مکاشِفۀ یوحنا 15
15
هَف فرشتَه بِی هَف بلا
1اوسِه نشونی دَ مِنِه آسَمون دییُم، گَپو وِ حیرت آوَر: هَف فرشتَه که هَف بلا باشون بی، اونگَل آخِرین بَلایَلِن، سییِکِه بِی اونگَل غضبِ خدا تَموم ایابو.
2وِ چیئی دییُم که مِی دریایی وَ شیشَه بی که بِی تَش قاطی وابییَه بو، وِ هیبِی دریایِ بلوری کَسَلی نَه وِیسایَه دییُم که وَ او جونورِ وحشی وِ مجسمَش وِ شمارۀ نومِش زور وابییَه بییِن وِ سازَلِ چَنگِ خدا مِنِه دَسِشون بی. 3وِ اونگَل سِرو خادمِ خدا، موسی وِ سِرو بَرَه نَه ایخُونِن وِ ایگُن:
«گَپو وِ حیرت آوَرِه کارَلِ تو،
ای خداوند خِدِی قادرِ مطلق.
چِقَه رَیَلِ توعدلِه وِ حَقِه،
ای پادشاهِ مِلَتَل.
4کیَه که وَ تِ زَلَش نَرَه، ای خداوند،
وِ نومِ تِنَه جلال نَیِه؟
سییِکِه تِنا، تِ قدّوسی.
تَمومِ مِلَتَل ایایِن وِ
تِنَه پَرستِش ایکِنِن
سییِکِه کارَلِ تو که وَ ری عدلِه دیار وابییِه.»
5دِنداش دییُم که جِی مقدسِ بِهونِ شهادت، مِنِه آسَمون واز وابی. 6وِ هَف فرشتَهای که هَف بلا داشتِن وَ او جِی مقدس اومَن وَدَر، وِ اونگَل جومهای وَ پارچۀ کَتونِ پاک که بِرچ ایزَه وَرِشون بی وِ دویالی طِلایی دورِ سینَشون بی. 7وِ یکی وَ او چار مخلوقِ زِندَه، هَف جومِ طِلا دا وَ او هَف فرشتَه، که پُرتاپُر بی وَ غضبِ خدا، خدایی که تا ابدالآباد زِندَه یَه. 8وِ او جِی مقدس، وَ جلال وُ قدرتِ خدا پُرتاپِر وابی وَ دی، وِ تا زَمونی که هَف بَلایِ او هَف فرشتَه تَموم نَوابی هیشکَه نَتَرِس بِرَه مِنِه جِی مقدس.
Currently Selected:
مکاشِفۀ یوحنا 15: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
