مکاشِفۀ یوحنا 3
3
پِیومِ مسیح وَ کلیسِی ساردِس
1«وُ وَ فرشتۀ کلیسِی ساردِس بنویس:
یِنِه گَپَلِ وِه که هَف روحِ خدا وِ هَف ستارَه نَه دارِه: وَ کارَلِ تِ باخَوَرُم. وَ یِه معروفی که زِندَه یِی، امّا مُردییِی. 2دیار وابو وِ اوچیئی نَه که وَجا مُندِه وِ دارِه ایمیرِه، تقویت کُ! سییِکِه مِ کارَلِتَه مِنِه تییۀ خدا کامل نَجُسِمِه. 3پَ وَ حوشِت بیار، اوچیئی نَه که گِرُتییِی وِ اِشنُفتییِی؛ وِه نَه نِگَه کُ وِ توبَه کُ. اَر دیار نَوابِی، مو مِی دِزی ایام، وِ تِ نونی چه ساعتی ایام وَ ضِدِت.
4وا ای حال هَنی یِهپارهای نَه مِنِه ساردِس داری که جومهیَلِشونَه آلودَه نَکِردِنِه. اونگَل مِنِه جومِی سَفی بام قَیَم ایزَنِن، سییِکِه لایِقِن. 5هرکه زور وابو، ایطو جومۀ سَفیای ایکِنِه وَرِش وُ مِ وَتَه نومِشَه وَ دفترِ حیات پاک نیکِنُم، مِ نومِشَه مِنِه حضورِ بُوم وِ فرشتهیَلِش وَ زُوون ایارُم. 6وِه که گوش دارِه بِشنِفِه که روحِ خدا وَ کلیسایَل چِه ایگُ.»
پِیومِ مسیح وَ کلیسِی فیلادِلفیا
7«وَ فرشتۀ کِلیسِی فیلادلفیا بنویس:
یِنِه گَپَلِ وِه که مقدس وِ حَقِه، وِه که کلیلِ داوودِ پیغمبرَ دارِه، وِه که واز ایکِنِه وِ هیشکَه نیتَرِه بویَندِه، وِه که ایبَندِه وِ هیشکَه نیتَرِه واز کِنِه: 8مِ کارَلِ تِنَه دونُم. سِی کُ! دَری واز وَرِ ریت نَهامِه که هیشکَه نیتَرِه بویَندِش. دونُم که یِچِی قُویَت داری، امّا کلامِ مِنَه نِگه کِردییِی وِ نومِ مِنَه حاشا نَکردییِی. 9سِی کُ! مِ اونگَلی نَه که وَ کنیسۀ شِیطونِن وِ خِشونَه یَهودی دونِن امّا نَه یَهودی یَن بَلکَم دِرو ایکِنِن، ایسو وادارِشون ایکِنُم تا بیان وِ بییُفتِن وَرِ پایَلِت، وِ بِیونِن که مِ تِنَه دوس داشتِمِه. 10سییِکِه تِ کلامِ مِنَه دَرموردِ پاوَرجایی، نِگَه کِردییِی، مِ هَم تِنَه مِنِه ساعتِ امتحان نِگَه ایکِنُم، ساعتی که وَ ری تَمومِ دنیا ایایِه تا مَردِمونِ زَمینَه امتحان کِنِه.
11مِ وَ هَمی زیئی ایام. اوچیئی نَه که داری سِفت نِگَه کُ تا کسی تاجِتَه وَ دَسِت نَسونِه. 12هرکه زور وابو، وِّ نَه ستونی مِنِه معبدِ خِدِی خِم ایکِنُم، وِ دَ وَتَه وَ وُچِه نیزَنِه وَدَر، وِ مِ نومِ خِدِی خِمَه، وِ نومِ شهرِ خدامَه وَ ریش اینِویسُم، یعنی اورشلیمِ تازَه نَه که وَ آسَمون وَ طرفِ خدایِ مو ایا دومِن، وِ نومِ تازۀ خِمَه وَ ریش اینِویسُم. 13وِه که گوش دارِه بِشنِفِه که روحِ خدا وَ کلیسایَل چِه ایگُ.»
پِیومِ مسیح وَ کلیسِی لائودیکیَه
14«وَ فرشتۀ کِلیسِی لائودیکیَه بنویس:
یِنِه گَپَلِ وِه که آمینِه، وِه که شاهدِ وفادار وِ حقِه، وِه که سَرچشمۀ خِلقتِ خدایَه: 15کارَلِ تِنَه دونُم؛ که نَه سردی نَه گرم. کاشکی یا سرد بیئی یا گرم. 16پَ سییِکِه مَلیلی، وِ نَه گرمی وِ نَه سرد، تِنَه وَ دِهونُم تِف ایکِنُم. 17سییِکِه ایگِی: "دارایَم؛ مالِمِنال دارُم وِ اِتیاج وَ چیئی نَیارُم." وِ نُونی که سیاروز، خوارِزار، فقیر، کور وِ لُختی. 18وَت نصیحت ایکِنُم که طِلِی خالصِ رَی وابییَه وَ تَش وَم بِسونی تا دارا وابِی؛ وِ جومهیَلِ سَفی، تا کِنی وَرِت وِ ننگِ لُخت بییَنِت دیار نَوابو؛ وِ مرهَم، تا بِساوَنی وَ ری تییَلِت تا بِوینی.
19مِ اونگَلی نَه که دوسِشون دارُم توبیخ وِ ادب ایکِنُم، پَ وَ غیرَت بیو وِ توبَه کُ. 20سِی کُ! مِ ایوِیسُم پَسِ دَر وِ ایکویُم. اَر کسی صیامَه بِشنِفِه وِ دَرَ واز کِنِه، ایام داخل وِ باش شوم ایخَرُم وُ وِّ هَم بِی مو.
21هرکه زور وابو، وَش اجازَه اییُم بِی مِ وَ ری تختُم بِشینِه، هَموطو که مِ زور وابییُم وِ بِی بُوم وَ ری تختِش نِشَسُم. 22وِه که گوش دارِه بِشنِفِه که روحِ خدا وَ کلیسایَل چِه ایگُ.»
Currently Selected:
مکاشِفۀ یوحنا 3: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
