بیرینجی نامه، قُرِنتلیلَره 11
11
1مندن سَرمشق توتینز، ائله اولهیین کی من، مَسیحدَن سَرمشق توتیرام.
آروادلار دُعاسی و اوللارینگ نَبوّتی کلیسادا
2بو سَبریه کی واری زاددا منی یادا گتیریرَینز و رَسملَری ائله اولهیین کی بئلَینزه تاپشیردیم ساخلاییراینز، ایندی بئلَینزدَن تعریف ائدیرَم.
3آما سئیرم کی سیز بونو آنگلایانز کی، هَر کیشینینگ باشی مَسیح دیر، بیر آروادینگ باشی، اَری دیر و مَسیح باشی دا تارئ دیر. 4هَر کیشی کی باشی اؤرتولو دُعا ائدیر یا نَبوّت ائدیر، اؤز باشینی حُرمَتسیز ائدیر. 5آما هَر آرواد کی باشی آچیق دُعا ائدیر یا نَبوّت ائدیر، اؤز باشینی حُرمَتسیز ائدیر. اؤنونگ بو ایشی بونونگ لهیین دیر کی باشینی قیرخمیش. 6چونکی اگر بیر آرواد باشینی اؤرتمهییر، پس تیکینی کوتاه ائدهسی. آما اگر بو، بیر آرواد ایچی عیب دیر کی اؤز تیکینی کوتاه ائده یا دا باشینی قیرخه، پس باشینی اؤرتسون. 7بیر کیشی اؤز باشینی اؤرتمهیهسی، بو خاطره کی او، تارئنینگ شمایلی و شوکتی دیر، آما کیشینینگ شوکتی آرواد دیر. 8بو خاطره کی کیشی، آرواددان دؤزهلمهدی، بلکی آرواد، کیشیدَن دؤزهلدی؛ 9کیشی، آرواد ایچی یارانمادی، بلکی آرواد، کیشی ایچی یاراندی. 10بو خاطره و فرشتهلَر سَبرسینه بیر آرواد، باشینی اؤرتهسی تا گؤرسده کی بیر کَسینگ اِقتداری آلتیندا دیر. 11آما رَبده نه آرواد، کیشیدَن آیری دیر و نه کیشی، آرواددان. 12چون ائله او طور کی آرواد، کیشیدَن دؤزهلدی، ائله او طور ده ایندی کیشی، آرواددان دوغولیر. واری زاد تارئ طرفیندَن دیر. 13اؤزونز حکم ائدینز: بیر آروادا یاراشیر کی باشی آچیق تارئ درگاهینا دُعا ائده؟ 14بئیه طبیعتینگ اؤزو، سیزه اؤرگدمئیر کی اگر بیر کیشی اوزون تیک واری اولا، اؤنونگ ایچی عیب دیر؟ 15آما اگر بیر آرواد اوزون تیک واری اولا، اؤنونگ ایچی عزّت دیر؟ چونکی آروادینگ تیکی بئلَسینه وئریلمیش تا باشینی اؤرته. 16اگر دا کی بیری سئیه بو بارهده جَر و بحث ائده، بونو بیلسین کی نه بیزده، نه دا تارئ کلیسالاریندا بیر بئلهیین رَسم یوخ دور.
رَب شامی
17آما بو گپلَر اینن کی ایندی سئیرَم سیزه دئیَم، بئلَینزدَن تعریف ائدمئیرَم، بو خاطره کی سیز بیر بیر دئییرینه ییغیلَنده بو، ضرردَن آیری هئچنه یوخو. 18چونکی اَوّلا، اوندا کی بیر بیر دئییرینه بیر کلیسا لهیین ییغیلیرَینز، ائشیتیرَم کی آراینزدا آیریلیقلار دؤشیر و بیر اندازه دا بونو اینانیرام. 19چونکی آراینزدا آیریلیقلار اولاسی، تا بئله سیزینگ آراینزدان او آداملار کی خالص دیرلَر، آلهیین اولالّار. 20اوندا کی بیر بیر دئییرینه ییغیلیرَینز، یئدیگینز شام رَبّینگ دهییل. 21چونکی خورَکی یئمَک موقعاسیندا، هَر کَس خورکیسینی گؤتوریر و ایلَری ایلَری یئییر و بئله بیری آج قالیر، او بیری مَست اولیر. 22بئیه ائو یوخینز کی ائوینز ایچینده یئیَینز و ایچَینز؟ یا تارئ کلیساسینی حَقیر ساییراینز و اوللاری کی هئچنه یوخلاری خجالتزده ائدیرَینز؟ نه دئیَم سیزه؟ بونونگ ایچی سیزدَن تعریف ائدَم؟ یوخیر، ائدمَم.
23چون من سیزه ده وئردیگیمی، اؤزوم رَبدَن آلدیم کی رَب عیسا دشمن اَلینه وئریلَن گئجهده، چؤرهکی گؤتوردو، 24و شُکر ائدندن سورا، اونو تیکهلهدی و دئدی: «بو منیم بَدنیم دیر کی سیزینگ ایچی دیر. بو ایشی مَنیم یادیمدا گؤرونز.» 25و ائله بئله دا، شامدان سورا، پایلایی گؤتوردو و دئدی: «بو پایلا، تازّا عَهد دیر کی قانیمینگ تؤکولمَکی اینَن، سیزینگ اینَن باغلاییرام. هَر دفعه کی بونو ایچیرَینز، بو ایشی مَنیم یادیمدا گؤرونز.» 26بو سبریه کی هَر دفعه کی بو چؤرهکدَن یئییرَینز و بو پایلادان ایچیرَینز، رَب عیسانینگ اؤلومونو، او زامانانچاز کی او گله اعلام ائدیرَینز.
27پس هَر کَس کی بیر رَقم کی دوز دهییل بو چؤرهکدَن یئسه یا دا رَب عیسانینگ پایلاسیندان ایچسه، رَب عیسانینگ بدنینده و قانیندا تَقصیرکار ساییلار. 28پس هَر کَس اؤزونو امتحان ائدسین و اوندا او چؤرهکدَن یئسین و او پایلادان ایچسین. 29چونکی هَر کَس بدون بو کی رَبّینگ بدنینی تشخیص وئره، یئسه و ایچسه، بئلهیین یئمَک و ایچمَک اینن اؤزونو مَحکومیت آلتینا آپاریر. 30ائله بونونگ ایچی دیر کی چوخ آدام سیزدَن ضعیف دیرلَر و مَریض دیرلَر و بیر پارا دا اؤلموشلار. 31آما اگر بیز گرچکدَن اؤزوموزه حکم ائدسَیدیک، بئلَمیزه حکم اولمازدی. 32آما اوندا کی رَب بیزه حکم ائدیر، تربیت اولیراک تا دنیا اینان محکوم اولمایاک.
33پس کاکالاریم، یئمک ایچی بیر بیر دئییرینه ییغیلاندا، بیر بیر ایچی صبر ائدینز. 34اگر بیری آج دیر، او آدام اؤز ائوینده بیر زاد یئسین تا بیر بیر دئییرینه ییغیلدیگینزینگ آخیری محکوم اولماگینزا چکیلمهیه. باقّی مَسئلهلَر بارهسینده دا گلنده دانیشارام.
Currently Selected:
بیرینجی نامه، قُرِنتلیلَره 11: QII
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
