نامَه وَ کِلیسِی فیلیپی 3
3
صالحی وَ رَه ایمون وَ مسیح
1آخِرِ سَر، ای کَکایَلُم، مِنِه خداوند شایی کِنیت! سی مِ زحمتی نی ای چییَلَه سیتون بنویسُم بَلکَم سی امنیت ایشانِه. 2وَ او سَگَل دیری کِنیت! وَ او گَندَکارَل دیری کِنیت! وَ اونگَلی که سی خَتنَه جسمَه ایبِرِن دیری کِنیت! 3سییِکِه ختنَه وابییَه ایمایِیم، که بِی روحِ خدا پرستش ایکِنیم، وِ مِنِه مسیح عیسی افتخار ایکِنیم وِ تِکیمون نَه وَ جسمِه - 4هرچَن مِ خُوم دلیلی سی تِکی زَیَن وَ جسم دارُم.
اَر کسی دَ فکر ایکِنِه که دَلیلی سی تِکی زَیَن وَ جسم دارِه، مِ بیشتر: 5ختنَه وابییَه مِنِه روزِ هشتُم، وَ قومِ اسرائیل، وَ طِیفِی بنیامین، یِه عبرانی وَ دِیبُو عبرانی؛ وَ لَحاظِ شریعت، فَریسی؛ 6وَ لَحاظِ غیرت، آزاردهندۀ کلیسا؛ وَ لَحاظِ صالحیِ شریعتی، بیعیب. 7امّا هر چیئی که وَ نَفعُم بی، وِه نَه وَ خاطرِ مسیح ضرر دونِسُم. 8وَراسی، مِ همَه چی نَه وَ خاطرِ یِکِه اِشناختنِ خداوندُم مسیح عیسی وَ هر چیئی بالاترِه، ضرر دونُم. وَ خاطرِ وِّ همَه چی نَه وَ دَس دامِه وِ اونگَلَه اَشغال وَ حساب ایارُم تا نَفعُم مسیح بو 9وُ مِنِه وِّ جُسَه وابوم، نَه بِی صالحیِ خُوم که وَ شریعت ایایِه، بلکَم بِی صالحی که وَ رَه ایمون وَ مسیح وَ دَس ایایِه، صالحی وَ خدا که طبقِ ایمونِه - 10تا مسیح وِ قدرتِ زِندَه وابییَنِشَه بِشناسُم، وِ مِنِه عذابَلِش شریک وابوم، مِنِه مرگش مِی وِّ بوم، 11تا وَ هر طریق که وابییِه زندَه وابییَنِ وَ مُردِهیَلَه وَ دَس بیارُم.
تلاش سی رَسییَن وَ هدف
12نَه یِکِه تا ایسِه وَ دَسِش آوُردِمِه یا کامل وابییِمِه، بَلکَم تلاش ایکِنُم تا وِه نَه وَ دَس بیارُم، سییِکِه مسیح عیسی مِنَه این خُوش کِردِه. 13ای کَکایَل، گَمون نیکِنُم هَنی وِه نَه وَ دَس آوُردَه بوم؛ امّا یِه کار ایکِنُم، اوچیئی که مِنِه گذشتَه یَه وَ حوشم ایبَرُم وِ سی اوچیئی که نَهامِه تلاش ایکِنُم، 14سی رَسییَن وَ هدف تلاش ایکِنُم، تا جایزهای نَه وَ دَس بیارُم که خدا سی وِه مِنَه، مِنِه مسیح عیسی وَ بالا خُوندِه.
15مابِینِمون اونگَلی که بالِغِن، بایِس ایطو فکر کِنِن؛ وِ اَر مِنِه هر چیئی طوری دَ فکر ایکِنیت، وِه نَه هَم خدا سیتون آشکار ایکِنِه. 16بایِس وَ اوچیئی که رَسیئیمِه، طبقِ وِ رفتار کِنیم.
17ای کَکایَل، وَ مِ سرمشق بِگِریت، وِ حواسِتونَه وَ کَسَلی بِئیت که طبقِ چیئی که مِنِه ایما سراغ داریت، رفتار ایکِنِن. 18سییِکِه خیلییَل، که مِ دَرمورِدشون چَن دَفَه وَتون گُتِمِه وِ ایسِه هم حتی بِی خَرسَلُم ایگُم، مِی دشمَنَلِ صلیب مسیح رفتار ایکِنِن. 19عاقبتِ اونگَل نابودی یَه، خِدِی اونگَل کِمِشونِه وُ وَ چییَلِ نومِنَنگِشون افتخار ایکِنِن، وِ فکرِشون وَ چییَلِ زمینی یَه. 20امّا ایما اهلِ آسمونیم، وِ بِی شوق وُچه بَندیرِ نجات دهندَهمونیم، یعنی خداوند عیسی مسیح، 21وِّ که بَیَنِ پستِ ایما نَه عوض ایکِنِه تا مِی بَیَنِ جلال جُسِۀ وِّ بِیم، بِی قویَتی که وَش قدرت اییِه تا همَه چی نَه وَ امرِ خُوش دَرارِه.
Currently Selected:
نامَه وَ کِلیسِی فیلیپی 3: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
