بیرینجی نامه، قُرِنتلیلَره 12
12
روحانی عَطالار
1ایندی کاکالار، سئمئیرَم کی روحانی عَطالاردان بیخبر اولاینز. 2بونو بیلیرَینز اوندا کی بُتپَرست ایدینز، گُنگ بُتلارا ساری یولدان چیخیردینز، ایندی هَر طریقه کی اولیردی. 3پس سئیرَم بونو آنگلایانز کی، بیر آدام کی تارئ روحونونگ واسطهسینه دانیشیر، هئچ وَخت دئمئیر کی: «عیسا، لَعنت اولونموش دیر!» و بهغیری تارئنینگ قُدّوس روحو واسطهسینه، هئچکَس دئیه بیلمَز: «عیسا، رَب دیر.»
4ایندی، رَقم به رَقم عَطالار وار، آما روح، ائله او روح دیر؛ 5و رَقم به رَقم خدمتلَر وار، آما رَب، ائله او رَب دیر. 6رَقم به رَقم ایشلَر وار، آما تارئ، ائله او تارئ دیر کی واری بو ایشلَرینگ قُوّتینی واری کَسه وئریر.
7تارئ روحونونگ ظاهر اولماگی هَر آداما، واری کَسینگ مَنفعتی ایچی وئریلمیش. 8چونکی تارئ روحو واسطهسینه بیرینه حِکمت سؤزو وئریلیر و بیر آیری آداما ائله او روحا گؤره مَعرفت سؤزو وئریلیر. 9ائله او روح وسیلهسینه بیرینه، ایمان وئریلیر و بیر آیری آداما ائله او روح وَسیلهسینه، شفا وئرمک عَطالاری وئریلیر. 10بیر آداما مُعجزه ائدمک قُدرتی وئریلیر، آیریسینا دا نَبوّت ائدمَک و او بیرسینه دا روحلاری تشخیص وئرمَک قُدرتی وئریلیر. بیرینه رَقم به رَقم دیللَره دانیشماک و او بیرینه دا او دیللَرینگ ترجمهسی وئریلیر. 11بوللارینگ واریسینا بیر روح و ائله او روح واسطهسینه قوّت وئریلیر، او روح کی اؤز سئدیگینه گؤره اوللاری بَهر ائدیر و هَر کَسه تَک به تَک وئریر.
بیر بدن چوخ عضولار اینان
12چونکی ائله اولهیین کی بدن بیر دیر و چوخ عضولار واری و بدنینگ واری عضولاری هر چند کی چوخ دیرلار، آما بیر بدن دیرلَر، مَسیح بارهسینده ده ائله بئلهیین دیر. 13بو خاطره کی بیزیم واریمیز، بیر روحدا تَعمید غُسلی توتدوک تا بیر بدن اولاک و واریمیزا بیر روحدان وئریلدی تا ایچَک. چه یهودی و چه یونانلی، چه غُلام و چه آزاد. 14چونکی بدن بیر عضودان دؤزهلمهمیش، بلکی چوخ عضولاردان دؤزهلمیش. 15اگر قیچ دئسه: «چونکی اَل دهییلَم، بدنه تعلّق یوخوم،» بو باعث اولمئیر کی او داها بدنینگ بیر قسمتی اولمایا. 16و اگر قولاق دئسه: «چونکی گؤز دهییلَم، بدنه تعلّق یوخوم،» بو باعث اولمئیر کی او داها بدنینگ بیر قسمتی اولمایا. 17اگر بوتون بدن گؤز اولسا ایدی، نهیین ائشیتمَک اولوردو؟ اگر بوتون بدن قولاق اولسا ایدی، نهیین ایسلهمَک اولوردو؟ 18آما ائله اولهیین کی وار، تارئ ائله او طور کی سئیردی عضولاری تَک به تَک بدن ایچینده یئرلَشدیردی. 19اگر بو عضولارینگ واریسی بیر عضو اولسا ایدیلار، بدن هاردا ایدی؟ 20آما ائله اولهیین کی وار، عضولار چوخ دیرلار، با بو حال بدن بیر دیر. 21گؤز، باشارماز اَله دئیه کی: «سنه احتیاج یوخوم،» باش دا قیچلَره دئیه بیلمَز کی، «سیزه احتیاج یوخوم.» 22بر عَکس، بدنینگ او عضولاری کی ضعیفتر گؤروریرلَر، واجبتر دیرلَر، 23و بدنینگ او عضولارینا کی گمان ائدیرَک حُرمَتلَری آزتر دیر، آرتیق حُرمَت ائدیرَک؛ و او عضولاریمیزا کی قشنگ دهییللَر، آرتیق ائتیشیرَک. 24با بو حال قشنگتر گؤرولَن عضولاریمیز بیر بئلهیین ائتیشمکه احتیاج یوخلاری. آما تارئ، بدنی ائله مُرتب دوزهتمیش کی او عضولارا کی حُرمَتلَری آز دیر، آرتیق حُرمَت قؤیولا، 25تا بدنده آیریلیق اولمایا، بلکی عضولار ائله بیر اندازه بیر بیر قیدینده اولالّار. 26اگر بیر عضو آغیریق چکیر، عضولارینگ واریسی بئلینه آغیریق چکیرلَر؛ اگر بیر عضوا حُرمَت قؤیولیر، عضولارینگ واریسی بئلینه شادلیگ ائدیرلَر.
27ایندی سیز مَسیح بدنییانز و هَر بیرینز تَک به تَک اؤنونگ عضولارییانز 28تارئ، کلیسادا بیرینجیسی حَواریلاری، ایکّینجیسی نَبوّت ائدنلَری و اؤچونجوسو معلّملَری، اوندا مُعجزهلَر قُدرتینی، اوندان سورا شفا وئرمَک عَطالارینی، کؤمک ائدمَکی، اداره ائدمَکی و آیری دیللَره دانیشماکی، معین ائدمیش. 29بئیه واری کَس حَواری دیر؟ بئیه واری کَس نَبوّت ائدَن دیر؟ بئیه واری کَس معلّم دیر؟ بئیه واری کَس مُعجزه ائدمَک قُدرتی واری؟ 30بئیه واری کَس شفا وئرمَک عَطالارینی واری؟ بئیه واری کَس آیری دیللَره دانیشیر؟ بئیه واری کَس ترجمه ائدیر؟
31آما سیز غِیرت اینان بویوکتر عَطالار سئینز، من دا سیزه بیر اَعلی یول گؤرسدَرَم.
Currently Selected:
بیرینجی نامه، قُرِنتلیلَره 12: QII
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
