ဧဇရ 6
6
ထုမ်ႏမော့ꩻချာယင်းဧကရာဇ်ခွန်တန်ကုရုအမိန်း
1နဝ်ꩻမꩻ ဖေႏနေးကထုမ်ႏ ခွန်တန်မတ်တမ်ꩻ ကအွဉ်ႏသော့ꩻခါꩻဒါႏ ဗာဗုလုန် ဟော်နန်ꩻကိုနဝ်ꩻ ဧကရာဇ်ခွန်တန်ဒါရိ ချꩻစွဉ်ႏအမိန်း နဝ်ꩻသွူ။ 2ကွဲႏတွော့ꩻ မတ်တမ်ꩻ ကပါသော့ꩻဒါႏ လိတ်ထူ နုဲင်းဆလယိုနဝ်ꩻ မော့ꩻသော့ꩻစွဉ်ႏ မေဒိခမ်းနယ်ႏ ဝေင်ꩻအာခမေသကိုသွူ။
3“ဧကရာဇ်ခွန်တန် ကုရု အုပ်စိုꩻပထမနေင်ႏနဝ်ꩻ ဝွေꩻထေအမိန်း၊ ကအီႏလူႏပူႏဇောႏဒါႏ ယဇ်ဖုံႏစွဉ်ႏ ကအီႏလဲ့ꩻပူႏဇောႏဒါႏ ယဇ်ခင်ႏလမ်း တထွောင်းနဝ်ꩻ တယ်ႏဟဝ်ဗာႏချာယင်း ဗိမာန်ႏတောႏကျောင်ꩻ ဝေင်ꩻယေရုသလမ်ႏကိုသွူ။ ဗိမာန်ႏတောႏ ကျောင်ꩻနဝ်ꩻ အထိုအဝ်ႏဗာႏ ပေကွတ်ꩻဆီ၊ အလုဲင်းနဝ်ꩻ အဝ်ႏဗာႏ ပေကွတ်ꩻဆီသွူ။ 4ဗိမာန်ႏတောႏကျောင်ꩻ အဆေင်ႏနဝ်ꩻ တယ်ႏဗာႏ လုံးတူႏသွံရန်းထွူ သော့ꩻဖေႏဗာႏ သေင်ႏထုတ်တန်ꩻ တရန်းစီႏသွူ။ ခွိုင်းကားကလို့နဝ်ꩻ ထေသွုံꩻအီဗာႏ ခွန်တန် ဘဏ္ဍာႏတောႏတွိုက်ကိုသွူ။ 5ဗာဗုလုန်ခမ်း ခွန်တန် နေဗုခဒ်နေဇာ ကသိမ်ꩻသဲင်ꩻလွဉ်ဒါႏ ဝေင်ꩻယေရုသလမ်ႏ ဗိမာန်ႏတောႏကျောင်ꩻ ခံꩻဖုံႏတွမ်ႏ ရွဉ်ယာႏ ထာꩻခြိုꩻဖုံႏနဝ်ꩻတဲ့ ပသာချာဗာႏယင်း ကဆဲင်ႏဒါႏ ထာꩻခြိုꩻနဝ်ꩻဖုံႏ ခင်ႏလမ်း ဝေင်ꩻယေရုသလမ်ႏ ဗိမာန်ႏတောႏ ကျောင်ꩻကို” နုဲင်းနဝ်ꩻသွူ။
ဧကရာဇ်ခွန်ဒါရိထေအမိန်းဖေႏကမာꩻသွုပ်သွုပ်ယင်းထာꩻမာꩻ
6နဝ်ꩻထွူ ဧကရာဇ်ခွန်ဒါရိ ပြန်ႏပသာချာယင်း လိတ်နုဲင်းဆလယို နဝ်ꩻသွူ။
“ဖေႏထေ့လွေꩻ ဥဖရတ် ထီခြောင်တန် အခဝ်တွို့ꩻဖဲ့ꩻ ခွန်ခံႏတာတနဲ၊ သျေတာဗောဇနဲတွမ်ႏ သီသွꩻ ဥဖရတ် ထီခြောင်တန် အခဝ်တွို့ꩻ အာႏဏာႏပဲင်ႏသားဖုံႏထျꩻသွူ။
“အုံညာꩻညာꩻသွော့ ဗိမာန်ႏတောႏ ကျောင်ꩻနဝ်ꩻတဲင်၊ 7ကတယ်ႏဒါႏ ဗိမာန်ႏတောႏ ကျောင်ꩻနဝ်ꩻတဲ့ တွမ်ႏမာꩻသျွုတ် တရေင်မွိုန်းဟုဲင်း။ အွဉ်ႏသွော့ ယုဒခွန်ခံႏစွဉ်ႏ ဂျူးခေါင်းဆောင်ဖုံႏ တယ်ႏဟဝ်ချာ ဗွေႏဘုရာꩻ ဗိမာန်ႏတောႏကျောင်ꩻ အခြောင်ꩻလီꩻကိုနဝ်ꩻဟုဲင်း။ 8ဖေႏကစွဲကို ဝွေꩻသီး တယ်ႏဟဝ်ချာယင်း ဗိမာန်ႏတောႏကျောင်ꩻနဝ်ꩻ ခွေမိန်းဖေႏသီ။ ဝွေꩻသီး ထာꩻဖေႏနေး အရဲအဆီꩻ ကအဝ်ႏဗာႏမွိုန်း၊ ကလို့ဒါႏ စရိပ်ဖုံႏနဝ်ꩻ အခွဉ်ႏဖုံႏ ကကောက်လꩻဒါႏ ဥဖရတ် ထီခြောင်ဝွတ်တွို့ꩻဖဲ့ꩻ ခွန်အဘဏ္ဍာႏတွိုက်ကိုနဝ်ꩻ ထေဖေႏသွူးဗာႏ နဝ်ꩻသွူ။ 9ယဇ်ပရောဟိတ်ဖုံႏ ကအဝ်ႏသော့ꩻဒါႏ ဝေင်ꩻယေရုသလမ်ႏကို ဝွေꩻသီး ကအွဉ်ႏဒေါ့ꩻနယ်ဖေႏဒါႏသီ ဝွေꩻသီး ကအဝ်ႏလိုႏဒါႏ ကအီႏလဲ့ꩻပူႏဇောႏဖေႏ ခမ်းထီမို့ꩻလောင်း အဗွေႏဘုရာꩻ ယဇ်ထာꩻပူႏဇောႏ ကထွာ ဖိုးထီးထွိုက်ꩻဖုံႏ၊ သွိုꩻ ၊ သွိုꩻပေႏတဲ့နဝ်ꩻ၊ ဗွူကလာꩻ၊ တသာႏ၊ ဝုဲင်စွဉ်ႏ သံလွေင် နမ်းမန်ဖုံႏနဝ်ꩻ တနီꩻထွူတနီꩻ အွဉ်ႏပျတ်ထိုꩻဗာႏတဝ်း သီဖေႏဗာႏနဝ်ꩻသွူ။ 10ယိုနဝ်ꩻ ဖေႏနေး ဝွေꩻသီး ကပူႏဇောႏဖေႏနွောင်ꩻ ခမ်းထီမို့ꩻလောင်း အဗွေႏဘုရာꩻ ကနစ်သက် လက်ခံႏ ဝွေꩻသီး ယဇ်ထာꩻပူႏဇောႏဖုံႏတွော့ꩻ ခွေတွမ်ႏ ခွေပိုခိုဖုံႏတာႏ ဖေႏကကွီနွောင်ꩻ ဝွေꩻဗွေႏထျꩻ မင်္ဂလာႏနဝ်ꩻ မာꩻဗာႏနုဲင်းယို နဝ်ꩻသွူ။ 11ခွေဖေႏသွုပ်အမိန်း၊ ပါꩻမုဲင်ꩻ မဉ်ႏတနာႏတဝ်း အမိန်းယိုနဝ်ꩻ ဗဲ့ꩻထန်ႏဗာႏ ဝွေꩻအလမ်း ထုတ်တန်ꩻတလီး ဗျောက်ꩻဈူအနာ တဖဲ့ꩻထွူ ထူးဖြွဉ်သီထိုꩻဗာႏ ဝွေꩻအနမ်းတွော့ꩻ ဝွေꩻသီး လမ်းဖုံႏနဝ်ꩻ မာꩻထိုꩻဗာႏ နုဲင်းထာꩻအီႏပြုန်ႏနဝ်ꩻသွူ။ 12ဗွေႏဘုရာꩻ ကလွိုက်သေꩻခါꩻဒါႏ ဝေင်ꩻယေရုသလမ်ႏ၊ ကအီႏဝုဲင်ႏ ကိုꩻကွယ်ႏဗာႏ ဝွေꩻဗွေႏ ခင်ႏလမ်းနဝ်ꩻ ကဆန်ချာဒါႏ အမိန်းယိုတွော့ꩻ ကျိုꩻစာꩻယားကုဲင်ထိုꩻဒါႏ ဗိမာန်ႏတောႏကျောင်ꩻ၊ ကအဝ်ႏဒါႏ နဝ်ꩻကိုသား ခွန်တန်တဲ့နဝ်ꩻ၊ လိုꩻမျိုꩻဖုံႏတဲ့နဝ်ꩻ ယံဖေႏ ကခံႏဗာႏသွော့ အယားကုဲင်။ ယိုနဝ်ꩻထွာခွေ ဒါရိအမိန်းဒျာႏ။ ခွေအမိန်းနဝ်ꩻ လွောက်ꩻနာႏ မာꩻလွဉ်ꩻလို့လို့သွော့” နုဲင်းနဝ်ꩻသွူ။
ကပ်လူႏထင်ႏဗိမာန်ႏတောႏကျောင်ꩻ
13နဝ်ꩻထွူ ခွန်ခံႏတာတနဲ၊ သျေတာဗောဇနဲတွမ်ႏ ဝွေꩻသီးသွꩻ အာႏဏာႏပဲင်ႏသားဖုံႏနဝ်ꩻ မာꩻလွဉ်ꩻလို့စွဉ်ႏ နုဲင်းဧကရာဇ်ခွန် ကမိန်းသေꩻခါꩻ အတွိုင်ꩻနဝ်ꩻသွူ။ 14#ဟဂ္ဂဲ ၁:၁၊ ဇာ ၁:၁။ ပရောဖဲစ် ဟဂ္ဂဲစွဉ်ႏ ပရောဖဲစ် ဇာခရိသီး တမာဖေႏအာႏနဝ်ꩻမꩻ ဂျူးလိုꩻတန် ခေါင်းဆောင်ဖုံႏ ကတယ်ႏဒါႏ ဗိမာန်ႏတောႏ ကျောင်ꩻနဝ်ꩻ မာꩻတိုꩻတက်အောင်ႏမျင်ႏ ထင်ႏထိုဟဝ် မွေးနေးစွဉ်ႏသွူ။ နုဲင်းဣသရေး ဗွေႏဘုရာꩻ အမိန်းစွဉ်ႏ ပါးသျားဧကရာဇ် ခွန်တန်ကုရု၊ ဒါရိတွမ်ႏ အာတာဇေရဇ်သီး အမိန်းတဲင် ဝွေꩻသီး မာꩻထွူလို့စွဉ်ႏ ဗိမာန်ႏတောႏကျောင်ꩻ နဝ်ꩻသွူ။ 15ဝွေꩻသီး ကမာꩻထွူလို့ဒါႏ ဗိမာန်ႏတောႏ ကျောင်ꩻနဝ်ꩻ ဧကရာဇ်ခွန်တန် ဒါရိ အုပ်စိုꩻလꩻ သူနေင်ႏ၊ အာဒါလာ သွံနီꩻကိုနဝ်ꩻသွူ။ 16နဝ်ꩻထွူ ဣသရေး လိုꩻမျိုꩻဖုံႏ၊ ယဇ်ပရောဟိတ်ဖုံႏ၊ လေဝိစွိုးခွိုꩻဖုံႏတွမ်ႏ လိုꩻလင်ဖုံႏ ကခံႏဗာႏဒါႏ ဝါးထန်ႏထိုꩻ ခမ်းထီ ကသဲင်ꩻလွဉ်ချာသား ကားကအဝ်ႏနဝ်ꩻ စွဉ်ႏထာꩻပျောႏသွင်ႏ ကပ်လူႏစွဉ်ႏ ဗိမာန်ႏတောႏကျောင်ꩻ နဝ်ꩻသွူ။ 17ကကပ်လူႏထင်ႏဒါႏ ပွယ်ꩻတာႏနဝ်ꩻ နုဲင်းယဇ်ထာꩻပူႏဇောႏအနေႏ ဝွေꩻသီးလူႏဖိုး အဗာႏ၁၀ဝ၊ သွိုꩻ ၂၀ဝ၊ သွိုꩻပေႏ ၄၀ဝစွဉ်ႏ နုဲင်းအပဲစ်လွစ်ယဇ်အနေႏ ဣသရေးစွုမ်ႏခွိုꩻ တခွိုꩻနဝ်ꩻ ဗဲတဗာႏစီႏ၊ ထွာ ၁၂ ဗာႏနဝ်ꩻသွူ။ 18မဲဉ်ႏလွဉ်ꩻစွဉ်ႏ နုဲင်းမောသျေကျမ်ꩻအုပ်ကို ကထွန်ႏသေꩻခါꩻအတွိုင်ꩻ ကအီႏမာꩻဗာႏ ဗိမာန်ႏတောႏကျောင်ꩻတာႏ ထာꩻမာꩻ ဝေင်ꩻယေရုသလမ်ႏကိုနဝ်ꩻ ဝွေꩻသီး ထွော့ဖေႏဗာႏပါက ယဇ်ပရောဟိတ်ဖုံႏတွမ်ႏ လေဝိစွိုးခွိုꩻဖုံႏ တာႏဝွန်ႏနဝ်ꩻသွူ။
ပွယ်ꩻပတ္တခါ
19 #
ထလ ၁၂:၁–၂၀။ ဆုဲင်ꩻတနေင်ႏ ပထမလာ တဆီလစ်ꩻနီꩻကိုနဝ်ꩻ လိုꩻကခံႏဗာႏ ဝါးထန်ႏထိုꩻ ခမ်းထီကို ကသဲင်ꩻလွဉ်ချာ သားဖုံႏနဝ်ꩻ မာꩻပွယ်ꩻပတ္တခါ နဝ်ꩻသွူ။ 20ယဇ်ပရောဟိတ်ဖုံႏတွမ်ႏ လေဝိစွိုးခွိုꩻဖုံႏ ကားကအဝ်ႏနဝ်ꩻ၊ မာꩻကြောင်းစင်ချာ အနမ်းဖုံႏတွော့ꩻ ဘာႏသာႏရေꩻ ထွုံꩻအလꩻ ကြောင်းစင်လဲဉ်းဖုံႏ နဝ်ꩻသွူ။ လိုꩻကသဲင်ꩻလွဉ်ချာ သားဖုံႏ ကားကအဝ်ႏတာႏ ယဇ်ပရောဟိတ်ဖုံႏတာႏစွဉ်ႏ ဝွေꩻသီးနမ်းတာႏ ပတ္တခါ ယဇ်ထာꩻပူႏဇောႏတာႏနဝ်ꩻ လေဝိစွိုးခွိုꩻဖုံႏ မာꩻသီဗာႏ ထာꩻသားဖုံႏနဝ်ꩻသွူ။ 21ဣသရေး လိုꩻမျိုꩻ ကခံႏဗာႏ ဝါးထန်ႏထိုꩻခမ်းထီ ကသဲင်ꩻလွဉ်ချာသားဖုံႏ ကားကအဝ်ႏ၊ လိုꩻလင်ဖုံႏ ကစွဉ်ꩻထိုꩻဒါႏ ဝုဲင်ႏကိုꩻကွယ်ႏ ရွုတ်တု၊ ကအဝ်ႏအုံသော့ꩻဒါႏ ရပ်နဝ်ꩻကိုသားဖုံႏတွမ်ႏ လိုꩻကလွဉ်ဝုဲင်ႏ ကိုꩻကွယ်ႏဒါႏ ထာဝရဘုရာꩻ ဣသရေး ဗွေႏဘုရာꩻသားဖုံႏနဝ်ꩻ အံႏလွစွဉ်ႏ ယဇ်ထာꩻသားယာႏဖုံႏ နဝ်ꩻသွူ။ 22ဝွေꩻသီးနဝ်ꩻ အဝ်ႏစွဉ်ႏထာꩻပျောႏ နွတ်ꩻနီꩻလွုမ်းလွုမ်း မာꩻပွယ်ꩻတခိုး တမီႏတပါဗာႏတဝ်း နဝ်ꩻသွူ။ ကတယ်ႏချာဒါႏ ဣသရေး ဗွေႏဘုရာꩻ ဗိမာန်ႏတောႏ ကျောင်ꩻနဝ်ꩻ ဝွေꩻသီးထာꩻမာꩻကို ဖေႏနေး အာသီးရီးယား ဧကရာဇ်ခွန်တန် ကစွဲကိုနဝ်ꩻ ကွပ်ပွိုး ထာဝရဘုရာꩻ တမာꩻဖေႏအာႏဝွေꩻ နဝ်ꩻမꩻ ဝွေꩻသီး ပျောႏသွင်ႏ မွေးနေးစွဉ်ႏဖုံႏ နဝ်ꩻသွူ။
Currently Selected:
ဧဇရ 6: PBCL
Highlight
Copy
Compare
Share
Want to have your highlights saved across all your devices? Sign up or sign in
Pao Bible Common Language© Bible Society of Myanmar, 2019.
