فیلیپیلیلَر 4
4
1پس، کاکالاریم، سیزلَر کی بئلَینزی چوخ سئیرَم و گؤرمَکینز ایچی آرزی چکیرَم، سیزلَر کی منیم شادلیگیم و تاجیمانز، عزیزلریم بئلهیین رَبده قایم تورینز.
آخیرکی سؤزلَر
2اِفُودیهدن خواهش ائدیرم و ائله بئله ده سینتیخیدَن خواهش ائدیرم کی رَبده بیر بیر اینن صلاح گئدلَّر. 3بلی، ای حَقیقی همکار سندَن ده سئیرَم کی بو آروادلارا کؤمک ائدَینگ، بوللارا کی اَکلیمنتُس و آیری همکارلاریم اینان کی آدلاری زندلیگ دفترینده یازیلمیش، یان یانا منیم اینن اینجیل یولوندا زحمت چکمیشلَر.
4همیشه رَبده خوشحاللیگ ائدینز؛ گئنه دا دئییرَم خوشحاللیگ ائدینز. 5قؤینز تا واری کَسه آشکار اولا کی ناغاد با مُلاحظه آداملارانز. رَبّینگ گلمَکی یاخین دیر. 6هئچ نه ایچی نگران اولمانز، بلکی واری زاددا دُعا و خواهش و تَمنّا اینان، ائله بئله ده شُکر ائدمک اینن، اؤز سئدیگیلَرینزی تارئیا بیلدیرینز. 7و تارئنینگ صُلح و سلامتلیگی کی واری فَهمدَن ایلَری ووریر، سیزینگ اؤرهکینزدَن و فکرینزدَن مَسیح عیسادا حفاظت ائدَر.
8آخیردان، کاکالار، هَرنهیه کی گرچک دیر، هر نهیه کی حُرمَتلی دیر، هر نهیه کی دؤز دور، هر نهیه کی آرّی دیر، هر نهیه کی چوخ سئمهلی دیر و هر نهیه کی تعریف ائدمهلی دیر، اگر بیر زاد چوخ خوب دور، اگر بیر زاد تعریف ائدمَک اَرزشی واری، بئلهیین زادلارا فکر ائدینز. 9هَر نه کی مَندن اؤرگنمیشَینز، قبول ائدمیشَینز، ائشیتمیشَینز و منده گؤرموشَینز، بو زادلارا عَمل ائدینز و صُلح و سلامتلیگ تارئسی سیزینگ اینن اولور.
هدیهلردن تشکر ائدمک
10رَبده چوخ خوشحالام کی ایندی آخیردان، گئنه منیم فکریمه دؤشموشاینز. سیز گرچکدَن منیم فکریمده ایدینز، آما فُرصت یوخینز ایدی. 11بئلهیین دهییل کی من احتیاج اوستوندَن دانیشیرام، چونکی اؤرگنمیشَم کی هر وَضعده قانع اولاسیم. 12یوخسوللیگ چکمهکی بیلیرَم، فروانلیگده زندلیگ ائدمَکی ده بیلیرَم. هر وضع و حالدا بونونگ سِرّینی کی توخلیگدا و آجلیگدا، فراوانلیگده و احتیاجدا باش ائدَم، اؤرگنمیشَم. 13واری ایش گؤره بیلیرَم، مَسیح طریقیندَن کی منه قوّت وئریر. 14آما حلی ده بو سیزینگ مهربانلیگینزدَن ایدی کی منیم تنگیمده بئلیم اینن شریک اولدونز.
15سیز فیلیپیلیلَر، اؤزونز بیلیرَینز کی اینجیل ایشینینگ باشلانماکیندا، من مَقدونیه منطقهسیندَن چیخندن سورا، بیر تک سیزدَن آیری، هئچ کلیسا وئرمَکده و آلماکدا منیم اینن شریک اولمادی. 16حَتّی اوندا کی تَسالونیکی شَهرینده ایدیم، احتیاجلاریم ایچی بئلیمه کؤمک یوللادینز و گئنه ده یوللادینز. 17بئلهیین دهییل کی هدیه آلماگ قولونجوندا اولام، بلکی او ثَمر قولونجوندایام کی سیزینگ حسابینزا قؤیولا. 18او پیلینگ واریسینی آلدیم، حتّی آرتیق ده. ایندی کی سیزینگ یوللادیگینز هدیهلَری اِپافرودیتوسدان آلدیم، واری زاددان فراوان واریم. سیزینگ هدیهلَرینزی کی بیر ایسی خوب عطر دیر، بیر قبول اولان قُربانلوق دور و تارئیی خُشنود ائدیر. 19و منیم تارئم، سیزینگ واری احتیاجلارینزی اؤز شوکتلی دولتینه گؤره مَسیح عیسادا برطرف ائدَر. 20تارئمیز، گؤیدهکی بووآمیزا اَبددَن اَبدنچاز شوکت اولسون. آمین.
آخیرکی سالاملار
21واری مَسیح عیساداکی مُقدّسلَره سالام ائتیشدیرینز. منیم اینن اولان کاکالار، سیزه سالام ائتیردیرلَر. 22واری مَسیحه ایمانی اولانلار بئلَینزه سلام ائتیردیرلَر، علیالخصوص ده اوللار کی روم پادشاهینینگ اوباسیندان دیرلار.
23رَب عیسا مَسیحنینگ فِیضی سیزینگ روحینز اینان اولسون.
Currently Selected:
فیلیپیلیلَر 4: QII
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
