ဧဇရ 4
4
အဝ်ႏတွိုက်ꩻဆန်တယ်ႏဟဝ်ချာဗိမာန်ႏတောႏကျောင်ꩻ
1လိုꩻကခံႏဗာႏ ဝါးထန်ႏထိုꩻ ခမ်းထီသားဖုံႏ သဲင်ꩻလွဉ် အဝ်ႏတယ်ႏဟဝ်ချာယင်း ထာဝရဘုရာꩻ ဣသရေး ဗွေႏဘုရာꩻ ဗိမာန်ႏတောႏ ကျောင်ꩻနဝ်ꩻ ယုဒလိုꩻဖုံႏစွဉ်ႏ ဗေင်ယာမိန်လိုꩻဖုံႏ ရန်ႏသူႏဖုံႏ ဟွိုန်နဝ်ꩻမꩻ၊ 2#၂ရာႏ ၁၇:၂၄–၄၁။ ဝွေꩻသီးနဝ်ꩻ လွေꩻမော့ꩻစွဉ်ႏ ဇေရုဗဗေလတွမ်ႏ ခွိုꩻနွယ်ႏခေါင်းဆောင် လိုꩻတန်ဖုံႏ ထျꩻတွော့ꩻ ဒေါ့ꩻ “သီ ကအဝ်ႏတယ်ႏဒါႏ ဗိမာန်ႏတောႏကျောင်ꩻနဝ်ꩻ ဖေႏပါငီꩻနီမွိုင်။ သီကအဝ်ႏကိုꩻကွယ်ႏဒါႏ ဗွေႏဘုရာꩻနဝ်ꩻ နီအဝ်ႏဝုဲင်ႏ ကိုꩻကွယ်ႏ တယ်ႏစွဉ်ႏ အာသီးရီးယား ဧကရာဇ်ခွန်တန် ဧဇရဟဒ္ဒုန် ကအွဉ်ႏစွꩻလွဉ်အုံနီ ယိုကိုခါကာႏ နီအဝ်ႏလူႏ ပူႏဇောႏဒျာႏ ဝွေꩻဗွေႏ ယဇ်ထာꩻလူႏပူႏဇောႏဖုံႏ” နုဲင်းနဝ်ꩻသွူ။
3ဇေရုဗဗေလ၊ ယောသျုစွဉ်ႏ ခွိုꩻနွယ်ႏခေါင်းဆောင် လိုꩻတန်ဖုံႏနဝ်ꩻ ဒေါ့ꩻဖေႏဝွေꩻသီး “ကအီႏတယ်ႏဒါႏ ထာဝရဘုရာꩻ နီဗွေႏဘုရာꩻ ဗိမာန်ႏတောႏကျောင်ꩻ တဖြုံႏနဝ်ꩻ နီတအဝ်ႏလိုႏတဝ်း သီစွဲကို။ နုဲင်းပါးသျား ဧကရာဇ်ခွန်တန် ကုရု ကမိန်းနီအတွိုင်ꩻ ဗိမာန်ႏတောႏ ကျောင်ꩻနဝ်ꩻ နီအီႏတယ်ႏဒျာႏ နီရင်ꩻ” နုဲင်းနဝ်ꩻသွူ။
4နဝ်ꩻထွူ ဂျူးလိုꩻမျိုꩻဖုံႏတွမ်ႏ ကောကအဝ်ႏတယ်ႏဒါႏ သားဖုံႏ ဖေႏသꩻကကုဲင်တွော့ꩻ ကငမ်းထိုꩻနဝ်ꩻ လိုꩻဖုံႏ ကအဝ်ႏအုံသော့ꩻဒါႏ ခမ်းကိုသားဖုံႏနဝ်ꩻ ကျိုꩻစာꩻမာꩻစွဉ်ႏ နဝ်ꩻသွူ။ 5ဖေႏနေးကဆန် ဝွေꩻသီး ထာꩻမာꩻဖုံႏနဝ်ꩻ ဝွေꩻသီးဖေႏပါက ပါးသျားအစိုႏရ အာႏဏာႏပဲင်ႏသားဖုံႏ လာဘ်လက်ဆောင်ႏ နဝ်ꩻသွူ။ တယ်ႏစွဉ်ႏ ဧကရာဇ်ခွန် ကုရု ကအုပ်စိုꩻစိုး ဗꩻလွေꩻစွဉ်ႏ ဧကရာဇ်ခွန်ဒါရိ ကအုပ်စိုꩻဒါႏစိုးနဝ်ꩻ ဝွေꩻသီး အဝ်ႏယား သွုပ်သွုပ်စွဉ်ႏ နုဲင်းယိုနဝ်ꩻသွူ။
ဆန်ချာကအဝ်ႏတယ်ႏဟဝ်ချာဝေင်ꩻယေရုသလမ်ႏ
6ဧကရာဇ်ခွန်တန်ဇေရဇ် ကအုပ်စိုꩻစနဝ်ꩻ လိုꩻဖုံႏ ကအဝ်ႏအုံသော့ꩻဒါႏ ယုဒခမ်းစွဉ်ႏ ဝေင်ꩻယေရုသလမ်ႏသား အရန်ႏသူႏဖုံႏနဝ်ꩻ တဲမ်းဆန် ပဲစ်တင်ႏလွဉ် ဝွေꩻသီးလိတ်ဖုံႏ နဝ်ꩻသွူ။
7ပါးသျား ဧကရာဇ်ခွန်တန် အာတဇေရဇ် အုပ်စိုꩻစိုးနဝ်ꩻ ဗိသျလံ၊ မိသရေဒတ်၊ တဗေလစွဉ်ႏ ဝွေꩻသီး အစွုမ်ꩻစွိုꩻဖုံႏနဝ်ꩻ တဲမ်းထေ့ဖေႏ ဧကရာဇ်ခွန်ထျꩻ လိတ်တစောင်ႏနဝ်ꩻသွူ။ လိတ်နဝ်ꩻ တဲမ်းနေး အာရမိလိုꩻမျိုꩻငဝ်း #၄:၇ အာရမိ တယ်ႏ ၄:၈ ဗꩻလွေꩻ ၆: ၁၈ အအုပ်ယိုနဝ်ꩻဟေဗြဲကျမ်ꩻကိုတအဲဉ်ထဝ်း၊ ကွဲႏတွော့ꩻ ပါသျားခမ်း အဲမ်ပါယာ အမျာꩻသွုံꩻငဝ်း တရာꩻဝင်ႏဒျာႏသွူ။ အာရမိဘာႏသာႏကိုနဝ်ꩻအဝ်ႏသွူ။ တဲင် ကဖတ်နယ်ချိန်ႏနဝ်ꩻ ပြန်ႏနယ်နေးဗာႏ အဓိပ္ပါယ်ႏ နဝ်ꩻသွူ။
8ပွိုင်းဝွို့တွမ်ႏ ဝေင်ꩻယေရုသလမ်ႏ ခရာႏနဝ်ꩻ ခွန်ခံႏရေဟုံစွဉ်ႏ နယ်ႏအကိုရေꩻ သျိမသျဲနဝ်ꩻတဲ့ တဲမ်းဖေႏ ဧကရာဇ်ခွန်တန် အာတဇေရဇ် လိတ်တစောင်ႏ နုဲင်းဆလယို နဝ်ꩻသွူ။
9“အဝ်ႏခွန်ခံႏရေဟုံ၊ နယ်ႏအကိုရေꩻ သျိမသျဲတွမ်ႏ ဝွေꩻသီး အစွုမ်ꩻစွိုꩻဖုံႏ၊ တရာꩻလိုꩻတန်သားဖုံႏ၊ ကအဝ်ႏဒါႏ ဝေင်ꩻဧရဲက်၊ ဝေင်ꩻဗာဗုလုန်တွမ်ႏ ဝေင်ꩻဧလံခမ်း ၊ ဝေင်ꩻသုသျန်ဖုံႏ ကလွဉ်မာꩻဖေႏထာꩻမာꩻ အာႏဏာႏပဲင်ႏ သားအလင်ဖုံႏ ကားကအဝ်ႏနဝ်ꩻ အထျꩻ၊ 10ပါတွမ်ႏ တန်ꩻခိုꩻကတန်ငါႏ ခွန်တန် အာသနပ္ပါ ကအွဉ်ႏစွꩻ လွဉ်အုံသော့ꩻဒါႏ ဝေင်ꩻသျမာရိကို သားဖုံႏတွမ်ႏ၊ ခင်ႏလမ်းအလင် လိုꩻအကအုံ ဥဖရတ် ထီခြောင်တန် ဝတ်တွို့ꩻဖဲ့ꩻ ကပြောင်ꩻလွဉ်အုံဒါႏ လိုꩻလင်ဖုံႏနဝ်ꩻထျꩻ။” #၄:၁၀ ဥဖရတ် ထီခြောင်ဝွတ်တွို့ꩻ ဟံႏနယ်ႏ ပါသျား ကအုပ်စိုꩻဒါႏစိုး ယုခအခဝ်ယိုနဝ်ꩻ ဥဖရတ်ခြောင်တန် ဝွတ်တွို့ꩻဖဲ့ꩻ ဟံႏယားနဝ်ꩻထွာ အလုဲင်းသွတ်ꩻသွူ။
11လိတ်ကို ကပါဒါႏ အကျောင်ꩻခရာႏနဝ်ꩻ နုဲင်းယိုသွူ။
“အဝ်ႏခွန်တန်အသွဉ်းဖုံႏ ကအဝ်ႏအုံသော့ꩻဒါႏ ဥဖရတ် ထီခြောင်တန် ဝတ်တွို့ꩻဖဲ့ꩻ သားဖုံႏထျꩻနဝ်ꩻ တဲမ်းထေ့လွေꩻဖေႏ ဧကရာဇ်ခွန် အာတဇေရဇ်ထျꩻနဝ်ꩻသွူ။
12“နီꩻမဉ်အွဉ်ႏဟွိုန်ငါႏ နီဗွေႏခွန်တန်၊ နီဗွေႏနဝ်ꩻ ဂျူးလိုꩻမျိုꩻဖုံႏ ကအဝ်ႏအုံသော့ꩻဒါႏ နီဗွေႏ ဟံႏနယ်ႏ အလင်ကိုတွော့ꩻ ကလွဉ်အုံသော့ꩻဒါႏ ဝေင်ꩻယေရုသလမ်ႏကိုနဝ်ꩻ အဝ်ႏတယ်ႏချာယင်း ထာꩻကုဲင်စွဉ်ႏ ကတောႏလန်ႏ ဆန်ချာဒါႏ ဝေင်ꩻနဝ်ꩻသွူ။ ဝွေꩻသီး အဝ်ႏတယ်ႏစလဲဉ်း ဝေင်ꩻဆေင်ႏတန်ꩻတွိုင်ꩻဖုံႏတွော့ꩻ၊ တညတဝ်း နဝ်ꩻဖုံႏနဝ်ꩻ အီႏထွူသွူ။ 13နီဗွေႏခွန်တန် တယ်ႏဟဝ်ချာ ဝေင်ꩻယိုတွော့ꩻ၊ ဝေင်ꩻဆေင်ႏ တန်ꩻတွိုင်ႏဖုံႏ မဉ်ႏထွူလို့ထိုꩻနဝ်ꩻ လိုꩻဖုံႏ အီႏတဖေႏတဝ်းဒွုမ် အခွဉ်ႏနဝ်ꩻမꩻ၊ နီဗွေႏခွန်တန်နဝ်ꩻ အီႏလꩻဆေ့ꩻထိုꩻ အခွဉ်ႏနဝ်ꩻသွူ။ 14ယိုခါ နီနဝ်ꩻ ကွပ်ပွိုး တလွစ်ကင်ꩻတဝ်းတွမ်ႏ နီဗွေႏခွန်တန် ကေꩻဇူꩻနဝ်ꩻမꩻ၊ ထွာထာꩻနုဲင်းယိုနဝ်ꩻ နီတမဉ်ထီႏတဝ်း။ နဝ်ꩻမꩻ နီမဲဉ်ဖေႏကျံႏ၊ 15နီဗွေႏ ထေဖေႏသွော့ အမိန်းတစား၊ ဖေႏနေး ကထုမ်ႏထွားဒျာႏ နီဗွေႏမွိုးဖြား ဖါဖြားသီး ကတဲမ်းမတ်ခါꩻဒါႏဖုံႏ အကို။ နီဗွေႏမဉ်ႏမာꩻ နုဲင်းနဝ်ꩻနဝ်ꩻ ဝေင်ꩻယိုနဝ်ꩻ အဝ်ႏတောႏလန်ႏဆန်ချာ သေႏသေႏဒျာႏ ထာꩻတွော့ꩻ၊ စခေါင်ႏစခါကာႏ ဝေင်ꩻနဝ်ꩻ အဝ်ႏဖေႏဒုက္ခတသေႏ ခွန်တန်ဖုံႏစွဉ်ႏ ကအုပ်စိုꩻဒါႏ နယ်ႏသားဖုံႏနဝ်ꩻ နီဗွေႏ အီႏသေဗာႏနဝ်ꩻသွူ။ လိုꩻဝေင်ꩻနဝ်ꩻသားဖုံႏနဝ်ꩻ အုပ်စိုꩻအဝ်ႏယပ်ꩻ သေႏသေႏဒျာႏ နဝ်ꩻသွူ။ ကွပ်နုဲင်းယိုနဝ်ꩻမꩻ ဝေင်ꩻနဝ်ꩻ ခံႏဗာႏ အယားကုဲင်ထိုꩻ နဝ်ꩻသွူ။ 16နဝ်ꩻမꩻ ဝေင်ꩻယို မွဉ်းတယ်ႏဟဝ်ချာတွော့ꩻ ဝေင်ꩻအဆေင်ႏတန်ꩻတွိုင်ꩻ မဉ်ႏတယ်ႏဟဝ်ချာ ထွူလို့ထိုꩻနဝ်ꩻ နီဗွေႏခွန်တန် အီႏထိန်ꩻ ဥဖရတ် ထီခြောင် ဝွတ်တွို့ꩻ ဟံႏနယ်ႏဖုံႏ အီႏတနွောင်ꩻတဝ်း၊ နီယွုမ်း နုဲင်းနဝ်ꩻတွော့ꩻ နီလဝ်းဟွိုန်ဗာႏ” နုဲင်းနဝ်ꩻသွူ။
17ဧကရာဇ်ခွန်တန် ပသာချာ ငဝ်းဖြေႏနုဲင်းယို၊
“ခွန်ခံႏရေဟုံ၊ နယ်ႏအကိုရေꩻ သျိမသျဲတွမ်ႏ ဝွေꩻသီး အစွုမ်ꩻစွိုꩻ ကအဝ်ႏအုံသော့ꩻဒါႏ ဝေင်ꩻသျမာရိတွမ်ႏ ဟံႏနယ်ႏကအဝ်ႏဒါႏ ထီခြောင်တန် ဝတ်တွို့ꩻသားဖုံႏ ထျꩻနဝ်ꩻ အွဉ်ႏဟွိုန်ဖေႏ ငဝ်းနုတ်ဆက်ဖုံႏ နဝ်ꩻသွူ။
18“သီကပသာလွဉ် ဖေႏလဲဉ်းဒါႏ လိတ်နဝ်ꩻ ပြန်ႏဖေႏတွော့ꩻ ဖတ်နယ်ဖေႏလဲဉ်းသွူခွေ နဝ်ꩻသွူ။ 19ခွေထေအမိန်း အွဉ်ႏစုံႏစမ်ꩻထွားတဲင် ဝေင်ꩻယေရုသလမ်ႏနဝ်ꩻ တယ်ႏစွဉ်ႏ စခေါင်ႏစခါ ချိန်ႏကာႏ အဝ်ႏတောႏလန်ႏဆန်ချာ သေႏသေႏဒျာႏ၊ ခွန်တန် အာႏဏာႏပဲင်ႏသားဖုံႏ၊ အဝ်ႏဗွေစွဉ်ႏ ထာꩻတောႏလန်ႏဖုံႏတွော့ꩻ အဝ်ႏမာꩻဒုက္ခ ဒျာႏထာꩻဖုံႏ နဝ်ꩻသွူ။ 20ခွန်တန် တန်ꩻခိုꩻတန်ဖုံႏနဝ်ꩻ အဝ်ႏအုပ်စိုꩻ ဝေင်ꩻနဝ်ꩻတွော့ꩻ အုပ်စိုꩻတွိုႏလွေꩻစွဉ်ႏ ဥဖရတ် ထီခြောင်တန် ဝတ်တွို့ꩻ ဟံႏနယ်ႏ တနယ်ႏလွုမ်း၊ အဝ်ႏကောက် အခွဉ်ႏတဲင် အဝ်ႏထမ်ꩻဖေႏဗာႏ နဝ်ꩻသွူ။ 21နဝ်ꩻမꩻ ဗꩻတွိုႏစွဉ်ႏ ခွေကထေလွဉ် အမိန်းတစွိုးတမျိုꩻ ကအဝ်ႏတယ်ႏဟဝ်ချာဒါႏ ဝေင်ꩻနဝ်ꩻ အွဉ်ႏလိုꩻစားနဝ်ꩻဖုံႏ ဖေႏကအွဉ်ႏထွူထိုꩻနဝ်ꩻ သီထူႏရေꩻ ထေဖေႏသွော့ အမိန်း။ 22ယံဖေႏ ခွေအကျိုꩻ ကဆေ့ꩻဗာႏမွိုန်းတဲင် အမိန်းယိုနဝ်ꩻ ထေသွော့ တလဲင်ႏချင်ꩻဟုဲင်း” နုဲင်းနဝ်ꩻသွူ။
23အဝ်ႏဧကရာဇ်ခွန်တန် အာတဇေရဇ်ထျꩻ လိတ်ယို ပေါႏသဲစ် ကဖတ်နယ်ဖေႏ ရေဟုံ၊ သျိမသျဲစွဉ်ႏ ဝွေꩻသီး အစွုမ်ꩻစွိုꩻဖုံႏနဝ်ꩻ တလဲင်ႏချင်ꩻ ဝွေꩻသီး နဲစ်လွေꩻစွဉ်ႏ ဝေင်ꩻယေရုသလမ်ႏတွော့ꩻ ထွဉ်ႏအွဉ်ႏထွူ နွိုင်ႏစွဉ်ႏ ဂျူးလိုꩻမျိုꩻဖုံႏ ကအဝ်ႏတယ်ႏဟဝ်ချာဒါႏ ဝေင်ꩻနဝ်ꩻသွူ။
တယ်ႏစချာဖျင်ယင်းဗိမာန်ႏတောႏကျောင်ꩻထာꩻမာꩻ
24 #
ဟဂ္ဂဲ ၁:၁၊ ဇာ ၁:၁။ အွဉ်ႏထွူ အုံပဆားထိုꩻ ဗိမာန်ႏတောႏ ထာꩻမာꩻနဝ်ꩻ ဗꩻတွိုႏစွဉ်ႏ ပါးသျားဧကရာဇ်ခွန်တန် ဒါရိအုပ်စိုꩻလꩻ ဒုတိယနေင်ႏကို နဝ်ꩻသွူ။
Currently Selected:
ဧဇရ 4: PBCL
Highlight
Copy
Compare
Share
Want to have your highlights saved across all your devices? Sign up or sign in
Pao Bible Common Language© Bible Society of Myanmar, 2019.
