مکاشِفۀ یوحنا 14
14
بَرَه وُ صدوچلوچار هزار نفر
1هَمیِکِه سِیل کِردُم، او بَرَه نَه دییُم که وِیسایَه بی وَ ری کُو صَهیون، وِ صدوچِلوچار هزار نفر باش بییِن، که وَ ری پیشونیشون نومِ وُّ وِ نومِ بوش نوشتَه وابییَه بی. 2وِ مِ صییِی وَ آسَمون اِشنُفتُم، مِی هوفۀ اُویَلِ زیادی وِ مِی صییِی قُرُمتِراقِ بِلندی بی. او صیا که اِشنُفتُم مِی صییِی چَنگزَنَل بی اوسِه که چَنگِ خِشونَه ایزَنِن. 3وِ اونگَل دَر برابرِ تخت وِ دَر برابرِ او چار مخلوقِ زِندَه وِ دَر برابرِ ریشسَفییَل، سرویی تازَه ایخُوندِن. وِ او سِرو نَه هیشکَه نَتَرِس یای بِگِرِه، غیرَ او صدوچِلوچار هزار نَفر که وَ مابینِ مَردِمونِ زمین اَزنو اِسَیَه وابییَه بییِن. 4اینگَل هَمو کَسَلی یَن که خِشونَه بِی زَنَل لکَهدار نَکِردِنِه، سییِکِه ای مِردَل باکِرِه یَن. اینگَل هَمو کَسَلی یَن که ایرَن وَ دینِ بَرَه هرجا که بِرَه. اینگَل وَ مابینِ آیَمَل اَزنو اِسَیَه وابییِنِه تا نوبر بون سی خدا وِ بَرَه، 5وِ هیچ دِرویی مِنِه کَپِشون جُسَه نَوابی، سییِکِه اونگَل بیعیبِن.
پِیومَلِ سه فرشتَه
6اوسِه فرشتهای دَ دییُم که مِنِه دلِ آسَمون بال ایزَه وِ انجیلی ابدی باش بی تا وِه نَه وَ مَردِمونِ زمین اعلام کِنِه، وَ هر ملت وِ طِیفَه وِ زُوون وِ قومی که بون. 7وِّ بِی صییِی بِلَند گُت: «وَ خدا زَلَتون بِرَه وُ وِّ نَه جلال بِئیت، سییِکِه ساعتِ داوری وِّ رَسییِه، وِّ نَه بِپَرَستیت که آسَمون وِ زمین وِ دریا وِ چشمهیَلَه وِّ آفَری.»
8وِ فرشتهای دَ، یعنی دِوُمی، وَ دینِش اومَه وِ گُت: «سَرنِگون وابی! بابِلِ گَپو سَرنِگون وابی! وِه که وَ شرابِ هوسِ هرزهایِ خُوش، دا وَ خَردِ تَمومِ مِلَتَل.»
9اوسِه فرشتهای دَ، یعنی سِوِمی اومَه وَ دینِ اونگَل وِ بِی صییِی بِلَندی گُت: «اَر کسی او جونور وحشی وِ مجسَمَشَه بِپَرَستِه وِ نِشونِشَه وَ ری پیشونی یا دَسِش قبول کِنِه، 10وِّ هَم وَ شرابِ غضبِ خدا ایخَرِه، شرابی که مَشت وِ خالص رِتَه وابییِه مِنِه پیالۀ غَضَبِ خدا. وُ وِّ بِی تَش وِ گوگرد دَر برابرِ فرشتهیَلِ مقدس وِ دَر برابرِ بَرَه عذاب ایبینِه. 11وِ دیِ عذابِ اونگَل تا ابدالآباد ایرَه وَ بالا، وِ اونگَلی که او جونورِ وحشی وِ مجسَمَشَه ایپَرَستِن وِ هَر کسی که نِشونِ نومِ وِّ نَه قبول ایکِنِه، نَه مِنِه روز آسودِهای دارِه وِ نَه مِنِه شُو.» 12یِه پاوَرجاییِ ایموندارَلِ وَ مسیحَ ایخوا که حُکمَلِ خدا وِ ایمون وَ عیسی نَه نِگَه ایکِنِن.
13وِ صییِی وَ آسَمون اِشنُفتُم که ایگُت: «یِنَه بنویس: خَش وَ حال اونگَلی که وَ یِه واپَس مِنِه خداوند ایمیرِن.» وِ روحِ خدا ایگُ: «وَراسی خَش وَ حالِشون، که اونگَل وَ کارَلِ سَختِشون آسودهیَن، سییِکِه کارَلِشون وَ دینِشون ایایِه!»
وَرچییَنِ مَصولِ زمین
14اوسِه هَمیِکِه سِیل کِردُم، اُوری سَفی دَمِ ریم بی وِ ری اُور یکی نِشَسَه بی که مِی کِرِ انسان بی، تاجی وَ طِلا ری سَرِش بی وِ داسِ تیزی مِنِه دَسِش. 15وِ فرشتهای دَ وَ معبد اومَه وَدَر وِ بِی صییِی بِلَندی وَ او کسی که ری اُور نِشَسَه بی گُت: «داسِ خِتَه وَگِه وِ بوئور، سییِکِه ساعتِ بِرییَن رَسییِه وِ مَصولِ زمین کامل رَسییَه یَه.» 16پَ وِّ که نِشَسَه بی وَ ری اُور، داسِ خِشَه وَ طرفِ زمین تُو دا وِ مَصولِ زمین وَرچییَه وابی.
17اوسِه فرشتهای دَ وَ معبدی که مِنِه آسَمونِه اومَه وَدَر وُ وِّ هَم داسِ تیزی داشت. 18اوسِه فرشتهای دَ وَ مذبَح اومَه وَدَر که وَ ری تَش اقتدار دارِه وِ بِی صییِی بِلَندی وَ وِه که داسِ تیزی داشت، قیرَه زَه وِ گُت: «داسِ تیزِتَه وَگِه وِ خُوشَلَه وَ دارِ رَزِ زمین وَرچین، سییِکِه انگورَل رَسییِنِه.» 19پَ او فرشتَه داسِشَه وَ طرفِ زمین تُو دا وِ مَصولِ انگورِ زمینَه وَ دارِ رَزِ زمین جَم کِه، وُ وِرِش دا مِنِه حوضِ گَپو شرابِ غضبِ خدا. 20وِ حوضِ شراب صَرا وَ شهر لَقَتکو وابی، وِ خین وَ حوضِ شراب رُو کِه، غوریش وَ قَدِ اوسارِ اَسبَل، وِ دِرازیش سیصد کیلومتر بی.
Currently Selected:
مکاشِفۀ یوحنا 14: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
