထွာနွောင်ꩻ ဒါဝိဒ်ပိုလီꩻစွိုးခွိုꩻ နုဲင်းမုဲင်ꩻဟောင်း” နုဲင်းနဝ်ꩻသွူ။

46ပါꩻမုဲင်ꩻတဖြာꩻတဲ့ တလဝ်းဖြေႏချာ နွောင်ꩻတဝ်း ဗွေႏယေသျု ငဝ်းဖြေႏ တငွါငွါတဲင် တယ်ႏစွဉ်ႏအနီꩻနဝ်ꩻ ပါꩻမုဲင်ꩻတဖြာꩻတဲ့ ရီရုဲင်းဗွိုန်ႏဒွုမ် ဝွေꩻဗွေႏ ငဝ်းရီဖုံႏ တငွါငွါနဝ်ꩻသွူ။

Currently Selected:

မတဲ 22: PBCL

Highlight

Copy