اوّلتا نامه قُرنتیانِ ره 12
12
روحانی عطایان
1هسّا ای براران، نخوام کی روحانی عطایان باره بی خبر بیبید. 2دَنیدی اُ موقع کی بُت پرست بید، گُمراهَ بوستید و لالِ بُت ئان سمت فاکشه بوستیدی به هر حال هر جور کی بو شمرأ فاکشانئیدی. 3پس شمرأ گَم كی هركس، بواسطه ی خُدا روح گب بزنه، هرگس نیگه لعنت بر عیسی، و هیکّس بی اونکی روح القدوّس واسطه بِبه نتانه بگه: «عیسی، خُداوندِ.»
4رقم به رقم عَطیه نئا، ولی روحْ هونه؛ 5رقم به رقم خیدمت نئه، ولی خُداوند هونه؛ 6رقم به رقم کار نئه، ولی هو خُدا ایسه کی همه کسَ، همه چی درون قوّت دِئه.
7خُدا روحِ ظاهر بوستن هرکس ره، همه کسِ منفعت واسی فدَه به. 8چونکی اینفرَ بواسطه خُدا روح، حکمت کلام فدَه به، و اینفر دیگه بواسطه هو روح، کلامِ دانستن. 9و اینفر بواسطه هو روح، ایمان و اینفر دیگر بواسطه هو روح، شفا دئنِ عَطایا. 10اينفرَ انجام دَئن مُعجزات قُدرت و اینفر دیگرَ نبوّت، و اینفرَ روح ئان تشخیص دَئنِ قُدرت فدَه به. اينفرَ جورواجور زوانان، گب زئن واسی، و اینفر دیگرَ جورواجور زوانانِ ترجمه کودَن فدَه به. 11تمانِ اَشان بواسطه هو ایتا روح کی خُدا روح ایسه قوّت گیریدی و اوجور کی خودِش خوائه اونَ سَام کونه و هرکسَ فدِه.
ایتا تن، اعضای زیاد اَمرا
12چون هُطوکی تن ایتا ایسه و خَیلی عضو دَره؛ و تمان تن اعضا با اَنکی زیادید، ایتا تن ایسید. مسیح هم هَطو ایسه. 13چونکی امان همه ایتا روح درون غُسل تعمید بیگیفتیم تا ایتا تن بیبیم، و امان همه ایتا روحِ جا بُنوشانه بُبوستیم؛ چی یهود و چی یونانی، چی غُلام و چی آزاد. 14چونکی تن نه ایتا عضو اَمرا، بلکی جه اعضایِ زیادی چاکوده بُبوسته. 15اَگه پا بگه «چونکی دَس نیئَم، تنِ شین نیئَم،» اَن دلیل نیبیه کی عضوی جه تن نَبه. 16و اَگه گوش بگه «چونکی چوم نیئَم، تنِ شین نیئَم،» اَن دليل نيبه كی عضوی جه تن نبه. 17اَگه تمانِ تن چوم بو، چُطو خواستیم بیشتاویم؟ و اَگه تمانِ تن گوش بو، چُطو خواستیم بو بُکونیم؟ 18ولی اَطویی، خُدا تنِ اعضایَ اوجور کی خودش خواستی، ایتا ایتا تن درون بَنه. 19اَگه تمان اعضا ایجور بُبوسته بید، تن کویا وجود داشتی؟ 20ولی هُطوکی اعضا زیادید، با اَ حال تن ایتا ایسه. 21چوم نتانه دسَ بگه، «تَره احتیاج نارَم!» و هُطو کَله هم نتانه لنگانَ بگه، «شمرأ احتیاج نارم!» 22برعكس، اُ تنِ اعضا کی ضعيف تر نیشان دیئیدی، واجب تَرید. 23و اُ تن اعضا کی فیکر کونیم کمتر حُرمت دَریدی، ویشتر اوشانَ حُرمت نیئیم، و اُ اعضا مَرا کی قشنگ نیئید ویشتر اوشانَ فارس فارس کونیم؛ 24هسّا اَنکی اَمی قشنگ عضوئان اَجور فارس فارسی احتیاج ناریدی. ولی خُدا تنَ اَنقدَر منظم بساخته کی اُ اعضا کی حُرمت کمتری دَریدی ویشتر حُرمت بدَرید، 25تا تن درون جُدایی نبه، بلکی تنِ اعضا به ایتا اندازه همدیگر فیکر بیبید. 26و اَگه ایتا عضو عذاب بکشه، تمان اعضا اونَ امرا عذاب بکشید؛ و اَگه ایتا عضو حُرمت بدَره، همتان، همدیگر امرا ذوق بُکونید. 27اَطویی، شُمان مسیحِ تن ایسید و تک به تک اونِ اعضا ایسید. 28خُدا کلیسا میان، اول رسولان، دوم پیغمبران، سیوم آموجگاران؛ بعد قُدرت مُعجزات، بازون پس شفا دَئن عطایا و کمک و مدیریت و گب زئن به جورواجور زوانانَ تعیین بُکود. 29مگه همتان رسولید؟ مگه همتان پیغمبرید؟ مگه همتان آموجگاریدی؟ مگه همتان قُدرت مُعجزه یَ دَریدی؟ 30مگه همتان شفا دَئن عطایایَ دَریدی؟ مگه همتان جورواجور زوانانَ گب زنیدی؟ مگه همتان ترجمه کونیدی؟
31ولی شُمان ذوق اَمرا پیله تر عطایانِ دُمبال بیبید، و من بخترین راهَ شمرأ نیشان دَئَم.
Currently Selected:
اوّلتا نامه قُرنتیانِ ره 12: GIL
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
