ဧဇရ 7
7
ဧဇရဖျော်လွဉ်သော့ꩻဝေင်ꩻယေရုသလမ်ႏကို
1နေင်ႏထွိုင်ႏညလွဉ် ပါးသျားဧကရာဇ်ခွန် အာတဇေရဇ် အုပ်စိုꩻချိန်ႏ ပါꩻမဉ်ꩻ ဧဇရ အဝ်ႏတဖြာꩻသွူ။ တွက်ချာလွေꩻ ဝွေꩻဖါဖြား ဗꩻလွေꩻစွဉ်ႏ ယဇ်ပရောဟိတ်ခွန် အာရုန် ကလင်ꩻလွဉ်နဝ်ꩻ နုဲင်းဆလယိုနဝ်ꩻသွူ။ ဧဇရနဝ်ꩻထွာ စရာယပိုခို၊ စရာယနဝ်ꩻထွာ အာဇရိပိုခို၊ အာဇရိနဝ်ꩻထွာ ဟိလခိပိုခို၊ 2ဟိလခိနဝ်ꩻထွာ သျလ္လုံပိုခို၊ သျလ္လုံနဝ်ꩻထွာ ဇာဒုတ်ပိုခို၊ ဇာဒုတ်နဝ်ꩻထွာ အဟိတုပ်ပိုခို၊ 3အဟိတုတ်နဝ်ꩻထွာ အာမရိပိုခို၊ အာမရိနဝ်ꩻထွာ အာဇရိပိုခို၊ အာဇရိနဝ်ꩻထွာ မေရာယုတ်ပိုခို၊ 4မေရာယုတ်နဝ်ꩻထွာ ဇေရဟိအပိုခို၊ ဇေရဟိနဝ်ꩻထွာ ဩဇိပိုခို၊ ဩဇိနဝ်ꩻထွာ ဗုက္ကိပိုခို၊ 5ဗုက္ကိနဝ်ꩻထွာ အဗိသျွပိုခို၊ အဗိသျွနဝ်ꩻထွာ ဖိနဟတ်ပိုခို၊ ဖိနဟတ်နဝ်ꩻထွာ ဧလျာသာပိုခို၊ ဧလျာသာနဝ်ꩻထွာ ယဇ်ပရောဟိတ်ခွန် အာရုန်ပိုခိုနဝ်ꩻသွူ။
6-7ဧဇရနဝ်ꩻထွာ လိုꩻပညာႏအဝ်ႏသားတဖြာꩻ သေနာႏလို့စွဉ်ႏ ထာဝရဘုရာꩻ ဣသရေးဗွေႏဘုရာ ကဖေႏသေꩻခါꩻ မောသျေ ပညတ်ကျမ်ꩻဖုံႏ နဝ်ꩻသွူ။ ဧဇရနဝ်ꩻ ကွပ်ပွိုး ထာဝရဘုရာꩻ ဝွေꩻဗွေႏဘုရာꩻ ဖေႏလဲဉ်းဝွေꩻ မင်္ဂလာႏဖုံႏနဝ်ꩻမꩻ ခွိုင်းကားဝွေꩻကကွီနဝ်ꩻ ဧကရာဇ်ခွန်တန် ဖေႏလို့စွဉ်ႏဝွေꩻနဝ်ꩻသွူ။ အာတဇေရဇ် အုပ်စိုꩻလꩻ နွတ်ꩻနေင်ႏကိုနဝ်ꩻ ဧဇရတွမ်ႏ ဣသရေး လိုꩻမျိုꩻတစွိုꩻ ပါစွဉ်ႏယဇ်ပရောဟိတ်ဖုံႏ၊ လေဝိစွိုးခွိုꩻဖုံႏ၊ ဗိမာန်ႏတောႏကျောင်ꩻ အဒုံႏအအူ အနုပညာႏသားဖုံႏ၊ ဗိမာန်ႏတောႏ ကျောင်ꩻပွေါ စဲ့ꩻသားဖုံႏစွဉ်ႏ ထာꩻမာꩻသားဖုံႏနဝ်ꩻ အဝ်ႏဗာဗုလုန်ခမ်း ထန်ႏသဲင်ꩻလွဉ်စွဉ်ႏ ဝေင်ꩻယေရုသလမ်ႏနဝ်ꩻသွူ။ 8-9ဝွေꩻသီး ကအဝ်ႏ ဗာဗုလုန်ခမ်း ထန်ႏနဝ်ꩻ ပထမလာ၊ ပထမနီꩻကိုတဲင် ဗွေႏဘုရာꩻ အဝ်ႏစွဲကိုနဝ်ꩻမꩻ ဝွေꩻသီး ထွိုင်ႏဖျော်လွဉ် ဝေင်ꩻယေရုသလမ်ႏနဝ်ꩻ ငတ်ꩻလာ ပထမမွူးနီꩻကို နဝ်ꩻသွူ။ 10ဧဇရနဝ်ꩻ ဝွေꩻဘဝ တသက်လွုမ်း စွဉ်ႏသွိုန်ႏလို့သꩻစင် အဝ်ႏသွဉ်ထူႏ ထာဝရဘုရာꩻ ပညတ်ကျမ်ꩻ၊ အဝ်ႏလွောက်ꩻလွဉ်ꩻ ပညတ်ကျမ်ꩻနဝ်ꩻဖုံႏတဲင် ပညတ်ကျမ်ꩻနဝ်ꩻဖုံႏစွဉ်ႏ စီꩻကန်ꩻဖုံႏနဝ်ꩻ အဝ်ႏသွဉ်သင် သေႏသေႏဖေႏ ဣသရေး လိုꩻမျိုꩻဖုံႏနဝ်ꩻသွူ။
ဧကရာဇ်ခွန်အာတဇေရဇ်ဖေႏဧဇရလိတ်ချုပ်မတ်တမ်ꩻ
11ထာဝရဘုရာꩻ ကဖေႏသေꩻခါꩻလဲဉ်းဒါႏ ဣသရေး လိုꩻမျိုꩻဖုံႏ ပညတ်တရာꩻတွမ်ႏ အမိန်းဖုံႏနဝ်ꩻ ဧကရာဇ်ခွန် အာတဇေရဇ်ဖေႏ ပါꩻကဒါႏလျင်ႏဒါႏ ပညတ်တရာꩻ ကထွာ ဒါႏ ယဇ်ပရောဟိတ် ဧဇရ လိတ်ချုပ် မတ်တမ်ꩻနဝ်ꩻ နုဲင်းဆလယိုသွူ။
12“အဝ်ႏဧကရာဇ်ခွန် အာတဇေရဇ်နဝ်ꩻ
13“ခွေစူဆလ ခမ်းထီတခမ်းလွုမ်း ကအဝ်ႏဒါႏ ဣသရေး လိုꩻမျိုꩻဖုံႏ၊ ယဇ်ပရောဟိတ်ဖုံႏစွဉ်ႏ လေဝိစွိုးခွိုꩻဖုံႏ ကားကအဝ်ႏ ကမဉ်လွေꩻငီꩻဒါႏတွမ်ႏနာꩻ ဝေင်ꩻယေရုသလမ်ႏကိုနဝ်ꩻ ဖေႏဗာႏအခွင်ꩻ ခွေအမိန်း နုဲင်းနဝ်ꩻသွူ။ 14ဖေႏနေး ကစုံႏစမ်ꩻထွား ဝေင်ꩻယေရုသလမ်ႏတွမ်ႏ ယုဒခမ်း အခေႏအနေႏ၊ ကအပ်သေꩻခါꩻ ဖေႏလဲဉ်းဒါႏနာꩻ သီဗွေႏဘုရာꩻ ပညတ်ကျမ်ꩻနဝ်ꩻ လွောက်ꩻနာႏ ခွိုင်းကားမုဲင်ꩻကျောင်ꩻ ဖေႏနေးကသေဗာႏနဝ်ꩻ ခွေတွမ်ႏ ခွေတွိုင်ႏပင်ႏဖက် ဝင်ꩻနွတ်ꩻနဝ်ꩻ အွဉ်ႏစွꩻလွေꩻနာꩻနဝ်ꩻသွူ။ 15ကနင်းသော့ꩻဒါႏ ဝေင်ꩻယေရုသလမ်ႏ ဗိမာန်ႏတောႏ ကျောင်ꩻကို ခွေစွဉ်ႏ ခွေလိုꩻတွိုင်ႏပင်ႏဖက်သားဖုံႏ ကလူႏသေꩻခါꩻဒါႏ ဣသရေး ဗွေႏဘုရာꩻ ခံꩻဖုံႏတွမ်ႏ ရွဉ်ထာꩻလူႏဖုံႏနဝ်ꩻ နာꩻ ထူႏသဲင်ꩻပါသွော့။ 16နဝ်ꩻလွုမ်ꩻတကာႏတဝ်း နာꩻကကောက်လꩻဒါႏ ရွဉ်စွဉ်ႏခံꩻဖုံႏ၊ ဗာဗုလုန်နယ်ႏကိုတွမ်ႏ ဣသရေး လိုꩻမျိုꩻစွဉ်ႏ ဝွေꩻသီး ယဇ်ပရောဟိတ်ဖုံႏ ကဖေႏဒါႏ ဝွေꩻသီးဗွေႏဘုရာꩻ ဗိမာန်ႏတောႏကျောင်ꩻတာႏ ဝေင်ꩻယေရုသလမ်ႏကို အလူႏဖုံႏနဝ်ꩻတဲ့ နာꩻထူႏသဲင်ꩻပါလို့သွော့။
17“ရွဉ်ယိုဖုံႏနဝ်ꩻ နာꩻအွဉ်ႏသတိ သွုံꩻစွဲꩻတွော့ꩻ ဖြေꩻသွော့ဖိုးဖုံႏ၊ သွိုꩻထီးဖုံႏ၊ သွိုꩻပေႏဖုံႏ၊ ဗွူဟူစွဉ်ႏ ဝုဲင်ထာꩻပူႏဇောႏဖုံႏတဲင် ထာꩻလူႏနဝ်ꩻဖုံႏနဝ်ꩻ ပူႏဇောႏလူးသွော့ ကအဝ်ႏသော့ꩻဒါႏ ဝေင်ꩻယေရုသလမ်ႏ ဗိမာန်ႏတောႏ ကျောင်ꩻကို ယဇ်ပလ္လင်ႏလောင်းနဝ်ꩻဟုဲင်း။ 18ကအဝ်ႏကုဲင်ဒါႏ ရွဉ်ဖုံႏတွမ်ႏခံꩻဖုံႏနဝ်ꩻ နာꩻတွမ်ႏ နာꩻလိုꩻမျိုꩻဖုံႏ သꩻဆန္ဒကအဝ်ႏအတွိုင်ꩻ ယံဖေႏ နာꩻသွုံꩻမဲဉ်ႏလွဉ်ꩻသွော့ သီဗွေႏဘုရာꩻ အလိုႏတောႏ ကအဝ်ႏအတွိုင်ꩻနဝ်ꩻသွူ။ 19ကအီႏသွုံꩻအီ ဝုဲင်ႏကိုꩻကွယ်ႏ ဗိမာန်ႏတောႏ ကျောင်ꩻကိုတာႏ၊ ကဖေႏသေꩻခါꩻလဲဉ်းဒါႏနာꩻ ထာꩻခြိုꩻထာꩻလေင်ꩻဖုံႏ ကားကအဝ်ႏနဝ်ꩻ နာꩻလူႏဖေႏသွော့ ကနင်းသော့ꩻဒါႏ ဝေင်ꩻယေရုသလမ်ႏကို ဗွေႏဘုရာꩻနဝ်ꩻဟုဲင်း။ 20“နဝ်ꩻမꩻ ဗိမာန်ႏတောႏ ကျောင်ꩻတာႏ နာꩻကအဝ်ႏလိုႏဒါႏ ထာꩻအလင်ꩻ အမျိုꩻမုဲင်ꩻတယဝ်း နာꩻထေနွောင်ꩻဒျာႏ ခွန်ဘဏ္ဍာႏတွိုက်ကို နဝ်ꩻသွူ။
21“ခွေနဝ်ꩻ ပါꩻကဒါႏလျင်ႏလို့ ခမ်းထီမို့ꩻလောင်း အဗွေႏဘုရာꩻ ပညတ်ကျမ်ꩻ ယဇ်ပရောဟိတ် ဧဇရတာႏ ဝွေꩻကကွီဒါႏသီ ထာꩻခြိုꩻဖုံႏ ကားကအဝ်ႏနဝ်ꩻ ဖေႏနေး ကထေဗာႏ မွိုင်မွိုင်နဝ်ꩻ ခွေမိန်းသေꩻဖေႏလဲဉ်းသွူ ဥဖရတ်ထီခြောင်တန် ဝတ်တွို့ꩻဖဲ့ꩻဟံႏနယ်ႏ ဘဏ္ဍာႏတွိုက် အာႏဏာႏပဲင်ႏသားဖုံႏ ကားကအဝ်ႏနဝ်ꩻသွူ။ 22ကခန်ꩻတွိုင်ꩻ သေꩻခါꩻဖေႏဒါႏ ရွဉ်ယာႏနဝ်ꩻ ပေါင်၇၅၀ဝ၊ ဗွူကလာꩻနဝ်ꩻ အဖျ၅၀ဝ၊ ဝုဲင်နဝ်ꩻ ဂါလံ၅၅၀၊ သံလွေင်နမ်းမန်ꩻနဝ်ꩻ ဂါလန်၅၅၀တွမ်ႏ ခွိုင်းကအဝ်ႏလိုႏ တသာႏဖုံႏနဝ်ꩻ ထေဖေႏသွော့။ 23ကအီႏဖေႏဗာႏ ခမ်းထီမို့ꩻလောင်း အဗွေႏဘုရာꩻ ဝွေꩻဗွေႏ ဗိမာန်ႏတောႏကျောင်ꩻတာႏ ကအဝ်ႏလိုႏဒါႏဖုံႏနဝ်ꩻ သီအွဉ်ႏသတိꩻဗာႏသွူ။ နဝ်ꩻမꩻ ခွေတွမ်ႏ ခွေဆꩻချာ ကအီႏအုပ်စိုꩻဒါႏ ခွန်ဖုံႏနဝ်ꩻ ဝွေꩻဗွေႏ အီႏတသꩻလျား တဝ်းဒွုမ်နဝ်ꩻသွူ။ 24ယဇ်ပရောဟိတ်ဖုံႏ၊ လေဝိစွိုးခွိုꩻဖုံႏ၊ ဂီတအနုပညာႏသားဖုံႏ၊ ကျောင်ꩻပွေါစဲ့ꩻသားဖုံႏ၊ ကဆဲင်ႏဒါႏ ဗိမာန်ႏတောႏကျောင်ꩻယို လိုꩻလင်ပါꩻမုဲင်ꩻတယဝ်း သီနဝ်ꩻအီႏရဲဆီꩻဗာႏ ဖေႏနေးကကောက်မွိုန်း ဝွေꩻသီးအခွဉ်ႏဖုံႏနဝ်ꩻသွူ။
25“နာꩻဧဇရနဝ်ꩻ သွုံꩻစွဉ်ႏ နာꩻဥာဏ်ႏပညာႏ နာꩻဗွေႏဘုရာꩻ ကဖေႏနဝ်ꩻတွော့ꩻ ဖေႏနေးကအုပ်ချုပ် လိုꩻကအုံအဝ်ႏဒါႏ ဥဖရတ် ထီခြောင်တန် ဝတ်တွို့ꩻဖဲ့ꩻစွဉ်ႏ သီဗွေႏဘုရာꩻ ပညတ်တရာꩻသားဖုံႏနဝ်ꩻ နာꩻခန်ꩻဖေႏသွော့ ကောအုပ်ထိန်ꩻသားစွဉ်ႏ တရာꩻလိုꩻတန်ဖုံႏဟုဲင်း။ လိုꩻတသေတဝ်း ပညတ်တရာꩻသားဖုံႏနဝ်ꩻ နာꩻအီႏသွဉ်သင် ဖေႏဗာႏနဝ်ꩻသွူ။ 26ပါꩻမုဲင်ꩻ မဉ်ႏတလွောက်ꩻနာႏတဝ်း သီဗွေႏဘုရာꩻ ပညတ်ကျမ်ꩻတဲ့နဝ်ꩻ၊ အဲမ်ပါယာ ဥပဒေႏဖုံႏတဲ့နဝ်ꩻ ဝွေꩻသီးနဝ်ꩻ ဖေႏဗာႏထွူစွဉ်ႏ ထာꩻသီအပဲစ်တံႏ၊ မဉ်ႏတမွေးတဝ်း ခံႏဗာႏဝါးထန်ႏထိုꩻ ခမ်းထီ အပဲစ်တံႏ၊ မဉ်ႏတမွေးတဝ်း သိမ်ꩻထိုꩻ အထာꩻခြိုꩻဥစ္စာႏတံႏ၊ မဉ်ႏတမွေးတဝ်း အွဉ်ႏခံသော့ꩻဗာႏ ထောင်ႏကိုနဝ်ꩻသွူ။
ဧဇရအုပ်ꩻထင်ႏဗွေႏဘုရာꩻ
27ဧဇရဒေါ့ꩻ “အုပ်ꩻထင်ႏရောင်သွော့ ထာဝရဘုရာꩻ နီမွိုးဖြားဖါဖြားသီး အဗွေႏဘုရာꩻနဝ်ꩻဟုဲင်း။ ဧကရာဇ်ခွန် ကအီႏအုပ်ꩻထင်ႏ ထာဝရဘုရာꩻ ဗိမာန်ႏတောႏကျောင်ꩻ ဝေင်ꩻယေရုသလမ်ႏကိုနဝ်ꩻ ဝွေꩻဗွေႏမာꩻလဲဉ်း စွဉ်ႏအနယ်ꩻယိုနဝ်ꩻသွူ။ 28ဗွေႏဘုရာꩻ ကေꩻဇူꩻတောႏနဝ်ꩻမꩻ ဧကရာဇ်ခွန် တွမ်ႏဝွေꩻတွိုင်ႏပင်ႏ ဖက်သားဖုံႏစွဉ်ႏ ဝွေꩻလိုꩻ အာႏဏာႏပဲင်ႏသားဖုံႏ ကားကအဝ်ႏထျꩻနဝ်ꩻ ခွေလꩻလဲဉ်းမဲ့ငါနဝ်ꩻသွူ။ ထာဝရဘုရာꩻ ခွေဗွေႏဘုရာꩻနဝ်ꩻ ဖေႏလဲဉ်းခွေ အစွန်ꩻထာꩻရုဲင်းနဝ်ꩻမꩻ ခွေနဝ်ꩻ ဣသရေး လိုꩻမျိုꩻ ခွိုꩻနွယ်ႏ ခေါင်းဆောင် လိုꩻတန်ဖုံႏ ဖေႏနေးကသဲင်ꩻလွဉ်ꩻ တွမ်ႏခွေနဝ်ꩻ ခွေစုလꩻအာငါႏလဲဉ်း နဝ်ꩻသွူ။
Currently Selected:
ဧဇရ 7: PBCL
Highlight
Copy
Compare
Share
Want to have your highlights saved across all your devices? Sign up or sign in
Pao Bible Common Language© Bible Society of Myanmar, 2019.
