مکاشِفۀ یوحنا 2
2
پِیومِ مسیح وَ کلیسِی اَفِسُس
1«وَ فرشتۀ کِلیسِی اَفِسُس بِنویس:
یِنِه گَپَلِ وِه که هَف ستارَه مِنِه دَسِ راسِش دارِه وِ مابینِ هَف چراغدونِ طِلا قَیَم ایزَنِه: 2کارَلِ تِنَه دونُم وُ وَ عَذابَل وِ پاوَرجائیت باخَوَرُم، دونُم که طاقتِ شَریرَلَه نَیاری وِ اونگَلی نَه که ادعا ایکِنِن رسولِن ولی نَه رسولِن، امتحان کِردییِی وِ فَمِسییِی دِروکِنِن. 3دونُم که وَ خاطرِ نومِ مو بِی صبر طاقت ایاری وِ تحمل ایکِنی، وِ خَسَه نَوابییِی.
4امّا مِ ای شکایَتَه وَت دارُم که محبتی نَه که اَوَل داشتی، وِل کِردییِی. 5پَ وَ حوشِت بو وَ کوچه اُفتائییِی، توبَه کُ وِ کارَلی کُ که وَ اَوَل ایکِردی. اَر نَکِنی، ایام طِیت وِ چراغدونِتَه وَ جاش اییَگِرُم، غیرَ یِکِه توبَه کِنی. 6امّا ای خوبی نَه داری که وَ کارَلِ دارِدسۀ نیکولائی نفرت داری، هَموطو که مِ هَم نفرت دارُم.
7وِه که گوش دارِه بِشنِفِه که روحِ خدا وَ کلیسایَل چِه ایگُ. وَ وِه که زور وابو، یِنَه وَش ایبَخشُم تا وَ ثَمَرِ دارِ حیات که مِنِه بهشتِ خدا یَه بِخَرِه.»
پِیومِ مسیح وَ کلیسِی اِسمیرنا
8«وُ وَ فرشتۀ کِلیسِی اِسمیرنا بِنویس:
یِنِه گَپَلِ وِه که اَوَلِه، وِه که آخِرِه، وِه که مُرد وِ زِندَه وابی: 9وَ عذاب وُ فقیریِ تِ خَوَر دارُم، امّا تِ دارایِی! هَمیطو وَ بُهتونَلِ اونگَلی که خِشونَه یهودی دونِن وِ نَه یهودی یَن، بَلکَم کنیسۀ شِیطونِن هَم خَوَر دارُم. 10وَ عذابَلی که وَ زیئی ایکَشی، زَلَت نَرَه. سِی کُ! وَ زیئی اِبلیس یِهپارهای وَ ایشا نَه وِر اییِه مِنِه زِندان تا امتحان وابِیت وِ دَه رو عذاب ایکَشیت. تا دَمِ مُردن وفادار وِیس که مِ تاجِ حیاتَه وَت اییُم.
11وِه که گوش دارِه بِشنِفِه که روحِ خدا وَ کلیسایَل چِه ایگُ. هرکه زور وابو، وَ مرگِ دِوم بَلایی نیگِرِش.»
پِیومِ مسیح وَ کلیسِی پِرگاموم
12«وُ وَ فرشتۀ کِلیسِی پِرگاموم بِنویس:
یِنِه گَپَلِ وِه که شُمشیرِ دو دَمِ تیز دارِه: 13دونُم کوچِه منزل داری، وُچِه که تختِ پادشاییِ شِیطونِه. وا ای حال وَ نومِ مو وفادار مُوندییِی، وِ ایمونی که وَم داشتی حاشا نَکِردی حتی مِنِه روزَلی که آنتیپاس، او شاهدِ وفادارِ مو که مابِینِ ایشا وَ وُچِه که شِیطون منزل دارِه، کُشتَه وابی.
14امّا، یِچِی شکایت وَت دارُم. وُچِه کَسَلی نَه داری که چَسبِسِنِه وَ تعلیم بَلعام؛ هَموِه که وَ بالاق تعلیم دا که دَر برابرِ بنیاسرائیل بَردی وِربییِه که باعثِ وَ گِل خَردَنِه، که وَ خوراکِ تقدیمی وَ بُتَل بِخَرِن وِ بیعفتی کِنِن. 15غیرَ یو، کَسَلی نَه هَم داری که چَسبِسِنِه وَ تعلیمِ دارِدَسۀ نیکولائی. 16پَ توبَه کُ. اَندیی وَ هَمی زیئی ایام طِیت وِ بِی شُمشیرِ دِهونُم باشون ایجَنگُم.
17وِه که گوش دارِه بِشنِفِه که روحِ خدا وَ کلیسایَل چِه ایگُ. وَ هرکه زور وابو، یِچِی وَ او "مَنایِ" پَنون اییُم، وِ بردِ سَفیای وَش اییُم که ریش نومِ تازهای واکَندَه وابییِه، که هیشکَه وِه نَه نُونِه غیرَ او کسی که ایگِرِش.»
پِیومِ مسیح وَ کلیسِی تیاتیرا
18«وُ وَ فرشتۀ کِلیسِی تیاتیرا بنویس:
یِنِه گَپَلِ کِرِ خدا که تییَلی مِی بِرازۀ تَش وِ پایَلی مِی بُرنزِ برق اُفتایَه دارِه: 19مِ وَ کارَلِ تو، وَ محبت و ایمون وِ خذمت وِ پاوَرجائیت خَوَر دارُم، وِ یِکِه کارَلِ آخِرِت بیشتَر وَ کارَلِ اَوَلِتِه. 20امّا ای شکایتَه وَت دارُم، که وَ او زنِ ایزابِل نوم که خِشَه نبی دونِه، سخت نیگِری. وِّ که بِی تعلیمِ خُوش، خادِمَلِ مِنَه وَ رَه وِل ایکِنِه تا بیعفتی کِنِن وُ وَ خوراکِ تقدیمی وَ بُتَل بِخَرِن. 21وَش مهلت دامِه تا توبَه کِنِه، امّا وِّ نیخوا وَ بیعفتیش توبَه کِنِه. 22ایسو، مِ وِّ نَه ناخُوش وِر اییُم مِنِه جا وِ اونگَلی نَه که باش زِنا ایکِنِن وَ عذابِ سختی گرفتار ایکِنُم، غیرَ یِکِه وَ کارَلِ وِّ توبَه کِنِن. 23وِ اولادَلِشَه نابود ایکِنُم. وِ اوسِه تَمومِ کلیسایَل ایفَمِن که مِ دِلَل وِ فکرَلَه ایجورُم وُ وَ هر کویَکی وَ ایشا وَ طبقِ کارَلِش عوض اییُم. 24امّا وَ باقیِ ایشا مِنِه تیاتیرا، که ای تعلیمَه قبول نَکِردیتِه؛ وِ اوچیئی نَه که یِهپارهای وَش ایگُن "سِرَّلِ عمیقِ شِیطون"، یای نَگِرُتیتِه، وَتون ایگُم که بارِ بیشتری نینُم وَ کولِتون. 25تِنا یِکِه وَ اوچیئی که داریت سِفت بِچَسبیت تا مِ بیام.
26هر کس زور وابو وِ کارَلِ مِنَه تا وَ آخِر نِگَه کِنِه، وَش اقتدار اییُم که وَ ری مِلَتَل حکومت کِنِه،
27"وِّ بِی گلاکِ آهِنی وَشون حکم ایکِنِه؛
وِ اونگَلَه مِی کوزۀ گِلی خُرد ایکِنِه،"
دِرُس هَموطو که مِ وَ بُوم اقتدار گِرُتِمِه. 28وِ مِ ستارۀ گَلَهکَنونَه وَش ایبَخشُم. 29وِه که گوش دارِه بِشنِفِه که روحِ خدا وَ کلیسایَل چِه ایگُ.»
Currently Selected:
مکاشِفۀ یوحنا 2: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
