မတဲ 20
20
တဗဲစ်ဥယျာဉ်ႏခြံထာꩻမာꩻသားဖုံႏ
1“ခမ်းထီမို့ꩻလောင်းနဝ်ꩻ ဗွိုန်နုဲင်းယိုသွူ။ တလဲင်ႏသား ပါꩻအဝ်ႏတဖြာꩻနဝ်ꩻ ထန်ႏလွေꩻစဝ်း မွူးရဝ်ꩻခိုႏတွော့ꩻ ထုမ်ႏလိုꩻစင်း ယင်ဟန်ႏ ဖေႏကမာꩻထာꩻမာꩻ ဝွေꩻတဗဲစ် ဥယျာဉ်ႏခြံကိုနဝ်ꩻသွူ။ 2ဝွေꩻသဘော်ꩻတူႏ အီႏဖေႏဝွေꩻသီး ထာꩻမာꩻခ တနီꩻနဝ်ꩻ ရွဉ်ယာႏ တဗီႏတဲင် အွဉ်ႏစွꩻလွေꩻ ဝွေꩻသီး ဖေႏကမာꩻ ဝွေꩻတဗဲစ်ဥယျာဉ်ႏ ခြံကိုနဝ်ꩻသွူ။ 3ထွိုင်ႏတွိုႏ ကွတ်ꩻနားရီႏနဝ်ꩻ ဝွေꩻထန်ႏလွေꩻဖျင် ဆေꩻကိုတလဲင်ႏတဲင် ထီႏလိုꩻခိုယင်ဟန်ႏ ထာꩻမာꩻအဲဉ်ထဝ်း အဝ်ႏအုံထွိုင်ႏခြေင်ထာꩻ နဝ်ꩻကိုဖုံႏသွူ။ 4နဝ်ꩻမꩻ ဝွေꩻဒေါ့ꩻဖေႏ ဝွေꩻသီး၊ ‘သီတဲ့ လွေꩻမာꩻသွော့ ထာꩻမာꩻ တဗဲစ်ဥယျာဉ်ႏခြံကိုတဲင် ကထွိုက်ꩻတန်ႏဒါႏ အခနဝ်ꩻ ခွေအီႏဖေႏ’ နုဲင်းနဝ်ꩻသွူ။ 5နဝ်ꩻမꩻ ဝွေꩻသီး လွေꩻစွဉ်ႏနဝ်ꩻသွူ။ နဝ်ꩻထွူ မွူးယာ တဆီနီ နားရီႏတွမ်ႏ မွူးဟာလင်ꩻ သွံနားရီႏနဝ်ꩻတဲ့ ဝွေꩻမာꩻဗွိုန်ဖျင် နုဲင်းနဝ်ꩻနေနေသွူ။ 6မွူးဟာလင်ꩻ ငတ်ꩻနားရီႏ အီႏဒုံႏလဲဉ်း ဝွေꩻထွိုင်ႏလွေꩻ ဆေꩻချိန်ႏ ထီႏလိုꩻလင်ယင်ဟန်ႏ အဝ်ႏအုံထွိုင်ႏ စွူစွူနေက နဝ်ꩻကိုသွူ။ ဝွေꩻရီဝွေꩻသီး၊ ‘ပွိုးတမုဲင်ꩻ သီအဝ်ႏဖျုန်ꩻခြေင်ဗာႏ အချိန်ႏ တနီꩻမွူး၊ ယိုကိုနဝ်ꩻ ထာꩻမာꩻ အဲဉ်ထဝ်းဟောင်း’ နုဲင်းနဝ်ꩻသွူ။ 7ဝွေꩻသီး လဝ်းချာ၊ ‘ပါꩻမုဲင်ꩻတဲ့ တစင်းတဝ်းနီ’ နုဲင်းနဝ်ꩻသွူ။ ဝွေꩻဒေါ့ꩻဖေႏဝွေꩻသီး၊ ‘မွေးသွူ၊ ပေါ့ꩻနုဲင်းနဝ်ꩻ၊ သီလွေꩻတွော့ꩻ မာꩻသော့ꩻခွေ တဗဲစ်ဥယျာဉ်ႏခြံဟုဲင်း’ နုဲင်းနဝ်ꩻသွူ။
8 #
ဝိ ၁၉:၁၃၊ ဟော်ꩻ ၂၄:၁၅။ “မွူးထွိုင်ႏဟာလွဉ် ခြံဗွေႏဒေါ့ꩻနယ်ဖေႏ ဝွေꩻလိုꩻ ကအွဉ်မာꩻ ထာꩻမာꩻသား၊ ‘ တယ်ႏစစွဉ်ႏလိုꩻ ကလွဉ်မာꩻဆုဲင်ꩻစွဉ်ႏ အဆုဲင်ꩻသွတ်ꩻသားတွမ်ႏ လိုꩻအံႏစင်းနမ်း အရီးသွတ်ꩻသားဖုံႏနဝ်ꩻ ဟဲ့ꩻလွဉ်တွော့ꩻ ဖေႏဝွေꩻသီး ထာꩻမာꩻခဟုဲင်း၊’ နုဲင်းနဝ်ꩻသွူ။ 9လိုꩻကမာꩻစဒါႏ ထာꩻမာꩻ ငတ်ꩻနားရီႏသားဖုံႏနဝ်ꩻ ဖေႏအခ တဖြာꩻ ရွဉ်ယာႏတဗီႏ စီႏနဝ်ꩻသွူ။ 10နဝ်ꩻမꩻ ပါꩻခိုဖုံႏ ကအံႏစင်းနမ်း အရီးသွတ်ꩻသားဖုံႏ ထွိုင်ႏလွဉ် အီႏဖေႏ ထာꩻမာꩻခချိန်ႏ ဝွေꩻသီးထင်း ဝွေꩻသီး အီႏလꩻလွိုနဝ်ꩻသွူ။ ကွဲႏတွော့ꩻ ဝွေꩻသီးနဝ်ꩻတဲ့ အဝ်ႏဖေႏဗွိုန်ဗွိုန်ဒျာႏ ရွဉ်ယာႏ တဗီႏစီႏနဝ်ꩻသွူ။ 11ဝွေꩻသီးထူႏ ဝွေꩻသီးရွဉ်တဲင် သောင်ခြင်ꩻ ထေင်ဆန်ချာစစွဉ်ႏ ခြံဗွေႏနဝ်ꩻသွူ။ 12ဝွေꩻသီးဒေါ့ꩻ၊ ‘လိုꩻစားယိုနဝ်ꩻ အံႏစင်းနမ်း အဆုဲင်ꩻသွတ်ꩻ မာꩻထာꩻမာꩻ တနားရီႏလွုမ်ꩻ၊ တွိုႏနီနဝ်ꩻ အွဉ်ႏမာꩻသော့ꩻ ထာꩻမာꩻ ယာလျားကို တနီꩻမွူးမွူး၊ ကွဲႏတွော့ꩻ နာꩻဖေႏဝွေꩻသီးနဝ်ꩻ ဖေႏဗွိုန်ဒျာႏနုဲင်း ကဖေႏနီ ထာꩻမာꩻခ’ နုဲင်းနဝ်ꩻသွူ။
13အဗွေႏလဝ်းချာ ဝွေꩻသီးအကို တဖြာꩻ ၊ ‘နာႏဟုဲင်းသွꩻ၊ ခွေတလိန်ႏလဲဉ်တဝ်း သီသွူ။ နဝ်ꩻထွူ ကားကအဝ်ႏနဝ်ꩻ သီသဘော်ꩻတူႏလဲဉ်း အီႏမာꩻထာꩻမာꩻ တနီꩻမွူးတာႏနဝ်ꩻ ရွဉ်ယာႏတဗီႏနဝ်ꩻသွူ။ 14ယိုခါ ထူႏသီ ထာꩻမာꩻခတွော့ꩻ သဲင်ꩻခန်းလမ်းဟုဲင်း။ လိုꩻကအံႏစင်းနမ်း အဆုဲင်ꩻသွတ်ꩻ လိုꩻစားယိုနဝ်ꩻ တတွာ ခွေကဖေႏဒါႏ နာꩻအတွိုင်ꩻနဝ်ꩻ ခွေမဉ်ဖေႏဒျာႏသွူ။ 15နုဲင်းခွေကပဲင်ႏဒါႏ စွဉ်ႏခွေနမ်းရွဉ်နဝ်ꩻ မဉ်မာꩻနုဲင်းမုဲင်ꩻမာꩻ လꩻတဝ်းဟောင်း။ မဉ်ႏတမွေးတဝ်း၊ ကွပ်ပွိုး ခွေစေႏတနာႏ ဟဝ်ငါႏအတွက် နာꩻအဝ်ႏတကေးနဲ့ဟောင်း” နုဲင်းနဝ်ꩻသွူ။
16 #
မ ၁၉:၃၀၊ မာ ၁၀:၃၁၊ လု ၁၃:၃၀။ နဝ်ꩻမꩻ ဗွေႏယေသျု အွဉ်ႏသွတ်ꩻထာꩻဒေါ့ꩻ၊ “ လိုꩻကထဲ့ဆုဲင်ꩻသားနဝ်ꩻ အီႏတကတ်ꩻရီးတဲင် လိုꩻကလဲဉ်း ရီးသားဖုံႏနဝ်ꩻ အီႏထဲ့ဆုဲင်ꩻ” နုဲင်းနဝ်ꩻသွူ။
ပွိုင်းဝွို့တွမ်ႏဝွေꩻဗွေႏအီႏသီခရာႏနဝ်ꩻဗွေႏယေသျုဒေါ့ꩻတတိယလဲင်ႏ
(မာကု ၁၀:၃၂–၃၄။ လုကာ ၁၈:၃၁)
17နုဲင်းဗွေႏယေသျု ကအဝ်ႏထင်ႏလွေꩻ ဝေင်ꩻယေရုသလမ်ႏတွင်ꩻ တပဲ့တောႏ တဆီနီပါꩻနဝ်ꩻ ဝွေꩻဗွေႏ ဟဲ့ꩻလွဉ်ဗော့ꩻတဲင် နုဲင်းဝွေꩻသီး ကအဝ်ႏထောင်လွေꩻ ထာꩻချိန်ႏနဝ်ꩻ ဒေါ့ꩻနယ်တေ့ꩻဖေႏ ဝွေꩻသီးသွူ။ 18ဝွေꩻဗွေႏ ဒေါ့ꩻနယ်ဝွေꩻသီး၊ “နာႏဟုဲင်း၊ နီအဝ်ႏထင်ႏလွေꩻ ဝေင်ꩻယေရုသလမ်ႏ၊ နဝ်ꩻကို လိုꩻပိုခိုနဝ်ꩻ အီႏခံႏဗာႏ ယဇ်ပရောဟိတ်တန်ဖုံႏတွမ်ႏ ကျမ်ꩻဒါႏဆရာႏဖုံႏ ဆွမ်ꩻနဝ်ꩻသွူ။ ကအီႏဖေႏ ထာꩻသီတံႏနဝ်ꩻ ဝွေꩻသီး အီႏစီႏရင်ႏ ဝွေꩻဗွေႏတဲင်၊ 19အီႏအပ်ထိုꩻ ဝွေꩻဗွေႏ ဘာႏသာႏလင် စူကိုနဝ်ꩻသွူ။ အီႏသွမ်ꩻငရောင် ဝွေꩻဗွေႏ၊ တွဲႏဝွေꩻဗွေႏ စွဉ်ႏခွဉ်းရေႏ ဆူႏသားတဲင် တွဲႏဒပ်ဝွေꩻဗွေႏ ကင်းထွန်ႏလောင်းသွူ။ ကွဲႏတွော့ꩻ သွံနီꩻထွိုင်ႏလဲဉ်းနဝ်ꩻ ဝွေꩻဗွေႏ အီႏထွိုင်ႏမွန်ချာဒျာႏ” နုဲင်းနဝ်ꩻသွူ။
မွိုးတဖြာꩻအထာꩻကွီ
(မာကု ၁၀:၃၅–၄၅)
20နဝ်ꩻထွူ ဇေဗေဒဲအမာဖြား တွမ်ႏအပိုခို ဝင်ꩻနီနဝ်ꩻလွဉ် ဗွေႏယေသျုထျꩻ ၊ အွပ်ꩻလင်ꩻ ဝွေꩻဗွေႏဆꩻငါတွော့ꩻ ဖေႏသေရေꩻတာႏနဝ်ꩻ ကွီဝွေꩻဗွေႏသွူ။
21ဗွေႏယေသျုရီဝွေꩻမူႏ၊ “နာꩻအလိုႏအဝ်ႏ တမုဲင်ꩻဟောင်း” နုဲင်းနဝ်ꩻသွူ။
ဝွေꩻမူႏလဝ်းချာ၊ “နီဗွေႏမဉ်ႏထွာ ခွန်တန်ချိန်ႏ ခွေပိုခို ဝင်ꩻနီယို ဖေႏကအုံလင်ꩻဗာႏ နီဗွေႏ အထွေဖဲ့ꩻတွမ်ႏ အစေႏဖဲ့ꩻနဝ်ꩻ အွဉ်ႏဂတိဖေႏ ခွေသွဉ်းမူႏမွိုင်” နုဲင်းနဝ်ꩻသွူ။
22ဗွေႏယေသျု လဝ်းချာ အပိုခိုဖုံႏ၊ “နုဲင်းသီကအဝ်ႏကွီဒါႏ နဝ်ꩻ သီတသေနာႏတဝ်းသွူ။ ခွေကအွꩻဒါႏ ထာꩻဒုက္ခ တကောက်ꩻနဝ်ꩻ သီအွꩻနွောင်ꩻနေဟောင်း” နုဲင်းနဝ်ꩻသွူ။
ဝွေꩻသီးလဝ်းချာ၊ “နီအွꩻနွောင်ꩻဒျာႏ၊” နုဲင်းနဝ်ꩻသွူ။
23ဗွေႏယေသျု ဒေါ့ꩻဖေႏဝွေꩻသီး၊ “ခွေတကောက်ꩻနဝ်ꩻ သီအီႏအွꩻဗာႏမွေး။ ကွဲႏတွော့ꩻ ကအီႏအုံဗာႏ ခွေစူထွေဖဲ့ꩻတွမ်ႏ စူစေႏဖဲ့ꩻနဝ်ꩻ ခွေလွိုက်ခွင်ꩻ အဲဉ်ထဝ်းသွူ။ ခင်ႏလမ်းယိုနဝ်ꩻ ဆဲင်ႏဒျာႏလိုꩻဖုံႏ ခွေဖါ ကအဝ်ႏဖျင်ရဲဉ်ꩻဖေႏ ဝွေꩻသီးတာႏဒျာႏ” နုဲင်းနဝ်ꩻသွူ။
24တပဲ့တောႏ အလင် တဆီဖြာꩻ ထွိုင်ႏဟွိုန် ယိုခရာႏနဝ်ꩻ ဝွေꩻသီး သꩻလျားစွဉ်ႏ ပါꩻတဖူးဝေး ဝင်ꩻနီနဝ်ꩻသွူ။ 25#လု ၂၂:၂၅၊ ၂၆။ နဝ်ꩻမꩻ ဗွေႏယေသျု ဟဲ့ꩻစုဗူႏလို့ ဝွေꩻသီးတဲင်ဒေါ့ꩻ၊ “ဘုရာꩻတရာꩻအဲဉ်ထဝ်းသား ခွန်ဖုံႏနဝ်ꩻ တန်ꩻခိုꩻအဝ်ႏ ဝွေꩻသီးလောင်းတဲင် ခေါင်းဆောင် လိုꩻတန်ဖုံႏနဝ်ꩻ အဝ်ႏဗွေစွဉ်ႏ အာႏဏာႏတန်ꩻခိုꩻနဝ်ꩻ သီအဝ်ႏသေဒျာႏ။ 26#မ ၂၃:၁၁၊ မာ ၉:၃၅၊ လု ၂၂:၂၆။ ကွဲႏတွော့ꩻ သီအကိုနဝ်ꩻ ထွာဗာႏတဝ်း နုဲင်းယိုသွူ။ သီတဖြာꩻ မဉ်ႏမဉ်ထွာ အတန်သွတ်ꩻနဝ်ꩻ သီအီႏခံႏသွဉ်းဖေႏဗာႏ လိုꩻအဝ်ႏကုဲင်သား တာႏသွူ။ 27သီကိုတဖြာꩻ မဉ်ႏမဲဉ်ထွာ အတန်သွတ်ꩻနဝ်ꩻ သီအီႏခံႏဖေႏဗာႏ လိုꩻလင်ဖုံႏအသွဉ်းသွူ။ 28ဗွိုန်နုဲင်းနဝ်ꩻနေနေ လိုꩻပိုခိုနဝ်ꩻ ဖေႏဝင်ꩻကခံႏဖေႏ အသွဉ်းတွော့ꩻ ကျွꩻလွဉ် တမွေးတဝ်း၊ ကွဲႏတွော့ꩻ အီႏခံႏဖေႏသွဉ်းတဲင် ဖေႏဝွေꩻအသက်တွော့ꩻ အီႏလွိုက်ဖြေꩻချာ လိုꩻဖုံႏ အာငါႏ” နုဲင်းနဝ်ꩻသွူ။
ဗွေႏယေသျုလုမ်ꩻလာꩻဟဝ်ဖေႏလိုꩻမဲ့ခေ့ꩻဝင်ꩻနီ
(မာကု ၁၀:၄၆–၅၂။ လုကာ ၁၈:၃၅–၄၃)
29နုဲင်းဗွေႏယေသျုတွမ်ႏ ဝွေꩻဗွေႏ တပဲ့တောႏဖုံႏ အဝ်ႏဝေင်ꩻယေရိခေါ ကအဝ်ႏထန်ႏလွေꩻနဝ်ꩻ လိုꩻစွိုꩻအာဖုံႏ အဝ်ႏလွေꩻလွဉ်ꩻ ဝွေꩻဗွေႏ ဆꩻချာနဝ်ꩻသွူ။ 30လိုꩻခိုမဲ့ခေ့ꩻဝင်ꩻနီ ကအဝ်ႏအုံလင်ꩻ တဖူꩻတန်ထျꩻနဝ်ꩻ ဟွိုန်ဗွေႏယေသျု အဝ်ႏကာႏလွေꩻအထျꩻ၊ နဝ်ꩻမꩻ ဝွေꩻသီး ခြောဝ်စစွဉ်ႏ၊ “ဒါဝိဒ်ပိုခို၊ သညင်ꩻဗဲင်း နီမွိုင်ဗွေႏ” နုဲင်းနဝ်ꩻသွူ။
31လိုꩻစွိုꩻဖုံႏနဝ်ꩻ ခွန်းနယ်ꩻ ဝွေꩻသီးတဲင် ဒေါ့ꩻဝွေꩻသီး၊ ဖေႏကအုံတေ့ꩻတေ့ꩻ နဝ်ꩻသွူ။ ကွဲႏတွော့ꩻ ဝွေꩻသီး ကယိန်းခြောဝ်သန်ထဲင်း၊ “ဒါဝိဒ်ပိုခိုဟွေး၊ သညင်ꩻဗဲင်း နီမွိုင်ဗွေႏ၊” နုဲင်းနဝ်ꩻသွူ။
32ဗွေႏယေသျု အုံထွိုင်ႏတဲင် ဟဲ့ꩻဝွေꩻသီးသွူ။ ဝွေꩻဗွေႏရီ၊ “သီတာႏ သီမဉ်အွဉ်ႏခွေမာꩻဖေႏ တမုဲင်ꩻဟောင်း” နုဲင်းနဝ်ꩻသွူ။
33ဝွေꩻသီးလဝ်းချာ၊ “ဗွေႏ။ ဖေႏနီကထီႏစဲင်း ယင်းနဝ်ꩻ နီမဉ်အွဉ်ႏနီဗွေႏ မာꩻဖေႏ” နုဲင်းနဝ်ꩻသွူ။
34ဗွေႏယေသျု သညင်ꩻဝွေꩻသီးတဲင် စွဉ်ႏစူခွိုင်း ဝွေꩻသီးမဲ့ဖုံႏသွူ။ တလဲင်ႏချင်ꩻ ဝွေꩻသီး ထီႏနွောင်ꩻ ချာယင်းထာꩻတဲင် ဝွေꩻသီး လွေꩻလွဉ်ꩻစွဉ်ႏ ဝွေꩻဗွေႏ ဆꩻချာနဝ်ꩻသွူ။
Currently Selected:
မတဲ 20: PBCL
Highlight
Share
Copy
Want to have your highlights saved across all your devices? Sign up or sign in
Pao Bible Common Language© Bible Society of Myanmar, 2019.
