مکاشِفۀ یوحنا 13
13
جونِوَرِ وحشیِ اَوَل
1اوسِه دییُم جونِوَری وحشی وَ دریا ایا وَدَر. دَه شاخ وِ هَف سَر داشت، دَه تاج وَ ری شاخَلِش بی؛ وُ وَ ری هر سَرِش نومِ کُفرداری نوشتَه وابییَه بی. 2ای جونورِ وحشی که مِ دییُم مِی پلنگ بی، پایَلِش مِی پایَلِ خرس وِ کَپِش مِی کَپِ شیر بی. وِ اژدها قدرت وِ تختِ خُوش وِ اقتدارِ گَپویی وَش بَخشی. 3یکی وَ سَرَلِ او جونورِ وحشی انگار زخمِ مرگ وَباری وَگِرُتَه بی، امّا زخمِ مرگوَبارِش خوب وابییَه بی، وِ تَمومِ زمین حیرَتزَیَه وابییِن وُ وَ او جونورِ وحشی پِیروی کِردِن. 4مردم اژدها نَه پرستش کِردِن سییِکِه وَ او جونورِ وحشی اقتدارِ خِشَه دایَه بی، وِ اونگَل جونورِ وحشی نَه پرستِش ایکِردِن، وِ ایگُتِن: «کیَه که مِی ای جونورِ وحشی بو؟ کیَه که بِتَرِه باش بِجَنگِه؟»
5وَ او جونورِ وحشی کَپی دایَه وابی تا وَ ری غِدی وِ کُفر گَپ بِزَنِه، وِ وَش اجازَه دایَه وابی تا اقتدارِشَه سی چلِدِ ماه وَ کار بِگِرِه. 6وِّ کَپِ خِشَه واز کِه وَ کُفر گُتَنِ وَ خدا، کُفر گُتَن وَ نومِش وِ مَنزلگاش، یعنی وَ اونگَلی که مِنِه آسَمون منزل دارِن. 7هَمیطو وَش اجازَه دایَه وابی بِی ایموندارَلِ وَ مسیح بِجَنگِه وُ وَشون زور وابو؛ وُ وَش اقتدار دایَه وابی که وَ ری هر طِیفَه وِ قوم وِ زُوون وِ ملت حاکم بو، 8وِ تَمومِ اونگَلی که مِنِه زمین منزل دارِن وِه نَه ایپَرَستِن؛ یعنی هر کس که نومِش مِنِه دفترِ حیاتِ بَرَه، نوشتَه نَوابییِه، هَمو بَرَهای که نِهِی بَنِی جهان قُربونی وابی.
9وِه که گوش دارِه بِشنِفِه:
10اَر قرارِه کسی اسیر بو،
وَ اسیری ایرَه.
اَر قرارِه کسی بِی شُمشیر کُشتَه وابو،
بایِس وَ شُمشیر کُشتَه وابو.
وِ یِه پاوَرجایی وِ ایمونِ ایموندارَلِ وَ مسیح نَه ایطَلَبِه.
جونورِ وحشیِ دِوُم
11اوسِه دییُم یِه جونورِ وحشیِ دَ وَ زمین ایا وَدَر. دِتا شاخ مِی شاخِ بَرَه داشت، وِ مِی اژدها گَپ ایزَه. 12وِّ تَمومِ اقتدارِ جونورِ وحشیِ اَوَلی نَه وَجاش وَ کار ایگِرِه، وِ زمین وِ اونگَلی نَه که مِنِه زمین منزل دارِن وادار ایکِنِه، جونورِ وحشی اوَلی نَه که زخمِ مرگوَبارِش خوب وابییَه بی بِپَرَستِن. 13جونورِ وحشیِ دِوُم نِشونهیَل وِ معجزهیَلِ گَپویی اینِه وَ نمایش، طوری که حتی وَرِ تییِۀ مردم، وَ آسَمون تَش ایارِه وَ زَمین. 14وُ وَ خاطرِ نِشونهیَل وِ معجزهیَلی که اجازَه داشت وَ جِی او جونورِ وحشیِ اوَل اَنجوم بییِه، اونگَلی نَه که ری زمین منزل دارِن، گول ایزَنِه وُ وَشون ایگُ مجسمهای بِسازِن وَ او جونورِ وحشی که زخمِ شُمشیر خَه وُ وا ای حال زِندَه مُند. 15وُ وَش اجازَه دایَه وابی تا وَ مجسمۀ جونورِ وحشی جون بییِه، تا مجسمۀ جونورِ وحشی حتی بِتَرِه گَپ بِزَنِه وِ باعث وابو تَمومِ کَسَلی نَه که مجسمۀ جونورِ وحشی نَه نیپَرَستِن، بِکِشِه. 16هَمیطو هَمَه نَه وَ خُرد و گَپو، دارا و نَدار، غلام و آزاد، وادار ایکِه تا وَ ری دسِ راسِشون یا وَ ری پیشونیشون نِشونَه بِنِن. 17تا هیشکَه نَتَرِه چیئی بِسونِه یا بِفروشِه، غیرَ وِه که او نِشونَه، یعنی نومِ او جونورِ وحشی یا شمارۀ نومِشَه داشتَه بو. 18یِه حکمت ایخوا. هرکه فهم دارِه، بِل شمارۀ او جونورِ وحشی نَه حساب کِنِه، سییِکِه او شمارَه، شمارۀ انسانِه. وِ شمارَش شیشصَدوشَصوشیشِه.
Currently Selected:
مکاشِفۀ یوحنا 13: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
