ဧဇရ 5
5
1 #
ဟဂ္ဂဲ ၁:၁၊ ဇာ ၁:၁။ အချိန်ႏနဝ်ꩻနဝ်ꩻ ပရောဖဲစ်နီပါꩻ ကထွာဒါႏ ဟဂ္ဂဲစွဉ်ႏ ဣဒ္ဒေါပိုခို ဇာခရိသီးနဝ်ꩻ စွဉ်ႏဣသရေး ဗွေႏဘုရာꩻ အမဉ်ꩻနာႏမတွော့ꩻ ဟော်ꩻစဖေႏစွဉ်ႏ ဂျူးလိုꩻမျိုꩻဖုံႏ ကအဝ်ႏအုံသော့ꩻဒါႏ ယုဒခမ်းတွမ်ႏ ဝေင်ꩻယေရုသလမ်ႏကို နဝ်ꩻသွူ။ 2#ဟဂ္ဂဲ ၁:၁၂၊ ဇာ ၄:၆–၉။ သျာလတေလပိုခို ဇေရုဗဗေလတွမ်ႏ ယောဇဒဲက်ပိုခို ယောသျု ထွိုင်ႏဟွိုန် ဝွေꩻသီးတရာꩻငဝ်း ဝွေꩻသီး တယ်ႏဟဝ်ချာယင်း ဗိမာန်ႏတောႏကျောင်ꩻနဝ်ꩻ ဝေင်ꩻယေရုသလမ်ႏကိုတဲင် ပရောဖဲစ်နီပါꩻနဝ်ꩻ စွဲကိုဝွေꩻသီး နဝ်ꩻသွူ။
3ဥဖရတ် ထီခြောင်ဖင်ႏ ဝွတ်တွို့ꩻနယ်ႏ ခွန်ခံႏတာတနဲ၊ သျေတာဗောဇနဲစွဉ်ႏ ဝွေꩻသီးသွꩻ အာႏဏာႏပဲင်ႏသားဖုံႏနဝ်ꩻ တလဲင်ႏချင်ꩻ လွဉ်ဝေင်ꩻယေရုသလမ်ႏတဲင် ရီစွဉ်ႏ၊ “ကအီႏတယ်ႏချာဒါႏ ဗိမာန်ႏတောႏကျောင်ꩻ ယိုတွော့ꩻ မာꩻစွုံႏလင်ႏဗာႏ ဗိမာန်ႏတောႏ ကျောင်ꩻနဝ်ꩻ ပါꩻမုဲင်ꩻဖေႏသီ အခွင်ꩻဟောင်း” နုဲင်းနဝ်ꩻသွူ။ 4ကတယ်ႏကူဒါႏ ဗိမာန်ႏတောႏကျောင်ꩻ လိုꩻမဉ်ꩻစရင်ꩻ ကားကအဝ်ႏဖုံႏနဝ်ꩻတဲ့ ဝွေꩻသီး ကွီပါက နဝ်ꩻသွူ။ 5ကွဲႏတွော့ꩻ ဗွေႏဘုရာꩻနဝ်ꩻ အဝ်ႏပွေါးထွား ဂျူးခေါင်းဆောင် လိုꩻတန်ဖုံႏနဝ်ꩻမꩻ ပါႏသျား အာႏဏာႏပဲင်ႏသားဖုံႏ ဆွုံꩻဖျတ်၊ ဝွေꩻသီး တဲမ်းဒင်ႏနယ်ထေ့ဖေႏ ဧကရာဇ်ခွန်ဒါရိထျꩻ လိတ်တွော့ꩻ ဗꩻတွိုႏစွဉ်ႏ ကလက်ခံႏ လိတ်ပြန်ႏချာနဝ်ꩻ တွမ်ႏထူႏရေꩻမွိုန်း နုဲင်းနဝ်ꩻသွူ။ 6ဝွေꩻသီး ကပသာဖေႏဒါႏ ဧကရာဇ်ခွန်လိတ်နဝ်ꩻ နုဲင်းယိုသွူ။
7“ဖေႏထေ့လွေꩻ ဧကရာဇ်ခွန်ဒါရိ၊ ယံဖေႏ နီဗွေႏနဝ်ꩻ ကအုပ်စိုꩻ ငိမ်ꩻချမ်ꩻခွꩻသꩻသွော့။
8“နီလွေꩻ ယုဒခမ်းကိုတွော့ꩻ ထီႏဗာႏ တန်မျတ်ငါႏ ဗွေႏဘုရာꩻ ဗိမာန်ႏတောႏကျောင်ꩻ၊ ကတယ်ႏဟဝ်ချာဒါႏတွမ်ႏ လုံးတူႏခြုံးတန်ဖုံႏတွော့ꩻ အဆေင်ႏဖုံႏလောင်းနဝ်ꩻ အွဉ်ႏဒင်ႏလူးဖေႏတွမ်ႏ သေင်ႏထုတ်တန်ꩻဖုံႏနဝ်ꩻ လဝ်းအွဉ်ႏဟွိုန်ဗာႏ နီဗွေႏနဝ်ꩻသွူ။ ကမာꩻထွူလဲဉ်းဒါႏ ထာꩻမာꩻဖုံႏနဝ်ꩻ အွဉ်ႏရေꩻမွေးနေးစွဉ်ႏ နဝ်ꩻမꩻ အောင်ႏမျင်ႏ ထင်ႏထိုꩻစွဉ်ႏနဝ်ꩻသွူ။
9“နဝ်ꩻထွူနီရီ ခေါင်းဆောင်လိုꩻတန်ဖုံႏ ပါꩻမုဲင်ꩻဖေႏဝွေꩻသီး အခွင်ꩻအာႏဏာႏ ဖေႏကတယ်ႏ ဟဝ်ချာဗာႏ ဗိမာန်ႏတောႏ ကျောင်ꩻတွော့ꩻ ကမာႏစွုံႏလင်ႏဗာႏ ကျောင်ꩻနဝ်ꩻ ဒေါ့ꩻနယ်ဖေႏသွော့နီ။ 10ပါꩻကမာꩻ ထာꩻမာꩻယို ခေါင်းဆောင်ဖုံႏ အမဉ်ꩻနဝ်ꩻတဲ့ ဖေႏနေး ကဒင်ႏနယ်နွောင်ꩻ နီဗွေႏနဝ်ꩻ နီကွီပါက ဝွေꩻသီးနဝ်ꩻသွူ။
11“ဝွေꩻသီးလဝ်းချာ၊ ‘နီနဝ်ꩻ ထွာဒျာႏမို့ꩻတွမ်ႏဟံႏ အဗွေႏဘုရာꩻ အသွဉ်းဖုံႏနဝ်ꩻမꩻ နေင်ႏပေါင်ꩻ ညလဲဉ်းခါကာႏ တန်ꩻခိုꩻကတန်ငါႏ ဣသရေး ခွန်တန်တပါꩻ တယ်ႏသေꩻခါꩻ ထွူတွော့ꩻ ကမာꩻသေꩻခါꩻလဲဉ်းဒါႏ ဗိမာန်ႏတောႏ ကျောင်ꩻလီꩻနဝ်ꩻ နီအဝ်ႏမွဉ်းဖျင် တယ်ႏဟဝ်ချာယင်း နဝ်ꩻသွူ။ 12#၂ရာႏ ၂၅:၈–၁၂၊ ၂ရာႏချုပ် ၃၆:၁၇–၂၀၊ ယေ ၅၂:၁၂–၁၅။ နီမွိုးဖြား ဖါဖြားသီးဖုံႏနဝ်ꩻ ကွပ်ပွိုး မာꩻသꩻလျားထိုꩻ ခမ်းထီမို့ꩻလောင်း အဗွေႏဘုရာꩻ နဝ်ꩻမꩻ ဝွေꩻဗွေႏအွဉ်ႏ ခါလဒိန် ခွန်ခွိုꩻတပါꩻ၊ ဗာဗုလုန်ခမ်း ခွန်တန် နေဗုခဒ်နေဇာနဝ်ꩻ တွိုက်ꩻအောင်ႏနွောင်ꩻထိုꩻ ဝွေꩻသီး နဝ်ꩻသွူ။ ဗိမာန်ႏတောႏ ကျောင်ꩻနဝ်ꩻ ယားကုဲင်ထိုꩻတွော့ꩻ လိုꩻဖုံႏနဝ်ꩻ ခံႏဗာႏဝါးထန်ႏထိုꩻ ခမ်းထီကိုတဲင် ဆွမ်ꩻသဲင်ꩻထိုꩻ ဗာဗုလုန်ခမ်း နဝ်ꩻသွူ။ 13#ဧဇ ၁:၂–၁၁။ နဝ်ꩻထွူ ဗာဗုလုန်ခမ်း ဧကရာဇ်ခွန်တန် ကုရု အုပ်စိုꩻ အရီးသွတ်ꩻ နေင်ႏကိုနဝ်ꩻ ဖေႏနေးကတယ်ႏ ဟဝ်ချာယင်း ဗိမာန်ႏတောႏ ကျောင်ꩻတာႏနဝ်ꩻ ကုရုထေဖေႏ အမိန်းနဝ်ꩻသွူ။ 14ဝေင်ꩻယေရုသလမ်ႏ၊ ဗိမာန်ႏတောႏ ကျောင်ꩻကို နေဗုခဒ်နေဇာ ကသိမ်ꩻသဲင်ꩻထိုꩻဒါႏ ခံꩻတွမ်ႏရွဉ်ဖုံႏ ဗိမာန်ႏတောႏ အသွုံꩻထာꩻခြိုꩻဖုံႏတွော့ꩻ ကအွဉ်ႏသော့ꩻဒါႏ ဗာဗုလုန် ဗိမာန်ႏတောႏ ကျောင်ꩻကိုဖုံႏနဝ်ꩻ ခွန်တန် ဖေႏချာယင်းနဝ်ꩻသွူ။ အသွုံꩻထာꩻခြိုꩻ ယိုဖုံႏနဝ်ꩻ ဧကရာဇ်ခွန်တန် ကုရုအပ်ဖေႏချာ၊ ဝွေꩻကခန်ꩻဖေႏဒါႏ ယုဒခွန်ခံႏ ပါꩻတဖြာꩻ ကမဉ်ꩻဒါႏ သျေသျဗာဇာ အစူကိုနဝ်ꩻသွူ။ 15ဧကရာဇ်ခွန်တန် ဒေါ့ꩻဖေႏဝွေꩻ ထူႏထာꩻခြိုꩻ နဝ်ꩻဖုံႏတွော့ꩻ ထာꩻခြိုꩻနဝ်ꩻဖုံႏနဝ်ꩻ အီသဲင်ꩻချာ ဗိမာန်ႏတောႏကျောင်ꩻ ဝေင်ꩻယေရုသလမ်ႏကိုတဲင် ထွဉ်ႏတယ်ႏဟဝ်ချာယင်း ဗိမာန်ႏတောႏကျောင်ꩻ၊ အခင်ႏလမ်းလီꩻကိုနဝ်ꩻသွူ။ 16နဝ်ꩻမꩻ သျေသျဗာဇာနဝ်ꩻ လွဉ်တွော့ꩻချꩻဖေႏစွဉ်ႏ ဗိမာန်ႏတောႏကျောင်ꩻ အရွီးခင်ႏဖါနဝ်ꩻသွူ။ နဝ်ꩻထွူ အဝ်ႏထွဉ်ႏတယ်ႏ သွုပ်သွုပ် ဗꩻတွိုႏစွဉ်ႏ ဟန်ႏနီꩻယိုနဝ်ꩻသွူ။ ကွဲႏတွော့ꩻ ဗိမာန်ႏတောႏကျောင်ꩻနဝ်ꩻ တထွူလꩻတဝ်းဒွိုန်းနဝ်ꩻသွူ။’
17“ဖေႏနေး ကတယ်ႏဟဝ်ချာယင်း ဗိမာန်ႏတောႏကျောင်ꩻ ဝေင်ꩻယေရုသလမ်ႏကိုနဝ်ꩻ၊ ဧကရာဇ်ခွန်တန်ကုရု ဖေႏအမိန်း မွေးနဲ့ တမွေးတဝ်းနဲ့ ဖေႏကသေနဝ်ꩻ ယိုခါနဝ်ꩻ နီဗွေႏ မဉ်ႏနစ်သက် အလိုႏမဉ်ႏအဝ်ႏနဝ်ꩻ ထုမ်ႏထွားချာယင်းသွော့ ဗာဗုလုန်ခွန်ခွိုꩻ ကတဲမ်းမတ် သေꩻခါꩻဒါႏ အကိုနဝ်ꩻဟုဲင်း။ နဝ်ꩻထွူ ပွိုင်းဝွို့တွမ်ႏ ကိစ္စယို နီꩻဗွေႏအလိုႏတောႏ အဝ်ႏနုဲင်းမုဲင်ꩻနဝ်ꩻ အွဉ်ႏဟွိုန်သွော့နီ” နုဲင်းနဝ်ꩻသွူ။
Currently Selected:
ဧဇရ 5: PBCL
Highlight
Copy
Compare
Share
Want to have your highlights saved across all your devices? Sign up or sign in
Pao Bible Common Language© Bible Society of Myanmar, 2019.
