کولُسیلیلَر 1
1
1پولُسدان، کی تارئ سئدیگی اینن مَسیح عیسانینگ بیر حَواریسی دیر و کاکامیز تیموتائوسدان،
2مَسیحدهکی مُقدّسلَره و وافالی کاکالارا کی کولُسی شَهرینده دیرلَر:
بووآمیز تارئ طرفیندَن سیزه فِیض و صُلح و سلامتلیگ اولسون.
شُکر و دُعا ائدمگ
3بیز سیزینگ ایچی دُعا ائدنده، همیشه تارئیی، رَبّیمیز عیسا مَسیحنینگ بووآسینی شُکر ائدیرَک، 4چونکی بیز مَسیح عیسادا اولان ایمانینز بارهسینده و او مُحبّت بارهسینده کی واری مَسیحه ایمانی اولانلارا وارینز ائشیتدیک. 5بوللار او امیددَن سَرچشمه توتیر کی گؤیده سیزینگ ایچی ساخلانمیش. بو امید بارهسینده ایلَرتر حَقیقت کلامیندا یعنی اینجیلده ائشیتمیشَینز، 6او اینجیل کی سیزه ائتیشمیش، ائله اولهیین کی گرچکدَن بوتون دنیادا ثَمر ائدیر و چوخالیر، ائله او طور کی سیزینگ آراینزدا ده او گؤندَن کی بونو ائشیتدینز و تارئ فِیضینی حَقیقتده آنگلادینز عَمل ائدیر، 7ائله اولهیین کی بیزیم اینن خدمت ائدَن عزیز اِپافْراسدان اؤرگندینز. او سیزینگ یئرینزه مَسیحنینگ بیر وفالی خادمی دیر 8و سیزینگ مُحبّتینزی کی تارئ روحوندا دیر بیزه بیلدیرمیش.
9بو خاطره، او گؤندن کی بونو ائشیتدیک سیزینگ ایچی دُعا ائدمکدن اَل چَکمهمیشَک، بلکی تارئدان سئیرَک کی سیز اؤنونگ سئدیگینینگ مَعرفتی اینن دؤلانز، بوتون روحانی حِکمتده و فَهمده. 10تا بیر رقم رووآل ائدَینز کی رَبّه یاراشا و اؤنو تمام و کمال خُشنود ائدَینز، یعنی هَر خوب ایشده ثَمر ائدَینز و تارئ مَعرفتینده رُشد ائدَینز. 11بوتون قُدرت اینن کی اؤنونگ شوکتلی قوّتینه گؤره دیر، گؤجلو اولینز، تا شادلیگ اینان بیر تمام و کمال اِستقامت و صَبر وارینز اولا 12و گؤیدهکی بووآیی شُکر ائدَینز کی سیزی قابل ائدمیش کی مَسیحه ایمانی اولانلارینگ میراثیندا کی ایشّیقده دیر شریک اولانز. 13او بیزی قرنگیلیگ حکمرانلیگیندان قورتارمیش و بئلَمیزی اؤز عزیز اوغلونونگ پادشاهلیگینا کؤچورتمیش، 14اؤز عزیز اوغولو کی بیز اؤندا آزادلیگ واریمیز، یعنی گُناهلاریمیزینگ باغیشلانماکی.
مَسیحینگ کیملیگی و ایشی
15مَسیح، گؤرولمهیَن تارئنینگ شمایلی دیر و اَوّلکی دوغولان بوتون خلقتدَن ایلرتر و اوخاریتر. 16چونکی اؤنونگ واسطهسینه واری زاد یارادیلدی، گؤیده و یئرده، گؤرولَن و گؤرولمهیَن، چه پادشاهلیگ تَختلَری چه دا حکمرانلیگلار، رئیسلَر یا دا اِقتدارلیلَر، واری زاد اؤنونگ واسطهسینه و اؤنونگ ایچی یارادیلدی. 17او واری زاددان ایلَرتر دیر و اؤندا واری زاد، بئلینه ساخلانیر. 18او بَدنینگ، یعنی کلیسانینگ، باشی دیر. او باشلانیش دیر، اؤلولَر آراسیندا اَوّلکی دوغولان او دور، تا واری زاددا باش، او اولا. 19چونکی تارئنینگ بوتون دؤلولوگونونگ خُشنودلیگی بوندا ایدی کی اؤندا مَنزل ائده، 20و اؤنونگ واسطهسینه واری زادی اؤزو اینن صُلح وئره، چه یئرده چه گؤیده، او صُلح وسیلهسینه کی اؤنونگ قانینینگ صَلیب اوستونده تؤکولمهکی اینن برقرار ائدی.
21سیز کی بیر زامان تارئ اینان غَریب ایدینز و اؤز فکرینزده اؤنونگ اینان دُشمن ایدینز و عَمللَرینز پیس ایدی، 22ایندی مَسیح سیزی اؤز جسمانی بدنینده، اؤز اؤلومو وسیلهسینه صُلح وئرمیش، تا سیزی مُقدّس، عیبسیز و بدون بو کی بئلَینزه سَرکوفت وورالّار، تارئ حُضورونا گتیره، 23اگر گرچکدَن سیز ایماندا قایم و اُستوار قالانز و ائشیتدیگینز اینجیلینگ امیدینده تَتلنمهیَینز، ائله او اینجیل کی گؤی آلتینداکی خلقتینگ واریسینا اعلام اولموش و من، پولُس، اولدوم اؤنونگ بیر خادمی.
پولُسینگ خدمتی کلیسایا
24ایندی سیزینگ بالاینزا چکدیگیم زَجرلَریمده شادلیگ ائدیرَم. مَسیحنینگ اؤز بدنی بالاسینا یعنی کلیسا بالاسینا چکدیگی مُصیبتلَرینگ هر کَم و کاستینی اؤز جسمیمده دؤلدوریرام. 25تارئ سیزینگ ایچی منه وئردیگی مُباشرلیگ خدمتینه گؤره، من کلیسانینگ خادمی اولدوم، تا تارئ کلامینی تمام و کمال بیلدیرَم، 26یعنی او سِرّی کی، چوخ زامانالار دیر و چوخ نَسللَر دیر کی پنهان ساخلانمیشدی، آما ایندی اؤنونگ مُقدّسلَرینه آشکار اولموش. 27اوللارا کی تارئ سَچدی تا بئللَرینه بیلدیره کی بو سِرّینگ شوکتینینگ فروانلیگی غیرییهودیلار آراسیندا ناغاد بویوک دیر. ائله او سِرّ کی مَسیح سیزده دیر، کی شوکت امیدی دیر.
28بیز مَسیحی اعلام ائدیرَک و هَر کَسی هوشکار ائدیرَک و واری کَسه بوتون حِکمت اینن تعلیم وئریرَک تا مَسیحده واری کَسی بالغ، گتیرَک تارئ حُضورونا. 29بو خاطره دیر کی من زَحمت چکیرم و اؤنونگ بوتون گؤجو اینن کی قُدرت اینن منده ایش گؤرور، تلاش ائدیرَم.
Currently Selected:
کولُسیلیلَر 1: QII
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
