نامَه وَ کِلیسِی فیلیپی 2
2
سرمشق گِرُتن وَ کوچِکنظمیِ مسیح
1پَ اَر مِنِه مسیح دلگَرمی هِسی، اَر محبتِ وُّ باعثِ آروم وابییَنِ ایشانِه، اَر مِنِه روحِ خدا رفاقت داریت، وِ اَر مِرَبونی وِ دلسوزی هِسی، 2بِی هُمرأی بییَن، بِی هَمی محبت، بِی یِهدل بییَن وِ هُمنظر بییَن، شاییِ مِنَه کامل کِنیت. 3هیچ کاری نَه وَ ری غُت بییَن وِ غِدی نَکِنیت، بَلکَم بِی کوچِکنظمی بَقیَه نَه وَ خِتون بِختَر بِیونیت. 4هیچ کویَکی وَ ایشا تِنا وَ فکرِ نفعِ خُوش نَبو، بَلکَم وَ فکرِ بَقیَه هَم بو. 5هَمو فکرَ داشتَه بِیت که مسیح عیسی داشت:
6وِّ که هَرچَن بِی خدا هُمشکل بی،
دِدَسی نَچَسبی وَ برابریِ بِی خدا،
7بَلکَم خِشَه خالی کِه
شکلِ غلامی وَ خُوش گِرُت،
وَ شباهتِ آیَمَل دَراومَه.
8وِ وختی که وَ شکلِ بشر دَراومَه
خِشَه کوچِکنظم کِه
وِ تا وَ مُردَن،
حتی مُردَن وَ ری صلیب
مطیع وابی.
9پَ خدا وِّ نَه مَهلی بِلَند کِه
وِ نومی بالاتَر وَ تَمومِ نومَل وَش بَخشی،
10تا وَ نومِ عیسی هر زونیای خَل وابو،
مِنِه آسمون، ری زمین وِ زِرِ زمین،
11وِ هر زُوونی اعتراف کِنِه که عیسی مسیح "خداوندِه"،
سی جلالِ خِدِی بُو.
نور مِنِه دنیا
12پَ ای عَزیزَل، هَموطو که هَمیشَه مطیع بیئیتِه، ایسو، نَه تِنا مِنِه حضورِ مو، بلکَم مَهلی بیشتر مِنِه نَبییَنُم، نجاتِ خِتونَه بِی ترس و لرز وَ عمل بیاریت؛ 13سییِکِه خدایَه که سی خشنودیِ خُوش مِنِه ایشا کار ایکِنِه، هَم مِنِه ارادَه وِ هم مِنِه عمل.
14تَمومِ کارَلَه بی غُرَغُر وُ یِکِهوَدو اَنجوم بِئیت، 15تا بیعیب وِ سادَهدل، اولادَلِ بیعیبِ خدا بِیت، مابینِ نسلی فاسد وُ ناخَلَف که مابینِشون مِی نور مِنِه ای دنیا بِرچ ایزَنیت، 16کلامِ حیاتَه سِفت نِگَه کِنیت، تا مِنِه روزِ وَرگشتِ مسیح افتخار کِنُم که بیفِیدَه نَدویِسِمِه وُ وَ وِل زحمت نَکَشییِمِه. 17حتی اَر قرار بو خینِ مو مِی پیشکشی رِتَنی، رِتَه وابو وَ ری قربونیِ ایمونِتون که تقدیم ایابو، خوشحالُم وِ بِی تَمومِ ایشا شایی ایکِنُم. 18هَمیطو ایشا هَم بایِس خوشحال بِیت وِ بِی مِ شایی کِنیت.
تیموتائوس و اِپافرودیتوس
19مِنِه خداوند عیسی اِمید دارُم که تیموتائوسَ وَ هَمی زیئی بِسی کِنُم طِیتون، تا وَ حالِتون باخَوَر بوم وِ دلُم شای وابو. 20سییِکِه کسی نَه مِی وِّ نَیارُم که وَراسی وَ فکرِ راحَتیتون بو. 21همَه وَ دینِ نفعِ خِشونِن، نَه عیسی مسیح. 22امّا ایشا دونیت که تیموتائوس امتحانِ خِشَه پَس دایِه، که چِطو بِی مو، مِی کِری بِی بُوش، مِنِه کارِ انجیل خذمت کِردِه. 23پَ اِمید دارُم هَمیِکِه تکلیفُم روشن وابی، وِّ نَه بِسی کِنُم طِیتون؛ 24وِ مِنِه خداوند اِطمینون دارُم که خِمَم وَ هَمی زیئی ایام.
25مِ لازم دونُم اِپافرودیتوسَ بِسی کِنُم طِیتون، وِّ نَه که وَ یِه طرف کَکا وِ هُمکار وِ هُمرزمِ مِنِه، وُ وَ طرفِ دَ، بِسی کِردَه وِ خادِمِ ایشا سی اِتیاجَلِ مِنِه. 26سییِکِه وِّ مشتاقِ دییَنِ تَمومِ ایشا وابییِه وُ وَ بابتِ یِکِه اِشنُفتیت مریض وابییِه، پَریشون وابییِه. 27وَراسی که مریض بی وِ نِزیک بی بِمیرِه. امّا خدا وَش رحم کِه، وِ نَه تِنا وَ وُّ، بَلکَم وَ مِ هَم، تا نَکِنِه غِصَهای بیا وَ ری غِصَهیَلُم. 28پَ مِ سی بِسی کِردَنِش بیشتر شوق دارُم، تا وَ دِبارَه دییَنِش شایَمون وابِیت وِ شاید وَ هولوهراسِ مِ هَم کم وابو. 29پَ مِنِه خداوند، وِّ نَه بِی شاییِ تَموم قبول کِنیت وِ حرمتِ ایطو کَسَلی نَه داشتَه بِیت، 30سییِکِه وِّ سی کارِ مسیح نِزیک بی بِمیرِه، سی جبرانِ کَم خذمتی ایشا وَ مو، دَس وَ جونِ خُوش کَشی.
Currently Selected:
نامَه وَ کِلیسِی فیلیپی 2: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
