مکاشِفۀ یوحنا 4
4
تختِ مِنِه آسَمون
1بعدَ وُه سِیل کِردُم، وِ مِنِه آسمون دَری واز دییُم، وِ هَمو صییِی اَوَلی که اِشنُفتَه بییُم که مِی صییِی شیپور بام گَپ زَیَه بی، گَت: «بیو بالا وِیچو، وِ مِ اوچیئی نَه که بایِس وَ یِه واپَس اتفاق بییُفتِه، وَت نشون اییُم.» 2هَمو دَقَه روحِ خدا مِنَه گِرُت مِنِه خُوش، دییُم تختی مِنِه آسَمون بی وِ کسی نِشَسَه بی وَ ری تخت. 3وِ او کسی که نِشَسَه بی، انگار بردِ یَشم وِ عقیق بی وِ دورتادورِ تَختَه قوسوقَزَحی گِرُتَه بی که انگار زُمرد بی. 4دورتادورِ تخت، بیسوچار تَختِ دَ بی وِ ری تَختَل بیسوچار ریشسَفی نِشَسَه بییِن. اونگَل جومۀ سَفی وَرشون بی وِ تاجِ طِلا وَ ری سَرِشون. 5وَ تخت، تَشِبرق وِ صییِی غِرُمبَه وِ قُرُمتِراق اومَه. نِهِی تخت، هَف مشعلِ گُر گِرُتَه بی، که هَف روحِ خدایَن. 6وِ دَر برابرِ تخت، چیئی بی که انگار دریایی وَ شیشه بی، مِی بلور.
وِ دورِوَرِ تخت، وَ هَر پَلیِ تخت، چار مخلوقِ زندَه بی، بَیَنِشون وَ پَسِ پیش پوشییَه وَ تییَه یَه. 7مخلوقِ زندۀ اولی، مِی شیر بی، مخلوقِ زندۀ دِوُم مِی گا، مخلوقِ زندۀ سِوِمی، ری انسانَه داشت وِ مخلوقِ زندۀ چارِمی، مِی باشُویی بی دَر حالِ بال زَیَن. 8وِ او چار مخلوقِ زندَه هَر کویَکیشون شَش بال دارِن وِ تَمومِ دورتادور وِ مِنِشون، پوشییَه وَ تییَه یَه، وِ شو وِ رو یِه سَرَه ایگُتِن:
«قدوس، قدوس، قدوسِه
خداوند خِدِی قادرِ مطلق،
وِّ که بی وِ هِسی وِ ایایِه.»
9وِ هَر موقَع که او مَخلوقَلِ زندَه، او کسی نَه که نِشَسِه وَ ری تخت که تا ابدالآباد زِندَه یَه، جلال وِ حُرمت وِ شکر ایگُن، 10او بیسوچار ریشسَفی اییُفتِن دَر برابرِ وِّ که نِشَسِه وَ ری تخت، وُ وِّ نَه که تا ابدالآباد زندَه یَه ایپَرَستِن وِ تاجَلِشونَه وِر اییِن وَرِ تخت وِ ایگُن:
11«ای خداوندِ ایما وِ خِدِی ایما،
تِ لایقی که جلال وِ حُرمت وِ قدرت وَ تِ تقدیم وابو،
سییِکِه همَه چی نَه تِ آفَرییِی
وِ همَه چی وَ خواسِ تِ وَ وجود اومَه وِ آفَرییَه وابی.»
Currently Selected:
مکاشِفۀ یوحنا 4: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
