مکاشِفۀ یوحنا 9
9
1وِ فرشتۀ پنجم شیپورِشَه وَ صیا دَرآورد، وِ مِ ستارهای نَه دییُم که وَ آسَمون اُفتا زمین، وِ کِلیلِ چاهِ هاویَه که تَه نَیارِه وَش دایَه وابی. 2وِّ چاهِ هاویَه نَه واز کِه، وِ دیئی مِی دیِ کورۀ گَپویی وَش راس وابی، وِ اَفتو وِ هوا وَ دیِ چاه تاریک وابییِن. 3اوسِه وَ مِنِه دی، کِلویَلی اومَن ری زمین وُ وَشون قدرتی مِی قدرتِ عقرَبَلِ زمین دایَه وابی. 4وَشون گُتَه وابی که نَه وَ علفِ زمین، نَه وَ هیچ سُوزَهای، نَه وَ هیچ داری ضَرر نَزَنِن، بَلکَم تِنا وَ او کَسَلی ضرر بِزَنِن که مُهرِ خدا نَه وَ پیشونی نَیارِن. 5وِ اونگَل اجازَه نَیاشتِن کسی نَه بِکِشِن، بَلکَم اونگَلَه سی پنج ماه عذاب بییِن، وِ عذابِشون مِی عذابِ عقرب بی، اوسِه که کسی نَه ایزَنِه. 6وِ مِنِه او روزَل مردم وَ دینِ مُردَنِن، امّا وِه نَه نیجورِن؛ اُرزویِ مرگ ایکِنِن، امّا مرگ وَشون ایدَرَه.
7او کِلُویَل مِی اسبَلی بییِن که آمایۀ جَنگ بییِن. وَ ری سَرِشون چیئی بی که مِی تاجِ طِلا بی وِ ریشون مِی ری آیَم بی. 8اونگَل مییَلی مِی مییِ زَنَل داشتِن وِ دِندونَلِشون مِی دِندونَلِ شیر بی. 9وَ سینهیَلِشون سینَهپوشی آهِنی داشتِن، وِ صییِی بالَلِشون مِی صییِی ارابهیَل وِ اسبَلِ زیادی بی که هجوم ایارِن سی جنگ. 10دُم وِ نیشِشون مِی دُم وِ نیشِ عقرب بی، وِ مِنِه دُمِشون ای قدرت بی که پنج ماه وَ مردم عذاب بییِن. 11فرشتۀ چاهِ هاویَه پادِشاشونِه، که وَ زُوونِ عبرانی نومِش "اَبَدون" یعنی نابودگَرِه، وُ وَ زُوونِ یونانی "آپولیون".
12وایِ اَوَل تَموم وابی. ایسو، هَنی دِتا وایِ دَ مِنِه رَه یَه که بایِس بیان.
13اوسِه فرشتۀ شیشُم شیپورِشَه وَ صیا دَرآوُرد، وِ مِ صیایی وَ چار شاخِ مذبحِ طلا که مِنِه پیشگاه خدایَه، اِشنُفتُم؛ 14که وَ فرشتۀ شیشُم که شیپور داشت، ایگُت: «او چار فرشتَه نَه که هیبِی رو گَپو فُرات مِنِه بَندِن، آزاد کُ.» 15پَ او چار فرشتَه که سی هَمی ساعت وِ هَمی رو وِ هَمی ماه وِ هَمی سال آمایَه وابییَه بییِن، آزاد وابییِن تا یِهسومِ آیَمَلَه بِکِشِن. 16عِدۀ سُوارَه نظام دِویس مِلیون بی، که عِدَهشونَه اِشنُفتُم.
17اَسبَل وِ سُوارَلِشونَه مِنِه رؤیا ایطو دییُم: زِرِهیَلی وَ وَرِشونِه وَ سُرخیِ تَش وِ آبیِ کَلون وِ زردیِ گوگرد. کَلۀ اَسبَل مِی کَلۀ شیرِه وُ وَ کَپِشون تَش وِ دی وِ گوگرد ایزَه وَدَر. 18بِی ای سه بلا، تَش وِ دی وِ گوگرد که وَ کَپِشون ایزَه وَدَر، یِهسومِ آیَمَل کشتَه وابییِن. 19سییِکِه قدرتِ اَسبل مِنِه کَپِشون وِ دُمِشونِه. سییِکِه دُمِشون مِی مارِه که سَر دارِه، وِ بِی اونگَل ضَرر ایزَنِن.
20باقیِ آیَمَل، که بِی ای سه بَلا کُشتَه نَوابییِن، نَه وَ کارَلِ دَسِ خِشون توبَه کِردِن وِ نَه دَس وَگِرُتِن وَ پرستشِ دیوَل وِ بُتَلِ طِلا وِ نقره وِ بِرنج وِ سنگ وِ چُو، که نیتَرِن بِوینِن وِ بِشنِفِن وِ رَه بِرَن. 21اونگَل وَ آدَمکِشییَل وِ جادوگرییَل وِ بیعفَتییَل وِ دِزییَلِ خِشون هَم توبَه نَکِردِن.
Currently Selected:
مکاشِفۀ یوحنا 9: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
