فیلیپیلیلَر 3
3
صالح ساییلماک او ایمان طریقیندَن دیر کی مَسیحه دیر
1آخیردان، کاکالاریم، رَبده شادلیگ ائدینز! منیم ایچی ائله بیر زادلاری سیزینگ ایچی یازماک زحمت یوخو، بلکی سیزینگ اَمنیتینز ایچی دیر.
2او ایتلردن هوشکار اولینز! پیس ایش گؤرنلَردَن ایراق تورینز! اوللاردان کی سُنّت ائدمَک ایچی بدنی کسیرلَر اؤزونزو ایراق ساخلاتینز! 3چونکی سُنّت اولانلار بیزَک، بیزلَر کی تارئ روحو اینان پرستش ائدیرَک و مَسیح عیسایا فَخر ائدیرَک و تَکّهمیز جسمه دهییل. 4هرچند کی منیم اؤزوم دلیل واریم کی تَکّم جسمه اولا.
اگر بیر آیری آدام گمان ائدیر کی دلیل واری کی تَکّهسی جسمه اولا، من آرتیق واریم. 5سَکّیزینجی گؤنده سُنّت اولموشام، بیر یهودییَم، بنیامین طایفهسیندَنام، بیر عِبرانلییَم، عِبرانلی آنا بووآدان؛ شَریعته گؤره، فَریسی فِرقهسیندَن؛ 6غیرته گؤره، کلیسایا جور و جفا ائدَن؛ او صالحلیگه گؤره کی شَریعتدَن گلیر، عِیبسیز. 7آما هر نهیی که منیم ایچی مَنفعت ایدی، مَسیح خاطرینه ضَرر سایدیم. 8گرچکدَن، رَبّیم مَسیح عیسایی تانیماکینگ فروآن اَرزشی سَبرسینه واری زادی ضَرر ساییرام. اؤنونگ خاطرینه واری زادی اَلدن وئرمیشَم و اوللاری اَشغال ساییرام، تا بئله مَنفعتیم، مَسیح اولا. 9و اؤندا بولونام، نه اؤز صالحلیگیم اینن کی شَریعتدن گلیر، بلکی او صالحلیگ اینن کی مَسیحه اولان ایمان طریقیندَن گلیر، او صالحلیگ کی تارئ دان دیر و ایمانا باغلی دیر، 10تا مَسیحی و اؤنونگ دئرّیلمَکینینگ قُدرتینی تانیام، و اؤنونگ زجرلَرینده شریک اولام و اؤلومونده اؤنونگ لهیین اولام. 11تا هر طریقه کی اولموش اؤلومدَن دئرّیلمَکی اَله گتیرَم.
هدف ایچی تلاش ائدمک
12بئله دهییل کی ائله ایندیسی ده بونا ائتیشمیشم، یا ده ائله ایندیسی ده کاملام، بلکی اؤزومو ایلَری چکیرَم تا بیر زادی اَله گتیرَم کی مَسیح عیسا اؤنونگ ایچی منی اؤزوکو ائدمیش. 13کاکالار، گمان ائدمئیرم اؤنو اَله گتیرمیش اولام؛ آما بیر ایشی گؤرورَم: دالیم آردیندا قالانی یاددان چیخارتیرام و اؤزومو ایلَری چکیرَم او زادا ساری کی قَرشیمده دیر. 14و هدفه ائتیشمَک ایچی تَقلّی ائدیرَم، تا او جایزهیی اَله گتیرم کی تارئ اؤنونگ ایچی مَنی مَسیح عیسادا چاغیرمیش اوخاری.
15قؤی اوللار کی بیزیم آرامیزدا بالغ دیرلَر بئلهیین فکر ائدلَر و اگر بیر زاددا بیر آیری رَقم فکر ائدیرَینز، تارئ اؤنو ده سیزه آشکار ائدَر. 16فقط قؤینز تا هر مَقاما کی ائتیشمیشَک، اؤنا گؤره رووآل ائدَک.
17کاکالار، وارینز مندن سَرمَشق توتینز، و گؤزونز او آداملاردا اولسون کی او نمونهیه گؤره کی بیزده وارینز، رووآل ائدیرلَر. 18چون چوخ آداملار کی اوللار بارهسینده سیزه نئچه دفعه دئمیشَم، و ایندی ده گؤز یاشی اینان بئلَینزه دئییرَم، مَسیح صَلیبینینگ دشمنلَری لهیین رووآل ائدیرلَر. 19اوللارینگ آخیر عاقبتی هلاک اولماک دیر. اوللارینگ تارئسی قارنلاری دیر و اؤز عیب زادلارینا فَخر ائدیرلَر، بیر فکرلَر اینن کی دنیاداکی زادلار اوستونده دیر. 20آما بیزیم وَطنیمیز آسیمان دیر و اؤردان دیر کی نجات وئرَنینگ، یعنی رَب عیسا مَسیحنینگ یولونو گؤزلهییرَک. 21ائله او عیسا مَسیح کی او قُدرت اینن کی اؤنو قادیر ائدیر تا واری زادی اؤز اطاعتی آلتینا گتیره، بیزیم آلچاق بدنیمیزی دهییشَر تا اؤز شوکتلی بدنینه بنزهیه.
Currently Selected:
فیلیپیلیلَر 3: QII
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
