ဧဇရ 9
9
ဧဇရဟွိုန်ထွꩻတောႏလမ်းစွဉ်ႏဂျူးလိုꩻမျိုꩻဖုံႏတမွေးတဝ်းဖုံႏ
1မာꩻယိုကားကအဝ်ႏ ထွိုင်ႏထွူလို့နဝ်ꩻ ဣသရေး လိုꩻတန်ဖုံႏယင်ဟန်ႏ လွဉ်တွော့ꩻ ဒေါ့ꩻနယ်ဖေႏခွေ၊ လိုꩻဖုံႏ၊ ယဇ်ပရောဟိတ်ဖုံႏစွဉ်ႏ လေဝိစွိုးခွိုꩻဖုံႏနဝ်ꩻ ထိန်ꩻတဝ်းအနမ်းတွော့ꩻ အုံဖခေါ်ထိုꩻတဝ်းစွဉ်ႏ လိုꩻခမ်းထီ အသောင်အထျꩻဖုံႏ ကထွာအမ္မုန်ခမ်းသားဖုံႏ၊ မောအပ်ခမ်းသားဖုံႏစွဉ်ႏ အီဂျစ်ခမ်းသားဖုံႏ စွဉ်ႏခါနန်လိုꩻမျိုꩻဖုံႏ၊ ဟိတ္တိလိုꩻမျိုꩻဖုံႏ၊ ဖေရဇိလိုꩻမျိုꩻဖုံႏ၊ ယေဗုသိလိုꩻမျိုꩻဖုံႏ၊ အံမွန်ရိလိုꩻမျိုꩻဖုံႏနဝ်ꩻသွူ။ ဝွေꩻသီးနဝ်ꩻတဲ့ အဝ်ႏထွားနုဲင်းဒျာႏ လိုꩻစားယိုဖုံႏ ကမာꩻဒါႏ ထာꩻပသို့ꩻခရာႏဖုံႏနဝ်ꩻသွူ။ 2ဂျူးလိုꩻခိုဖုံႏနဝ်ꩻ အဝ်ႏတောႏလမ်းစွဉ်ႏ ခမ်းလင်သားမူႏဖုံႏ နဝ်ꩻမꩻ ဗွေႏဘုရာꩻ အလိုꩻကြောင်းစင်ဖုံႏနဝ်ꩻ ထွာလွဉ်စွဉ်ႏ တကြောင်းတဝ်းဖုံႏနဝ်ꩻသွူ။ ကမာꩻဒါႏ အပဲစ်စားယိုနဝ်ꩻ ခေါင်းဆောင် လိုꩻတန်ဖုံႏစွဉ်ႏ အာႏဏာႏပဲင်ႏသားဖုံႏနဝ်ꩻ အဟုဲင်းသွတ်ꩻနဝ်ꩻသွူ။ 3ခွေထွိုင်ႏဟွိုန်နုဲင်းယို စွဉ်ႏထာꩻသꩻကုဲင် ခွေအဲ့ꩻသဲ့ချာခွေဆဲင်ꩻ ထွို့ꩻချာခွေကလူꩻစွဉ်ႏ ကာႏဆွဉ်ႏဖုံႏတွော့ꩻ တွမ်ႏထာꩻသꩻပေႏနဝ်ꩻ အုံလင်ꩻစွဥ်ႏနဝ်ꩻသွူ။ 4စွဉ်ႏထာꩻသꩻပေႏ ခွေအုံလင်ꩻနဝ်ꩻကိုနဝ်ꩻ ဗꩻတွိုႏနေးစွဉ်ႏ မွူးဟာလင်ꩻ ကအီႏပူႏဇောႏဒါႏ ယဇ်ချိန်ႏတဲင် လိုꩻဖုံႏနဝ်ꩻ လွဉ်အုံခူစစွဉ်ႏခွေနဝ်ꩻသွူ။ ပွိုင်းဝွို့တွမ်ႏ လိုꩻကခံႏဗာႏ ဝါႏထန်ႏထိုꩻခမ်းထီ ကသဲင်ꩻလွဉ်ချာသားဖုံႏ အပဲစ်နဝ်ꩻ ပွိုင်းဝွို့စွဉ်ႏ ဣသရေး ဗွေႏဘုရာ အမိန်းလဲဉ်းနဝ်ꩻ လိုꩻဖုံႏကားကအဝ်ႏ ငမ်းသꩻရောင်လွစွဉ်ႏဖုံႏ နဝ်ꩻသွူ။
5မွူးဟာ ထာꩻပူႏဇောႏချိန်ႏ ထွိုင်ႏတွိုႏနဝ်ꩻ ခွေအဝ်ႏသောင်ခြင်ꩻထာꩻ လမ်းကို ထွိုင်ႏလွဉ်တဲင် အဝ်ႏကွဉ်ကဒျာႏတွမ်ႏ ခွေခွမ်ꩻလာꩻသဲ့နဝ်ꩻ ခွေထောက်လင်ꩻ ခင်ႏလေင်း ရုမ်းဗူႏစူတွော့ꩻ ဆုတောင်ꩻထင်ႏ ထာဝရဘုရာꩻ ခွေဗွေႏဘုရာꩻ၊ 6ခွေဆုတောင်ꩻ “အွိုးဗွေႏဘုရာꩻ၊ ခွေသွဉ်းနဝ်ꩻ ဝင်ꩻသꩻငါႏလွဉ်ꩻ နဝ်ꩻမꩻ နီဗွေႏဆꩻငါနဝ်ꩻ ခွေသွဉ်း အွော့ꩻငါကတူႏတဲ့ တဗွိုန်ႏတဝ်း နဝ်ꩻသွူ။ နီသွဉ်းသီး အပဲစ်ပြုန်ႏနဝ်ꩻ ထိုꩻကယ်ꩻလဲဉ်းက နီကတူႏဖုံႏ နဝ်ꩻသွူ။ အပဲစ်ဖုံႏနဝ်ꩻ ထိုဗꩻကီထင်ႏစွဉ်ႏ မို့ꩻနဝ်ꩻသွူ။ 7တယ်ႏစွဉ်ႏ နီမွိုးဖြား ဖါဖြားစိုး ဗꩻတွိုႏဟန်ႏနီꩻ နီဗွေႏလိုꩻ နီကပဲစ်မာႏလဲဉ်းနဝ်ꩻ တန်ငါႏနဝ်ꩻသွူ။ ကွပ်ပွိုး နီအပဲစ်ဖုံႏနဝ်ꩻမꩻ နီခွန်တန်ဖုံႏစွဉ်ႏ နီယဇ်ပရောဟိတ်ဖုံႏနဝ်ꩻ ထဲ့သော့ꩻထိုꩻလဲဉ်းသွူ ခမ်းလင်သား အခွန်တန်ဖုံႏ စူကိုနဝ်ꩻသွူ။ နီနဝ်ꩻ ခံႏဗာႏဝင်ꩻမာꩻသီ၊ ခံႏဗာႏ ဝင်ꩻရိမ်ထူႏနွိုင်ႏတွော့ꩻ ခံႏဗာႏ ဝင်ꩻဆွမ်ꩻလွေꩻညာꩻထိုꩻ နုဲင်းထောင်ႏသားဖုံႏသွူ။ နီနဝ်ꩻ ခံႏဗာႏတရေႏကုဲင် ဗꩻတွိုႏစွဉ်ႏ နုဲင်းနီကအဝ်ႏခံႏဗာႏ ဟန်ႏနီꩻယိုနဝ်ꩻသွူ။ 8အွိုးထာဝရဘုရာꩻ နီဗွေႏဘုရာꩻ ၊ ယိုခါနီဗွေႏနဝ်ꩻ အွဉ်ႏလဲဉ်းသွူ မေတ္တာႏ ကရုဏာႏ နီလောင်းနဝ်ꩻမꩻ ကအဝ်ႏခံႏဗာႏသွဉ်း နီလိုꩻယင်ဟန်ႏနဝ်ꩻ လွစ်ထန်ႏလွဉ်တဲင် အုံလုမ်းဗဉ်ႏသော့ꩻဗာႏ ခင်ႏလမ်းကြောင်းစင်ကိုယို တဆင်ႏပေႏနဝ်ꩻသွူ။ ကအဝ်ႏခံႏဗာႏသွဉ်းနဝ်ꩻ နီဗွေႏ အွဉ်ႏစွꩻလွစ်ဖေႏနီတဲင် ဖေႏလဲဉ်း နီဘဝတသာနဝ်ꩻသွူ။ 9နီအဝ်ႏထွာသွဉ်းစွဉ်ႏတဲ့ သွဉ်းဘဝကိုနဝ်ꩻ နီဗွေႏ တအွဉ်ႏကုဲင်ထိုꩻတဝ်း နီနဝ်ꩻသွူ။ ဖေႏနေးနီကလꩻမဲ့ငါ ပါးသျားဧကရာဇ် ခွန်တန်ထျꩻနဝ်ꩻ နီဗွေႏမာꩻတဲင် ဖေႏနီအသက် အဝ်ႏမွန်ခွင်ꩻတွော့ꩻ ဖေႏကတယ်ႏချာယင်း ကကုဲင်ပြင်ꩻဒါႏ နီဗွေႏ ဗိမာန်ႏတောႏကျောင်ꩻတွမ်ႏ ဖေႏကအုံ လုမ်းဗဉ်ႏသော့ꩻဗာႏ ယုဒခမ်းကိုစွဉ်ႏ ဝေင်ꩻယေရုသလမ်ႏကိုယို နဝ်ꩻသွူ။
10“ကွဲႏတွော့ꩻ ယိုခါ အွိုးဗွေႏဘုရာꩻ၊ ထွာလို့လဲဉ်းထာꩻ နုဲင်းနဝ်ꩻနဝ်ꩻမꩻ နီအီႏရိုꩻနွောင်ꩻက နုဲင်းမုဲင်ꩻဟောင်း။ နီနဝ်ꩻ တလွောက်ꩻနာႏဖျင်တဝ်း ပညတ်ကျမ်ꩻဖုံႏ၊ 11စွဉ်ႏနီဗွေႏသွဉ်း ပရောဖဲစ်ဖုံႏ ကဖေႏဒါႏ နီနဝ်ꩻသွူ။ ဝွေꩻသီးဒေါ့ꩻဖေႏ နီကအဝ်ႏလွေꩻ နွို့သိမ်ꩻဒါႏ ခမ်းထီနဝ်ꩻ တကြောင်းစင်တဝ်း၊ ကွပ်ပွိုးလိုꩻဖုံႏ ကအဝ်ႏအုံသော့ꩻဒါႏ ခမ်းနဝ်ꩻအကိုသားဖုံႏနဝ်ꩻ အဝ်ႏအမော့တဖဲ့ꩻ ဗꩻလွေꩻခတဖဲ့ꩻ အဝ်ႏဗွေစွဉ်ႏ အကျင်ꩻပသို့ꩻခရာႏဖုံႏ အကျင်ꩻကုဲင်ဝေႏဖုံႏ နဝ်ꩻသွူ။ 12#ထလ ၃၄:၁၁–၁၆၊ ဟော်ꩻ ၇:၁–၅။ ဝွေꩻသီး ဒေါ့ꩻနယ်ဖေႏနီ၊ နီမဉ်ႏမဲဉ် အံႏအွꩻ မွန်းပျောႏသော့ꩻ ခမ်းထီကို၊ မဉ်ႏမဲဉ်ဖေႏသွုပ် သေႏသေႏ နီပိုလီꩻလင်ꩻဖုံႏ အတမွီႏနဝ်ꩻ၊ နီတောႏလမ်းဗာႏတဝ်းတွမ်ႏ လိုꩻခမ်းနဝ်ꩻသားဖုံႏ၊ ဝွေꩻသီး စီꩻပွါꩻဥစ္စာႏ ထင်ႏထိုတာႏ တဲ့နဝ်ꩻ ထာꩻအောင်ႏမျင်ႏတာႏ တဲ့နဝ်ꩻ စွဲကိုဗာႏတဝ်း ဒျာႏရင်ꩻနဝ်ꩻသွူ။ 13နီအပဲစ် ဒုစရဲက်တာႏ နီအဝ်ႏခံႏဗာႏ အပဲစ်တံႏ နုဲင်းယိုစွဉ်ႏတဲ့၊ အွိုး နီဗွေႏဘုရာꩻ၊ နီဗွေႏကဖေဒါႏ နီအပဲစ်တံႏနဝ်ꩻ ဆေ့ꩻကယ်ꩻက နီကထွိုက်ခံႏနဝ်ꩻတဲင် ဖေႏနီအဝ်ႏမွန်ကုဲင် အခွင်ꩻနဝ်ꩻ နီအဝ်ႏသေဒျာႏသွူ။ 14နဝ်ꩻထွူ နီမဉ်ႏအွဉ်ႏဖွီဒျာႏက နီဗွေႏပညတ်ကျမ်ꩻ တလဲင်ႏတွော့ꩻ အဝ်ႏတောႏလမ်းဒျာႏက တွမ်ႏလိုꩻမွိုက်ကုဲင်ဖုံႏ စားယို အီႏထွာနုဲင်းမုဲင်ꩻဟောင်း။ နီမဉ်ႏတောႏလမ်းနဝ်ꩻ နီဗွေႏအီႏသꩻလျားနီ နဝ်ꩻမꩻ နီဗွေႏ အီႏယားကုဲင်ထိုꩻလို့ နီတွော့ꩻ တဖြာꩻငါတဲ့ သက်အီႏ တအဝ်ႏမွန်ကုဲင်တဝ်း နဝ်ꩻသွူ။ 15အွိုး ထာဝရဘုရာꩻ ဣသရေး ဗွေႏဘုရာꩻ နီဗွေႏနဝ်ꩻ တရာꩻငါႏ၊ ကွဲႏတွော့ꩻ နီဗွေႏနဝ်ꩻ အွဉ်ႏသက်မွန်ကုဲင်ဖေႏ နီနဝ်ꩻသွူ။ နီကပဲစ်မာႏဒါႏ နီဗွေႏနဝ်ꩻ နီအဝ်ႏဝွန်ႏခံႏဒျာႏ။ နီကအီႏလွဉ်ထေ့ဗာႏ နီဗွေႏထျꩻနဝ်ꩻ အခွင်ꩻအရေꩻ တအဲဉ်ထဝ်းနဝ်ꩻသွူ။
Currently Selected:
ဧဇရ 9: PBCL
Highlight
Copy
Compare
Share
Want to have your highlights saved across all your devices? Sign up or sign in
Pao Bible Common Language© Bible Society of Myanmar, 2019.
