فیلیپیلیلَر 2
2
مَسیح، گؤنگول آلچاقلیگدا نمونه دیر
1پس اگر مَسیحده، دلگرملیگ وارینز، اگر اؤنونگ مُحبّتی سیزینگ تَسلّینز دیر، اگر تارئ روحوندا یولداشلیگ وارینز، اگر رَحم وارینز و هَمدردلیگ ائدیرَینز، 2گلینز منیم شادلیگیمی کامل ائدینز و فکرینز بیر اولسون و بیر بیره مُحبّت ائدینز، اؤرهکینز و نَظرینز بیر اولسون. 3هئچ ایشی خودخواهلیگ یا دا غَرّهلیگ اوستوندن گؤرمَینز، بلکی گؤنگول آلچاقلیگ اینن باقّی کَسی اؤزونزدَن یئیتَر بیلینز. 4سیزدن هئچ بیرینز فقط اؤز منفعتی فکرینده اولماسین، بلکی باقّی آداملارینگ منفعتینی ده نَظرینزده ساخلاتینز. 5آراینزدا ائله او فکر اولسون کی مَسیح عیسا ده واری ایدی:
6او کی با بو حال کی تارئ شکلینده ایدی،
تارئ اینن برابر اولماگینا سِفت یاپیشمادی،
7بلکی بیر غُلام شکلینی اؤزونه آلماک اینان
اؤزونو خالی ائدی
و بَشر بنزهرینده دنیایا گلدی
8و انسان شکلینه چیخمَک اینن
اؤزونو آلچاق ائدی
و اؤلوم حَدّینانچز،
حَتّی صَلیب اوستونده اؤلومَک حَدّینانچز،
مُطیع اولدو.
9پس تارئ اؤنو چوخ اوجالتمیش،
و اؤنا بیر آد باغیشلامیش کی هر آددان باش دیر،
10تا عیسا آدیندا هر دیز اَگیله،
گؤیده، یئر اوزونده و یئرینگ آلتیندا،
11و هر دیل اِقرار ائده کی عیسا مَسیح رَبّ دیر،
بووآ تارئنینگ شوکتی ایچی.
ایشّیقلَر دنیادا
12پس عزیزلَریم، ائله اولهیین کی همیشه اطاعت ائدمیشَینز، ایندی ده نه فقط من اؤردا اولاندا، بلکی اوندان ده آرتیق اؤردا اولمادیگیمدا قورخو و حُرمَت اینن نجاتینزی نتیجهیه ائتیشتیرمَک ایچی غیرت گؤرسَدینز. 13چونکی بو تارئ دیر کی اؤز خُشنودلیگی ایچی سیزده عَمل ائدیر، هم ارادهده، هم ده عَملده.
14واری ایشی بدون بو کی توغولایانز یا دا جَر و بحث ائدَینز گؤرونز، 15تا قُصورسیز و مَعصوم و تارئنینگ عیبسیز اولادلاری اولانز، بیر اَگری یولو گئدن و ناخَلف نَسل اورتاسیندا کی اوللارینگ آراسیندا اولدوزلار لهیین بو دنیادا ایشّیلهییرَینز، 16ائله اولهیین کی زندلیگ کلامینا یاپوشموشانز تا بئله مَسیحنینگ بؤکولمهکی گؤنونده، فَخر ائدَم کی ویل قَچمهدیم یا دا ویل زَحمت چکمهدیم. 17حَتّی اگر لازیم اولا کی منیم قانیم، وَقف اولموش شراب لهیین سیزینگ ایمانینزینگ قُربانلوقو اوستونه کی تقدیم اولیر تؤکوله، من بو ایشدَن خوشحالام و سیزینگ وارینز اینان شادلیگ ائدیرَم. 18ائله اولهیین سیز ده خوشحال اولاسینز و منیم اینن شادلیگ ائدهسینز.
تیموتائوس اینان و اِپافْرودیتوس
19رب عیسادا امید واریم کی ائله بو تئزلیگده تیموتائوسی سیزینگ یانینزا یوللایام تا من ده سیزینگ حالینزدان خبر توتماک اینان شاد اولام. 20چونکی هئچکَسی تیموتائوس لهیین یوخوم کی بیر خالص نیّت اینن سیزینگ راحتلیگینز قیدینده اولا. 21چونکی اوللارینگ واریسی اؤز مَنفعتلَری قولونجوندا دیرلَر، نه عیسا مَسیحنینگ منفعتی قولونجوندا. 22آما سیز بیلیرَینز کی تیموتائوس اؤز امتحانینی گئری وئرمیش، نهیین بیر اوغول لهیین بووآسی اینان، منیم یانیم سورا اینجیل ایشینده خدمت ائدمیش. 23پس امید واریم کی تکلیفیم مَعین اولدوگو اینان اؤنو سیزینگ یانینزا یوللایام؛ 24و رَبده اطمینان واریم کی ائله بو تئزلیگده اؤزوم ده گلَرَم.
25بئله فکر ائدمیشم لازیم دیر کی، اِپافْرودیتوسی یوللایام سیزینگ یانینزا، اؤنو کی بیر یاندان، منیم کاکام و همکاریم و همخدمتیم دیر، و بیر یاندان دا منیم احتیاجلاریما ائتیشمَک ایچی سیزینگ ایلچیینز و خادمینز دیر. 26چونکی او سیزینگ وارینز ایچی آرزی چکیر و بوندان کی سیز ائشیتدینز کی ناخوشلامیشدی، پَریشان دیر. 27گرچکدن ده او اؤلوم حَدّینَنچاز ناخوشلادی. آما تارئ اؤنا رَحم ائدی، نه فقط اؤنا، بلکی ائله بئله ده منه، تا ائدمئیه غُصّهم اوستونه غُصّه قؤیولا. 28پس چوخ مُشتاقام اؤنو یوللایام، تا دوبارادان اؤنو گؤرمَک اینن خوشحال اولانز و تا منیم پریشانلیگیم ده آزالا. 29پس رَبده، اؤنو بوتون شادلیگ اینان قبول ائدینز و اؤنونگ لهیین آداملارا حُرمَت ائدینز، 30چونکی او، مَسیح ایشی ایچی آز قالمیشدی کی اؤلومه گئده و بونونگ ایچی کی سیز منه ائتدیگی خدمتینگ کم و کَسرینی توتا، اؤز جانینی قؤیدو اَلی اؤجینا.
Currently Selected:
فیلیپیلیلَر 2: QII
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
