ဧဇရ 8
8
လိုꩻကခံႏဗာႏဝါးထန်ႏထိုꩻခမ်းထီသဲင်ꩻလွဉ်ချာသားဖုံႏ
1အာတဇေရဇ် အဝ်ႏထွာ ဧကရာဇ် ခွန်တန်ချိန်ႏ ကခံႏဗာႏ ဝါးထန်ႏသော့ꩻထိုꩻ ဗာဗုလုန် ခမ်းထီကို ခွိုꩻနွယ်ႏ ခေါင်းဆောင် လိုꩻတန်ဖုံႏ ကသဲင်ꩻလွဉ်ငီꩻချာဒါႏ တွမ်ႏဧဇရ ဝေင်ꩻယေရုသလမ်ႏကို မဉ်ꩻစရင်ꩻဖုံႏနဝ်ꩻ နုဲင်းယိုသွူ။
2-14ဖိနဟတ်ခွိုꩻကိုနဝ်ꩻ ဂေရသျုန်၊
ဣတမာခွိုꩻကိုနဝ်ꩻ ဒံယေလ၊
ဒါဝိဒ်ခွိုꩻနွယ်ႏကိုနဝ်ꩻ သျေခနိပိုခိုဟတ္တုတ်၊
ပါရုတ်ခွိုꩻနွယ်ႏကိုနဝ်ꩻ ဇာခရိ တွမ်ႏဝွေꩻအခွိုꩻကို လိုꩻခိုအဖြာꩻ ၁၅၀ (နဝ်ꩻကိုနဝ်ꩻ အဝ်ႏတဲမ်းမတ်သေꩻ ဝွေꩻသီး တမွိုးဖါပိုစွိုꩻ စွိုးခွိုꩻရဲဉ်ႏ စရင်ꩻဖုံႏနဝ်ꩻသွူ။)
ပါဟတ်မောအပ် ခွိုꩻနွယ်ႏကိုနဝ်ꩻ ဇေရာယပိုခို ဧလျောနဲတွမ်ႏ လိုꩻခိုအဖြာꩻ ၂၀ဝ၊
ဇတ္တုခွိုꩻနွယ်ႏကိုနဝ်ꩻ ယဟာဇေလပိုခို သျေခနိတွမ်ႏ လိုꩻခိုအဖြာꩻ ၃၀ဝ၊
အာဒိန်ခွိုꩻနွယ်ႏကိုနဝ်ꩻ ယောနတန်ပိုခိုဧဗဲက်တွမ်ႏ လိုꩻခိုအဖြာꩻ ၅၀၊
ဧလံခွိုꩻနွယ်ႏကိုနဝ်ꩻ အာတလိပိုခို ယေသျာယတွမ်ႏ လိုꩻခိုအဖြာꩻ ၇၀၊
သျေဖတိခွိုꩻနွယ်ႏကိုနဝ်ꩻ မိက္ခေလပိုခို ဇေဗဒိတွမ်ႏ လိုꩻခိုအဖြာꩻ ၈၀၊
ယွာဗခွိုꩻနွယ်ႏကိုနဝ်ꩻ ယေဟေလပိုခို ဩဗဒိတွမ်ႏ လိုꩻခိုအဖြာꩻ ၂၁၈၊
ဗာနိခွိုꩻနွယ်ႏကိုနဝ်ꩻ ယောသိဖိပိုခို သျေလောမိတ် တွမ်ႏလိုꩻခိုအဖြာꩻ ၁၆၀၊
ဗေဗဲခွိုꩻနွယ်ႏကိုနဝ်ꩻ ဗေဗဲပိုခို ဇာခရိတွမ်ႏ လိုꩻခိုအဖြာꩻ၂၈၊
အာဇဂဒ်ခွိုꩻနွယ်ႏကိုနဝ်ꩻ ဟက္ကတန်ပိုခို ယောဟနန်တွမ်ႏ လိုꩻခိုအဖြာꩻ ၁၁၀၊
အဒေါနိကံခွိုꩻနွယ်ႏကိုနဝ်ꩻ ဧဖိလဲက်၊ ယွေလ၊ သျေမာယတွမ်ႏ လိုꩻခိုအဖြာꩻ ၆၀နဝ်ꩻသွူ။ (ဝွေꩻသီးနဝ်ꩻ သဲင်ꩻလွဉ် အဆုဲင်ꩻသားဖုံႏဒျာႏ နဝ်ꩻသွူ။)
ဗိဂဝဲခွိုꩻနွယ်ႏကိုနဝ်ꩻ ဥတဲစွဉ်ႏ ဇက္ကုရတွမ်ႏ လိုꩻခို ၇၀နဝ်ꩻသွူ။
ဗိမာန်ႏတောႏကျောင်ꩻတာႏနဝ်ꩻဧဇရထုမ်ႏမော့ꩻလေဝိစွိုးခွိုꩻဖုံႏ
15လိုꩻစွိုꩻဖုံႏ ကားကအဝ်ႏနဝ်ꩻ ခွေအွဉ်ႏစုဗူႏဗော့ꩻစွဉ်ႏ ကခူႏနေး ထီခြောင်တန် ကအဝ်ႏထွတ်ꩻလင်ꩻဒါႏ ဝေင်ꩻအဟာဝထျꩻတဲင် နီချꩻပင်နဝ်ꩻကို သွံနီꩻနဝ်ꩻသွူ။ အစွိုꩻကို နဝ်ꩻကိုနဝ်ꩻ ခွေထီႏဗာႏ ယဇ်ပရောဟိတ်ဖုံႏ အဝ်ႏပါသော့ꩻ၊ ကွဲႏတွော့ꩻ လေဝိစွိုးခွိုꩻနဝ်ꩻ တထီႏတဝ်းနဝ်ꩻသွူ။ 16ခွေဟဲ့ꩻလွဉ် ခေါင်းဆောင် လိုꩻတန်ဝင်ꩻကွတ်ꩻ အဲလိအာသာ၊ အရေလ၊ သျေမာယ၊ ဧလနာတန်၊ ယာရိမ်၊ ဧလနာတန်ꩻ၊ နာတန်၊ ဇာခရိစွဉ်ႏ မေသျုလံတွမ်ႏ ကထွာဒါႏ ဆရာႏဝင်ꩻနီ ယောယရိပ်စွဉ်ႏ ဧလနာတန်နဝ်ꩻသွူ။ 17ဝွေꩻသီးနဝ်ꩻ ခွေပသာလွေꩻ ကသိဖိဝေင်ꩻ ခေါင်းဆောင်လိုꩻတန် ဣဒ္ဒေါထျꩻတွော့ꩻ ကွီဝွေꩻစွဉ်ႏ ဝွေꩻစူထောက် ဗိမာန်ႏတောႏ ထာꩻမာꩻသားဖုံႏ ကအီႏမာꩻ ဗွေႏဘုရာꩻထာꩻမာꩻ ဗိမာန်ႏတောႏ ကျောင်ꩻကိုတာႏနဝ်ꩻ ဖေႏနေး ကအွဉ်ႏစွꩻလွဉ် နီလိုꩻဖုံႏဟုဲင်း။ 18ပွိုးစွဉ်ႏ ဗွေႏဘုရာꩻ ကေꩻဇူꩻတောႏနဝ်ꩻမꩻ ဝွေꩻသီး ပသာလွဉ်ဖေႏနီ မဟာလိခွိုꩻနွယ်ႏ လေဝိစွိုးခွိုꩻတဖြာꩻ လိုꩻဒါႏလျင်ႏသား သျေရဗိနဝ်ꩻတဲင် ဝွေꩻပိုခိုဖုံႏတွမ်ႏ ဝွေꩻဖူးခိုဖုံႏ တဆီသွစ်ꩻဖြာꩻနဝ်ꩻတဲ့ လွဉ်လွဉ်ꩻငီꩻ တွမ်ႏဝွေꩻနဝ်ꩻသွူ။ 19ဝွေꩻသီး ပသာလွဉ်ဖေႏပါက မေရာရိ ခွိုꩻနွယ်ႏကို ဟာသျဗိစွဉ်ႏ ယေသျာယတွမ်ႏ ဝွေꩻသီးဖူးဝေးဖုံႏ အဖြာꩻနီဆီနဝ်ꩻသွူ။ 20နဝ်ꩻလွုမ်ꩻတကာႏတဝ်း ကအီႏစွဲကို လေဝိစွိုးခွိုꩻဖုံႏနဝ်ꩻ ဝွေꩻသီး အမွိုးဖြားဖါဖြားသီး စိုးကာႏ ခွန်တန်ဒါဝိဒ်စွဉ်ႏ ဝွေꩻလိုꩻ အာႏဏာႏပဲင်ႏသားဖုံႏ ကခန်ꩻသေꩻခါꩻဒါႏ ဗိမာန်ႏတောႏကျောင်ꩻ ထာꩻမာꩻသား အဖြာꩻ ၂၂၀နဝ်ꩻတဲ့ ပါလွဉ်ꩻနဝ်ꩻသွူ။ ဝွေꩻသီး ကားကအဝ်ႏ အမဉ်ꩻဖုံႏနဝ်ꩻ တဲမ်းသော့ꩻခါꩻလဲဉ်း စရင်ꩻကိုနဝ်ꩻသွူ။
ဧဇရနဝ်ꩻအွဉ်လိုꩻဖုံႏဖေႏကသျောင်ႏကံထာꩻအံႏတွမ်ႏဆုတောင်ꩻ
21ဖေႏနေးကသျောင်ႏကံ ထာꩻအံႏတွော့ꩻ အွဉ်ႏချꩻဖွိုႏသꩻ ဖေႏကဆုတောင်ꩻ နီဗွေႏဘုရာꩻ ဆꩻငါတဲင် နီတဖူꩻနဝ်ꩻ ဖေႏနေး ဝွေꩻဗွေႏ ကအွဉ်နီ ဖေႏကရဲပွေါးထွား နီစွဉ်ႏနီပိုဖုံႏ၊ စွဉ်ႏနီထာꩻခြိုꩻဥစ္စာႏဖုံႏ ကားကအဝ်ႏတာႏနဝ်ꩻ ခွေထေအမိန်း ကခူႏနေးဒါႏ အဟာဝ ထီခြောင်တန်ထျꩻနဝ်ꩻသွူ။ 22နီကအဝ်ႏလွေꩻ တဖူꩻချိန်ႏ ကအီႏအုံပွေါးရံႏဖေႏဒါႏ နီရန်ႏသူႏတာႏ ကအီႏကွီဗာႏ ဧကရာဇ်ခွန်တန် စဲ့ꩻသေတပ် တတပ်နဝ်ꩻ ခွေဝင်ꩻသꩻငါႏ။ ပွိုးတွော့ꩻ လိုꩻကယွုမ်းအံႏ အာႏကွိုꩻဒါႏ ဝွေꩻဗွေႏသားဖုံႏနဝ်ꩻ နီဗွေႏဘုရာꩻ အီႏဖေႏမင်္ဂလာႏ၊ ကွဲႏတွော့ꩻ လိုꩻကခွယ်ညာꩻထိုꩻဒါႏ ဝွေꩻဗွေႏသားဖုံႏနဝ်ꩻ ဝွေꩻဗွေႏ တကျွိုက် နစ်သက်တဝ်းတဲင် အီႏဖေႏ အပဲစ်တံႏကျောင်ꩻနဝ်ꩻ ခွေဒေါ့ꩻနယ်ဖေႏလဲဉ်း ခွန်တန် အတွက်သွူ။ 23နဝ်ꩻမꩻ ဗွေႏဘုရာꩻ ဖေႏကရဲပွေါးထွား နီတာႏနဝ်ꩻ နီသျောင်ႏကံ ထာꩻအံႏတွော့ꩻ ဆုတောင်ꩻနဝ်ꩻမꩻ ဝွေꩻဗွေႏနဝ်ꩻ နာႏနီဆုတောင်ꩻငဝ်းဖုံႏ နဝ်ꩻသွူ။
ဗိမာန်ႏတောႏကျောင်ꩻတာႏထာꩻလူႏဖုံႏ
24ယဇ်ပရောဟိတ် ခေါင်းဆောင်တန်ဖုံႏ အကိုနဝ်ꩻ ခွေလွိုက်သျေရဗိ၊ ဟာသျာဗိစွဉ်ႏ အဖူးဝေးဖုံႏ ကအဝ်ႏပါငီꩻ တွမ်ႏဝွေꩻသီး လိုꩻလင်အဖြာꩻ တဆီနဝ်ꩻသွူ။ 25နဝ်ꩻထွူ ကအီႏသွုံꩻအီ ဗိမာန်ႏတောႏ ကျောင်ꩻကိုတာႏ ဧကရာဇ်ခွန်တန်၊ ဝွေꩻတွိုင်ႏပင်ႏ ဖက်သားဖုံႏ၊ အာႏဏာႏပဲင်ႏ သားဖုံႏစွဉ်ႏ ဣသရေး လိုꩻမျိုꩻဖုံႏ၊ ကလူႏဖေႏဒါႏ ရွဉ်ဖုံႏ၊ ခံꩻဖုံႏစွဉ်ႏ အသွုံꩻထာꩻခြိုꩻဖုံႏနဝ်ꩻ ခွေခဉ်ႏတွော့ꩻ ခွေဖေႏထိုꩻစွဉ်ႏ ယဇ်ပရောဟိတ် နဝ်ꩻသွူ။ 26-27ခွေကဖေႏဒါႏ ထာꩻခြိုꩻဖုံႏနဝ်ꩻ နုဲင်းယိုသွူ။
ရွဉ်ယာႏနဝ်ꩻ - ၂၅တန်၊
ရွဉ်ယာႏထာꩻခြိုꩻဖုံႏအဗာႏ ၁၀ဝနဝ်ꩻ-ပေါင်၁၅၀၊
ခံꩻယာႏနဝ်ꩻ- ပေါင်၇၅၀ဝ၊
တကောက်ꩻခံꩻ၂၀နဝ်ꩻ- ၂၇၀အောင်စ၊
တကောက်ꩻတောင်ꩻတသီး အဟဝ်စား နီဖြုံႏတန်ꩻဖိုꩻနဝ်ꩻ တတွာစွဉ်ႏ တကောက်ꩻခံꩻဖုံႏ၊
28ခွေဒေါ့ꩻဖေႏ ဝွေꩻသီး “သီနဝ်ꩻ မာꩻကြောင်းစင် ထွူလဲဉ်း ထာဝရဘုရာꩻ သီမွိုးဖြား ဖါဖြားသီး ဗွေႏဘုရာꩻတာႏနဝ်ꩻမꩻ တွမ်ႏစေႏတနာႏသꩻထာꩻလူႏ သီကထူႏလွဉ်ဖေႏဒါႏ ဝွေꩻဗွေႏ ရွဉ်၊ ခံꩻ စွဉ်ႏထာꩻခြိုꩻထာꩻလေင်ꩻဖုံႏ ကားကအဝ်ႏ နဝ်ꩻသွူ။ 29နဝ်ꩻဖုံႏနဝ်ꩻ ဗꩻတွိုႏစွဉ်ႏ သီကဖျော်လွေꩻ ဗိမာန်ႏတောႏကျောင်ꩻနဝ်ꩻ အွဉ်ႏသတိꩻ ပွေါးထွားဟဝ်ဟဝ်တွော့ꩻ၊ နဝ်ꩻဖုံႏနဝ်ꩻ ခဉ်ႏယဇ်ပရောဟိတ်ဖုံႏ အခန်ꩻကိုတွော့ꩻ အပ်ဖေႏသွော့ ယဇ်ပရောဟိတ် လိုꩻတန်ဖုံႏစွဉ်ႏ လေဝိစွိုးခွိုꩻ ခေါင်းဆောင် လိုꩻတန်ဖုံႏတွမ်ႏ ဝေင်ꩻယေရုသလမ်ႏကို ဣသရေး လိုꩻမျိုꩻ ခေါင်းဆောင်ဖုံႏ အစူကိုဟုဲင်း” နုဲင်းနဝ်ꩻသွူ။ 30ကွပ်နဝ်ꩻမꩻ ယဇ်ပရောဟိတ်ဖုံႏတွမ်ႏ လေဝိစွိုးခွိုꩻဖုံႏနဝ်ꩻ ထူႏသိမ်ꩻဟဝ် ရွဉ်ဖုံႏ၊ ခံꩻဖုံႏစွဉ်ႏ ထာꩻခြိုꩻထာꩻလေင်ꩻဖုံႏတွော့ꩻ ထာꩻခြိုꩻနဝ်ꩻဖုံႏနဝ်ꩻ ထူႏလွေꩻဖေႏဗာႏ ဗိမာန်ႏတောႏကျောင်ꩻ ဝေင်ꩻယေရုသလမ်ႏကိုနဝ်ꩻသွူ။
သဲင်ꩻလွဉ်ချာဝေင်ꩻယေရုသလမ်ႏ
31ပထမလာ တဆီနီနီꩻနဝ်ꩻ နီအဝ်ႏကခူႏနေးဒါႏ အဟာဝ ထီခြောင်တန်ထျꩻနဝ်ꩻ ထန်ႏသဲင်ꩻ ဝေင်ꩻယေရုသလမ်ႏနဝ်ꩻသွူ။ နီကလွေꩻတဖူꩻနဝ်ꩻ နီရန်ႏသူႏဖုံႏ ကအီႏတွိုက်ꩻထိုꩻနီစွဉ်ႏ ကအီႏလံတွိုက်ꩻထိုꩻနီနဝ်ꩻ နီဗွေႏဘုရာꩻနဝ်ꩻ အဝ်ႏငီꩻတွမ်ႏနီတဲင် ရဲပွေါးထွားဖေႏနီ နဝ်ꩻသွူ။ 32နီထွိုင်ႏဖျော်လွဉ် ဝေင်ꩻယေရုသလမ်ႏကို ချိန်ႏနဝ်ꩻ နီအုံပဆား သွံနီꩻနဝ်ꩻသွူ။ 33နဝ်ꩻထွူ လစ်ꩻနီꩻကိုနဝ်ꩻ နီလွေꩻ ဗိမာန်ႏတောႏကျောင်ꩻတွော့ꩻ ခဉ်ႏရွဉ်ဖုံႏ၊ ခံꩻဖုံႏတွမ်ႏ ထာꩻခြိုꩻထာꩻလေင်ꩻဖုံႏတဲင် အပ်ဖေႏဥရိယပိုခို ယဇ်ရောဟိတ် မေရိမုတ် စူကိုနဝ်ꩻသွူ။ ဖိနဟတ်ပိုခို ဧလျာသာစွဉ်ႏ လေဝိစွိုးခွိုꩻဝင်ꩻနီ ကထွာယောသျပိုခို၊ ယောဇဗတ်တွမ်ႏ ဗိန္နိပိုခို နောဒိသီး နဝ်ꩻတဲ့ အဝ်ႏငီꩻတွမ်ႏဝွေꩻ နဝ်ꩻသွူ။ 34ထာꩻခြိုꩻဖုံႏ ကားကအဝ်ႏနဝ်ꩻ တွက်ခဥ်ႏတဲင် တဲမ်းမတ်သော့ꩻစွဉ်ႏ စရင်ꩻကို အနီꩻနဝ်ꩻသွူ။
35နဝ်ꩻထွူ လိုꩻကခံႏဗာႏ ဝါးထန်ႏထိုꩻခမ်းထီ ကသဲင်ꩻလွဉ်ချာသား ကားကအဝ်ႏနဝ်ꩻ ထူႏလွဉ်ကအီႏလဲ့ꩻပူႏဇောႏ ဣသရေး ဗွေႏဘုရာꩻ ယဇ်ထာꩻပူႏဇောႏဖုံႏနဝ်ꩻသွူ။ ဣသရေး လိုꩻမျိုꩻဖုံႏ ကားကအဝ်ႏတာႏ ဖိုးထီး ၁၂ဗာႏ၊ သွိုꩻထီး ၉၆ဗာႏ၊ စွဉ်ႏသွိုꩻပေႏ ၇၇ဗာႏနဝ်ꩻသွူ။ အပဲစ်ဖေႏကလွစ် မာꩻကြောင်း ဝွေꩻသီး နမ်းတာႏနဝ်ꩻ ဝွေꩻသီး ပူႏဇောႏပါက ဗဲ ၁၂ဗာႏနဝ်ꩻသွူ။ ထာꩻသားယိုဖုံႏ ကားကအဝ်ႏနဝ်ꩻ လဲ့ꩻပူႏဇောႏဖေႏ ထာဝရဘုရာꩻ နုဲင်းယဇ်ထာꩻပူႏဇောႏ အနေႏဖုံႏနဝ်ꩻသွူ။ 36ဝွေꩻသီးထူႏပါက ဧကရာဇ်ခွန် ကဖေႏဒါႏ ဝွေꩻသီး လိတ်မတ်တမ်ꩻနဝ်ꩻတွော့ꩻ လိတ်နဝ်ꩻဖေႏစွဉ်ႏ ဥဖရတ်ထီခြောင်တန် ဝတ်တွို့ꩻဖဲ့ꩻ ဟံႏနယ်ႏခွန်ခံႏစွဉ်ႏ ဝွေꩻလိုꩻ အာႏဏာႏ ပဲင်ႏသားဖုံႏထျꩻ နဝ်ꩻသွူ။ ဖေႏနဝ်ꩻဖုံႏထွိုင်ႏထွူ ဝွေꩻသီး စွဲကိုအီလိုꩻဖုံႏစွဉ်ႏ ကဝုဲင်ႏကိုꩻကွယ်ႏဒါႏ ဗိမာန်ႏတောႏကျောင်ꩻ ထာꩻမာꩻသားဖုံႏနဝ်ꩻသွူ။
Currently Selected:
ဧဇရ 8: PBCL
Highlight
Copy
Compare
Share
Want to have your highlights saved across all your devices? Sign up or sign in
Pao Bible Common Language© Bible Society of Myanmar, 2019.
